¹ Nyǐ zɔ̀mà nɛ́ nyɛ̀bɛ́ Bə-zhɔ-zhe zɔ̀m n byili Zheremyi ni mú ; ń wə̀l mo : ² Cili-nə dɔbrɛ́ tɛ̀bɛ́ zɔ̀mà nɛ́, s’á zɔ̀m nɛ á byili Zhakɔɔbɛ lyì bí ǹdə́ Zhərəzalɛm lyì bí ni ! ³ Zɔ̌m-na ǹdə́ bɛ a wɔ̀ : Nyǐ Bə-zhɔ-zhe, Esərayɛl Yi rí n’ê zɔ̀m rə̀ zhe : Bwəl námməlwɛ̀lɛ́ m’a jòm lò mɔ̀bɔ́ ń tá ń cili dɔbrɛ́ tɛ̀bɛ́ zɔ̀mà nɛ́ mɔ́ yó, ⁴ Dɔbrɛ́ zɔ̀mà nyɛ̀bɛ́ à kɛ̃ a pə á dabá nɛ́, dɛ̃ rɛ́ tɛ̀bɛ́ à vùr be Ezhibti tənà y wa, à vùr be gɔ́rɔ́ w bə̀ ju myǐn ò wẽ́ bə̀ m’ê yə̌l cɔ̀bɔ́ mɔ́ wẽ́ mó yó né, à y’à zhe : Cili-nə à zɔ̀mà nɛ́, s’á wɛ̀rhɛ́ kɔn tɛ̀bɛ́ gakó à pɔ ába rə̀ nyí mú ; èta á m’ǎ yə̀ à dwí, sə àmyɛ m’a yə̀ á Yi, ⁵ à m’a pyìrh nyí rí tɛ̀bɛ́ à bwəl á dabá nɛ, b’à m’a pə bɛ tənà kɛ̀bɛ́ yil ǹdə́ tùr n’ê dùr tɛ̃́ è wẽ́, ǹdə á yírhə́ gə́ nə nɛ́ zà zà mɔ́ nɛ́ ta. À lyár Bə-zhɔ-zhe a wɔ̀ : Bə-zhɔ-zhe, Àmɛ́n ! ⁶ Bə-zhɔ-zhe wò ne : Zɛ̃̀ ń bwə̀l zɔ̀mà nɛ́ nə̀myɛ́ mɔ́ gakó ń byili Zhidə cɛmɛ nɛ́ wẽ́ ǹdə́ Zhərəzalɛm sɔ́msɛ́ yó, ǹ zhe : Cili-nə dɔbrɛ́ zɔ̀mà nɛ́ nyɛ̀bɛ́, s’á wɛ̀rhɛ́ ǹdə nə̀ gə́ n’ê byili ní ! ⁷ À ju kùr a byili ni á dabá, dɛ̃ rɛ́ tɛ̀bɛ́ à ce bə du Ezhibti ni mú yi ní ga kɔn m’e yí zà, nəkɔkɔ́lɛ́ gakó à y’à n’â byili ni bi, à zhe : Cili-nə à zɔ̀mɛ̀ rɛ́ ! ⁸ Sə bə̀ yə̀ cili yé, bə̀ yə̀ bə̀ zhɛ̃̌ púr bə cili yé, lò gakó ká n tó ń wu bùlə̀ námməlwɛ̀lɛ́ y kùrə̀ ; wɔ́ rə̀myɛ́ è ce, a zɛ̃̀ a pyìrh dɔbrɛ́ zɔ̀mà nɛ́ nyɛ̀bɛ́ à y’à pɔ bɛ nə́ nyí bə̀ bə̀ wɛ̀rhɛ́ ǹdə nə́ gə́ n’ê byili ní mú, bə̀ zɛ̃̀ bə cẽ nə̀ wɔ́rhɔ́ yò gaga mɔ́, yò w bə̀ yó. ⁹ Bə-zhɔ-zhe zɛ̃̀ n wɔ̀ nɛ : Nyǐ Zhidə lyì