¹ Bə-zhɔ-zhe zɔ̀m n wɔ̀ : Zɛ̃̀ ń vò ń yè kɔ̀lɔ́ də-mɔrna sono, sə́ zə dwí rí náncɛrh ǹdə́ vwĩ̀-zwə́lnə náncɛrh sə tó mó. ² Ń vò bə̀ gə́ n’ê mwɛ nə́kwánsɛ́ mə̀gã̌ bwə̀rə́ y ń du ń vò Bɛn-Yɔnɔm nə̀-gɔ̀lɔ̀ w wa, ń zhì gàà mɔ́, ń bwə̀l zɔ̀mà nɛ́ nyɛ̀bɛ́ à la mɔ́ byilu mú, ³ ń wɔ̀ : Zhidə pyǎ ǹdə́ Zhərəzalɛm lyì, cili-nə Bə-zhɔ-zhe zɔ̀mà nɛ́ ! Nyǐ Bə-zhɔ-zhe mó ń cǐ jàn cìnə́ bé mó, Esərayɛl Yi rí n’ê zɔ̀m rə̀ zhe : Nyǐ à m’a ce zwini b’e zə jàà y kɛ̀bɛ́, sə lò mɔ̀bɔ́ gakó zwini rí rə̀myɛ́ mɔ́ la ń zhɛ̃̌ w tu mú, wu-zɛ̃̀ɛ̃́ nánfwɛ̀lɛ̀ m’a zə rə̀-ná-cí. ⁴ Bə̀ bə̀ yẽ̌ ne, bə̀ co jàà y kɛ̀bɛ́ jìmdi, bə̀ ju wẽ̀ rə̀ lwẽ́ nã́nyə̀nyɛ̀lɛ́ myǐn bə̀ pə yə dwã nɛ, yə nyɛ̀bɛ́ bə̀myɛ́ ǹdə́ bə̀ nàmbala bɛ́ ǹdə́ Zhidə pyǎ bɛ́ yə̀l nə̀ pár mɔ́ nɛ, bə ló lyì byɛ̀bɛ́ bə̀ dóó zhe jal tɛ̃́ mə sú jàà y kɛ̀bɛ́ kókó ; ⁵ Bə̀ lù vwĩ̀-jùúli bə pə Baalɛ nɛ, bə̀ n’ê zal bə̀ byǎ bə̀ zwə́l vwə̃̀ námpúmə́ bə̀ ji myǐn bə̀ pɛ Baalɛ nɛ : E j’à yə̀ rə̀myɛ́ mɔ́ nyí kɛ̃ a pə yé, rə̀myɛ́ mɔ́ yə̀ à bùlə̀ wẽ́ twí gaga yé. ⁶ Wɔ́ rə̀myɛ́ yilə, nyǐ dwã ŋwɛ́nɛ́ nə̀ bànà, wɔ́ Bə-zhɔ-zhe ń zɔ̀m, bə̀ k’ê t’â la jàà y kɛ̀bɛ́ byõ̌ bə̀ Tɔfɛɛtɛ, bə̀ t’â la y byõ̌ bə̀ Bɛn-Yɔnɔm nə̀-gɔ̀lɔ̀ myɛ yé, nyǐ bə̀ m’a k’â n’ê byẽ̀ y bə̀ numbyínsi gu e ləlɛɛ tɛ̃́ jàà. ⁷ À m’a ce kɔn dɛ̀bɛ́ Zhidə lyì bí ǹdə́ Zhərəzalɛm lyì bí n’ê cící dwã bə̀ la wɔ̀rhɔ́ mɔ́ t’â la kùr zal jàà y kɛ̀bɛ́ wẽ́ yé, à m’a ce bə tu lyì bí bə̀ n’ê pyà bə̀ myə̌l vǔr mó jɔ̃̀ wa, a ce bə̀ zwə̀ bé gu bi ǹdə́ búlə́ shù ; a ce bə̀ cùù rí yə̀ kùjú, a pə dɛ̃̌ y w kúmsí ǹdə́ vwàmá nɛ́ cɛ y yó mó ne rə jí. ⁸ À m’a ce cɔ w kɔ̀bɔ́ jǐrh wu-zhùlù ǹdə́ mɔ̀n jàà ; kɔn m’a jàr