¹ Zɔ̀mɛ̀ rɛ́ tɛ̀bɛ́ Bə-zhɔ-zhe zɔ̀m n byili Zheremyi ni, də̀-kùlù w gə́ jòm yó né mó. ² Zhidə lyì bí n’ê kúrh bə̀ lyì bí cu mú ni, bə̀ cɛmɛ nɛ́ lyì bí wun zhìlì, bə̀ wun gɔwa, Zhərəzalɛm lyì bí búbwéé zɛ̃̀ è la yi wə. ³ Náncɛsɛ́ zɛ̃̀ sə̀ n’ê twĩ̀ bə̀sɔ́ná nɛ̃̌ kwã nɛ́, bə vò bə yí nɛ̃̌-gwáárɛ́ wẽ́ bə̀ púrí nɛ̃̌ də́-byǐ tɛ̀nɛ́ nɛ́ yé, bə k’a kwɛ̃̀ ǹdə́ bə̀ kwǎl nɛ́ nánfò ; bə̀ wun zhizhiri, cìzhìl zhe be, bə pyìlì bə̀ ywẽ́ ne ! ⁴ Dwà y nɛ̃̌ gə́ y’à k’ê t’â twərh tɛ̃́ tənà y w gaga mɔ́ ce cɛ y y’à j’a kù nánkùlì kẽkẽ, rə̀myɛ́ ce vwàlna bɛ́ wun ní j’a zhizhiri, bə pyìlì bə̀ ywẽ́ ne. ⁵ Gɔ sõ myɛ, ta gə lùl è byǐ e ju tɛ̃́, gə-lyɔ̀ gə́ tɛ̀nɛ́ è la dɔ́m mɔ́ ce è y’a dùr e yẽ̌ byǐ y ni tɛ̃́. ⁶ Gɔ bə̀nesé myɛ y’a zɛ̃̀ sə̀ zhǐ dɛ̃̌ pyàr rɛ́ yó, sə̀ m’ê lwẽ́ zho tɔ́nɔ́nɔ́ gə n’ê shí mə̀gã̌ mɔ́ ǹdə dɔma ta ; gɔ k’ê tɛ̀nɛ́ gaga yé, ce sə̀ y’a nyǐ nyǐ sə ga, sə̀ yírhə́ né lyɛ̀ɛ̀ kókó. ⁷ Bə-zhɔ-zhe, sə nə́ yə̀-bəlwàálɛ́ gə́ n’ê byili bə̀ nə́ dó mó, Ǎ Bə-zhɔ-zhe, tə̀ ǹ yil ré yil ń wɛ̀rhɛ́ kɔna, bə̀ nyǐ nə́ dwə́ə́ré já dɛ̃́dɛ̃́, nə́ dó ǹmyɛ́ nɛ. ⁸ Wɔ́ ǹmyɛ́ sõ Esərayɛl n’ê dɛ̃̀ kɔn nɛ́, ń gə ŋwɛ́nɛ́ zwini wẽ́ dɛ̃, wɔ́ ǹmyɛ́ ǹ nə́ ǹ zwẽ mo, è nə wɔ́ bə̀kɔ́n yil ǹ m’ǎ zɛ̃̀ ǹ yə̀ ǹdə zhə-bal ta tənà y w mɔ́, ǹdə wɔ́ sɔ́m-zhə̀lnə ń tú tənà y w ń la zɔ̃́ sə n dùlí n lyɛ̃ ta mɔ́ ? ⁹ Wɔ́ bə̀kɔ́n yil ǹ nə m’ǎ yə̀ ǹdə lò mɔ̀bɔ́ ń nə́ ń zɛ̃̀ wu ni ta, ǹdə búlə́ kã̀dɔ̀ kɔ̀bɔ́ ò k’ô wàr nə́ kúrhí ò la sãɔ̃ mɔ́ ta ? Bə-zhɔ-zhe, ǹdə́ rə̀myɛ́ ga, ń jà ǹ ŋwɛ́nɛ́ nə́ cəcəl wə, ǹ yil ré n’ê byẽ̀ nə́ sono : Rə̀myɛ́ ce, ǹ bə̀ká yǎrh nə́ba tɛ̃́ yé ! ¹⁰ Nyǐ kɔn tɛ̀bɛ́ Bə-zhɔ-zhe nə́ ń zɔ̀m dwí rí tɛ̀bɛ́ lyì bí yil mó : Bə̀ só dɛ̃̌ dǔr bə vò mə̀gã̌ mə̀gã̌, bə̀ yə̀l bə̀ cìn zal bə zhǐ yé ; Bə-zhɔ-zhe kə́ ń bə bə̀ zhə̀n zhe yé, n zɛ̃̀ ń nə́ ń lyǐrh bə̀ dwə́ə́ ré yò, ce n zɛ̃̀ ń nə́ ń pɛ bɛ còrhò-tum bə̀ yə̀-bəlwàálɛ́ yilə. ¹¹ Sə Bə-zhɔ-hze wò ne : Ǹ bə̀k’á lwə̀l Yi dwí rí tɛ̀bɛ́ yil yé. ¹² Má rə̀ lyẽ rə̀ nyí, rə búbwéé rə ce ne myɛ, à t’â la rə̀ búbóó mó culu yé ; má rə̀ zwə́l vwə̃̀ námpúmə́ cɛ̃́ɛ̃́ rə súlí ǹdə́ paánsɛ ga myɛ rə pɛ̃ myɛ, à t’â la rɛ zõ yé ; bə̀ à n’â yǎl a zə búlə́ shú ǹdə́ nɔrh ǹdə́ címí námməlwɛ̀lɛ́ a m’a cɔ̀ rɛ. ¹³ Rə̀myɛ́ yó né, a zɛ̃̀ a lyár Bə-zhɔ-zhe a wɔ̀ : Ǎ ! Cǐnnə, Bə-zhɔ-zhe ! Nyǐ wé, nyì-zwennə bé n’ê wə̀l be : Nyǐ á t’á búlə́ shù nɔ á yírh w gaga yé, nɔrh nánfɔ̀lɔ̀ t’â la ába zal gaga yé ; à m’a pə ába yə̀-zùlə́ jàà y kɛ̀bɛ́ wẽ́ lò lò tá ń la ába jə́jɔ́ yé. ¹⁴ Bə-zhɔ-zhe zɛ̃̀ n lyár nɛ n wɔ̀ : Ǹ y’ǎ nyí wɔ́ kɔma nyì-zwennə bé n’ê zal à yil ré bə̀ m’ê gòmə̀ ; à yə̀ bɛ twĩ̀ gaga yé, à yə̀ bɛ nyí pɛ gaga yé, à yə̀ zɔ̀m ǹdə́ bɛ gaga yé ; Nyǐ wɔ́ kɔma wẽ̀ bə̀ nɔwa, wẽ̀ ré tɛ̀bɛ́ bə̀ n’ê byili bə̀ rə̀ bàn mɔ́ myɛ wɔ́ wẽ̀ nánfwə̀r, wɔ́ bə̀ cìcì mú wun zɔ̀ma bə̀ n’ê bwə̀l bə̀ byili àba, bə̀ m’ê jə́jɛ̀rɛ́ ába. ¹⁵ Wɔ́ rə̀myɛ́ è ce, Àmyɛ́ Bə-zhɔ-zhe n’â zɔ̀m nyì-zwennə bé byɛ̀bɛ́ bə̀ n’ê zal à yil ré bə̀ m’ê zɔ̀m nyì-zwennə zɔ̀mà nɛ́ mɔ́, e j’à də̀ àmyɛ́ à twĩ̀ bi mú, bə̀ n’ê wə̀l : Bə̀ búlə́ shú ǹdə́ nɔrh nánfɔ̀lɔ̀ t’â bàn mɔ́ : Nyǐ wɔ́ búlə́ shù ǹdə́ nɔrh nánfɔ̀lɔ̀ rə̀ m’a gu nyì-zwennə bé bə̀myɛ́ mɔ́ bə jé tɛ̃́. ¹⁶ Sə lyì bí byɛ̀bɛ́ nyì-zwennə bé