¹ Rə̀myɛ́ yó né, Yəmɛɛrɛ byǐ, vwĩ̀-zwə́lnə Pəshuuri mú ń yà ń wɔ́ Bə-zhɔ-zhe jì y yó-cə́bal mɔ́ mɔ́, nyɛ̀ɛ̀ ywẽ̀ né nyɛ̀bɛ́ Zheremyi yà ń nə́ ń bwə̀l ń byili mú. ² Pəshuuri já n zɛ̃̀ n mà Zheremyi, n zə mɔ n ce byə̀nə́-jì y è ŋwɛ́nɛ́ Bɛ̃zhamɛ bwə̀rə́ y è wɔ dɛ̃̌ sõ bə̀ n’ê tó bə̀ zwì Bə-zhɔ-zhe jì y w mú wə. ³ E cɛ zɛ̃̀ nəkɔkɔlɛ́ y Pəshuuri ce bə vùr Zheremyi byə̀nə́ jì y wə. Zheremyi zɛ̃̀ n wɔ̀ Pəshuuri ni : Nyǐ Bə-zhɔ-zhe kə́ ń tá ń byẽ̀ mó bə̀ Pəshuuri yé, ń co ǹ yil bə̀ Magɔrɛ-Məsəbyibi. ⁴ Bə-zhɔ-zhe nə́ ń zɔ̀m ń zhe : Nyǐ kɔn zhí zà, à m’a ce ǹmyɛ́ ǹdə́ ǹ dɔwabá gakó jǐrh wu-zɛ̃̀ɛ̃́ kɔna ; ǹ dɔwabá zwə̀ bé m’a gu bi ǹdə́ búlə́ shù, ǹ cìcì mú yírhə́ m’a nə rɛ. À m’a ce Zhidə lyì bí myɛ gakó Babyəlɔnɛ pyɔ̌ jɔ̃̀ wa, n zə bɛ n mə n vò yóm re jè Babyəlɔnɛ nɛ́, n gu bi ǹdə́ búlə́ shù. ⁵ À m’a ce cɔ w kɔ̀bɔ́ lyì bí zwə̀ bé pwà bə̀ nə̀cɛ̀ndɛ́ gakó, ǹdə́ bə̀ kɔn tɛ̀bɛ́ bə̀ twĩ̀ bə nə mɔ́ gakó, ǹdə́ bə̀ wẽ̀ tɛ̀bɛ́ rə̀ càn dɛ̃́dɛ̃́ du mú gakó, à m’a ce Zhidə pyǎ bɛ́ zwə̀ bé pwà bə̀ nə̀cɛ̀ndɛ́ tɛ̀bɛ́ bə̀ pyà bə cĩ́ dɛ̃̌ mɔ́ gakó, bə bubu ri, bə zə rɛ bə m’e vò Babyəlɔnɛ. ⁶ Sə Pəshuuri, lwar bə̀ bə̀ m’a zə ǹmyɛ́ ǹdə́ lyì bí byɛ̀bɛ́ bə̀ ŋwɛ́nɛ́ ǹ sõ kɛ̀lɛ́ w mɔ́ gakó á vò yóm re jè ; ǹ m’ǎ vò Babyəlɔnɛ, wɔ́ gàà mɔ́ ǹ m’ǎ cì ní, bə ce mó gàà mɔ́, ǹmyɛ́ ǹdə́ ǹ dɔwabá byɛ̀bɛ́ gakó ǹ gòm kɔma bɛ́ ń pə bɛ bə̀ ǹ wɔ́ nyì-zwennə mó. ⁷ Bə-zhɔ-zhe, ǹ swèlè ne, sə à zwẽ à sòlò mó nyí ; ǹ zɔ nɛ, sə ǹ ŋwɛ̀nɛ́ nɛ. Dɛ̃ gakó à jǐrh mɔ̀n kɔna, lyì bí gakó n’ê mɔ̀nà. ⁸ À gə j’â la zɔ̌m gakó, kɔn wɔ́ nyɔ́ɔ́ s’a búbwéé a ce, a búbwéé a byili à nyǐ wɔ́ jàn tumə ǹdə́ cɛ cɔ̌ yò ! Bə-zhɔ-zhe zɔ̀mɛ̀ rɛ́ zɛ̃̀ rə jǐrh cìzhìl ǹdə́ tùùrhi kɔn à yil dɛ̃ gakó. ⁹ À gə zɛ̃̀ à wə̀lə̀ : À k’â tâ la ń yò lyǐrh, à k’â tâ la ń yil ré zɔ̀mà zɔ̌m, e jà ǹdə́ rə̀myɛ́ ga, kɔn n’ê jí à wẽ́ ǹdə myǐn ta, mə̀ co