¹ Bə-zhɔ-zhe byẽ̀ ne n wɔ̀ : Zɛ̃̀ ń vò Zhidə pyɔ̌ mɔ́ sõ kɛ̀lɛ́ wa, ń byili mu zɔ̀mɛ̀ rɛ́ tɛ̀bɛ́, ² ń wɔ̀ mɔ : Zhidə pyɔ̌, cili Bə-zhɔ-zhe zɔ̀mɛ̀ rɛ́, ǹmyɛ́ mɔ̀bɔ́ ǹ jě Dəvyidi pyɛ̀lɛ̀ rɛ́ də̀gwã́ y yó mó, ǹmyɛ́ ǹdə́ ǹ kwã-lyì bí ǹdə́ dwí rí n’á tó pyɔ̌ kɛ̀lɛ́ y bwə̀rsé shɛ̀bɛ́ á zwì è wẽ́ mó ! ³ Bə-zhɔ-zhe nə́ ń wə̀l ába : Wɛ̀rhɛ́-na kɔn dɛ̀bɛ́ rə̀ wɔ́ cángá, rə j’a mə̌ mɔ́, s’á zwẽ lò mó mɔ̀bɔ́ ń dõ mó nə́ ń nwɛ̀nɛ̀ mɔ mɔ́ ń jɔ̃̀ wa ; bə̀k’á wɛ̀rhɛ́ lwɛlɛ zhəl-bal ǹdə́ bə̀tɛ̀lɛ́ ǹdə́ ejə̃̀-kɛ̃ nɛ́ yé ; bə̀k’á wɛ̀rhɛ́ jàn tumə lyì bí ni yé, bə̀k’á ló lò mɔ̀bɔ́ ń yə̀ dwé jal tɛ̃́ ń nə̀mɔ̀ɔ̀rɛ yó jàà y kɛ̀bɛ́ wẽ́ yé. ⁴ Lwar-na bə̀ á gə́ wɛ̀rhɛ́ ǹdə zɔ̀mɛ̀ rɛ́ gə́ byili ní, sə́ nyǐ pyǎ m’a jòm Dəvyidi pyɛ̀lɛ̀ də̀gwã́ y yó, bə̀ jòm búlə́ eshə-vwə̃tur, bə jòm eshərh, bə̀myɛ́ ǹdə́ bə̀ kwã-lyì bí ǹdə́ bə̀ dwí rí m’ê tó pyɔ̌ kɛ̀lɛ́ y bwə̀rsé shɛ̀bɛ́ bə̀ zwì. ⁵ Sə á gə yə̀ zɔ̀mà nɛ́ nyɛ̀bɛ́ èta mɔ́ cili, sə á lwar bə̀ à n’â bwəl nyí à pɛ à cìn ni, nyǐ kɛ̀lɛ́ y kɛ̀bɛ́ m’a wǔr e ló tɛ̃́ e jǐrh jì-bwə̀r ; wɔ́ Bə-zhɔ-zhe ń zɔ̀m rə̀myɛ́. ⁶ Nyǐ zɔ̀mɛ̀ Bə-zhɔ-zhe zɔ̀m Zhidə pyɔ̌ mɔ́ yilə : Ǹ nyɛ̌ ǹdə Galaadɛ ta à yilə, ǹ nyɛ̌ ǹdə Ləbã pyɔ̀ w yə́-pɛ̀lɛ́ è zhə̀l dẽ̌ mó ta à yilə, sə ǹdə́ rə̀myɛ́ ga à m’a ce ń jǐrh gɔ-elũ èpòlò, cɔ kɔ̀bɔ̀ lòlò bə ò wẽ́ jě mó. ⁷ À n’â tɛnɛ cɔ̀rna bə̀ bàn bú ǹdə́ mɔ́, mə̀dù gakó ǹdə́ ń búlə́ wẽ̀ ; Bə m’a kà ǹ sədɛ́ɛ́rɛ́sɛ́ shɛ̀bɛ́ sə̀ càn dɛ̃́dɛ̃́ mɔ́, bə dol myǐn wə. ⁸ Tənèrh lyì