koussoube-marc-lee_jos_text

Kǝ̀kàl-fwɛ̀lɛ̀ 13

¹ Zhozwe yà ń jǐrh náncɛ, ń byinə né yó w y'à ju ní. Cinu Yi zɛ̃̀ n wɔ̀ mɔ: «Ǹ jǐrh náncɛ, e jà tənà y kɛ̀bɛ́ è n'ê yǎl zõ e cìní mú nyí rí rə̀ dàl mɔ́ gwẽ̌ já dɛ̃́dɛ̃́. ² Nyǐ tənà y nyí rí rə̀ gwẽ̌ dàl mɔ́: wɔ́ Shilisəti lyì bí ǹdə́ Gəshəritibá cɛmɛ nɛ́ gakó; ³ kɔn zhì Shəwɔrɛ nɛ́, Ezhibti tənà y yé y ne mó, e m'e vò jə̀-gwã̀ sõ, Ekərɔ̃ tənà y nɛ, bə̀ mə̌ sə bə nyǐ y ǹdə wɔ́ Kanaã lyì bí bə̀ cǐ y ta: wɔ́ pyǎ bɛ́ bə̀nu y byɛ̀bɛ́ bə̀ y'à n'ê nwɛ̀nɛ̀ Shilisəti lyì bí bə̀ jě gàà: Gaza pyɔ̌ mɔ́ ǹdə́ Ashədɔɔdɛ pyɔ̌ mɔ́ ǹdə́ Ashəkəlɔ̃ pyɔ̌ mɔ́ ǹdə́ Gaatɛ pyɔ̌ mɔ́, e súlí Ekərɔ̃ pyɔ̌ mɔ́. Avitibá súlí bə̀ jě gàà. ⁴ Kɔn zhì jə̀-jĩ́ sõ, e ce Kanaã lyì bí tənà y gakó ǹdə́ Məyara Sədɔ̃ lyì bí cǐ mú, e m'e yí Afɛka, e súlí e m'e yí Amɔrətibá swɛ̃́ rɛ́. ⁵ E ce Gəbələtibá tənà y ǹdə́ Lyəbã nyí rí púlə́púlə́ né, yi-púrhí w mú, kɔn zhì Baal-Gaadɛ nɛ́, Erəmɔ̃ pyɔ̀ w kùr wə̀ e m'e yí Ləbo-Amaatɛ. ⁶ Pyààrɛ́ lyì bí gakó, e zhì Lyəbã nɛ́ e m'e vò Myəsərəfɔtɛ-Məyim, ǹdə́ Sədɔ̃ lyì bí gakó. Àmyɛ́ cìcì m'à jì bì a zwẽ bə tənà y a pə nɛ. Ǹmyɛ́ tum rí wɔ́ ń tó tántɛ́ɛ́ dɛnnɛ ń tə̀ y ń pə nɛ dúdú, e cìní ǹd'â gə́ pɔ mɔ́ nyí ní. ⁷ Èlǎsɛ̃́, zɛ̃̀ ń tə̀ tənà y èmyɛ́ n pə kwálsɛ́ nə̀bɔ́ y ǹdə́ Manasɛ kwálá y kə̀kàlà y nɛ e yə̀ sə̀ cəl.» ⁸ Orɔbɛn ǹdə́ Gaadɛ kwálsɛ́ e súlí Manasɛ kwálá y kə̀kàlà y dõ mó lyì bí nɔ cəl-tənà y kɛ̀bɛ́ Muyiisi pɔ bɛ mɔ́ wẽ́, Zhɔrdɛ̃ bwǐ y èpákɛ̀, yí-púrhí wə, rə mɛrhɛ ǹdə Cinu Yi tùntùnnə Muyiisi gə́ yà ń pɔ bɛ nɛ́ mɔ́: ⁹ kɔn zhì Arɔwɛɛrɛ cɔ w ò ŋwɛ́nɛ́ Arənɔ̃ nə̀-gɔ̀lɔ̀ w nyí ni, e súlí, kɔn zhì cɔ w kɔ̀bɔ́ ò ŋwɛ́nɛ́ nə̀-gɔ̀lɔ̀ w cəcəl ré w mɔ, e ce Mɛdəba tə̀na y è wɔ́ jə́-è-zɛ̃̀-dɛ̃̌ nɛ́ e m'e yí Dibɔ̃ ¹⁰ E súlí