koussoube-marc-lee_jos_text

Kǝ̀kàl-fwɛ̀lɛ̀ 17

¹ Nyǐ Manasɛ kwálá y cəl ré, è gə́ y'à wɔ́ Zhozefu byì-cɛ y yilə: Manasɛ byì-cɛ, Məciiri, Galaadɛ da mɔ́, nɔ Galaadɛ ǹdə́ Bashã ń gə́ yà ń wɔ́ kàndɔ búlə́ né shò kwã nɛ́ mɔ́ yilə. ² Nyǐ Manasɛ byǎ bɛ́ dwã bɛ́ cəl ré kɔn mɛrhɛ dwã ǹdə bə̀ jìsí: Abyəzɛɛrɛ byǎ bɛ́, Elɛkɛ byǎ bɛ́, Asərəyəə byǎ bɛ́, Shəshɛm byǎ bɛ́, Efɛɛrɛ byǎ bɛ́ ǹdə́ Shəmyəda byǎ bɛ́: Zhozefu byǐ Manasɛ byǎ bɛ́ byɛ̀bɛ́ bə̀ wɔ́ bala mɔ́, kɔn tó dwã ǹdə bə̀ jìsí. ³ Manasɛ lùl Məciiri. Məciiri zɛ̃̀ n lù Galaadɛ. Galaadɛ zɛ̃̀ n lù Efɛɛrɛ. Efɛɛrɛ zɛ̃̀ n lù Səlɔfaadɛ. Sə Sələfəyadɛ yə̀ bal-byǐ lùl yé; è wɔ́ kana-byǎ dúdú ń lùlə̀; bə̀ yilə né y'à wɔ́: Mala, Nəwa, Ogəla, Myələka ǹdə́ Tərəsa. ⁴ Bə̀myɛ́ mɔ́ zɛ̃̀ bə vò vwĩ̀-zwə́lnəEləyazaarɛ ǹdə́ Nuuni byǐ Zhozwe e súlí yé né cìnə́ bé sõ, bə wɔ̀ bɛ̀: «Cinu Yi pɔ nyí Muyiisi ni bə̀ ń pə nə́ba cəl nə́ nəbwá bɛ́ cəcəl wə!» Sə bə̀ pɔ bɛ cəl bə̀ da mɔ́ da-byǎ bɛ́ cəcəl w ǹdə́ Cinu Yi gə́ yà ń pɔ nyí ní. ⁵ Rə̀myɛ́ ce, Manasɛ nɔ cələ shíyə́, e súlí Galaadɛ tənà y ǹdə́ Bashã, Zhɔrdɛ̃ bwǐ y yi-púrhí sõ mó ne. ⁶ Manasɛ bə̀kwá bɛ́ zhə̀n ga nɔ cəl ń bala-byǎ bɛ́ cəcəl wə; sə Galaadɛ tənà y yàl Manasɛ byǎ bɛ́ dwã bɛ́ bə̀ cìní yə. ⁷ Manasɛ swɛ̃́ rɛ́ y'à zhì Asɛɛrɛ nɛ rə̀ vò Myəkəmyətatɛ, Shəshɛm yé né mó; rə y'à zhə̀l Yəmyin səta, Yəshəvi səta, Eyin-Tapɔwa nɛ́. ⁸ Manasɛ yà ń cǐ Tapɔwa tənà y, sə wɔ́ Efərəyim byǎ bɛ́ bə̀ y'à cǐ Tapɔwa kɔn k'â la Manasɛ swɛ̃́ rɛ́ səta. ⁹ Swɛ̃́ rɛ́ y'à só rə bə̀ Kana nə̀-gɔ̀lɔ̀ w nɛ, jə̀-jĩ́ sõ. Wɔ́ Efərəyim kwálá y è cǐ cɛmɛ nɛ́ nə̀myɛ́ Manasɛ cɛmɛ nɛ́ cəcəl wə. Manasɛ swɛ̃́ rɛ́ y'à ŋwɛ́nɛ́ nə̀-gɔ̀lɔ̀ w jə̀-gwã̀ sõ; rə̀ y'à gu yó Nə̀-fɔ̀lɔ̀ w nɛ. ¹⁰ Jə̀-jĩ́ sõ mó, y'à wɔ́ Efərəyim kwálá y è cǐ, jə̀-gwã̀ sõ mó y'à wɔ́ Manasɛ kwálá y è cǐ; Nə̀-fɔ̀lɔ̀ w y'à wɔ́ bə̀ swɛ̃́ rɛ́; sə sə̀ y'à zhí Asɛɛrɛ nɛ, jə̀-gwã̀ sõ, ǹdə́ Yəsakaarɛ nɛ, yi-púrhí sõ. ¹¹ Yəsakaarɛ ǹdə́ Asɛɛrɛ nɛ́, Manasɛ nɔ Bɛtɛ-Shəyã ǹd'ô gə́ cǐ má nyí rí, Yəbələyam nd'ô gə́ cǐ má nyí rí, Dɔɔrɛ ǹd'ô gə́ cǐ má nyí rí, Eyin-Dɔɔrɛ ǹd'ô gə́ cǐ má nyí rí, Taanakɛ ǹd'ô gə́ cǐ má nyí rí, Məjido ǹd'ô gə́ cǐ má nyí rí; Dɔɔrɛ cɔ w ò y'à wɔ jə́ y nyí rí wẽ́ mó y'à wɔ́ cɛmɛ nə̀tɔ̀ nyɔ̃̌ wá. ¹² Sə Manasɛ byǎ bɛ́ yə̀ ŋwɛ̀nɛ́ bə zwẽ cɛmɛ nɛ́ nə̀myɛ́ bə cìní yé; Kanaã lyì bí myɛ nyɛ́ɛ́ jàn bə jòm tənà y èmyɛ́ mɔ́ wẽ́. ¹³ Esərayɛl lyì byǎ bɛ́ jàn rɛ́ gə́ tú rə súlí yi ní, bə̀ ce Kanaã lyì bí n'ê twĩ̀ tũ̀-kùlə̀, sə bə yə̀ ŋwɛ̀nɛ́ bə jì bì yé. ¹⁴ Zhozefu byǎ bɛ́ zɛ̃̀ bə wɔ̀ Zhozwe ne: «Byè yil ǹ nə pɔ nə́ba cəl rə̀dù sásá, e jà nə́ wɔ́ dwí nánzhəzhɔ̌, bə̀ Cinu Yi cĩ́ bwəl nə́ yó kɔn b'e yí zà?» ¹⁵ Zhozwe zɛ̃̀ n wɔ̀ bɛ̀: «Ǹ gə wɔ́ dwí nánzhəzhɔ̌ e jà Efərəyim pyàr rɛ́ wɔ́ nánshəshɛ́ndɛ ǹ yilə, sə zɛ̃̀ ń vò tú w səta, Pərəzhitibá ǹdə́ Erəfəyitibá tənà y wẽ́, ń kà jàà ǹ cìcì yilə.» ¹⁶ Zhozefu byǎ bɛ́ zɛ̃̀ bə̀ wɔ̀: «Pyààrɛ́ nyí rí yír nə́ba yé; e súlí myɛ, Kanaã lyì bí bə̀ ŋwɛ́nɛ́ jə́ y nyí rí wẽ́ mó zhe lùr eshərh-vwə̃tur; èta myɛ ǹdə́ byɛ̀bɛ́ bə̀ ŋwɛ́nɛ́ Bɛtɛ-Shəyã ǹd'ô gə́ cǐ má nyí rí ga wẽ́ ǹdə́ byɛ̀bɛ́ bə̀ ŋwɛ́nɛ́ Zhəzərɛyɛl jə́ y nyí rí wẽ́ mó myɛ. ¹⁷ Rə̀myɛ́ yi ní, Zhozwe zɛ̃̀ n wɔ̀ Zhozefu dwí rí ni Efərəyim ǹdə́ Manasɛ nɛ: «Ǹ wɔ́ dwí tɛ̀bɛ́ rə̀ já, e jà ǹ zhe jàn; ǹ tá ǹ la cəl rə̀dù sásá jú yé. ¹⁸ Manasɛ yà ń cǐ Tapɔwa tənà y, sə wɔ́ Efərəyim byǎ bɛ́ bə̀ y'à cǐ Tapɔwa kɔn k'â la Manasɛ swɛ̃́ rɛ́ səta.