¹ Bə-zhɔ-zhe zɔ̀m ǹdə́ nɛ́, n pɛ̃ nyí n wɔ̀ : Zɛ̃̀ ń vò ń yè cã̌-tɔ̀nɔ̀ kɔ̀bɔ́ bə̀ zɔ lɛ̃́ɛ̃ɛ̃ bə wɛ̀rhɛ́ mɔ́ ń lyẽ ǹ cã̌ nɛ ; sə ǹ bə̀ká ce w nɛ̃̌ w yé. ² A zɛ̃̀ a yè cã̌-tɔ̀nɔ̀ ǹdə Bə-zhɔ-zhe zɔ̀mɛ̀ rɛ́ gə́ byili ní, a lyẽ à cã̌ nɛ. ³ Bə-zhɔ-zhe kə́ n zɔ̀m ǹdə́ nɛ, ń twər rə̀lyè nyǎn rɛ́ n wɔ̀ : ⁴ Kwě cã̌-tɔ̀nɔ̀ w ǹ yè ń lyẽ ǹ cã̌ nɛ́ mɔ́ ; sə́ zɛ̃̀ ń vò Efəratɛ səta, ń zhì gàà mɔ́, ń shèè w pyɔ̀ gógòló wə. ⁵ A zɛ̃̀ à la vò a shèè w Efəratɛ səta, ǹdə Bə-zhɔ-zhe gə́ pɔ nyí ní. ⁶ E wɛ̀rhɛ́ dwã nánzhəzhɔ̌, rə̀myɛ́ kwã nɛ́ Bə-zhɔ-zhe wɔ̀ nɛ : Zɛ̃̀ ń vò Efəratɛ səta, sə́ zhì gàà mɔ́, ń kwè cã̌-tɔ̀nɔ̀ w à y’à pɔ mɔ́ nyí bə̀ ǹ shèè w gàà mɔ́ mɔ́. ⁷ A zɛ̃̀ à la Efəratɛ səta, a yí a pyà pyà, a nə cã̌-tɔ̀nɔ̀ w à gə́ y’à shèè w mə̀gã̌ mɔ́ a kwè ; à b’à la nyǔ, a pwírí cã̌-tɔ̀nɔ̀ w cɔ̀, ò k’ô bə tum zhe yé. ⁸ Bə-zhɔ-zhe zɛ̃̀ n kə́ n zɔ̀m ǹdə́ nɛ : ⁹ Nyǐ Bə-zhɔ-zhe nə́ ń zɔ̀m ń zhe : Lwar bə̀ wɔ́ èta à la Zhidə cìn-byilu mú ǹdə́ Zhərəzalɛm cìn-byilu mú nánfɔ̀lɔ̀ w cɔ̌ nɛ́. ¹⁰ Dwí rí tɛ̀bɛ́ námməlwɛ̀lɛ́ y èta mɔ́, rə̀ bə shɛ̀ à zɔ̀mà nɛ́ culu yò mó, wɔ́ rə̀ bùlə̀ né námməlwɛ̀lɛ́ y kùr rə̀ n’ê tó mó, wɔ́ yə né dwã bɛ́ kwã rə̀ n’ê dùr né mó, rə̀ n’ê tó ne, rə̀ n’ê wùlì nə̀ yé né mó, nyǐ dwí rí rə̀myɛ m’a jǐrh ǹdə cã̌-tɔ̀nɔ̀ w kɔ̀bɔ́ ta, rə̀ k’ê bə tum zhe yé. ¹¹ Nyǐ à zɔ à cìn a lyẽ Esərayɛl kɛ̀lɛ́ y gakó ǹdə́ Zhidə kɛ̀lɛ́ y gakó ne, ǹdə bə̀ gə́ y’a zə cã̌-tɔ̀nɔ̀ bə m’e lyẽ numbyíní cã̌ nɛ nɛ́ mɔ́ ta, wɔ́ Bə-zhɔ-zhe ń zɔ̀m, mùnì ga sə̀ lyì bí yə̀ à dwí, sə yə̀ à