Amɔrətibá pyɔ̌ Shəwɔɔnɛ, ń yà ń cǐ Eshəbɔ̃, cɛmɛ nɛ́ gakó e m'e yí Amɔ̃ byǎ bɛ́ swɛ̃́ rɛ́. ¹¹ E súlí Galaadɛ ǹdə́ Gəshuritibá ǹdə́ Myəkətitibá tənà y ǹdə́ Erəmɔ̃ pyɔ̀ w púlə́púlə́ ǹdə́ Bashã nyí rí púlə́púlə́ e m'e yí Saləka. ¹² E súlí Oge ń yà ń cǐ Ashətarɔtɛ ǹdə́ Edərəyi mɔ́, Erəfəyitibá byɛ̀bɛ́ bə̀ y'à gwẽ̌ dàl mɔ́ mə̀dù, tənà y púlə́púlə́, Bashã nyí rí wẽ́. Muyiisi yà ń ŋwɛ̀nɛ́ bɛ búlə́ né wẽ́ n zɛ̃̀ n jì bì n zwẽ bə̀ tənèsé n cìní. ¹³ Sə yə̀ Gəshuritibá ǹdə́ Myəkətitibá jì bə zwẽ bə̀ tənèsé bə cìní yé. Rèmyɛ́ rə ce Gəshuuri ǹdə́ Myəkətɛ mɛ̃ ǹdə́ Esərayɛl lyì byǎ bɛ́ kɔn b'e yí zà gwẽ̌. ¹⁴ E jà Muyiisi yə̀ cəl pɛ Levyi kwálá y nɛ yé: wɔ́ pansɛ shɛ̀bɛ́ bə̀ n'ê pɛ Cinu Yi ni, Esərayɛl lyì byǎ bɛ́ Yi rí ni mú, sə̀myɛ́ sə̀ wɔ́ è cəl ǹdə ń gə́ yà ń byili ní. ¹⁵ Muyiisi pə cəl Orɔbɛn kwálá y byǎ bɛ́ nɛ kɔn mɛrhɛ dwã ǹdə bə̀ jìsí. ¹⁶ Bə̀ nɔ tənà y kɛ̀bɛ́ è zhì Arɔwɛɛrɛ cɔ w ò ŋwɛ́nɛ́ Arənɔ̃ nə̀-gɔ̀lɔ̀ w nyí ni mú, ǹdə́ cɔ w kɔ̀bɔ́ ò ŋwɛ́nɛ́ nə̀-gɔ̀lɔ̀ w cəcəl ré w mó, e ce tənà y kɛ̀bɛ́ è wɔ́ jə́-è-zɛ̃̀-dɛ̃̌ nɛ́, Mɛdəba yala nɛ mɔ́ nɛ́. ¹⁷ E súlí Eshəbɔ̃ ǹd'ô cɛmɛ nɛ́ gakó nə̀ ŋwɛ́nɛ́ tənà y è wɔ́ jə́-è-zɛ̃̀-dɛ̃̌ w mɔ́: Dəbɔ̃ Bəmɔtɛ-Baal ǹdə́ Bɛtɛ-Baal-Mewɔ̃, ¹⁸ Yaasɛ ǹdə́ Kədəmɔtɛ ǹdə́ Myəfaatɛ, ¹⁹ Cərəyətəyim, Səbəma, Sɛrɛtɛ-Shaarɛ jə́ y yó gurə́ pyàr rɛ́ yó. ²⁰ Bɛtɛ-Pəwɔɔrɛ, Pyəsəga pyɔ̀ w nə̀bán rɛ́ ǹdə́ Bɛtɛ-Yəshəmɔtɛ, ²¹ tənà y è wɔ́ jə́-è-zɛ̃̀-dɛ̃̌ cɛmɛ nɛ́ gakó, Amɔrətibá pyɔ̌ Shəwɔɔnɛ ń yà ń cǐ Eshəbɔ̃, gə́ yà ń cǐ mú nyí rí gakó. Muyiisi yà ń ŋwɛ̀nɛ́ ńmyɛ̌ ǹdə́ Majanɛ yé né cìnə́ bé búlə́ né wẽ́: Evyi, Erəkɛm, Suuri, Uuri ǹdə́ Erəba, bə̀ y'à jě tənà y wẽ́, Shəwɔɔnɛ yà ń cǐ bi. ²² Bəwɔɔrɛ ń yà ń wɔ́ jə̀-pɛ́rɛ́ cə́bal mɔ́, byǐ Balamɛ, yàl lyì bí byɛ̀bɛ́ gu ǹdə́ búlə́-shìmì ní mú mə̀dù. ²³ Orɔbɛn byǎ bɛ́ swɛ̃́ rɛ́ y'à wɔ́ Zhɔrdɛ̃ bwǐ y ǹdə́ kɔn gə́ bwə́l gàà mɔ́ nyí rí. Wɔ́ rə̀myɛ́ rə̀ yàl Orɔbɛn byǎ bɛ́ cəl ré ǹdə́ nə̀ cɛmɛ nɛ́ ǹdə́ nə̀ cə-bwǎlsɛ́, kɔn ²⁴ Muyiisi pə cəl Gaadɛ kwálá y nɛ: n pə cəl Gaadɛ byǎ bɛ́ nɛ kɔn mɛrhɛ dwã ǹdə bə̀ jìsí. ²⁵ Bə̀ nɔ Yazɛɛrɛ tənà y, ǹdə́ Galaadɛ cɛmɛ nɛ́ gakó, e súlí Amɔ̃ byǎ bɛ́ tənà y kə̀kàlà kɔn b'e vò Arɔwɛɛrɛ cɔ w ò ŋwɛ́nɛ́ Araba yé y w mó. ²⁶ E súlí, kɔn zhì Eshəbɔ̃ è m'e yí Aramatɛ-Myəsəpɛ ǹdə́ Bətonyimi e súlí kɔn zhì Məyənəyimi e m'e yí Lɔdəvwaarɛ swɛ̃́ rɛ́; ²⁷ e súlí jə́ y nyí rí wẽ́: Bɛtɛ-Aramɛ, Bɛtɛ-Nəmyəra, Səkɔɔtɛ ǹdə́ Safɔ̃, Eshəbɔ̃ pyɔ̌ Shəwɔɔnɛ gə́ yà ń cǐ mú nyí rí rə̀ dàl mɔ́, e súlí Zhɔrdɛ̃ bwǐ y ǹdə́ kɔn gə́ bwə́l gàà mɔ́ nyí rí, e m'e yí Cənərɛtɛ bù-fwɛ̀lɛ̀ y yó-gurə́, Zhɔrdɛ̃ bwǐ y yi-púrhí sõ. ²⁸ Wɔ́ Gaadɛ byǎ bɛ́ cəl ré ǹdə́ rə̀ cɛmɛ nɛ́ ǹdə́ nə̀ cə-bwǎlsɛ́ èta, kɔn mɛrhɛ dwã ǹdə bə̀ jìsí. ²⁹ Muyiisi pə cəl Manasɛ kwálá y kə̀kàlà y nɛ́, n pə cəl Manasɛ kwálá y kə̀kàlà y byǎ bɛ́ nɛ kɔn mɛrhɛ dwã ǹdə bə̀ jìsí. ³⁰ Bə̀ tənà y zhì Məyənəyimi ní, e ce Bashã nyí rí púlə́púlə́ né, Bashã pyɔ̌ Oge gə́ yà ń cǐ mú nyí rí gakó, e súlí Yəyiiri kwə̀ə́rhé gakó rə̀ wɔ́ cɛmɛ shə́-shə̀ldù Bashã nyí rí wẽ́. ³¹ Galaadɛ tənà y kə̀kàlà, e súlí Ashətarɔtɛ ǹdə́ Edərəyi Oge gə́ yà ń cǐ mú nyí rí cɛmɛ nɛ́, Bashã nyí rí wẽ́, yàl Manasɛ byǐ Məciiri byǎ bɛ́ cəl, è n'ê yǎl è wɔ̀ Məciiri byǎ bɛ́ kə̀kàlà yá, kɔn mɛrhɛ dwã ǹdə bə̀ jìsí. ³² Wɔ́ cəl ré rə̀myɛ́ Muyiisi zhì Mɔwaabɛ jə́ y wə, Zhɔrdɛ̃ bwǐ y yi-púrhí sõ, kɔn mɛrhɛ dwã ǹdə́ Zheriko, n tə̀ mɔ́. ³³ Sə Muyiisi yə̀ cəl pɛ Levyi kwálá y nɛ yé: wɔ́ Cinu Yi, Esərayɛl lyì byǎ bɛ́ Yi rí ń wɔ́ è cəl ré ǹdə ń gə́ yà ń byili ri bi ní.