bə̀myɛ́ bwə̀l zɔ̀mà nɛ́ bə byili bi mú, búlə́ shù ǹdə́ nɔrh nánfɔ̀lɔ̀ m’a gu bi bə ləlɛlɛ tɛ̃́ Zhərəzalɛm sɔ́msɛ́ yó, numbyíní də́-byǐ t’â la nɔ e pwà bə̀myɛ́ ǹdə́ bə̀ kana bɛ́ ǹdə́ bə̀ bala-byǎ bɛ́ ǹdə́ bə̀ kana-byǎ bɛ́ e ce lú-bɔ̀l w yé ; à kwè bə̀ wu-bárhɛ́ tumə né a ló a ləlɛlɛ bə̀ yó. ¹⁷ Wál bɛ zɔ̀mɛ̀ rɛ́ tɛ̀bɛ́ : Nyǐ à n’â kúrh à yə́-nàná n’ê bubwere tɛ̃́ cəcɛ̃ ǹdə́ nə̀nyɛ́nɛ́ gakó, nə́ t’â zhɛ̀ yé ; nyǐ bə̀ mà à dwí rí bə̀kɔ́ mɔ́ ń gwẽ̌ yə̀l bal pár mɔ́ ǹdə́ ku nánfɔ̀lɔ̀, s’o gə́ mà mə̀gã̌ mɔ́ jǐrh nyəlɛ́ rə̀ n’ê yì dɛ̃́dɛ̃́. ¹⁸ À gə zɛ̃̀ à zhə̀l gɔ sono myɛ, a yí a pwírí búlə́ shù gu lyì bí gàà mɔ́ ; à gə k’â tú cɔ w myɛ, a pwírí nɔrh mɔ́ gu lyì bí ; nyì-zwennə mó ǹdə́ vwĩ̀-zwə́lnə ga zɛ̃̀ bə̀ n’ê dùr tənà y wa, bə̀ k’ê yə̀l bə̀ gə́ la má yé. ¹⁹ È nə wɔ́ tɛ̃́ ǹ yǎrh Zhidə nɛ́ ? Səyɔ̃ nə́ jǐrh pwarha kɔn ǹ wẽ́ nà ? Wɔ́ bə̀kɔ́n yil ǹ mà nə́ba, nə́ k’é wàr bəsàzùlí nə́ la nɔ mɔ́ ? Nyǐ wɔ́ yə̀-zùlə́ nə́ y’ǎ n’é dɛ̃̀, sə wu-nyɔ̀ də̀-byǐ myɛ t’â nɛ́ yé, nə́ y’ǎ n’é dɛ̃̀ nə́ wárh dɛ̃, k’â wɔ́ ywẽ nánfɔ̀lɔ̀ nə́ nɔwa ! ²⁰ Bə-zhɔ-zhe, nyǐ nə́ lwar nə́ dwééré párá, nə́ dabá lwɛlɛ rɛ́ ; Bə̀ nyǐ nə́ dó ǹmyɛ́ nɛ. ²¹ Tə̀ ǹ yil ré yilə, sə ǹ bə̀ká ń zhɛ̃̀ yé, ǹ bə̀ká ń ce cìzhìl ǹ pyɛ̀lɛ̀ də̀gwã́ y còrhó w ne yé ! Ǹ bə̀ká ń swě yé, ǹ bə̀ká ń cɔ̀ ǹ dɔbrɛ́ ǹdə́ nə́ba mɔ́ yé ! ²² Nyǐ tənèsé yə né wẽ́ mó, wɔ́ tɛ̌ rə̀ wɔ̌ rə̀ m’a ce dwà nyɔ̀ ? È nə́ wɔ́ dɛ̃̌ yi rí rə̀ n’ê ce dwà nywɛ̀ ? È nə də̀ ǹmyɛ́ Bə-zhɔ-zhe, nə́ Yi rí ǹ nə́ ǹ ce è nywɛ̀ nà ? Nyǐ wɔ́ ǹmyɛ́ sõ nə́ n’ê dɛ̃̀ kɔn nɛ́, bə̀ wɔ́ ǹmyɛ́ ǹ wɛ̀rhɛ́ wẽ̀ ré rə̀myɛ́ mɔ́ gakó.