¹ Zhozefu byǎ bɛ́ cəl ré y'à ju kùr Zhɔrdɛ̃ bwǐ y Zheriko yala nɛ mɔ nɛ, Zheriko nàná bɛ́ yi-púrhí sõ. Wɔ́ èpòlò w kɔ̀bɔ́ ò zhì Zheriko né o vò Bətɛl pyɔ̀ w yó. ² Rə̀ y'à zhì Bətɛl nɛ́ rə lyɛ̃ rə twèlé rə yí Luuzi, rə tó Arikitibá swɛ̃́ rɛ́ səta Atərɔtɛ nɛ́, ³ rə só rə vò yi-zùr wə̀, Yəfələtitibá swɛ̃́ rɛ́ səta, rə yí Bɛtɛ-Orɔ̃ tənà y è wɔ Tɛ̃́-sõ mó ǹdə́ Gɛzɛɛrɛ, rə zɛ̃̀ rə vò rə gu yó Nə̀-fɔ̀lɔ̀ w nɛ. ⁴ Wɔ́ rə̀myɛ́ rə̀ yàl Zhozefu byǎ Manasɛ ǹdə́ Efərəyim cəl ré. ⁵ Nyǐ Efərəyim byǎ bɛ́ swɛ̃́ rɛ́ kɔn tó dwã ǹdə bə̀ jìsí: yi-púrhí wə, bə̀ cəl ré swɛ̃́ rɛ́ y'à wɔ́ Atərɔtɛ-Adaarɛ e m'e yí Bɛtɛ-Orɔ̃ tənà y è wɔ Dɛ̃̌-sõ mó. ⁶ Yi-zùr wə̀, swɛ̃́ rɛ́ y'à twèlé rə vò Myəkəmyətatɛ səta, jə̀-gwã̀ sõ rə zɛ̃̀ rə gwɛ̃́ kɔn zǎ yi-púrhí wə, Taanatɛ-Shilo nɛ́; rə tó Taanatɛ-Syilo kɔn zǎ yi-púrhí wə, rə lyɛ̃ rə zǎ Yanwa. ⁷ Rə zhì Yanwa nɛ́ rə só rə̀ bə̀ Atərɔtɛ ǹdə́ Naarata, rə lyɛ̃ rə yí Zheriko, rə lyɛ̃ rə twèlé rə yí Zhɔrdɛ̃ bwǐ y nɛ. ⁸ Rə̀ zhì Tapɔwa nɛ́ rə lyɛ̃ rə vò Kana nə̀-gɔ̀lɔ̀ w nɛ, yi-zùr w səta, rə zɛ̃̀ rə lyɛ̃ rə yí Nə̀-fɔ̀lɔ̀ wá. Wɔ́ rə̀myɛ́ rə̀ yàl Efərəyim kwálá y byǎ bɛ́ cəl ré kɔn tó dwã ǹdə bə̀ jìsí. ⁹ E súlí cɛmɛ nɛ́ nyɛ̀bɛ́ gakó ǹdə́ nə̀ cə-bwǎlsɛ́ bə̀ y'à cĩ́ kwã nɛ́ Efərəyim byǎ bɛ́ yilə, Manasɛ́ byǎ bɛ́ cəl ré wẽ́ mó. ¹⁰ Sə bə̀ yə̀ Kanaã lyì bí bə̀ y'à jě Gɛzɛɛrɛ nɛ́ mɔ́ jì yé. Kanaã lyì bí j'â jòm ǹdə́ Efərəyim kɔn b'e yí zà; sə bə ce Efərəyim lyì bí n'ê twĩ̀ tũ̀-kùlə̀ ǹdə yómə́ ne.