¹ Ǎ ! À yó w gə y’à sú ǹdə́ nɛ̃̌, à yírhə́ né gə y’à wɔ́ yé-nàná nə̀-bùlì, à y’à m’a n’â kúrh à dwí rí bə̀kɔ́ mɔ́ cùùrí ni, cəcɛ̃ ǹdə́ nə̀nyɛ́nɛ́ gakó ! ² Ǎ ! À gə y’à zhe sɔ́m-zhə̀lnə̀ zulə́ jàà gɔ-elũ èpòlò wə, à y’à m’a yẽ̌ à dwí rí ni, a vò kwã nɛ́ gaga ! bə̀ nyǐ bə̀ gakó wɔ́ nə̀fwə̀ə́le, yǔyǔ cìnə́ bə̀ wɔ dwã yó. ³ Bə̀ zhe mə̀jə̀ə̀lé ǹdə wɔ́ twã è vwɛ̃ ta, sə wɔ́ kɔma bə̀ n’ê tɛ ; è də̀ zhə̀n rə̀ ce bə̀ zhe jàn tənà y w yé ; bə̀ wɔ́ lwɛlɛ yó bə̀ j’â ŋwɛ́nɛ́ gaga bə̀ j’â n’ê twĩ̀, sə bə̀ yə̀l à pár yé, wɔ́ Bə-zhɔ-zhe ń zɔ̀m. ⁴ Bə̀ lò gakó zhǐ ń nə́ yìlì ń dɔwa, sə lò lò bə̀ká n zə ń da-byǐ zhə̀n yé, nyǐ da-byǐ gakó nə́ ń pyà ń dõ yǔr, dɔwa gakó nə́ ń tó dɛ̃̌ ǹdə́ gàrmɔ dúdú. ⁵ Bə̀ n’ê yǔr dwã, bə̀ t’â zɔ̀m zhə̀n gaga yé ; bə̀ n’ê zal bə̀ mə̀jə̀ə̀lé bə̀ m’ê gòm kɔma, bə̀ n’ê pyà dwã yé-shò lwar, mùnì ga bə wɛ̀rhɛ́ lwɛlɛ dwã nɛ. ⁶ Ǹ jàà y ŋwɛ́nɛ́ yǔyǔ jàà wa ; wɔ́ yǔyǔ mú è ce bə̀ bə̀ shɛ̀ à pár lwar mɔ́ yò yé, wɔ́ Bə-zhɔ-zhe ń zɔ̀m. ⁷ Wɔ́ rə̀myɛ́ è ce, Bə-zhɔ-zhe mó ń cǐ kɔn gakó mó zɔ̀m n wɔ̀ : Nyǐ à m’a dwẽ́ be, a lwar bə̀ gə́ wɔ́ nɛ́. Bə̀ è nə wɔ́ etər à nə m’a wɛ̀rhɛ́ nɛ́ à dwí rí bə̀kɔ́ mɔ́ yilə ? ⁸ À dwí rí mə̀jòlò w nyɛ̌ ǹdə cam tɛ̀bɛ́ rə̀ n’ê gwi lò ta, rə̀ lyì wɔ́ kɔma dúdú bə̀ n’ê gòmə̀ ; bə̀ n’ê zɔ̀m yə̀-zùlə́ yò bə̀ nyú w ǹdə́ bə̀ dõ, è jà bə̀ wu w wẽ́ mó, wɔ́ pɔ̀mrɛ bə̀ pàmà. ⁹ À nə m’a yẽ̌ be, à t’â la pɛ còrhò-tum pɔ wẽ̀ ré rə̀myɛ́ mɔ́ yilə, a cẽ à jim cṹ tənà y kɛ̀bɛ́ dwí rí yó cṹ ? wɔ́ Bə-zhɔ-zhe ń zɔ̀m rə̀myɛ́. ¹⁰ À n’â yǎl a zhì pyàr rɛ́ yó a kúrh a wɔ́wɔ́lɛ́, a zhì gɔ-elũ èpòlò w w a nún wu-zhìlù nwə̃́ ; bə̀ nyǐ rə̀ jú myǐn, lòlò kə́ ń tá ń tó gàà mɔ́ ń lyɛ̃ yé, lò kə́ ń tá ń nyɛ̀ɛ̀ vwàmá cələ gàà mɔ́ yé, kúmsí ǹdə́ vwàmá nɛ́ dùr rə jé tɛ̃́. ¹¹ À m’a ce Zhərəzalɛm cɔ w jǐrh nə́kulə nə̀ pyě dwã yó púl, gɔ-kǔlsi pwə́lə́ jàà, a ce Zhidə cɛmɛ nɛ́ jǐrh gɔ-elũ èpòlò numbyíní də́-byǐ tɛ̀nɛ́ nə́ wẽ́ yé. ¹² Wɔ́ yẽ̀ lò mɔ̀bɔ́ ń zhe surhə, ń yě wẽ̀ ré rə̀myɛ́ mɔ́ kùr mú ná-cí ŋwɛ́nɛ́ ? Lò mɔ̀bɔ́ Bə-zhɔ-zhe gə zɔ̀m ǹdə́ mɔ mɔ́, sə rə̀-ná-cí mú bwə̀l ré n byili rə̀ kùrə̀ ! Wɔ́ bə̀kɔ́n yil tənà y cɔ̀, e jí myǐn è zhǐ ǹdə gɔ-elũ èpòlò ta, lò lò kə́ ń tá ń tó gàà mɔ́ ń lyɛ̃ mɔ́ ? ¹³ Bə-zhɔ-zhe zɔ̀m n wɔ̀ : Wɔ́ bə̀ gə́ yẽ̌ à nyə́ né, à y’à cĩ́ bə̀ yé né, bə̀ yə̀ à zɔ̀mɛ̀ rɛ́ cili gaga, bə̀ yə̀ wɛ̀rhɛ́ ǹdə rə̀ gə́ n’ê byili ní mú yilə ; ¹⁴ Wɔ́ bə̀ gə́ tó bə̀ wun bùlə̀ né ne, bə̀ dùr Baalɛ kwã nɛ́, ǹdə bə̀ dabá gə̀ cèrhè be re né mú ta mɔ́ yilə. ¹⁵ Wɔ́ rə̀myɛ́ yilə, Bə-zhɔ-zhe mó ń cǐ kɔn gakó mó, Esərayɛl Yi rí wòwə̀ : Nyǐ à m’a pə vɔ cɛ̀ɛ́ dwí rí tɛ̀bɛ́ nɛ rə dɔ̃̀, a pə rɛ nɛ̃̌ mɔ̀bɔ́ bə̀ co cə́m mɔ̀bɔ́ mə̀ n’ê gwi lò né rə nyɔ̀. ¹⁶ À m’a ce bə dùr bə làà dɛ̃̌ tənèrh wẽ́, tənèrh shɛ̀bɛ́ bə̀myɛ́ ráá bə̀ dabá yə̀ sə pár lwar wẽ́, a zɛ̃̀ a ce búlə́ shú twèlé be, o bú ǹdə́ bɛ kɔn m’e yí a gu bə̀ gakó a zhɛ̀. ¹⁷ Bə-zhɔ-zhe mó ń cǐ kɔn gakó mó zɔ̀m n wɔ̀ : Zɛ̃̀-na á pyà cùùri ni kúrh kana bɛ́, á zə á m’á bà ! ¹⁸ Bə̀ bə ce jàn nɛ́ làlà bə bà, bə nún wu-zhùlù cǐl nwə̃́ nə́ yó ! Nə́ kúrh nə́ yə́-nàná bobwere tɛ̃́, nə̀ nɛ̃̌ dùr nə́ yə́-gwárá wa ! ¹⁹ Bə̀ nyǐ wu-zhùlù búbwéése zɛ̃̀ tɛ̃́ Səyɔ̃ nɛ́ : Sə wɔ́ bə̀kɔ́n yò èta ! Nyǐ nə́ yò zhìlì ! cìzhìl pú