à kúr rí dwã w mə̀ n’ê jí, a zɛ̃̀ à n’â pyà mə̀ pyɔ́nɔ́, sə à wàr mɔ yé. ¹⁰ À zhã̌ nyɛ̌ lyì nánzhəzhɔ̌ n’ê zɔ̀m zɔ̀mà nyɛ̀bɛ́ nə̀ bə càn à yil yé, bə̀ n’ê zɔ̀m wu-zɛ̃̀ɛ̃́ zɔ̀mà cə-yala gakó w bə̀ zhe : Cĩ́-nə yò ń yó, nə́ m’ǎ zɛ̃̀ nə́ ce cà ń nyí ni ! Rə̀myɛ́ yó né, lyì bí byɛ̀bɛ́ gakó nə́ y’ǎ jě ǹdə́ yə̀-zùlə́ mó j’a zɛ̃̀ bə̀ n’ê myə̀lɛ́ nɛ bə̀ nyǐ à gə́ m’a tu tɛ̃́ nɛ́ ; Bə̀ m’ê zɔ̀m bə̀ zhe : Dɛ̃̀ga n gə ń mà n yẽ̌ lyì bí jàr mɔ́ bə zə ǹdə́ ń yə̀l yé, èta nə́ m’a zɛ̃̀ nə́ ŋwɛ́nɛ́ mɔ nə́ cĩ́ nə́ jim ń yó. ¹¹ Sə nyǐ Bə-zhɔ-zhe ŋwɛ́nɛ́ ǹdə́ nɛ ǹdə búlə́ kã̀dɔ nánfɔ̀lɔ̀ ta ; Wɔ́ rə̀myɛ́ è ce, byɛ̀bɛ́ bə̀ n’ê nwɛ̀nɛ̀ nɛ mɔ́ m’a tu, bə̀ t’â la bɛlɛ jú à yó yé ; kɔn tɛ̀bɛ́ bə̀ n’ê pyà bə̀ la wɔ̀rhɔ́ mɔ́ gə́ yə̀ nyí zwẽ mó ce, bə̀ m’a zhizhiri dɛ̃̌ : È m’a yə̀ cìzhìl rə̀ la bɛ zal twéé twéé bə̀ t’â la rə̀ yò sǒ yé. ¹² Bǝ-zhɔ-zhe mó ń cǐ jàn cìnǝ́ bé mó, nǝ́ ń zhẽ̀ wu-cágá cǝ́bal, n zù ń wẽ́. À yírhǝ́ b'a nǝ ń gǝ́ la à yò cõ bǝ̀ yé né mó, bǝ̀ wɔ́ yó w à n'â nyǐ ní. ¹³ Nún-nǝ Bǝ-zhɔ-zhe, zǔl-nǝ Bǝ-zhɔ-zhe! Bǝ̀ wɔ́ ńmyɛ̌ ń nǝ́ n zwẽ zúzúnú cǝ́bal lyì-bǝlwɛ̀lɛ́ jɔ̃̀ wa ¹⁴ Dɛ̃ rɛ́ tɛ́bɛ́ à ná lùl ne mó yál bwəl námməlwɛ̀lɛ́ dɛ̃ ! Bə̀ dɛ̃ rɛ́ tɛ̀bɛ́ à ná lùl ne mó yó bə̀k’a cĩ́ bwəl yé ! ¹⁵ Bwəl námməlwɛ̀lɛ́ jǒm lò mɔ́ mɔ̀bɔ́ ń tú n pə nyí rí rə̀myɛ́ mɔ́ à da nɛ n wɔ̀ : Nyǐ bə̀ lùl bal-byǐ bə pɔ̃́, n ce à da wu sú ǹdə́ wu-nyɔ̃̀ w mɔ́ ! ¹⁶ Bə̀ lò mó ńmyɛ́ mɔ́ yál ǹdə cɛmɛ nɛ́ nyɛ̀bɛ́ Bə-zhɔ-zhe yə̀ nə̀ nɔ̀nɔ̀ dùr n cɔ̀ nɛ mɔ́ ta ! Sə n nyɛ̀ɛ̀ wu-zhùlù búbwéése nəkɔkɔ́lɛ́ nɛ́, n nyɛ̀ɛ̀ búlə́ myɛ búbwéése nə̀nyɛ́nɛ́ cəcəl wə ! ¹⁷ È nə wɔ́ byè yil ń yə̀ ce a cì à ná wẽ́ ! Ń yə̀ ce à ná pwǐ yə̀ à lú-bɔ̀l ! Ń yə̀ ce à ná pwǐ y j’a mɛ̃ nɛ́ gaga ń bə̀ká n lù yé ! ¹⁸ Wɔ́ bə̀kɔ́n yil à du à ná wẽ́ mó, a m’a nə lyààrɛ́ ǹdə́ zwini rí tɛ̀bɛ́, à dwã nɛ́ j’a yə̀ cìzhìl dwã cɛ yó mó ?