bí ǹdə́ Zhərəzalɛm cɛmɛ lyì bí co dwã yó bə cẽ à zɔ̀mà nɛ́ zõ yò. ¹⁰ Bə̀ k’a kwɛ̃̀ bə zù bə̀ dabá nã́yə́ə́ bé lwɛlɛ rɛ́ wɔ̀rhɔ́ mɔ́ wẽ́, bə̀myɛ́ byɛ̀bɛ́ bə̀ cẽ à zɔ̀mà nɛ́ culu yò, bə dùr yə dwã kwã nɛ́, bə cèrhé ne mó. Nyǐ Esərayɛl lyì bí ǹdə́ Zhidə lyì bí cɔ̀ à dɔbrɛ́, à y’à zɔ ǹdə́ bə̀ dabá mɔ́. ¹¹ Wɔ́ rə̀myɛ́ yil Bə-zhɔ-zhe wòwə̀ : Nyǐ à m’a ce zwini b’e jòm bə̀ yó, zwini tɛ̀bɛ́ bə̀ wàr bə̀ cìn bə̀ la vwǎrh rə̀ wẽ́ mó. Bə̀ m’a zɛ̃̀ bə̀ n’ê búbwéé bə̀ ce ne, sə à t’â la bə sõ culu yé. ¹² Rəmyɛ́ yi ní, Zhidə lyì bí ǹdə́ Zhərəzalɛm cɛmɛ nɛ́ lyì bí m’a vò yə né nyɛ̀bɛ́ bə̀ n’ê byẽ̀ bə̀ ce ne mó, nyɛ̀bɛ́ bə̀ n’ê ji wẽ̀ rə̀ lwẽ́ nã́nyə̀lɛ́ y myǐn bə̀ pɛ rɛ mɔ́ sono, Sə nə̀ t’â la bɛ vwǎrh bə̀ zwini yi ní yé. ¹³ Ǎ Zhidə, ǹ já ǹ zhe yə nánzhəzhɔ̌ ǹdə ǹ gə́ zhe cɛmɛ nánzhəzhɔ̌ nɛ́ mɔ́ ta ! Èta myɛ, Zhərəzalɛm zhe yə dwã vwĩ̀-jùúli nánzhəzhɔ̌ ǹdə ń gə́ zhe sɔ́msɛ nánzhəzhɔ̌ nɛ́ mɔ́ ta, ǹdə á gə́ lù yə dwã vwĩ̀-jùúli ní, á m’á ji wẽ́ rə̀ lwẽ́ nã́nyə̀nyɛ̀lɛ́ á pɛ Baalɛ nɛ… ¹⁴ Sə è gə wɔ́ ǹmyɛ́ yilə, ǹ bə̀ká zə Yi cã̌ nɛ́ dwí rí tɛ̀bɛ́ yil yé, ǹ bə̀ká zhẽ̌ ǹ cəl ń búbwéé ń lwə̀l Yi bə̀ yil yé ; bə̀ nyǐ bə̀ gə byẽ̌ bə̀ co ne, bə̀ zwini yil myɛ, à t’â la bə̀ zɔ̀mà nɛ́ culu yé. ¹⁵ È nə wɔ́ bə̀kɔ́n à byì-swénnə mó la vò n wɛ̀rhɛ́ à jì y wẽ́ mó ? Ń mà n twĩ̀ tumə námməywààlɛ è wẽ́. Nyǐ vwə̃̀ né bə̀ n’ê zwə́l bə̀ pɛ Yi ni mú nàmá bɛ́ m’a jé tɛ̃́. Bə̀ wɔ́ ǹ gə nə́ ǹ twĩ̀ lwɛlɛ mɔ́, wɔ́ rə̀myɛ́ yi ní ǹ nə́ ǹ jí bɛlɛ nɛ́ ! ¹⁶ Olyivyé, ǹ gakó pú ǹdə́ vɔr dúdú mú, ǹ byǐ y càn, è nyǔ zhe shil mó, nyǐ wɔ́ yil ré rə̀myɛ́ mɔ́ Bə-zhɔ-zhe y’ǎ co mó ; sə lwar bə̀ nyǐ wɔ́ zho nánfɔ̀lɔ̀ Bə-zhɔ-zhe la ce o zɛ̃̀ o zə myǐn o ce ǹ yó, mə kwɛ̃́ vɔr rɛ́ myǐn rə jí dɔ́dɔ́. ¹⁷ Wɔ́ Bə-zhɔ-zhe mó ń cǐ kɔn gakó mó, ń zhele mó, wɔ́ ńmyɛ̌ ń ce zwini bə̀ ǹ yó, Esərayɛl lyì bí ǹdə́ Zhidə lyì bí lwɛlɛ rɛ́ yilə, bə̀ bə̀ twĩ̀ tumə bə m’e zɛ̃̀ à lyim ni, bə̀ gə́ ju wẽ̀ rə̀ lwẽ́ nã́nyə̀nyɛ̀lɛ́ myǐn bə pə Baalɛ nɛ mɔ́ yilə. ¹⁸ Bə-zhɔ-zhe zɔ̀m yò òdù n byili a lwar ; ǹ ce à yírhə́ nə bə̀ tũ̀-twə̃̀ə̃̀ né. ¹⁹ À y’à nyɛ̌ ǹdə pyì-bwɛ̀lɛ́ kɛ̀bɛ́ bə̀ y’a zə bə̀ la e gu jàà y w mɔ́ ta, à j’â yə̀l bùlə̀ né námməlwɛ̀lɛ́ y kɛ̀bɛ́ è ŋwɛ́nɛ́ bə̀ wẽ́ à yil mó yé ; bə̀ n’ê zɔ̀m bə̀ zhe : Kǎ-na nə́ kà cǒ w ǹdə́ ò byǐ y nə́ ji tɛ̃́ ! Vǔr-nə nə́ vùr w ó jé tɛ̃́ cɛ yó numbyínsí cəcəl wə, mùnì ga bə̀k’ê bə̀ ò yil ré yò lyǐrh kə́dò yé ! ²⁰ Sə Bə-zhɔ-zhe wɔ́ bù-kárna cángá, ń yě numbyíní yǎl mɔ́ ǹdə́ è wu bùlə̀ né ga párá. Ce à yírhə́ m’a nə ń jimdí ń la bə̀ yó cṹ mú, Bə̀ wɔ́ Bə-zhɔ-zhe jɔ̃̀ w à co yò w né. ²¹ Wɔ́ rə̀myɛ́ è ce Bə-zhɔ-zhe nə́ ń zɔ̀m ǹdə́ Anatɔtɛ lyì bí bə̀ n’ê pyà à myə̌l ré vǔr mó yò, bə̀ n’ê zɔ̀m bə̀ zhe : Ǹ bə̀ká zɔ̀m nyì-zwennə zɔ̀mà ǹdə́ Bə-zhɔ-zhe yil ré yé, ǹ gə cẽ, sə́ nyǐ ǹ mà cì nə́ jɔ̃̀ wa ! ²² Wɔ́ rə̀myɛ́ è ce Bə-zhɔ-zhe mó ń cǐ kɔn gakó mó nə́ zɔ̀m ń zhe : Nyǐ à la bɛ còrhò-tum pɔ ; búlə́ shú m’a gu ébwa-dàlá bɛ́, nɔrh m’a gu bə̀ byǎ bɛ́ ǹdə́ bə̀ bə̀kwá bɛ́. ²³ Bə̀myɛ́ mə̀dù ga tá ń la lú yé ; bə̀ nyǐ à m’a ce zwini bə̀ rə jòm Anatɔtɛ lyì bí yó, byin rí tɛ̀bɛ́ à bàn còrhò-tum rí pɔ mɔ yi ní.