¹ Esərayɛl kɛ̀lɛ́ lyì, cili-nə Bə-zhɔ-zhe zɔ̀mɛ̀ rɛ́ ń la zɔ̀m ǹd’ába mɔ́ ! ² Nyǐ Bə-zhɔ-zhe nə́ ń zɔ̀m ń zhe : À bə̀k’á kwè tənèsé dwã bɛ́ lyì bí nà á wɛ̀rhɛ́ ǹdə bə̀ ta yé ! S’á bə̀k’á dùr myaarhɛ́ tɛ̀bɛ́ rə̀ n’ê wɛ̀rhɛ́ dɛ̃̌ yi w mú ywẽ yé, tənèsé dwã bɛ́ lyì gə́ n’ê dùr rə̀ ywẽ yil mú yil yé. ³ Bə̀ dwə́ né dwã bɛ́ lùl-epúrsí wɔ́ wẽ̀ tɛ̀bɛ́ rə̀ bə kùr zhe yé. Nyǐ wɔ́ dɔ̌ bə̀ y’à vò bə kà sɔ̀lɔ̀ wa ; də-shə̀lnə zə ń jɛ̃̀ sə̀ w ǹdə́ dwèlé ; ⁴ bə̀ kwɛrhɛ wa, bə̀ zə sə̀byì-kùlì ǹdə́ sánə́má bə m’e zùrhì w náàcɛ́nɛ́, bə zɛ̃̀ bə kwè dàdǎbsɛ bə cĩ́ ní bə zə mə̀rə̀tó bə pəpa, mùnì ga o zhì dɛ̃̌ ò bə̀k’a zhízhǐ yé. ⁵ Yə né nə̀myɛ́ mɔ́ nyɛ̌ ǹdə wɔ́ dǎr yə bə̀ shə̀l nə̀ ŋwɛ́nɛ́ dwã yó tá, nə̀ t’â zɔ̀m gaga yé ; nə̀ wàr nə̀ n’ê zhə̀l yé, wɔ́ kwé bə̀ y’a kwè ne bə zhĩ. Bə̀ k’á dùr nə̀ ywẽ yé, bə̀ nə̀ yə̀l lwɛlɛ nə̀ la wɔ̀rhɔ́, nə̀ wàr cɛ̀nɛ̀ myɛ nə̀ la wɔ̀rhɔ́ yé. ⁶ Ǎ Bə-zhɔ-zhe, lò lò tɛ̀nɛ́ ń mà n nyɛrhɛ ǹmyɛ́ yé ! Ǹ wɔ́ nánfɔ̀lɔ̀, ǹ yil ré wɔ́ nánfɔ̀lɔ̀ ǹ ŋwɔ̀nɔ́ w jàn rɛ́ yilə. ⁷ Tənèrh gakó pyɔ̌, wɔ́ mɔ̌ lò ń ŋwɛ́nɛ́ ń mà n cẽ mó nyám mɔ́ ? Nyǐ wɔ́ ǹmyɛ́ ǹ mə̌ ǹdə́ nyɔ̀mɔ̀ ; bə̀ nyǐ surhə cìnə́ bé tənèsé gakó wẽ́ mó, ǹdə́ pyə̀-tənèsé gakó wẽ́ mú, lò lò tɛ̀nɛ́ ń nyɛrhɛ ǹmyɛ́ yé. ⁸ Bə̀ nyǐ bə̀ gakó mù dwã nɛ́ bə̀ wɔ́ èkwə̀r, bə̀ surhə zhe cìnə́ ; bə̀ lwar mɔ́ wɔ́ lwar mə̀ bə kùr zhe yé, mə̀ wɔ́ dɔ̌ ! ⁹ Wɔ́ Tərəshiisi ní bə̀ n’ê zal sə̀byì-kùlì y bə̀ m’ê shí ní, wɔ́ Ufaazɛ nɛ́ bə̀ n’ê zal sánə́má mɔ́ bə̀ m’ê shí ní, bə pə lò mɔ̀bɔ́ ń nə́ ń yə̌l mó ne n yə̌l, yǎl-bal zɛ̃̀ n zə ń jɛ̃̀ n zə rɛ n mə n twĩ̀ tum rí ; bə kwè gã̀-èpɔ̀ɔ̀lɛ ǹdə́ gã̀-shɛ̀n bə̀ zù yə né nə̀myɛ́ mɔ́, yə né nə̀myɛ́ mɔ́ gakó wɔ́ lyì byɛ̀bɛ́ bə̀ yě bə̀ jɛ̃̀-tum mú bə̀ wɛ̀rhɛ́ nɛ. ¹⁰ Sə Bə-zhɔ-zhe wɔ́ Yi rí páá mɔ́, rə̀ wɔ́ Yi nã́nyì, rə̀ wɔ́ pyɔ̌ byinə nə̀ bə zhɔ̌ zhe yé ; rə̀ lyim gə zɛ̃̀ cɛ y n’ê zhízhǐ rə̀ yé né, tənèsé wàr rə̀ lyim rí nánfɔ̀lɔ̀ yé né sə̀ n’ê zhì ní yé. ¹¹ Rə̀myɛ́ yilə, wál-na bɛ : Bə̀ nyǐ yə né nyɛ̀bɛ́ nə̀ yə̀ dɛ̃̌ ǹdə́ cɛ y wɛ̀rhɛ́ mɔ́, nə̀ m’a jé tɛ̃́ cɛ y yó ǹdə́ cɛ y kùr w mú ga. ¹² Bə̀ nyǐ wɔ́ Yi rə̀ zɔ rə̀ jàn rɛ́ rə wɛ̀rhɛ́ cɛ yá, rə̀ zə rə surhə né rə cĩ́ lũ w kùr rí tɛ̃́, rə lɛ̀lɛ̀ dɛ̃̌ yə né dɛ̃̌ ǹdə́ rə̀ lárma mɔ́. ¹³ Rə̀ gə dom rə̀ cəl ré, nàná bɛ́ n’ê zhì dɛ̃̌ yi w bə̀ ce sɔ̀ nánfɔ̀lɔ̀ ; rə ce bə́ban shí lũ kùr w rə du, rə ce dwà lyə́lyɔ̌ e nyɔ̀, rə ce zho shí ò jàà w o zɛ̃̀ o du ò n’ô ce. ¹⁴ Rə̀myɛ́ yi ní, numbyíní gakó jǐrh námməyiri è lwar mɔ́ yírh wə, cìzhìl zɛ̃̀ rə̀ zhe yǎl-bal ń wẽ̀ ré ń zùrhì mú yírh wə ; bə̀ nyǐ yə né nə̀myɛ́ mɔ́ wɔ́ yə nã́-kɔ̀mrɛ, nə̀ bə shíshə̀rhə́ zhe gaga yé. ¹⁵ Nə̀ wɔ́ kɔn tɛ̀bɛ́ rə̀ bə kùr zhe yé, numbyíní jə́jɔ̀rɔ́ tum ; còrhò-tum rí gə tú dɛ̃ nə̀ gakó m’a jé tɛ̃́. ¹⁶ Sə lò mó mɔ̀bɔ́ ń wɔ́ Zhakɔbə cəl kɔn rɛ́ mɔ́ də̀ ǹdə wẽ̀ ré rə̀myɛ́ mɔ́ ta yé ; bə̀ wɔ́ ńmyɛ̌ ń wɛ̀rhɛ́ kɔn gakó, sə wɔ́ Esərayɛl ń wɔ́ ń cəl kwálá yá. Wɔ́ Bə-zhɔ-zhe mó ń cǐ kɔn gakó mó, è wɔ́ ń yil ré. ¹⁷ Ǹmyɛ́ mɔ̀bɔ́ ǹ ŋwɛ́nɛ́ zúzúnú w wẽ́ mó, zɛ̃̀ tɛ̃́ ń kwè ǹ kɔn tɛ̀bɛ́ ǹ zhe tənà y w mɔ́ ń mə́ lyɛ̃ ! ¹⁸ Nyǐ Bə-zhɔ-zhe nə́ ń zɔ̀m ń zhe : Nyǐ èlǎsɛ̃́ mɔ́, à la tənà y lyì bí vǔr a dul yé né gaga, a zə bɛ bə zhì, mùnì ga bə̀ zwə̀ bé cĩ́ jɛ̃̀ bə̀ yó. ¹⁹ Nyǐ zwini zhe ne yòò ! À kú cù kókó ! À nyəlɛ rɛ́ yin rí də̀ zhɔ̌ kɔn yé ! Sə à wə̀lə̀ : nyǐ wɔ́ zwini rə̀ yú ni, sə à m’a pyɛ́nɛ́ a zhĩ ri ! ²⁰ À kòrhó w wǔr o ló tɛ̃́, à nyínsí gakó sɔ́wá, à byǎ bɛ́ dùr, bə̀ k’ê tɛ̀nɛ́ yé ; à k’â bə lò lò zhe ń kə́ ń la à kòrhó w kɔrhɔ n pú, n lɛ̀lɛ̀ à kàmə̀jɛ̃̀sɛ́ ò yó n pɛ̃ yé, ²¹ Dwí rí kálna bɛ́ yàl námməyuuri, bə̀ yə̀ Bə-zhɔ-zhe pyà yé ; wɔ́ rə̀myɛ́ è ce bə̀ kaka yə̀ ŋwɛ̀nɛ́ e zwẽ nyí gaga yé, wɔ́ rə̀myɛ́ è ce bə̀ dwí rí gakó làà tɛ̃́ bə̀ yé né. ²² Nyǐ bə̀ zɛ̃̀ bə̀ nyɛ̌ zɔ̀mà nə̀ n’ê ŋwúŋwúní tɛ̃́, sɔ̀ ò shí lũ jə̀-gwã sõ tənà y w ò n’ô ce ò bànà, ò bàn Zhidə cɛmɛ nɛ́ cɔ̌ nə pyẽ̀ jì-bwə̀r, nə jǐrh gɔ-kǔlsí pwə́lə́ jààsɛ. ²³ Ǎ Bə-zhɔ-zhe ! à yě re, à yě bə̀ numbyíní b’e sɔ́má zhəl jàn zhe yé ; è də̀ numbyíní ǹdə́ è sə̀pwà jàn è m’ê zal è cìn è zhə̀l yé. ²⁴ Ǎ Bə-zhɔ-zhe ! Pɛ̃ còrhò-tum, sə̀ mə tó ǹdə kɔn gə́ mə̌ nɛ́, sə ǹ bə̀ká ń pɛ̃ còrhò-tum ǹdə́ ǹ lyim yé, mùnì ǹ bə̀ká ń ce a jé tɛ̃́ lũ yó yé. ²⁵ Ló ǹ lyim rí nánfɔ̀lɔ̀ w tənèsé lyì bí byɛ̀bɛ́ bə̀ yə̀l ǹ párá, ǹdə́ dwə́ né nyɛ̀bɛ́ nə̀ lyì bí t’â byẽ̀ ǹ yil ré mó yó ! Bə̀ bə̀ n’ê dɔ̀m Zhakɔbɛ bə̀ zhəzhɛrɛ, bə̀ n’ê ji mu myǐn, bə̀ n’ê cɔ̀ ń jàà yá.