¹ Bə-zhɔ-zhe zɔ̀m ǹdə́ nɛ n wɔ̀ : ² Ǹ bə̀ká ń pyà kɛ̃ jú nyɔ̀nɔ̀ gaga, bə̀ nyǐ jàà y kɛ̀bɛ́ wẽ́, ǹ tá ǹ la bal-byǐ nɔ, ǹ tá ǹ la kɛ̃-byǐ myɛ nɔ è wẽ́ yé. ³ Bə̀ nyǐ Bə-zhɔ-zhe zɔ̀m kɔn rɛ́ tɛ̀bɛ́ rə̀ la bala-byǎ bɛ́ ǹdə́ kana-byǎ bɛ́ byɛ̀bɛ́ bə̀ dabá la lúl nyɔ̀nɔ̀ mɔ́, ǹdə́ bə̀ nábá byɛ̀bɛ́ la bɛ lúl mó, ǹdə́ bə̀ dabá bɛ́ byɛ̀bɛ́ bə̀ la bɛ lúl nyɔ̀nɔ̀ mɔ́ nɛ yú mú, shò kwã nɛ́ mɔ́ n wɔ̀ : ⁴ Címí námməlwɛ̀lɛ́ la bɛ gu ; bə̀ t’â la bɛ kúrh yé, bə̀ t’â la bɛ lú-bɔ̀là w co yé, Bə̀ m’a pyẽ̀ cɛ y yó ǹdə pùlú ta ; Búlə́ shù ǹdə́ nɔrh nánfɔ̀lɔ̀ m’a gu bi ; Bə̀ cùù rí m’a pyẽ̀ tɛ̃́ rə̀ yə̀ dɛ̃̌ kúmsi ǹdə́ vwàmá kùjú. ⁵ Bə-zhɔ-zhe kə́ n zɔ̀m n wɔ̀ : Ǹ bə̀ká ń vò zù kɛ̀lɛ́ kɛ̀bɛ́ cu cù è wẽ́ mó w yé, ń tó è lyì bí ni ń kúrh ń wɛ̀rhɛ́ wu-zhùlù yé ; bə̀ nyǐ a vùr à yə̀-zùlə́ né ǹdə́ à wu-bɔ̀nɔ̀ w ǹdə́ à nɔ̀nɔ̀ dǔr mó, dwí rí tɛ̀bɛ́ wẽ́, wɔ́ Bə-zhɔ-zhe ń zɔ̀m. ⁶ Náncɛrh ǹdə́ bə̀sɔ́ná m’a cì tənà y kɛ̀bɛ́ wẽ́ ; bə̀ t’â la bɛ kúrh gaga yé, bə̀ t’â la bɛ lú-bɔ̀là w co gaga yé, lò tá ń yala kǎr bə̀ cu yil yé, lò tá ń la ń yó fɔ́n bə̀ yil yé. ⁷ Bə̀ t’â la búrú kɔ́ dwã w bə pə lò ne bə̀ m’e zə ń wu ni bə̀ ń lò cù yil yé, bə̀ t’â la də̀vɛ̃́ kǎzɔ̌m w co bə pə lò n nyɔ̀ bə m’e zə ń wu ni bə̀ ń da ráá ń ná cù yil yé. ⁸ Ǹ bə̀ká ń vò ń zù kɛ̀lɛ́ kɛ̀bɛ́ címsi n’ê jí è wẽ́ mó w ń tó è lyì bí ni ń jòm, ń tó be ń jí ń tó be ń nyɔ̀ yé. ⁹ Bə̀ nyǐ Bə-zhɔ-zhe, mɔ̀bɔ́ ń cǐ jàn cìnə́ bé mó, Esərayɛl Yi rí, zɔ̀m n wɔ̀ : Nyǐ à m’a ce wu-nyɔ̃̀ búbwéésé, ǹdə́ fùwə́ búbwéésé, ǹdə́ bal ǹdə́ kɛ̃ dwã jú nwíísí jé tɛ̃́ á yírhə́ wə, ǹdə́ á dwã nɛ́ wẽ́ ¹⁰ Ǹ gə tú ǹ bwə̀l ywẽ̀ né nyɛ̀bɛ́ mɔ́ gakó ń byili dwí rí tɛ̀bɛ́ lyì bí ni, nyǐ bə̀ la mɔ́ wál : Wɔ́ byè yil Bə-zhɔ-zhe zɛ̃̀ ń nə́ ń pupuri tɛ̃́ ń mə́ ń zɔ̀m zwini rí tɛ̀bɛ́ mɔ́ gakó yò mó ? Nə́ dóó w wɔ́ bə̀kɔ́n dwí yò ? Wɔ́ yə̀-bəlɔ̀lɔ́ dwí tɛ̌ nə́ m’é gwar Bə-zhɔ-zhe, nə́ Yi rí mú ? ¹¹ Ǹ mà ń zɛ̃̀ ń lyár bɛ ń wɔ̀ : Á dabá yẽ̌ ne, wɔ́ Bə-zhɔ-zhe ń zɔ̀m, á dabá dùr yə dwã kwã nɛ́, bə̀ wɛ̀rhɛ́ ǹdə nə̀ gə́ n’ê