¹ Bə-zhɔ-zhe zɔ̀m ǹdə́ Zheremyi n wɔ̀ : ² Zɛ̃̀ ń vò də-mɔrna mɔ́ sõ kɛ̀lɛ́ wa, ǹ gə yú gàà mɔ́, à m’a byili mú kɔn dɛ̀bɛ́ à la zɔ̌m mɔ́. ³ A zɛ̃̀ a vò də-mɔrna mɔ́ sõ kɛ̀lɛ́ wa, a yí a púrí ǹdə́ ń nə́ n mwɛ nə̀zhĩ̌. ⁴ Sə nə̀zhĩ̌ y ń yà ń nə́ ń mwɛ mɔ́ bə shɛ̀ nyí zõ ǹdə dɔ gə́ y’a bə shɛ̀ mɔ yò də-mɔrna jɔ̃̀ w nɛ́ mɔ́ ta ; n zɛ̃̀ n ká n kwɛrhɛ n mɔ nə̀zhĩ̌ dõ, ǹdə ń gə́ nə́ ń yǎl nɛ́. ⁵ Bə-zhɔ-zhe kə́ n zɔ̀m ǹdə́ nɛ wɔ̀ : ⁶ Esərayɛl kɛ̀lɛ́ lyì, à nə wàr à m’a wɛ̀rhɛ́ ába ǹdə də-mɔrna mɔ́ mɔ̀bɔ́ ta nà ? Wɔ́ Bə-zhɔ-zhe ń zɔ̀m. Nyǐ-na wé, ǹdə dɔ gə́ y’a yə̀ də-mɔrna jɔ̃̀ w nɛ́ mɔ́ ta, Esərayɛl kɛ̀lɛ́ lyì, wɔ́ èta ámyɛ ŋwɛ́nɛ́ nɛ́ à jɔ̃̀ w nɛ́ ! ⁷ Nyǐ dɛ̃ ŋwɛ́nɛ́ à y’a zɛ̃̀ à n’â zɔ̀m tə̀nà shò kwã nɛ́, à n’â zɔ̀m pyə̀-tənà shò kwã nɛ́, à zhe b’à la y mǔr, à la y wǔr, à la y cɔ̌ ; ⁸ Sə tənà y kɛ̀bɛ́ à zɔ̀m è yò mó gə yẽ̌ è lwɛlɛ rɛ́ nɛ, à m’a yẽ̌ lwɛlɛ rɛ́ à y’à bùl à wẽ́ à la y wɔ̀rhɔ́ mɔ́ nɛ. ⁹ Nyǐ dɛ̃ myɛ k’ê ŋwɛ́nɛ́ à y’a zɛ̃̀ à n’â zɔ̀m tə̀nà shò kwã nɛ́, à n’â zɔ̀m pyə̀-tənà shò kwã nɛ́, à zhe bə̀ à la y lú, bə̀ à la y zholo ; ¹⁰ Sə tənà y èmyɛ́ gə zɛ̃̀ è wɛ̀rhɛ́ lwɛlɛ à yìrhə na, è t’â cili à zɔ̀mà nɛ́, à m’a yẽ̌ cɛ̀nɛ̀ rɛ́ à y’à n’â yǎl a wɛ̀rhɛ́ y mɔ́ nɛ. ¹¹ Èlǎsɛ̃́, zɛ̃̀ ń zɔ̀m ǹdə́ Zhidə lyì bí ǹdə́ Zhərəzalɛm lyì bí, ń wɔ̀ : Nyǐ-nə Bə-zhɔ-zhe nə́ ń zɔ̀m ń zhe : Nyǐ à n’â tɛnɛ zwini à la ába pɔ, à n’â tɛ́rɛ́ kɔn à wẽ́ à la m’a bú ǹd’ába. Yẽ̌-nə á sɔ́msɛ́ námməjə́ə́lé ne, s’á k’á bə̀ á kwã nɛ́, kwɛrhɛ-na á sɔ́msɛ́ ǹdə́ á tũ̀twə̃̀ə̃̀ né ! ¹² Sə bə̀ zɛ̃̀ bə̀ zhe : Kaka tə̀ gàà yé ! Nə́ m’ǎ cə̀ə̀le nə́ n’é tó nə́ bùlə̀ né ne, nə́ m’é wɛ̀rhɛ́ ǹdə nə́ wun bùlə̀ né námməlwǎlsɛ́ gə̀ n’ê yǎl nɛ́. ¹³ Wɔ́ rə̀myɛ́ è ce Bə-zhɔ-zhe zɔ̀m n wɔ̀ : Zɛ̃̀-na á bwə̀rh tənèsé ! Á nyǐ wɔ́ mɔ̌ lò ń gwẽ̌ nyɛ̀ɛ̀ kɔn rɛ́ rə̀myɛ́ mɔ́ dwí rí ? Esərayɛl kɛ̃ byǐ y è yə̀l bal pár mɔ́ twĩ̀ pwarha tum kɔn lyɛ̃ cɛ nɛ. ¹⁴ Wàr yi ni nɛ̃̌ mɔ́ mɔ̀bɔ́ mə̀ n’ê zal dwã nɛ mɔ́ nə y’a yẽ̌ Ləbã pyàr rɛ́ cɛsɛ́ wẽ́ pyõ̌ ne nà ? Ráá bə̀ y’a nə nàná bɛ́ bə̀ n’ê dùr bə̀ shí yé né gaga bə̀ twí mú y’a wĩ nà ? ¹⁵ Sə nyǐ àmyɛ́ dwí rí swě à yò, rə̀ n’ê ji wẽ̀ rə̀ lwẽ̀ nã́nyə̀nyɛ̀lɛ́ myǐn rə̀ pɛ yə dwã nɛ ; rə̀ zhə̀l rə kwè rə̀ sə̀pwà sɔ́msɛ, rə̀ n’ê mà rə̀ nèrh, rə yẽ̌ shãã ga sɔ̀msɛ́ nɛ, rə̀ m’ê tó sɔ́msɛ shɛ̀bɛ́ sə̀ yə̀ kɔ̀rh yé. ¹⁶ à dwí rí lyì bí ce bə̀ tənà y jǐrh wu-zhùlù kɔn, lyì n’ê mɔ̀n twéé twéé ; lyì byɛ̀bɛ́ bə̀ n’ê tó gàà mɔ́ gakó wun zhìlì bə̀ n’ê zhízhí bə̀ ywẽ́. ¹⁷ À m’a jì bi bə̀ zwə̀ bé yé né bə làà dɛ̃̌ ǹdə zho gə́ y’a ce o shí yi-púrhí sõ mó né ta, à m’a pyìrhí à kwã a zǎ bɛ, à t’â la bə̀ sõ nyǔ bə̀ zúzúnú dɛ̃ yù w yé. ¹⁸ Bə zɛ̃̀ bə̀ n’ê zɔ̀m bə̀ zhe : Bà-nà nə́ pyà yò nə́ cĩ́ Zheremyi yó ! È gə də̀ rə̀myɛ́, nyǐ, vwĩ̀-zwə́lnə gə j’â ŋwɛ́nɛ́ nɛ́, sə̀ nyǐ nyə́ né còrhò mó t’â la jó yé, surhə cìnə́ gə j’â ŋwɛ́nɛ́ nɛ́, sə́ nyǐ cúcú mú t’â la jó yé, nyì-zwennə gə j’â ŋwɛ́nɛ́ nɛ́, sə́ nyǐ Yi zɔ̀mɛ̀ rɛ́ bwə̌l e byili mú t’â la jó yé. Rə̀myɛ́ ce, bà-nà, gu-nə nə́ gu mu ǹdə́ nə́ mə̀jə̀ə̀lé ; nə́ bə̀k’á nyǐ ń zɔ̀mà nɛ́ nyɛ̀bɛ́ ń nə́ ń zɔ̀m mɔ́ rə̀dù ga sono yé. ¹⁹ Sə Bə-zhɔ-zhe cili à zɔ̀mɛ̀ ! sə́ ń pyèrhè ń zhɛ̃̌ ń cili à zwə̀ bé gə́ n’ê zɔ̀m nɛ́ ! ²⁰ Bə̀ nə y’a càrh lwɛlɛ cɛ̀nɛ̀ jàà w nà ? Nyǐ bə̀ kù gɔ́rɔ́ bə̀ la m’e vùr à myə̌l. Ǹ y’ǎ lyǐrh kɔn rə̀dù, nyǐ à zhì ǹ yé né a zə ǹ cã̌ nɛ bə̀ yilə, mùnì ń yẽ̌ ǹ lyim rí rə̀ zɛ̃̀ bə̀ yó mó ne. ²¹ Wɔ́ rə̀myɛ́ è ce, ce nɔrh nánfɔ̀lɔ̀ zə bə̀ bə̀sɔ́ná bɛ́, ce búlə́ shù jàr jàr o gu bə̀ bə̀sɔ́ná bɛ́ ; sə bə̀ kana bɛ́ lyɛ̃̀ bə̀sɔ́ná, bə jǐrh ejə̀nə̀, sə címí námməlwɛ̀lɛ́ gu bə̀ byə́nə́ bé ; sə búlə́ shù gu bə̀ èbwá-dálá bɛ́ búlə́ jàà wa ! ²² Sə lyì zɛ̃̀ bə̀ nyɛ̌ wìísi sə̀ n’ê wǔrh bə̀ kǎlsɛ́ wa, ǹdə́ ǹ gə́ tú ǹ jàr jàr ǹ ce lyì zə búlə́ wẽ̀ bə b’e pú bi yi ní ! Bə̀ bə̀ kù gɔ́rɔ́ bə̀ la m’e zə nɛ, bə̀ bə̀ pàm pɔ̀mɔ̀ à gə́ n’â tó mə̀gã̌. ²³ Sə ǹmyɛ́, Bə-zhɔ-zhe, ǹ yě kɔn dɛ̀bɛ́ bə̀ shə̀l bə cĩ́ bə̀ la m’ê vùr à myə̌l mó párá, ǹ bə̀k’á pə bɛ bə̀ lwɛlɛ rɛ́ sǔbri yé, ǹ bək’á pɔ́pɔ̌ bə̀ yə̀-bəlɔ̀lɔ́ w ǹ yé né yé ! Ce bə tu tɛ̃́ ǹ yé né ! Bú ǹdə́ bɛ ǹdə́ ǹ lyim rí gə tú rə̀ zɛ̃̀ yi ní.