¹ Bə-zhɔ-zhe, ǹ wɔ́ cángá cə́bal dɛ̃́dɛ̃́, ce à wàr à m’a wɔ̀ bə̀ ǹ nə́ ǹ dwé yé ; sə ǹdə́ rə̀myɛ́ ga, à n’â yǎl a zɔ̀m kɔn tɛ̀bɛ́ ǹ bùrsí mə̌ dwã sə sə tó mó yò : Wɔ́ bə̀kɔ́n yil lyì bə-lwǎlsɛ́ tumə né n’ê zwẽ nyí mú ? Wɔ́ bə̀kɔ́n yil myìnnə bé gakó zhe yə̀-zùlə́ mó ? ² Ǹ zhele be, bə tə nèrh, bə̀ n’ê byìlə̀, bə̀ n’ê zhĩ byǎ ; ǹ bwə́l bə̀ nyə́ né ne, sə ǹ nyɛ ǹdə́ bə̀ wun ní. ³ Sə ǹmyɛ́, Bə-zhɔ-zhe, ǹ yě à párá, ǹ nə nɛ, à wu w ŋwɛ́nɛ́ ǹdə́ mɔ́, ǹ yě kɔn tɛ̀bɛ́ rə̀ ŋwɛ́nɛ́ ò wẽ́ mó. Vǔr be ǹdə pyììsi shɛ̀bɛ́ bə̀ mə̌ sə bə gu mú ta, sə́ tɛnɛ sɛ ń cĩ́ dɛ̃ rɛ́ tɛ̀bɛ́ bə̀ la sə̀ nyí rí gakó gu mú yù w mú ! ⁴ Tənà y nə m’à n’ê kúrh cùùrí ni kɔn la m’e yí dǒ ? Cɛsɛ́ gakó gɔ w nə m’a j’a kù ò zhǐ kɔn la m’e yí dǒ ? Wɔ́ tənà y lyì bí lwɛlɛ rɛ́ rə̀ ce vwàmá nɛ́ ǹdə́ kumsí gakó cùwə̀. Bə̀ zɛ̃̀ bə̀ n’ê zɔ̀m bə̀ zhe : Ǹ tá ń la nə́ yó gə́ la mə̀gã̌ gu mú nɔ yé. ⁵ Ǹ nə gə zɛ̃̀ ń tó nèrh cìnə́ ne ǹ nə́ dùrə̀, bə zɛ̃̀ bə̀ n’ê lyɛ̀ɛ̀ mɔ́, ǹ nə wɔ̌ ǹ m’ǎ zɛ̃̀ ń jə̀ə̀le eshərh cìnə́ ne tó ń dùr ? Ǹ nə gə bə ǹ cìn zhə̀n zhe tənà kɛ̀bɛ́ yə̀-zùlə́ ŋwɛ́nɛ́ è wẽ́ mó wẽ́, wɔ́ etər ǹ nə m’ǎ zɛ̃̀ ń wɛ̀rhɛ́ nɛ́ Zhɔrdɛ̃ bwǐ y è pú ǹdə́ kà-cə̌r mó nyí ni mú w mú ní ? ⁶ Bə̀ nyǐ bə̀ ǹ da-byǎ bɛ́ cìcì mú n’ê myìnì mú, bə̀ cìcì mú ŋwɛ́nɛ́ ǹ kwã nɛ́ bə̀ n’ê ce sɔ̀ bə̀ búbwéé. Bə̀ gə tú bə n’ê zɔ̀m dɔbrɛ zɔ̃̀-ènyə̀là ǹdə́ mɔ́, sə ǹ bə̀ká zwẽ nyí yé. ⁷ À yẽ̌ à kɛ̀lɛ́ y nɛ, à zhɔ̃̀ à cəl kɔn rɛ́ ; à yẽ̌ mɔ̀bɔ́ ń wɔ́ à sónó kɔn mɔ́ nɛ ń zwə̀ bé jɔ̃̀ wa. ⁸ À cəl kɔn rɛ́ yàl bɔrɔ à yil sɔ̀lɔ̀ wa, ò n’ô swər ò ce ne ; wɔ́ rə̀myɛ́ è ce à cəl kɔn rɛ́ jǐrh kɔn tɛ̀bɛ́ à n’â súlə́. ⁹ À cəl kɔn rɛ́ jǐrh kúmí, gɔ-wẽ̀ nyí-kùjú, rə̀ jǐrh zúm ; kúmsí shɛ̀bɛ́ sə̀ n’ê pyà kùjú mú gakó la shí lũ cə-yala gakó sə bə̀ sə̀ jòm sə kə́kɛ́lɛ́. Zhəl-nə, byẽ̌-na gɔ-wẽ̀ ré gakó á cĩ́ dwã yó, á ce rə̀ gakó bə̀ rə jí ! ¹⁰ Kálna nánzhəzhɔ̌ cɔ̀ à də̀vɛ̃́ cèmé né, bə tətɛrɛ cɛ y wa ; bə ce cɛ y à só mó jǐrh kɔn nánfò, e jǐrh gɔ-elũ èpòlò, jàà kɛ̀bɛ́ è pyě è dúdú numbyíní də́-byǐ tɛ̀nɛ́ è wẽ́ yé. ¹¹ Bə̀ ce e jǐrh gɔ-elũ èpòlò, jàà è pyě nánfò, è lyì bí cùwə̀, è wu zhìlì à yé né. Tənà y gakó cɔ̀, lò lò kə́ ń tá ń kwè y ǹdə kɔn ta yé. ¹² Cə-cɔ̀rna j’a du tɛ̃́ gɔ-elũ èpòlò w sɔ́msɛ́ gakó yó bə̀ bà, Bə̀-zhɔ-zhe búlə́ shù w j’a zɛ̃̀ o zhì cə-yala gakó w ò n’ô gwi tənà y lyì bí ; numbyíní də́-byǐ k’ê bə yə̀-zùlə́ zhe yé. ¹³ Bə̀ dù bə̀lé, bə k’a kwar sɔr ; bə̀ y’a lyɛ̀ɛ̀ lyɛ̀ɛ̀, e jà wɔ́ nánfò. Lwar-na cìzhìl pár tɛ̀bɛ́ á n’á jə̀r mó yilə, bə̀ nyǐ wɔ́ Bə-zhɔ-zhe lyim rí nánfɔ̀lɔ̀ w ò zɛ̃̀. ¹⁴ Bə-zhɔ-zhe nə́ ń zɔ̀m à jə̀-dwã bɛ́ námməlwǎlsɛ́ gakó shɛ̀bɛ́ sə̀ n’ê bwǐ ǹdə́ à cəl tənà y à pɔ à dwí, Esərayɛl nɛ mɔ́ shò kwã nɛ́ ń zhe : Nyì wé, à m’a mǔr bi tɛ̃́ bə̀ tənà y wa, à m’a mǔr Zhidə kɛ̀lɛ́ y tɛ̃́ bə̀ cəcəl wə. ¹⁵ Sə à gə tú à mǔr bi tɛ̃́ a zhɛ̀ kwã nɛ́, à m’a k’a dùr bə̀ nɔ̀nɔ̀ kə́dò, à m’a k’a zə mə̀dù mə̀dù gakó a k’a bə̀ ń cəl kɔn rɛ́ wẽ́, a zə lò gakó n ká n bə̀ ń tə̀nà y wa. ¹⁶ Sə bə̀ gə shɛ̀nɛ́ bə̀ cèrhè à dwí rí sɔ́msɛ́, bə̀ gə bwəl nyí ǹdə́ à yil ré bə wɔ̀ : Bə-zhɔ-zhe wɔ́ nã́nyì ! Ǹdə bə̀myɛ gə́ cèrhè à dwí rí, rə zə Baalɛ yil ré rə bwəl nyí ní ta mɔ́, sə bə lwar bə̀ bə̀ m’a yə̀ wu-nyɔ̃̀ cìnə́ à dwí rí cəcəl wə. ¹⁷ Sə bə̀ gə yə̀ kaka cili, sə́ nyǐ à m’a cɔ̀ tənà y èmyɛ́ mɔ́, à m’a cɔ̀ ya, a ce e jé tɛ̃́, wɔ́ Bə-zhɔ-zhe ń zɔ̀m.