yil ré, sə yə̀ à zǔl mó, sə yə̀ à còrhó wə́. Sə ǹdə́ rə̀myɛ́ ga, bə̀ yə̀ à zɔ̀mà nɛ́ cili gaga yé. ¹² Ǹ m’ǎ zɔ̀m ǹdə́ bɛ ń wɔ̀ : Nyǐ Bə-zhɔ-zhe, Esərayɛl Yi rí n’ê zɔ̀m rə̀ zhe : Ce-nə kwǎlnɛ́ gakó sú ǹdə́ də̀vɛ̃́. Sə bə̀ m’a lyár mɔ́ bə̀ wɔ̀ : Nə́ nə y’ǎ yə̀l bə̀ nə́ m’a ce kwǎlnɛ́ gakó sú ǹdə́ də̀vɛ̃́ mɔ́ nà ? ¹³ Sə́ zɔ̀m ǹdə́ bɛ́ ǹdə́ rə̀myɛ́ ga ń wɔ̀ : Nyǐ Bə-zhɔ-zhe nə́ ń zɔ̀m ń zhe : Nyǐ-nə, à m’ ce tənà y lyì bí gakó, ǹdə́ pyǎ bɛ́ bə̀ jě Dəvyiddi pyɛ̀lɛ̀ də̀gwã̌ y yó mó ǹdə́ vwĩ̀-zwə́lnə bé ǹdə́ nyì-zwennə bé, ǹdə́ Zhərəzalɛm lyì bí gakó, nyɔ̀ də̀vɛ̃́ e zə bɛ. ¹⁴ À m’a ce bə̀ dabá ǹdə́ bə̀ byǎ ga dwã w a cɔ̀ bɛ a gùlí dwã nɛ, wɔ́ Bə-zhɔ-zhe ń zɔ̀m ; à t’â la mə̀dù ga nɛ́ yõ̌ n lú yé, à t’â la yə́-zhìl dùr gaga yé, à t’â la nɔ̀nɔ̀ dǔr gaga yé, kɔn tɛ̀nɛ́ rə̀ la à yé ne cə̌r ǹdə́ bə̀ cɔ̌ yé. ¹⁵ Pyèrhè-nə á zhɛ̃̌ á cili ! Bə̀k’á zhẽ̌ á cìn dɛ̃̌ yé ! Nyǐ Bə-zhɔ-zhe nə́ ń zɔ̀mà. ¹⁶ Zǔl-nə Bə-zhɔ-zhe, á Yi rí, ǹdə́ ń gwẽ̌ yə̀ ce cə-byín rí bə̀ yé, ǹd’á gwẽ̌ yə̀ á nèrh zal á mà pyàr rɛ́ nɛ cəcɛ̃ nɛ yé ; nyǐ á m’ǎ n’â dɛ̃̀ pwẽ̀, sə ń mà n lyə́r re rə jǐrh cu ywə́l, n cɔ̀ rɛ rə jǐrh cəcɛ̃ byṹ fúrí. ¹⁷ Á gə́ t’â cili, à m’a shèè a kúrh, á cìn byilu mú yilə ; à yə́-nàná m’a shìl tɛ̃́, bə̀ bə̀ m’a zə Bə-zhɔ-zhe dwí rí bə m’e vò yómre jè. ¹⁸ Zɔ̌m ǹdə́ pyɔ̌ mɔ́ ǹdə́ pyə̀-kɛ̃ mɔ́, ń wɔ̀ : Zɛ̃̀-na á jóm tɛ̃́ cə-shó w wẽ́ ! Bə̀ nyǐ á pyɛ̀lɛ̀ yə́-púr rí rə̀ n’ê jə́jɛ̀mɛ́ mɔ́ shí á yó w rə tu tɛ̃́. ¹⁹ Bə̀ pyi MIDI cɛmɛ nɛ́ nyí ni, lò lò tɛ̀nɛ́ ń la nə nyí ni pul