¹ Bə̀ zɔ lù ku bə m’e kɛ̃ Zhidə yə̀-bəlɔ̀lɔ́ wá, bə̀ zɔ jamã è nyí rí nã́sə́sɛ́mɛ́ bə m’e kɛ̃ wa, bə̀ kɛ̃ w bə̀ wun ní bwèlè y yó, bə̀ kɛ̃ w á vwĩ̀-jùúlí nyimə né yó. ² Ǹdə bə̀ byǎ bɛ́ yò gə́ zù bi ní ta mɔ́, wɔ́ èta bə̀ vwĩ̀-jùúlí, ǹdə́ bə̀ yə né nə̀ ŋwɛ́nɛ́ Ashəra pyǎlsɛ́ sə̀ yó du dɛ̃̌dɛ̃̌ mɔ́, sə̀ pú ǹdə́ cèmé dúdú mú səta mɔ́ myɛ yò gə́ zù bi ní mú ta. ³ À m’a ce bə zə mɔ́ bə bubu à pyɔ̀ w ǹdə́ ò cɛsɛ́, ǹdə́ ò nə̀cɛ̀ndɛ́, ǹdə́ ò kɔn tɛ̀bɛ́ gakó ò zhe mó, ǹdə́ ǹ vwĩ̀-jùúlí ǹ jàà y ǹ cǐ mú nyí rí gakó wẽ́, ǹ yə̀-bəlwàálɛ́ yilə. ⁴ Bə̀ m’a zə mɔ́ bə zwẽ ǹ cəl tənà y à y’à pɔ mɔ́ mɔ́ ǹ jɔ̃̀ wa ; À m’a ce ń vò ń yə̀ ǹ zù-bal yóm tənà kɛ̀bɛ́ ǹ yə̀l è pár wẽ́ ń twĩ̀ ń pɔ̃́ ; Bə̀ á zɛ̃̀ à lyim rí ni rə kwɛ̃́ myǐn, sə rə̀ m’a j’â zhe myǐn gaga. ⁵ Bə-zhɔ-zhe zɔ̀m n wɔ̀ : Bwelé námməlwɛ̀lɛ́ ŋwɛ́nɛ́ ǹdə́ lò mɔ̀bɔ́ ń co ǹ cìn numbyíní jɔ̃̀ w mɔ́, lò mɔ̀bɔ́ ń zhí numbyíní ni mú, n zɛ̃̀ n pyìrhí ń wu w n yẽ̌ Bə-zhɔ-zhe ne mó ! ⁶ Ń nyɛ̌ ǹdə zúzúnú cə́bal mɔ̀bɔ́ ń ŋwɛ́nɛ́ gɔ-elũ èpòlò w ta, ń yírhə́ bə wu-nyɔ̃̀ də́-byǐ nɛ ń la nɔ yé ; ń jě gɔ-elũ èpòlò jààsɛ shɛ̀bɛ́ sə̀ jú myǐn wẽ́, cɛ kɛ̀bɛ́ è wɔ́ nə̀kwə̃̌ jàà lò lò bə è wẽ́ jě yé. ⁷ Sə bwəl náàcɛ̀nɛ́ ŋwɛ́nɛ́ ǹdə́ lò mɔ̀bɔ́ ń zhí Bə-zhɔ-zhe ne mó, è wɔ́ Bə-zhɔ-zhe sono ń nə́ ń dɛ̃̀ kɔn nɛ́ mɔ́ ! ⁸ Rə̀-ná-cí nyɛ̌ ǹdə wɔ́ cǒ kɔ̀bɔ́ ò zhele nɛ̃̌ nyí ni ta, ò nèsé n’ê tɛ sə̀ la nə̀-dùrmə̀ səta ; cə-lumu gə ŋwɛ́nɛ́ myɛ ò yə̀l yé, ò vɔr rɛ́ zhǐ nánlyàr ; də̀-kùlù gə tú byin myɛ, ywẽ bə w zhe gaga yé, ò t’â cẽ byǎ co yò yé. ⁹ Numbyíní wu w wɔ́ wu námməjóló kɔn gakó wẽ́, ò wɔ́ lwɛlɛ kɔn : È nə wɔ́ mɔ̌ lò ń wɔ̌ ò yé-shò ń la lwar ? ¹⁰ Wɔ́ àmyɛ́ Bə-zhɔ-zhe, à wɔ̌ à nɛ kɔn tɛ̀bɛ́ rə̀ ŋwɛ́nɛ́ ò wẽ́ mó, a lwar ò bùlə̀ né párá, a zɛ̃̀ a kwɛ̃̌ lò gakó ne kɔn tó ǹdə́ ń tumə né gə́ yàl nɛ́ mɔ́ nɛ́ ta, kɔn tó ǹdə́ byǎ bɛ́ ń tumə né co mó ta. ¹¹ Nyǐ lúwə́ y’a zwǎ càlà nyɛ̀bɛ́ è yə̀ ji yé, kɔn wɔ́ èta ǹdə́ lò mɔ̀bɔ́ ń nə́ ń tó yǔyǔ sɔ́má ń mə́ ń pyà nə̀cɛ̀ndɛ, ń dwã nɛ́ nyɛ̀bɛ́ ń mə̌ sə n zhǐr n yẽ̌ ne mó cəcəl wə, è la vò e m’e gu yó mó, n púrí ń wɔ́ bə surhə zhe cə́bal. ¹² Pyɛ̀lɛ̀ də̀-gwã́ èdù è zhe zùwə́ ŋwɛ́nɛ́ dɛ̃̌ yi w kùrju yi ní ga, wɔ́ èmyɛ́ è wɔ́ nə́ Yi jì y jàà yá, ¹³ Ǎ Bə-zhɔ-zhe, wɔ́ ǹmyɛ́ yó w Esərayɛl n’ê nyǐ ní ! Cìzhìl n’ê pwí lyì byɛ̀bɛ́ gakó bə̀ n’ê yẽ̌ mó mó, byɛ̀bɛ́ bə̀ n’ê kwɛ̃̀ bə̀ yẽ̌ mó mó yilə né kɛ̃ cə-shó w wẽ́, Bə-zhɔ-zhe, bə̀ lyì bí bə̀myɛ́ mɔ́ yẽ̌ nɛ̃̌ nə̀bùlì y è n’ê nyǔ mú mú ni ¹⁴ Bə-zhɔ-zhe, wárh nɛ, mùnì ga a nə bəsàzùlí ; vwǎrh nɛ, mùnì ga a lú ; bə̀ wɔ́ ǹmyɛ́ ǹ nə́ ǹ zhẽ̌ à yó dɛ̃̌. ¹⁵ Nyìwé, bə̀ n’ê zɔ̀m ǹdə́ nɛ bə̀ zhe : Wɔ́ yẽ̀ Bə-zhɔ-zhe zɔ̀mɛ̀ rɛ́ ŋwɛ́nɛ́ ? Sə rə pyìrh wɛ̀ ! ¹⁶ Sə è gə wɔ́ àmyɛ́ yilə, à yə̀ cẽ à la yə̀ dwí rí kálna yé, ce à shɛ̀nɛ́ à m’a wɛ̀rhɛ́ ǹdə ǹ gə́ byili ní ; ǹ yě re, à yə̀ zwini dɛ̃ rɛ́ yǎl yé ; kɔn dɛ̀bɛ́ rə̀ du à nyú mú yàl pamparɛ̃ɛ̃ ǹ yé né. ¹⁷ Ǹ bə̀ká ń yə̀ wu-zɛ̃̀ɛ̃́ kɔn à yil yé, bə̀ ǹmyɛ́ wɔ́ à zwini dɛ̃ shòò jàà ! ¹⁸ Ce cìzhìl pú byɛ̀bɛ́ bə̀ n’ê nwɛ̀nɛ̀ nɛ mɔ́, sə bə̀ká ń yẽ̌ cìzhìl pú àmyɛ́ nɛ yé ; ce bə̀ kəkə, sə àmyɛ́ bə̀k’a kəkə yé ! Ce zwini dɛ̃ b’e jòm bə̀ yó, ce nyəla kùrə̀ nə̀lyè zə bɛ e yə̀ bə̀ còrhò-tum ! ¹⁹ Bə-zhɔ-zhe zɔ̀m ǹdə́ nɛ n wɔ̀ : Zɛ̃̀ ń vò ń zhì Esərayɛl lyì byǎ bɛ́ bwə̀rə̀ y kɛ̀bɛ́ Zhidə pyǎ bɛ́ y’a tó bə zù, bə̀k’a tó y bə shə́r mó nyí ni, ǹdə́ Zhərəzalɛm bwə̀rsé gakó nyí ni. ²⁰ Ń wɔ̀ bɛ : Ámyɛ̌ Zhidə pyǎ bɛ́, ǹdə́ Zhidə lyì bí gakó, ǹdə́ ámyɛ̌ byɛ̀bɛ́ gakó á jě Zhərəzalɛm