nə́ba ! kɔn wɔ́ nyɔ́ɔ́ sə nə́ du nə́ yẽ̌ tənà y nɛ ! Bə̀ bə̀ wǔr nə́ jìsí bə ló tɛ̃́ ! ²⁰ Kana, cili-nə Bə-zhɔ-zhe zɔ̀mɛ̀ rɛ́, púr-nə á zhã̌ á sú zɔ̀mɛ̀ rɛ́ ń nə́ ń púr ń nyú w mú kùr cɛ̀nɛ̀ ! Cèrhè-nə wu-zhùlù cǐl kúrh nwíísí á bə̀kwá bɛ́ nɛ, cèrhè-nə wu-zhùlù nwíísí dwã nɛ ! ²¹ Bə̀ nyǐ cu mú zɛ̃̀ mə̀ tó nə́ jìsí cə̀-zhã̌ nɛ́ nɛ mə jì, mə̀ zù nə́ pyɔ̌ kǎlsɛ́ wẽ́ ; mə̀ n’ê gwirhi bə̀sɔ́ná bɛ́ sɔ́msɛ́ yó, mə̀ n’ê gwirhi èbwá-dàlá bɛ́ dwã-jəə́lé jààsɛ́ wa. ²² Bwə̌l ń wɔ̀ : Nyǐ Bə-zhɔ-zhe zɔ̀m n wɔ̀ : Bə̀ nyǐ lyì bí cùùrí m’a ló tɛ̃́ cɛsɛ́ wẽ́ ǹdə pùlú ta, rə ló tɛ̃́ ǹdə wɔ́ jíjí ywẽ́ jə̀rnə jə̀r rə ló tɛ̃́ bə̀ lyɛ̃ bə yẽ̌ re bə̀ kwã nɛ́, lò lò tá ń pwà rɛ mɔ́ ta. ²³ Bə-zhɔ-zhe zɔ̀m n wɔ̀ : Bə̀ surhə cə́bal bə̀ká n zhẽ̌ ń cìn dɛ̃̌ ń surhə né yil yé, bə̀ jàn cə́bal bə̀ká n zhẽ̌ ń cìn dɛ̃̌ ń jàn rɛ́ yil yé, bə̀ nə̀cɛ̀m-bal bə̀ká n zhẽ̌ ń cìn dɛ̃̌ ń nə̀cɛ̀ndɛ́ yil yé. ²⁴ Sə lò mɔ̀bɔ́ n gə nə́ ń yǎl n zhẽ̌ ń cìn dɛ̃̌ ń gə́ nɔ lárma, n mə lwar á pár mɔ́ yilə, ń gə́ lwar b’à wɔ́ Bə-zhɔ-zhe, à n’â twĩ̀ wu-bɔ̀nɔ̀ tumə, à n’â twĩ̀ kɔn tɛ̀bɛ́ rə̀ mǎ, à n’a twĩ̀ cángá tumə né cɛ y yó mó yilə ; wɔ́ rə̀myɛ́ numbyíní gə n’ê wɛ̀rhɛ́ mɔ́, rə̀ n’ê swí à yírhə́. ²⁵ Nyǐ dwã ŋwɛ́nɛ́ nə̀ bànà, wɔ́ Zhə-zhɔ-zhe ń zɔ̀m, dwã nɛ́ nə̀myɛ́ mɔ́ wẽ́, à m’a pə còrhò-tum lyì bí byɛ̀bɛ́ gakó bə̀ yə̀ gòm bə̀ wun ní wẽ́ mó gakó ne, ²⁶ è wɔ́ Ezhibti, Zhidə, Edɔm, Amɔ̃ byǎ bɛ́, Mɔwabɛ, lyì bí byɛ̀bɛ́ gakó bə̀ jě gɔ-elũ èpòlò w wẽ́, bə̀ n’ê fɔ̀n bə̀ pə̀pésé tama nɛ́ mɔ́ ; bə̀ nyǐ tənèsé lyì bí gakó yə̀ gòm yé, sə Esərayɛl kɛ̀lɛ́ y lyì bí wɔ́ bə̀ wun ní bə̀ yə̀ gòm yé.