yé ; bə̀ zɔ Zhidə lyì bí gakó bə m’e vò yómre jè, bə̀ zɔ bə̀ gakó púlə́púlə́ bə̀ vò yómre jè. ²⁰ Zhẽ̌ ǹ yé dɛ̃̌ ń nyǐ lyì bí byɛ̀bɛ́ bə̀ zɔ bə m’ê shí lũ jə̀gwã̀ sõ bə̀ m’ê bàn mɔ́ ń nyìwé, wɔ́ yẽ̀ dwí rí tɛ̀bɛ́ bə̀ y’à pɔ mɔ́, ǹ yà ǹ tə̀ rə̀ yil ǹ nə́ ǹ zhẽ̌ ǹ cìn dɛ̃̌ mɔ́ ŋwɛ́nɛ́ ? ²¹ È nə wɔ́ etər ǹ nə m’ǎ wɔ́ nɛ́, kɔn rɛ́ tɛ̀bɛ́ rə̀ n’ê pɛ mɔ́ còrhò-tum mú mú yilə ? Wɔ́ ǹmyɛ́ ǹ cèrhè be, bə zə mɔ́ bə m’e yə̀ bə̀ yó-cə́bal. Zwini nə yə̀ mɔ́ yí rə̀ n’ê yì mú, ǹdə kɛ̃ mɔ́bɔ́ ń pwǐ zɛ̃̀ mɔ è n’ê yì mu mú ta ? ²² Ǹ gə zɛ̃̀ ǹ nə́ ǹ zɔ̀m ǹ wẽ́ ǹ zhe : Wɔ́ bə̀kɔ́n yil yò w kɔ̀bɔ́ yú ni èta mɔ́ mɔ́ ? Sə́ lwar bə̀ wɔ́ lwɛlɛ rɛ nánzhəzhɔ̌ w ǹ wɛ̀rhɛ́ mɔ́ yilə, wɔ́ rə̀myɛ́ yil bə̀ kwɛ̃̀ ǹ gàndɛ́ nyə́ né bə ce dɛ̃̌ bə yẽ̌ ǹ nə̀kúlə́ né ne pwẽ̀ ne. ²³ Ecopyi lò nə wɔ̌ ń mà n lyə́r ń yala tɔ̀nɔ̀ wá ? Jə̀l myɛ nə wɔ̌ rə̀ m’a lyə́r rə̀ yala nɛ́ pɔ̀pɔ̀là nɛ́ ? Sə ámyɛ nə wɔ̌ á m’á wɛ̀rhɛ́ cɛ̀nɛ̀ ? Àmyɛ̌ byɛ̀bɛ́ á j’á myɛ̀rhɛ̀ lwɛlɛ rɛ́ mɔ́. ²⁴ À m’a ce gɔ-elũ èpòlò w zho w bə̀ o pwà bɛ ǹdə gɔ ta bə̀ làà dɛ̃̌ ; ²⁵ Nyǐ wɔ́ rə̀myɛ́ è wɔ́ ǹ dóó wə́, ǹ cəl dóó w à myɛrhɛ a pɔ̃́ mɔ́, bə̀ ǹ swě à yò, ǹ zɔ kɔma zhə̀nà, wɔ́ Bə-zhɔ-zhe ń zɔ̀m. ²⁶ Nyǐ à m’a kwɛ̃̀ ǹ gàndɛ́ a pyi ǹ yé y ne, mùnì ga bə nə ǹ cìzhìl ré. ²⁷ À nɔ ǹ fwə̌l tumə né, ǹdə́ fwə̌l shil ré rə̀ n’ê gwi mú mú, ǹdə́ fwə̌l mó ǹ nə́ ǹ fwə̌l pyàr rɛ́ yó ǹdə́ gɔ sõ, ǹ mə́ ǹ yè ǹ cìn mú, à nɔ ǹ pwarha tumə né. Zhərəzalɛm, zwini zhe mó, ǹ m’ǎ yə̀ nɛ́ èta kɔn m’e yí dǒ, múní ga ń mə́ shàrh ǹ cìn ń jǐrh wárhgáá mɔ́ ?