nánzəzhɔ̌ gə tú bə̀ n’ê tó cɔ w òmyɛ́ nyí ni bə̀ lyɛ̃, bə̀ m’a zɛ̃̀ bə̀ n’ê zɔ̀m ǹdə́ dwã bə̀ zhe : Wɔ́ etər Bə-zhɔ-zhe wɛ̀rhɛ́ cɔ w kɔ̀bɔ́ nánfɔ̀lɔ̀ w èta mɔ́ nɛ́ ? ⁹ Sə lyì m’a lyár bɛ bə wɔ̀ : Wɔ́ cɔ w lyì bí gə́ yẽ̌ bə-zhɔ-zhe, bə̀ Yi rí dɔbrɛ́ nɛ, bə zɛ̃̀ bək’a n’ê wùlì yə dwã yé né bə̀ cèrhé ne mó yilə. ¹⁰ Zhidə lyì, á bə̀k’á kúrh lò mɔ̀bɔ́ ń cù ni yé, sə á wun bə̀k’a zhìlì ń yil yé ; à gə la kúrh, s’á kúrh mɔ̀bɔ́ ń la ń kə́ ń tá ń kwɛ̃̀ ń bàn ń kwã nɛ́ mɔ́ nɛ, bə̀ rə̀-ná-cí kə́ ń tá ń la tənà y kɛ̀bɛ́ ń lùl è wẽ́ mó nɔ gaga yé. ¹¹ Wɔ́ èta Bə-zhɔ-zhe zɔ̀m nɛ́, Zhɔzhaasɛ byǐ Səshəlum Zhidə pyɔ̌ mɔ́ yil né né, wɔ́ ńmyɛ̌ ń yà ń cǐ pyɛ̀lɛ̀ rɛ́ ń da Zhɔzhaasɛ jàà wa, sə ń du jàà y èmyɛ́ mɔ́ wẽ́ : ń kə́ ń tá ń bàn ń kwã nɛ́ gaga yé. ¹² Ń la vò n cì bə̀ gə́ zɔ mɔ bə̀ vò yóm ré jè y mə̀gã̌, ń yírh k’ê t’â la tənà kɛ̀bɛ́ yó jǒm gaga yé. ¹³ Zwini b’a zə lò mɔ̀bɔ́ ń la ǹ jì lú ǹdə́ yǔyǔ tumə mó, ń lù jìrh dwã è yó ǹdə́ lwɛlɛ wẽ̀ mó ; ń nə́ ń ce ń dõ twĩ̀ nánfò ń pɛ mɔ, ń tá ń pɛ mɔ ń kwǎndɛ́ yé ; ¹⁴ Ń nə́ wə̀l ń wẽ́ ń zhe : À m’a lù à sə̀pwà jì nánfwɛ̀lɛ̀, ǹdə́ è dɛ̃̌ yó jìrh, sə̀ wun zə wàn ; a ce sə̀ túkwə́rse, a zə sɛ́ɛ́dɛrɛ dǎr a zù yə́, a fwàl y nánshɛ̃̀ gwɛ̃́gwɛ̃́ ! (Le verset 14) ¹⁵ Ǹ nə́ bùl bə̀ wɔ́ ǹ gə́ só sɛ́ɛ́dɛrɛ y yil ǹ jǐrh wɔ́ pyɔ̌ ? Ǹ da nə́ yà ń tá ń jí nà ? ń tá ń nywɛ̃̀ nà ? sə ǹdə́ rə̀myɛ́ ga ń wɛ̀rhɛ́ kɔn dɛ̀bɛ́ rə̀ wɔ́ cángá, ń wɛ̀rhɛ́ kɔn dɛ̀bɛ́ rə̀ mə̌, n yə̀l wu-nyɔ̃̀ cə́bal. ¹⁶ Ń kɔ́ nə̀mɔ̀ ǹdə́ zúzúnú cə́bal kùrsi cɛ̀nɛ̀, rə̀myɛ́ ce ń yàl wu-nyɔ̃̀ cə́bal. È nə də̀ tũ̀-twĩ̀ĩ̀ rí rə̀myɛ́ dwí rí rə̀ n’ê byili bə̀ lò yě àmyɛ́ pár mɔ́ nà ? Wɔ́ Bə-zhɔ-zhe ń zɔ̀m rə̀myɛ́. ¹⁷ Sə ǹmyɛ́ yírhə́ né ǹdə́ ǹ wu w wɔ́ lũ w wẽ̀ ré ǹ nə́ ǹ pyà ǹ tá ǹ swí yé, ǹdə́ jàn tumə wɔ̀rhɔ́, ǹdə́ lò mɔ̀bɔ́ ń bə dóó zhe mó jal tɛ̃́ ló mó, tum ǹ nə́ ǹ twĩ̀. ¹⁸ Rə̀myɛ́ mɔ́ ce, Zhɔzhaasɛ byǐ Zhojakim, Zhidə pyɔ̌, nyǐ Bə-zhɔ-zhe zɔ̀mɛ̀ rɛ́ ń zɔ̀m ǹ yil mó : Ǹ gə cù dɛ̃, lyì t’â la zɛ̃̀ bə̀ n’ê kúrh mó bə̀ zhe : Wɔ́ bə̀kɔ́n dwí yò ǹdə́ kɔ̀bɔ́, da-byǐ yé ! Wɔ́ bə̀kɔ́n yò ǹdə́ kɔ̀bɔ́, da-bə̀kɔ́ yé ! N gə cù dɛ̃, lyì t’â la zɛ̃̀ bə̀ n’ê kúrh mó bə̀ zhe : Wɔ́ bə̀kɔ́n dwí yò, Cǐnnə, yé ! Wɔ́ bə̀kɔ́n dwí yò, ǹmyɛ́ mɔ̀bɔ́ ǹ mə̌ ǹdə́ còrhó mó, yé ! ¹⁹ Bə̀ m’a ce mo ǹdə bə̀na cùù ta : bə fwàl mɔ́ tɛ̃́ bə vò bə dwĩ̀ Zhərəzalɛm bwə̀rsé kwã nɛ́ gaga. ²⁰ Zhərəzalɛm, zɛ̃̀ ń vò Lyəbã pyàr rɛ́ yə́-pɛ̀lɛ́ wa, ń búbwéé ń ce ǹ cəl du dɛ̃̌ Bashã nyí rí wẽ́. Ń jì ń zhì dɛ̃̌ Abərəyim yə́-pɛ̀lɛ́ w ń búbwéé : bə̀ nyǐ bə̀ nɔ̀m lyì bí byɛ̀bɛ́ bə̀ só mo mó gakó tɛ̃́ bəbɔbwɛlɛ. ²¹ À dámǎ a zɔ̀m rɛ a byili mú ǹdə́ ǹ gə́ yà ǹ gwẽ̌ só ǹ cìn yi ní. Rə̀myɛ́ yi ní ǹ yà ǹ lyár nɛ ń wɔ̀ : À bə zɔ̀mà nɛ́ nə̀myɛ́ mɔ́ cilu tum zhe yé.» Wɔ́ èta ǹ wɛ̀rhɛ́ nɛ́ ǹ bə̀sɔ́nɛ́ yi ni ga ; ǹ yə̀ à zɔ̀mà nɛ́ cili yé. ²² Zho m’a zə ǹ lyì bí byɛ̀bɛ́ bə̀ n’ê kál ǹ dwí rí mú o m’o jé, lyì zə ǹ lyì bí byɛ̀bɛ́ bə̀ só mó mó bə m’e vò yómre jè ; èta ǹ m’ǎ zɛ̃̀ ń nə cìzhìl ǹ wu zhizhuru, ǹ wu-bárhɛ́ tumə né nə̀myɛ́ mɔ́ gakó yilə. ²³ Ǹmyɛ́ mɔ̀bɔ́ ǹ jě Lyəbã nɛ́ mɔ́, ǹ cĩ́ ǹ jǎl rɛ́ sɛ́ɛ́dɛrɛbá cəcəl w mó, nyǐ wɔ́ twər màngala, zwini la mɔ́ zal rə yì mú, ń zɛ̃̀ ǹ nə́ ǹ wɔ́wɔ́lɛ́, ǹdə kɛ̃ pwǐ gə́ y’a zɛ̃̀ è n’ê yì mù, n zɛ̃̀ ń nə́ ń wɔ́wɔ́lɛ́ nɛ́ ta ! ²⁴ Àmyɛ́ wɔ́ nã́nyì ! Wɔ́ Bə-zhɔ-zhe ń wə̀l rə̀myɛ́, má Zhowəcim byǐ Kɔnəya, Zhidə pyɔ̌ mɔ́, gə yà ń wɔ́ jə̀-fɔ́lɛ́ cìbyìbí à jə̀-jĩ́ jɛ̃̀ y nɛ myɛ a vùr mo gàà mɔ́. ²⁵ A yẽ̌ mó a ce lyì bí byɛ̀bɛ́ bə̀ n’ê pyà ǹ gu mú jɔ̃̀ wa, byɛ̀bɛ́ ǹ nə́ ǹ kəkə bə̀ yé né mó jɔ̃̀ wa, Bəbyəlɔnɛ pyɔ̌ Nabəlɔdɔnɔzɔɔrɛ ǹdə́ Kalədɛ lyì bí jɔ̃̀ wa. ²⁶ À m’a vùr ǹmyɛ́ ǹdə́ ǹ ná nánlùlə̀ y a dwĩ̀ tənà dõ wẽ́, á gə́ yə̀ mə̀gã̌ lùl mó, á ga m’ǎ cì gàà mɔ́. ²⁷ Tənà y kɛ̀bɛ́ è shil gwẽ̌ zhe be, bə̀ k’â n’ê yǎl bə kwɛ̃̀ bə vò è wẽ́ mó, bə̀ t’â la kwãɔ̃ bə vò è wẽ́ gaga yé. ²⁸ Lyì bí m’a zɛ̃̀ bə n’ê bwə̀rh dwã bə̀ zhe : Wɔ́ Kɔnya mɔ́ ń jǐrh ku ò lo wə, lòlò kə́ ń bə ò tum zhe nà ? Ń jǐrh kɔn dɛ̀bɛ́ rə̀ k’ê bə nyɔ̀ɔ̀rhɛ́ dwí-byǐ zhe nà ? Wɔ́ bə̀kɔ́n yil bə̀ zɔ ńmyɛ̌ ǹdə́ ń byǎ bɛ́ bə dwĩ̀, bə ce bə vò tənà y kɛ̀bɛ́ bə̀ yə̀l è pár mɔ́ wẽ́ mó ? ²⁹ Tənà, tə̀nà, tənà, cili Bə-zhɔ-zhe zɔ̀mɛ̀ rɛ́ ! ³⁰ Bə-zhɔ-zhe wə̀lə̀ : Kɛ̃-na bal mɔ́ mɔ̀bɔ́ yil ré ǹdə lò mɔ̀bɔ́ ń bə byǐ zhe ta, bə̀ ń nyǔ mú cɛ yó mó yə̀ kùr zal yé, bə̀ ń nɛ̀mɛ́ nɛ́ mə̀dù ga tá ń la ŋwɔ̀nɔ́ n jòm Dəvyidi pyɛ̀lɛ̀ də̀gwá y yó n jí pyɛ̀lɛ̀ yé, ń wàr myɛ ń la pyɔ̌ yál Zhidə né yé.