yǎl nɛ́, bə wùlì nə̀ yé né ; á dabá yẽ̌ ne, bə̀ yə̀ wɛ̀rhɛ́ ǹdə à nyə́ né gə́ n’ê byili ní yé. ¹² Sə ámyɛ̌ gaga mɔ́ kwɛrhɛ á wɛ̀rhɛ́ lwɛlɛ á dwene á dabá ; á mə̀dù gakó j’â wɔ́ ń wu bùlə̀ né námməlwǎlsɛ́ kùr ń nə́ ń tó, ce á t’á cili à zɔ̀mà nɛ́ gaga yé. ¹³ Rə̀myɛ́ ce, à la ce bə̀ zə ába bə m’e vò tənà kɛ̀bɛ́ ámyɛ̌ ǹdə́ ába ga yə̀ è pár lwar gaga mɔ́ wẽ́ ; èta, á m’ǎ vò á zhì gàà mɔ́ á cèrhé yə né dwã bɛ́ cəcɛ̃ ǹdə́ nə̀nyɛ́nɛ́ ga gàà mɔ́, sə àmyɛ́ k’â t’â la sónó a sɛ̃ ába gaga yé. ¹⁴ Wɔ́ rə̀myɛ́ yilə, nyǐ dwã ŋwɛ́nɛ́ nə̀ bànà, wɔ́ Bə-zhɔ-zhe ń zɔ̀m, nə̀myɛ́ yi ní, bə̀ k’ê t’â la wál : Bə-zhɔ-zhe wɔ́ nã́nyì, wɔ́ ńmyɛ̌ ń vùr Esərayɛl lyì byǎ bɛ́ Ezhibti ní yé ! ¹⁵ Bə̀ m’a k’a zhe : Bə-zhɔ-zhe wɔ́ nã́nyì, wɔ́ ǹmyɛ̌ ń vùr Esərayɛl lyì byǎ bɛ́ lũ jə̀-gwã̀ sõ cɛmɛ nɛ́ nyɛ̀bɛ́ gakó bə̀ jì bí bə vò nə̀ wẽ́ mó wẽ́ ! À m’a k’a zə bɛ bə̀ tənà y wa, tənà y à y’à pɔ bə̀ dabá nɛ mɔ́. ¹⁶ Nyǐ nyɔ̀nɔ̀, à m’a twĩ̀ gwànnà nánjə̀jóló bə̀ b’e gwɛ̃̀ bɛ ; wɔ́ Bə-zhɔ-zhe ń zɔ̀m, rə̀myɛ́ kwã nɛ́, a m’a k’a twĩ̀ gɔ-jílnə nánjə́jóló bə bà, bə jì bi pyàr rɛ́ ǹdə́ pyǎlsɛ́ ǹdə́ pyə̀-égwə̀ə́lé gakó wẽ́. ¹⁷ Bə̀ nyǐ à yírhə́ pyǎ bə̀ tùntwə̃̀ə̃̀ né gakó yó à n’â nyǐ, nə̀ yə̀ à yé né shèè gaga yé, Bə̀ lwɛlɛ rɛ́ t’â la jó à yé né yé. ¹⁸ À m’a ji kùr a kwɛ̃̌ bɛ bə̀ lwɛrɛ rɛ́ ǹdə́ bə̀ yə̀-bəlwàálɛ́ kwã̌dɛ twər kùrə̀ nə̀lyè, bə̀ gə́ co à tənà y sú jìmdì, bə̀ gə́ ce à cəl tənà y sú ǹdə́ bə̀ yə nã́-cùù rí, bə̀ gə́ ce e sú ǹdə́ bə̀ pwarha tumə né mó yilə. ¹⁹ Bə-zhɔ-zhe, ǹ wɔ́ à jàn rɛ́, ǹmyɛ́ nɛ à zhí, ǹ wɔ́ à shòò jàà zhini dɛ̃ ! Sə tənèsé lyì bí m’a shí lũ cə-yala nɛ́ gakó w bə bə̀ zhì ǹ yé né, bə̀ zhe : Nyǐ nə́ dabá wɔ́ kɔma bɛ́ bə̀ yàl bə̀ cəl kɔn rɛ́ bə̀ nɔwa, yə nyɛ̀bɛ́ bɛ́ nə̀ wɔ́ kɔn nánfò, nə̀ wàr kaka nə̀ wɛ̀rhɛ́ yé. ²⁰ Numbyíní nə wɔ̌ è wɛ̀rhɛ́ yə è cìn nì, yə̀ né nə̀myɛ́ mɔ́ zɛ̃̀ nə́ wɔ́ yə ? ²¹ Wɔ́ rə̀myɛ́ è ce, nyǐ nyɔ̀nɔ̀, èlǎsɛ̃́ à m’a ce bə lwar, à m’a ce bə lwar à ŋwɔ̀nɔ́ ǹdə́ à jàn rɛ́ párá ; bə̀ zɛ̃̀ bə lwar b’à yil ré wɔ́ Bə-zhɔ-zhe.