¹ Zwini b’a zə à dwí rí kálna bɛ́, bə̀myɛ́ byɛ̀bɛ́ bə̀ nê cɔ̀ à dwí rí à ce bə̀ n’ê kál mɔ́ ; bə̀ ce rə làà tɛ̃́ mɔ́. Wɔ́ Bə-zhɔ-zhe ń zɔ̀m rə̀myɛ́. ² Wɔ́ rə̀myɛ́ è ce Bə-zhɔ-zhe, Esərayɛl Yi rí, zɛ̃̀ rə̀ n’ê zɔ̀m dwí rí kálna bɛ́ bə̀myɛ́ mɔ́ yò rə̀ zhe : «Á jì à dwí rí, rə làà tɛ̃́, á yə̀ rə̀ sõ nyǐ yé ; rə̀myɛ́ yilə, à la ába còrhò-tum pɔ á wu-bárhɛ́ tumə né yilə. Wɔ́ Bə-zhɔ-zhe ń zɔ̀m rə̀myɛ́.» ³ À m’a k’a ce à dwí rí kùr ré rə̀ dàl mɔ́, k’a shí tənèsé shɛ̀bɛ́ à y’à jì ri rə vò sə̀ wẽ́ mó w gakó rə k’a bə̀ dwã yó, rə̀ kùjú w jàà y w rə jí kùjú ; rə lù byǎ rə pù nánzhəzhɔ̌. ⁴ A zɛ̃̀ a pə rɛ kálna, bə kál rɛ ; ywẽ t’â la rɛ zal, rə̀ wu t’â la zhìlù myɛ yé ; bə̀ t’â la dwí rí lò mə̀dù ga byõ̌ bə lyɛ̃̀ rə̀ wẽ́ yé. Wɔ́ Bə-zhɔ-zhe ń zɔ̀m rə̀myɛ́. ⁵ Nyìwé, Bə-zhɔ-zhe wə̀l bə̀ nyǐ dɛ̃ ŋwɛ́nɛ́ rə̀ bànà, à m’a ce bə lù byǐ, ǹdə cǒ jɛ̃̀ gə́ y’a púrh ní : Ń mà n yə̀ pyɔ̌, n zə lárma ǹdə́ cángá tumə n mə n jí pyɛ̀lɛ̀ ǹdə kɔn gə mə̌ nɛ́ tənà ya. ⁶ Ń gə́ la pyɛ̀lɛ̀ rɛ́ jú yi ní Zhidə m’a nə vwǎrh, Esərayɛl lyì bí m’a jòm bə̀ jàà y w ǹdə́ yə̀-zùlə́ ; Nyǐ yil ré tɛ̀bɛ́ bə̀ la m’e byẽ̀ mo mó : «Bə-zhɔ-zhe wɔ́ nə́ cángá» ⁷ Wɔ́ rə̀myɛ́ è ce, Bə̀-zhɔ-zhe wə̀l bə̀ dɛ̃ ŋwɛ́nɛ́ rə̀ bànà, bə̀ k’ê t’â la n’ê wə̀l : «Bə̀ wɔ́ ǹdə́ Bə-zhɔ-zhe nã́nyì mú, ń vùr Esərayɛl lyì byǎ bɛ́ Ezhipti ni mú jàn yil yé.» ⁸ Nyǐ bə̀ m’a zɛ̃̀ bə k’â n’ê wə̀l : «Bə̀ wɔ́ ǹdə́ Bə-zhɔ-zhe nã́nyì mú ń vùr Esərayɛl lyì byǎ bɛ́ bə k’a shí lũ jə̀gwã̀ sõ tənà y wẽ́, ǹdə́ tənèsé shɛ̀bɛ́ gakó ń yà ń jì bi n ce sə̀ wẽ́ mó wẽ́ ; bə̀ k’a bə̀ bə̀ sə̀pwà tənà y w mɔ́ jàn yilə.» ⁹ Nyi kɔn rɛ́ dɛ̀bɛ́ rə̀ zɔ̀m nyì-zwennə bé yilə. À wu zhìlì à wẽ́, Bə-zhɔ-zhe ǹdə́ ń zɔ̀mà nɛ́ ń zɔ̀m mɔ́ yilə, à gakó n’â pə́pǎ, à