¹ Nyǐ kɔn dɛ̀bɛ́ nɔ, rə̀ wɔ́ bə̀ cəl Kanaã tənà y wẽ́; cəl ré tɛ̀bɛ́ vwĩ̀-zwə́lnə* Eləyazaarɛ ǹdə́ Nuuni byǐ Zhozwe ǹdə́ kwálsɛ́ jìsí cìnə́ pɔ bɛ. ² Bə̀ tó tántɛ́ɛ́ dɛnnɛ, bə tə̀ cəl bə pə kwálsɛ́ nə̀bɔ́ y èdù èdù gakó ne ǹdə́ kwálá y kə̀kàlà y nɛ ǹdə Cinu Yi gə́ yà ń pɔ nyí Muyiisi ni ní. ³ Bə̀ Muyiisi yà ń pɔ cəl kwálsɛ́ sə̀lyé y ǹdə́ kwálá y kə̀kàlà y sə̀ wɔ Zhɔrdɛ̃ bwǐ y yi-púrhí sõ mó ne, sə ń yà ń yə̀ cəl pɛ Levyitibá nɛ bə̀ dwã bɛ́ cəcəl w yé. ⁴ Zhozefu byǎ bɛ́ gə́ y'à wɔ́ kwálsɛ sə̀lyè mɔ́, Manasɛ ǹdə́ Efərəyim, ce bə zɛ̃̀ bə̀ yə̀ cə̀l rə̀dù ga myɛ pɛ Levyitibá nɛ, tənà y wẽ́ yé, è gə də̀ cɛmɛ nɛ́ nyɛ̀bɛ́ bə̀ la nə̀ wẽ́ jǒm mó dúdú e súlí jààsɛ́ nə̀ nyí ni mú, bə̀ vwàmá nɛ́ ǹdə́ bə̀ jɛ̃̀-kɔn rɛ́ yilə. ⁵ Esərayɛl lyì byǎ bɛ́ wɛ̀rhɛ́ ǹdə Cinu Yi gə́ yà ń pɔ nyí Muyiisi ni ní, bə̀ m'e tə̀ tənà yá. ⁶ Zhəda byǎ bɛ́ zɛ̃̀ bə b'è nə Zhozwe Jələgal nɛ́. Rə̀myɛ́ yi ní, Kənəzhitibá lò mə̀dù, Yəfũne byǐ Kalɛɛbɛ zɛ̃̀ n wɔ̀ mɔ̀: «Ǹ yě pamparɛ̃ɛ̃ kɔn dɛ̀bɛ́ Cinu Yi wə̀l Muyiisi Yi lò mó ne, àmyɛ́ ǹdə́ ǹmyɛ́ shò kwã nɛ́, Kədɛshɛ-Barənəya nɛ́. ⁷ Cinu Yi tùntùnnə Muyiisi twĩ̀ nì, a zhì Kədɛshɛ-Barənəya nɛ́ a vò a zə surhə a byɛ́lɛ́ tənà y, ǹd'â zhe byinə shí-ɛ̀na; sə à kwẽ̀ a b'à pul à wu a cĩ́ mu kɔn dɛ̀bɛ́ à y'à nɔ mɔ́. ⁸ À da-byǎ bɛ́ byɛ̀bɛ́ bə̀ y'à tó ne bə vò mó ce dwí rí wu gə kókó, s'àmyɛ́ y'à n'â tó Cinu à Yi rí ni ǹd'â wu gakó. ⁹ Dɛ̃ rɛ́ rə̀myɛ́ yùwə̀, Muyiisi dwĩ̀ nyí rí tɛ̀bɛ́ n wɔ̀: ‹Zhə̀n zhə̀nà, à n'â dwĩ̀ nyí bə̀ tənà y kɛ̀bɛ́ ǹ cĩ́ ǹ nà y è wẽ́ mó m'à yə̀ ǹmyɛ́ ǹdə́ ǹ byǎ bɛ́ cəl, twéé twéé yilə, ǹ gə́ tó Cinu à Yi rí ni ǹdə́ ǹ wu gakó mó yilə.› ¹⁰ Èlǎsɛ̃́, Cinu Yi ce à yírhə́ ŋwɛ́nɛ́ ǹdə ń gə́ byili ni, byinə shí-ɛ̀na ǹdə́ nə̀nu kwã nɛ́ ń gə́ zɔ̀m ǹdə́ Muyiisi ní. Rə̀myɛ́ yi ní ǹdə́ Esərayɛl lyì byǎ bɛ́ y'à gwẽ̌ ŋwɛ́nɛ́ gɔ-elũ èpòlò w wa è n'ê zhə̀lə̀. Sə nyǐ àmyɛ́ à zhe byinə shə́-lyɛlɛ ǹdə́ nə̀nu zà. ¹¹ Zà, à gwẽ̌ jɛ̀ ǹdə Muyiisi gə́ yà ń twĩ̀ nì yi ní ta. À zà zà jàn rɛ́ ǹdə́ jàn rɛ́ à y'à m'á zhə̀l búlə́ né jàà y w à k'â twí mú gwẽ̌ wɔ́ rə̀dù. ¹² Rə̀myɛ́ ce, pɛ̃ pyɔ̀ w kɔ̀bɔ́ Cinu Yi zɔ̀m ò zɔ̀mà, dɛ̃ rɛ́ rə̀myɛ́ yù w mú, bə̀ ǹ nyɛ̀ɛ̀ rə̀ yùwə̀ bə̀ Anəcitibá ǹdə́ cə-fwààlɛ̀ bə̀ lù byílsí dɛ̃̌dɛ̃̌ bə m'e kə́kɛ́lɛ́ nɛ mɔ́ ŋwɛ́nɛ́ gàà. Dədɛ̌nnɛ Cinu Yi mà n yə̀ nɛ́ ǹdə́ nɛ, rə̀myɛ́ ce à m'à ŋwɛ̀nɛ́ a zwẽ w a cìní ǹdə Cinu Yi gə́ yà ń bwəl nyí ní.» ¹³ Zhozwe cĩ́ bwəl* Yəfũne byǐ Kalɛɛbɛ yó n zɛ̃̀ n pɔ̃ Ebərɔ̃ cɔ w, ò la yə̀ ń cəl. ¹⁴ Wɔ́ rə̀myɛ́ rə̀ ce Yəfũne, Kənəzhitibá lò mó, byǐ Kalɛɛbɛ nɔ Ebərɔ̃ cɔ w ò wɔ́ ń dwí rí cəl kɔn b'e yí zà dɛ̃ rɛ́; wɔ́ ń gə́ tó Cinu Yi, Esərayɛl lyì byǎ bɛ́ Yi rí ni ǹdə́ ń wu gakó mó yilə. ¹⁵ Ebərɔ̃ cɔ w y'à jɛ̀rɛ̀ ò yil Cərəyatɛ-Arəba: Arəba yà ń wɔ́ lyì-fɔ̀lɔ̀ Anəcitibá gakó cəcəl wə. Rə̀myɛ́ kwã nɛ́ tənà y shǐrh ǹdə́ búlə́ né bú.