¹ Bə-zhɔ-zhe zɔ̀m ǹdə́ nɛ n wɔ̀ : Cili nyɔ̀nɔ̀, má Muyiisi ǹdə́ Saməwəə gə y’à tú bə̀ zhǐ à yé né myɛ, à t’â la dwí rí tɛ̀bɛ́ lyì bí sõ nyǔ yé. Jǐ ri à yé né rə vò yé né gaga. ² Rə̀ gə zɛ̃̀ rə̀ bwə̀rh mó rə wɔ̀ : Wɔ́ yẽ̀ nə́ m’ǎ vò né ? Sə́ lyár rɛ ń wɔ̀ : Nyǐ Bə-zhɔ-zhe wòwə̀ : Lyì bi byɛ̀bɛ́ bə̀ la cú mú m’a cì, lyì bí byɛ̀bɛ́ búlə́ shù la gu mú, búlə́ shù m’a gu bi, lyì bí byɛ̀bɛ́ nɔrh nánfɔ̀lɔ̀ la gu mú, wɔ́ nɔrh mə̀ la bɛ gu, lyì bí byɛ̀bɛ́ bə̀ la zal bə̀ m’e vò yóm re jé mó, wɔ́ yóm re jè bə̀ m’a zə bɛ bə̀ m’e vò ! ³ Bə-zhɔ-zhe wə̀lə̀ : À m’a ce ywẽ̀ kùrə̀ nə̀na bə̀ rə zə bɛ́ ; Búlə́ shù m’a bə̀ o gi bi, kǔlsi m’a bə̀ sə̀ n’ê dɔ̀m bɛ sə̀ fwàl tɛ̃́, dɛ̃̌ y w kúmsi ǹdə́ vwàmá nɛ́ cɛ yó mó m’a bə̀ rə dɔ̃̀ bɛ rə zhəzhɛrɛ rə cɔ̀. ⁴ À m’a tə̀ kɔn rɛ́ tɛ̀bɛ́ gakó Ezəcaasɛ byǐ Manasɛ Zhidə pyɔ̌ mɔ́ wɛ̀rhɛ́ Zhərəzalɛm nɛ́ mɔ́ yilə, a ce dwí rí tɛ̀bɛ́ lyì bí yə̀ kɔn tɛ̀bɛ́ rə̀ n’ê zɛ̃̀ wu ni lyì n’ê byili pyə̀-tənèsé lũ w púlə́púlə́ mó wẽ́. ⁵ Zhərəzalɛm, wɔ́ mɔ̌ lò ń mà n dùr ǹ nɔ̀nɔ̀, mɔ̌ lò ń mà n zwẽ ǹ nyí ni ? Mɔ̌ lò ń mà n zɛ̃̀ ń la ǹ yò bwə̌rh ? ⁶ Ǹ zhɔ̃̀ nɛ, ǹ ká vò ǹ kwã nɛ́, wɔ́ Bə-zhɔ-zhe ń zɔ̀m ; sə nyǐ à zhẽ̌ à jɛ̃̀ ǹ yó à n’â cɔ̀ mɔ́, à lyɛ̀ɛ̀, à nyɛ̌r nɔ̀nɔ̀ dǔr mó. ⁷ À zhǐ tənà y bwə̀ə̀lé səta à n’â cèlè à dwí rí ǹdə jíjí ta ; à n’â gwi rə̀ bə̀sɔ́ná bɛ́, à n’â ce à dwí rí jé tɛ̃́, rə̀ gə́ yə̀ kwɛ̃̀ rə̀ bə rə̀ kwã nɛ́ rə̀ yẽ̌ rə̀ sɔ́msɛ́ nɛ mɔ́ yilə. ⁸ Rə̀ ejə̀nə̀ bé zɛ̃̀ bə já dɛ̃́dɛ̃́ bə̀ du nə̀-fɔ̀lɔ̀ w nyí ni nyɔ̀rhɔ́ wá ; à m’a ce cə-cɔ̀rna mɔ́ jàr jàr n bə̀ nə̀nyɛ́nɛ́ sǎmpɛ̀rɛ́, n ce wu-zhùlù ǹdə́ wu-zɛ̃̀ɛ̃́ nánfwɛ̀lɛ̀ zə ébɔ́-dǎl ná. ⁹ Kɛ̃ mɔ́ ńmyɛ̌ mɔ̀bɔ́ ń yà ń lùl byǎ bwàlpyɛ̀ y mɔ́ wu-zhìlì, ǹ cì ; ń yi rí zù nə̀nyɛ́nɛ́ ǹdə́ yi gwẽ̌ zhǐ dɛ̃̌ ; cìzhìl pú mu ń wu gùlí dwã nɛ. A zɛ̃̀ a kwè byɛ̀bɛ́ bə̀ kùr rí dàl mɔ́ a ce bə̀ zwə̀ bé jɔ̃̀ wa, wɔ́ Bə-zhɔ-zhe ń zɔ̀m. ¹⁰ À ná, nyǐ zwini zhe ne, ǹ gə́ lùl ne mó yilə, nyǐ à wɔ́ lò mɔ̀bɔ́ ń wɔ́ tənà y lyì bí gakó nyə̀pə̀-màrna ǹdə́ bə̀ búlə́ cə́bal, à t’â jimì kaka lò sono, lò myɛ tá ń jìmì kaka àmyɛ sono yé, e jà ǹdə́ rə̀myɛ ga, lyì bí gakó j’â n’ê bwəl bwelé námməlwɛ̀lɛ́ bə̀ pɛ nɛ. ¹¹ Sə Bə-zhɔ-zhe wə̀lə̀ : Zhə̀n zhə̀nà, dɔnɔ kwã nɛ́ ǹ m’ǎ yə̀ wu-nyɔ̀ cə́bal, zhə̀n zhə̀nà, zwini ǹdə́ wu-zhìlù gə tú è zhe ǹ zwə̀ bé yi ní, à m’a nyɛ́ɛ́ bɛ bə bə̀ ń sono bə lwə̀l ǹ sɛ̃ɛ̃́. ¹² Cɔ̀bɔ́ nə wɔ̌ ò m’a mà lũ jə̀-gwã̀ sõ cɔ̀bɔ́ w o ká, o mà kàmɔ̃ w myɛ o ká ? ¹³ À m’a pə ǹ jɛ̃̀-kɔn rɛ́ ǹdə́ ǹ wẽ̀ ré ǹ zhe mó lyì ni bə bubu ǹ tənà y gakó wẽ́ ǹ yə̀-bəlwàálɛ́ gakó yilə. ¹⁴ À m’a ce ǹmyɛ́ ǹdə́ ǹ zù-bal mɔ́ gal lyɛ̃ á vò tə̀nà kɛ̀bɛ́ ǹ yə̀l è par mɔ́ wẽ́, bə̀ nyǐ à lyim rí zɛ̃̀ rə kwɛ̃́ myǐn mə̀ n’ê jí á yó. ¹⁵ Ǎ Bə-zhɔ-zhe, nyǐ ǹ yě kɔn gakó, lyǐrh à yò, ǹ bə̀ká ń swě à yò yé, cĩ́ à jim lyì bí byɛ̀bɛ́ bə̀ n’ê nwɛ̀nɛ̀ nɛ mɔ́ yó ! Ǹ bə̀ká tə̀ ǹ gə́ nə́ ǹ pyɛ́nɛ́ ǹ lyim t’a zɛ̃̀ làlà mɔ́ yil ń vùr ne yé ! Lwar bə̀ wɔ́ ǹmyɛ́ yil à shɛ̀nɛ́ fuulu mú yò. ¹⁶ À zwẽ ǹ zɔ̀mà nɛ́, à jú ni ; ǹ zɔ̀mà nɛ́ ce a fùù ǹdə́ wu-nyɔ̃̀ à wẽ́ ; Bə-zhɔ-zhe, jàn cìnə́ bé gakó cǐnnə Yi, nyǐ ǹ yil ré n’ê byẽ̀ à yó ! ¹⁷ À t’â tó mɔ̀nna nɛ à jòm bə̀ dwã gùlú jàà w yé, mùnì e m’e pə nɛ wu-nyɔ̃̀ yé ; sə wɔ́ ǹmyɛ́ jàndɛ́ rə̀ ce à jě à dúdú, bə̀ ń ce à wu w sú ǹdə́ lyim nánfɔ̀lɔ̀. ¹⁸ È nə wɔ́ bə̀kɔ́n yil à lyààrɛ́ j’â ŋwɛ́nɛ́ twéé twéé rə̀ t’â zhɛ̀, è nə wɔ́ bə̀kɔ́n yil à nyəlɛ́ rɛ́ j’â ŋwɛ́nɛ́ rə̀ n’ê yì dɛ̃́dɛ̃́ rə̀ t’â zhɛ̀mɔ́ ? Ǹ nə m’ǎ yə̀ ǹdə nə̀-bùlì kɛ̀bɛ́ è n’ê swèlè lò nyí ta à yil nà, ǹdə wɔ́ nɛ̃̌ mɔ̀bɔ́ lò bə mə zhə̀n zhe ta nà ? ¹⁹ Wɔ́ rə̀myɛ́ yilə, Bə-zhɔ-zhe nə́ ń zɔ̀m ń zhe : Ǹ gə ká n zə ǹ cìn shɛlɛ àmyɛ́ nɛ, à m’a lyár mɔ́, ǹ mà ń zɛ̃̀ ń zhì à yé né ; ǹ gə pɔr wẽ̀ tɛ̀bɛ́ rə̀ zhe kùrə̀, ǹdə́ tɛ̀bɛ́ rə̀ kùr zhe mó dwã wa, rə̀myɛ́ yi ní ǹ m’ǎ yə̀ ǹdə à nyí rí ta. Lwar bə̀ wɔ́ bə̀myɛ́ bə̀ mə̌ sə bək’á bə̀ ǹ sono, s’e də̀ ǹmyɛ́ ǹ mə̌ sə́ k’á bə̀ bə̀myɛ́ sono yé. ²⁰ À m’a ce ń jǐrh ǹdə kàmmɔ byílí ta dwí rí tɛ̀bɛ́ yilə ; rə̀ lyì bí m’a zɛ̃̀ búlə́ ǹdə́ mɔ́, sə bə̀ t’â la mɔ́ ŋwɔ̀nɔ́ yé ; bə̀ nyǐ à m’a yə̀ nɛ́ ǹdə́ mɔ́, a zwẽ mó, a vwǎrh mɔ́, wɔ́ Bə-zhɔ-zhe ń zɔ̀m. ²¹ À m’a vwǎrh mɔ́ lyì bə-lwàálsɛ́ jɔ̃̀ wa, à m’a zwẽ mó jàn cìnə́ bé jɔ̃̀ wa.