nɛ́ mɔ́, á n’á tó bwə̀rsé shɛ̀bɛ́ á m’á zwì mú, cili-nə ! ²¹ Bə-zhɔ-zhe nə́ ń zɔ̀m ń zhe : Dɛ̃̌-na á cìnə̀ ; á bə̀k’á shɛ̀nɛ́ á zwĩ zwĩĩ shìrhə́ dɛ̃ rɛ́ yù w á m’á tó Zhərəzalɛm bwə̀rse á m’á zù gaga yé. ²² Á bə̀k’á kwè zwĩĩ rə̀dù ga á sõ jù w shirhə́ dɛ̃ rɛ́ yù w á m’á du yé, s’á bə̀k’á twĩ̀ tum rə̀dù ga myɛ shìrhə́ dɛ̃ rɛ yé, bə̀ yẽ̌-nə shìrhə́ dɛ̃ rɛ́ yə̀ Bə-zhɔ-zhe dɛ̃, ǹdə à gə́ pɔ á nàmbala bɛ́ nɛ nyí ní ta. ²³ Sə nyǐ á nàmbala bɛ́ yə̀ cili yé, bə̀ yə̀ bə̀ zhɛ̃̌ pyèrhè bə cili yé ; bə̀ kùl bə̀ wun ní, bə̀ yə̀ cili sə bə zwẽ còrhò yé. ²⁴ Sə ámyɛ̌ gə cili à zɔ̀mà nɛ́, á gə yə̀ zhĩĩ zhĩ á m’á tó cɔ w kɔ̀bɔ́ bwə́rsé á zù shìrhə́ dɛ̃ rɛ́ yùwə̀, á yẽ̌ shìrhə́ dɛ̃ rɛ́ yə̀ Bə-zhɔ-zhe dɛ̃, á gə yə̀ tum rə̀dù ga twĩ̀ dɛ̃ rɛ́ rə̀myɛ́ mɔ́ yùwə̀, wɔ́ Bə-zhɔ-zhe ń zɔ̀m, ²⁵ rə̀myɛ́ nyi ní, Dəvyidi pyɛ̀lɛ̀ də̀gwã́ y pyǎ bɛ́ ǹdə́ bə̀ yé né cìnə́ bé gə zɛ̃̀ bə̀ n’ê jòm eshə-vwɛ̃tur rí ǹdə́ eshəsé bə̀myɛ́ ǹdə́ bə̀ yé né cìnə́ bé ǹdə́ Zhidə lyì bí, ǹdə́ Zhərəzalɛm lyì bí m’e tó cɔ w kɔ̀bɔ́ bwə̀rsé bə̀ zwì, èta lyì m’a jòm cɔ w kɔ̀bɔ́ wẽ́ twéé twéé gakó. ²⁶ Rə̀myɛ́ yó né, lyì m’a shí Zhidə cɛmɛ nɛ́ wẽ́ ǹdə́ cɛmɛ nɛ́ nyɛ̀bɛ́ nə̀ kə́kɛ́lɛ́ Zhərəzalɛm mɔ́ wẽ́, Bɛ̃zhamɛ tənà y wa, ǹdə́ pyǎlsɛ pyàr rɛ́ kùr w mó wẽ́, ǹdə́ lũ kùr sõ pyɔ̀ w wẽ́, bə zə paánsɛ ǹdə́ wẽ̀ rə̀ lwẽ́ nã́nyə̀nyɛ̌lsɛ́, bə m’e b’e zwə́l Yi nə̀bán co vwə̃̀ bə pə Bə-zhɔ-zhe ne ń jì y wə. ²⁷ Sə á gə yə̀ cili, á cẽ á yə̀ yẽ̌ shìrhə́ dɛ̃ rɛ́ yə̀ Bə-zhɔ-zhe dɛ̃, ǹdə à gə́ pɔ ába nyí, à wɔ̀ bə̀ á bə̀k’á zhĩ zwĩĩ rə̀dù ga á m’á tó Zhərəzalɛm bwə̀rsé á zù shìrhə́ dɛ̃ rɛ́ yù w gaga mɔ́, s’á lwar bə̀ à m’a ji myǐn Zhərəzalɛm bwə̀rsé nyí ni, mə̀ m’a jí Zhərəzalɛm pyə̀-kǎlsɛ́, sə mə̀ t’â la cú gaga yé.