¹ Wɔ́ zɔ̀mɛ́ rɛ́ Bə-zhɔ-zhe zɔ̀m n byili Zheremyi ni, ǹdə́ pyɔ̌ Sədəcaasɛ twĩ̀ Pəshuuri byǐ Mələkəja, ǹdə́ Maasɛja byǐ Sofoni mú ń wɔ́ vwĩ̀-zwə́lnə mó ń sono bə̀ bə̀ wál mɔ : ² Bə̀ ń yál yi ni, n vò n zɔ̀m ǹdə́ Bə-zhɔ-zhe nə́ yilə, nyǐ Bəbyəlɔɔnɛ pyɔ̌ Nəbəkadɔnɔzɔɔrɛ nə́ ń bwí ǹdə́ nə́ba, dɛ̀ga, Bə-zhɔ-zhe mà n wɛ̀rhɛ́ ń màmyaarhɛ́ òdù, mùnì ga Nəbəkadɔnɔzɔɔrɛ kwɛ̃̀ n vò kwã nɛ́ n yẽ̌ nə́ba. ³ Zheremyi lyár n wɔ̀ : Zhəl-na á wɔ̀ Sədəcaasɛ nɛ : ⁴ Bə̀ ń nyǐ kɔn rɛ́ dɛ̀bɛ́ Esərayɛl Yi rí zɔ̀m mɔ́ : Nyǐ-na wé, à m’a pyìrhí á búlə́ né wẽ̀ ré tɛ̀bɛ́ rə̀ ŋwɛ́nɛ́ á jɔ̃̀ w á m’á bwí ǹdə́ Bəbyəlɔɔnɛ pyɔ̌ mɔ́ pwẽ̀ ne byílí y kwã nɛ́ mɔ́, ǹdə́ tɛ̀bɛ́ á m’á bwí ǹdə́ Kalədənyɛ̃bá bə̀ ŋwɛ̀nɛ́ ába bə̀ zwẽ á cɔ w kɔ̀bɔ́ bə̀ jě mó, à m’a ce bə bə̀ dwã yó cɔ w òmyɛ́ cəcəl wə. ⁵ A zɛ̃̀ a cèlè à jɛ̃̀ y è zhe jàn dɛ̃́dɛ̃́ mɔ́, a bú ǹdə́ ába ǹdə́ wu-zhìlù ǹdə́ lyim nánfɔ̀lɔ̀. ⁶ A ce cím-bəlwɛ̀lɛ́ bə̀ e gu numbyínə́ bé ǹdə́ vwàmá nɛ́ nə̀ wɔ cɔ w kɔ̀bɔ́ wẽ́ mó. ⁷ Rə̀myɛ́ kwã nɛ́, Bə-zhɔ-zhe kə́ n wɔ̀ : À m’a ce Zhidə pyɔ̌ Sədəcaasɛ ǹdə́ ń lyì-fwààlɛ́, ǹdə́ lyì bí byɛ̀bɛ́ bə̀ ŋwɛ̀nɛ́ bə lú búlə́ shù w ǹdə́ nɔrh mɔ́ yé né cɔ w kɔ̀bɔ́ wẽ́ mó, bə̀myɛ́ byɛ̀bɛ́ bə̀ ŋwɛ̀nɛ́ bə lú Bəbyəlɔnɛ pyɔ̌ mɔ́ ǹdə́ bə̀ zwə̀ bé, ǹdə́ lyì bí byɛ̀bɛ́ gakó bə̀ y’à n’ê pyà bə̀ myə̀lə́ vǔr mó jɔ̃̀ w mɔ́. Bəbyəlɔnɛ pyɔ̌ mɔ́ mà n gu bə̀ nánzhəzhɔ̌, ń tá ń la bə̀ nɔ̀nɔ̀ dǔr yé, ń tá ń la bə̀ mə̀dù ga myɛ nɛ yõ̌ n lú yé, kaka myɛ t’â la ń bùlə̀ né lyə́r myɛ yé. ⁸ Sə è gə wɔ́ dwí rí tɛ̀bɛ́ yilə, Nyǐ kɔn rɛ́ dɛ̀bɛ́ Bə-zhɔ-zhe wò bə̀ wál rɛ mɔ́ : Nyǐ-nə à cĩ́ nyǔ sɔ́má ǹdə́ cu sɔ́má á yé né á la cír. ⁹ Lò mɔ̀bɔ́ ń gə mɛ̃ cɔ w kɔ̀bɔ́ wa, nyǐ wɔ́ búlə́ shù, ǹdə́ nɔrh ráá wɔ́ cím-bəlwɛ̀lɛ́ rə̀ la mɔ gu ; sə lò mɔ̀bɔ́ ń du cɔ w kɔ̀bɔ́ w n vò Kalədənyɛ̃bá byɛ̀bɛ́ bə̀ zwẽ cɔ w bə̀ jě ò wẽ́ mó sono, rə̀-ná-cí mà n zə myə̌l, ń myə̌l ré yə̀ ǹdə́ wɔ́ ń kɔn ń kwè ń zwə̀ sono búlə́ kwã nɛ́ ta. ¹⁰ Bə̀ nyǐ à yírhə́ zù cɔ w òmyɛ́, à la w lwɛlɛ wɔ̀rhɔ́, è də̀ cɛ̀nɛ̀ yé, wɔ́ Bə-zhɔ-zhe ń zɔ̀m rə̀myɛ́ ; ò m’a tu Bəbyəlyɔɔnɛ pyɔ̌ mɔ́ jɔ̃̀ wa, n ji w myǐn. ¹¹ Ǹ mà ń wɔ̀ Zhidə kɛ̀lɛ́ y pyɔ̌ mɔ́ nɛ : Cili Bə-zhɔ-zhe zɔ̀mɛ̀ rɛ́ ! ¹² Sə́ wɔ̀ Dəvyidi kɛ̀lɛ́ y lyì bí ni, nyǐ kɔn rɛ́ dɛ̀bɛ́ Bə-zhɔ-zhe zɔ̀m mɔ́ : Cɛ gə lɔ́ nəkɔkɔ́lɛ́, s’á kə́ bùrsí sə tó cángá, lò mɔ̀bɔ́ ń gə nə́ ń nwɛ̀nɛ̀ ń dõ, s’á zwẽ mo mɔ̀bɔ́ ń nə́ ń nwɛ̀nɛ̀ mɔ mɔ́ jɔ̃̀ wa, è gə də̀ rə̀myɛ́ à lyim m’a zɛ̃̀ ǹdə myǐn ta, lòlò wàr mɔ ń la cú yé, á wu-bárhɛ́ tumə né yilə. ¹³ Nyìwé, èlǎsɛ̃́ wɔ́ ǹmyɛ́ à yírh zùwə̀, ǹmyɛ́ cɔ w kɔ̀bɔ́ ò jě vɔlɔ w wa, jə́ y nə́kulu ò zɛ̃̀ dɛ̃̌ mɔ́ yó mó, wɔ́ Bə-zhɔ-zhe ń zɔ̀m rə̀myɛ́, ámyɛ̌ byɛ̀bɛ́ à n’á wə̀lə̀ : Wɔ́ mɔ̌ lò ń mà n só tɛ̃́ n bə̀ n bú ǹdə́ nə́ba, wɔ́ mɔ̌ lò ń mà n ŋwɛ̀nɛ́ n bə̀ n zù nə́ shòò jààsɛ́ wẽ́ ?» ¹⁴ À m’a pə ába còrhò-tum rə mɛrhɛ dwã ǹdə́ á tũ̀-twə̃̀ə̃̀ né ta, wɔ́ Bə-zhɔ-zhe ń zɔ̀m rə̀myɛ́ ; à m’a ji ǹ tú w myǐn, sə ò myǐn mú m’a jí kɔn dɛ̀bɛ́ rə̀ bwə́l ò nyí ni mú gakó.