lyì byɛ̀bɛ́ gakó bə̀ la tó gàà mɔ́ bə lyɛ̃ mɔ́, bə zɛ̃̀ bə̀ n’ê wúl fyìlsi cɔ w cɔ̌ mɔ́ èta mɔ́ gakó mó yilə. ⁹ À m’a ce bə̀ dɔ̃̀ bə̀ bala-byǎ ǹdə́ bə̀ kana-byǎ nàmá, a ce bə dɔ̃̀ dwã nàmá, bə̀ zwə̀ bé ǹdə́ lyì bí byɛ̀bɛ́ bə̀ n’ê pyà bə̀ myə̌l vǔr mó gə́ la bɛ wɔ̀rhɔ́ nɛ́ ma mɔ́, wu-zhùlù w ǹdə́ zúzúnú w bə̀ la nɔ mɔ́ cəcəl wə. ¹⁰ Rə̀myɛ́ kwã nɛ́ ǹ mà ń zɛ̃̀ ń lo nə́kwɛ́nɛ́ y lyì bí byɛ̀bɛ́ bə̀ tó mó bə vò mó yírh wə. ¹¹ Sə́ zɛ̃̀ ń wɔ̀ bɛ : Nyǐ Bə-zhɔ-zhe mó ń cǐ jàn cìnə́ bé mó zɔ̀m n wɔ́ : Nyǐ wɔ́ èta à la dwí rí tɛ̀bɛ́ ǹdə́ cɔ w kɔ̀bɔ́ nɛ́ lo né, ǹdə bə̀ gə́ y’a lo də-mɔrna nə́kwɛ́nɛ́, è k’ê wàr è la dwã w co né ta. Èta bə̀ m’a nyɛ́ɛ́ cùù rí ce dwã yó Tɔfɛɛtɛ nɛ́, bə̀ jàà y k’ê t’â la nɔ jàà dõ w bə m’e ce cùù ri ní yé. ¹² Wɔ́ èta à la jàà y kɛ̀bɛ́ ǹdə́ è lyì bí ní wɔ̀rhɔ́, wɔ́ Bə-zhɔ-zhe ń zɔ̀m, À m’a ce cɔ w kɔ̀bɔ́ jǐrh ǹdə Tɔfɛɛtɛ ta. ¹³ Zhərəzalɛm jìsí ǹdə́ Zhidə pyǎ bɛ́ jìsí m’a zə jìmdi ǹdə Tɔfɛɛtɛ jàà y ta, sə jǐrh jààsɛ shɛ̀bɛ́ gakó bə̀ n’ê ji wẽ̀ rə̀ lwẽ́ nã́nyə̀nyɛ̀lɛ́ myǐn sə̀ lyarha nɛ́ yó bə̀ pə càmmə́sɔ̌rh nɛ dɛ̃̌ yi w mú ni mú, bə̀ n’ê lwé də̀vɛ̃́ tɛ̃́ yə dwã yé né lyarha nɛ́ yó mó. ¹⁴ Zheremyi ká n kwɛ̃̀ n shí Tɔfɛɛtɛ, Bə-zhɔ-zhe gə́ y’ǎ twĩ̀ mu n vò n bwə̀l Yi zɔ̀mɛ̀ rɛ́ n byili mə̀gã̌ mɔ́ n ká n bà. N zɛ̃̀ n zhì Bə-zhɔ-zhe jì y kɔ̀nɔ́ w wa, n zɔ̀m ǹdə́ dwí rí lyì bí gakó n wɔ̀ : ¹⁵ Nyǐ-nə kɔn tɛ̀bɛ́ Bə-zhɔ-zhe mó ń cǐ jàn cìnə́ bé gakó mó, Esərayɛl Yi rí zɔ̀m mɔ́, ń wòwə̀ : Nyǐ à la ce zwini rí tɛ̀bɛ́ à dámǎ à zɔ̀m rə̀ yò cɔ w yil mó, bə̀ rə jòm òmyɛ́ ǹdə́ cɛmɛ nɛ́ nyɛ̀bɛ́ ò cǐ mú gakó yó, ò lyì bí gə́ wɛ̀rhɛ́ yó-kùlù bə̀ yə̀ à zɔ̀mà nɛ́ cili mú yilə.