jǐrh ǹdə lò mɔ̀bɔ́ sɛ̃́ zhe ta, ǹdə wɔ́ lò mɔ̀bɔ́ ń nyɔ̃̀ də̀vɛ̃́ e zù mu ta. ¹⁰ Bə̀ tənà y sú ǹdə́ nə̀fwə̀ə́le dúdú, bwəl námməlwɛ̀lɛ́ y zhìlì wu ni ǹdə wɔ́ numbyíní è cù ta. Gɔ-elũ èpòlò w vwàmá nɛ́ gɔ w gɔ w dɔ́m jààsɛ́ kùl kókó. Lyì bí wɔ́ lwɛlɛ wɔ̀rhɔ́ yil bə̀ ŋwɛ́nɛ́ ; bə̀ jàn rɛ́ wɔ́ lwɛlɛ bə̀ n’ê zə rɛ bə̀ wɛ̀rhɛ́. ¹¹ Nyì-zwennə bé ǹdə́ vwĩ̀-zwə́lnə bé wɔ́ yǔyǔ cìnə́ ; má à jì y cìcì mú wẽ́ myɛ, à pwírí wɔ́ lwɛlɛ bə̀ n’ê twĩ̀ è wẽ́. Wɔ́ Bə-zhɔ-zhe ń zɔ̀m rə̀myɛ́. ¹² Wɔ́ rə̀myɛ́ è ce, bə̀ sɔ́má m’a yə̀ námbyĩ́ è n’ê swə̀rə́, bə̀ m’a cìrh be bə ji tɛ̃́ ; à m’a ce zwini b’e jòm bə̀ yó, byin ri tɛ̀bɛ́ à la bɛ còrhò-tum pɔ mɔ́ byin rí, Wɔ́ Bə-zhɔ-zhe ń zɔ̀m rə̀myɛ́. ¹³ À nɔ pwarha tũ̀twə̃̀ə̃̀ Samarɛ cɔ w nyì-zwennə bé n’ê wɛ̀rhɛ́ : bə̀ n’ê zal Baalɛ yil ré bə̀ m’ê zɔ̀m nyì-zwennə zɔ̀mà, rə̀myɛ́ èta mɔ́, wɔ́ à dwí Esərayɛl bə̀ n’ê dwĩ̀. ¹⁴ Sə kɔn rɛ́ tɛ̀bɛ́ à nɔ Zhərəzalɛm nɛ́ myɛ, wɔ́ kɔn dɛ̀bɛ́ rə bə càn zhə̀n zhə̀nà, rə̀ n’ê yì lyim ni dɛ̃́dɛ̃́ : Ò lyì bí n’ê fwə̀lə́, bə j’à n’ê gòm kɔma bə̀ súlí, bə̀ n’ê sɛ̃ lyì bí byɛ̀bɛ́ n’ê gòm kɔma mɔ́ nɛ : ce lòlò kə́ ń wàr ń mà n yẽ̌ lwɛlɛ tũ̀-twə̃̀ə̃̀ né ne yé. Rə̀myɛ́ ce bə̀ gakó jǐrh ǹdə Sɔdɔmɛ lyì bí ta à yírh wə, Zhərəzalɛm lyì bí jǐrh ǹdə Gɔmɔɔrɛ lyì bí ta. ¹⁵ Rə̀myɛ́ ce, nyǐ-nə kɔn rɛ́ dɛ̀bɛ́ Bə-zhɔ-zhe, jàn cìnə́ bé yó-cə́bal mɔ́ zɔ̀m nyì-zwennə bé yil mó : Ǹ wòwə̀ : à m’a pə bɛ cǒ kɔ̀bɔ́ ò nyɛ̌ cɛ̀ɛ́ bə̀ dɔ̃̀, a ce cə́m mə̀ n’ê gwi lò nɛ̃̌ wẽ́ a pə bɛ bə nyɔ̃̀, bə̀ wɔ́ Zhərəzalɛm nyì-zwennə bé lwɛlɛ rɛ́ dɛnnɛ lwɛlɛ rɛ́ tó né rə sú tənà y gakó wẽ́. ¹⁶ Bə-zhɔ-zhe mó ń cǐ jàn cìnə́ bé mó wòwə̀ : Bək’á cili nyì-zwennə bé zɔ̀mà nɛ́ bə̀ n’ê bwə̀l bə̀ wɔ́ Yi rə̀ zɔ̀m mɔ́ yé ! Nyǐ wɔ́ wẽ̀ tɛ̀bɛ́ rə̀ bə kùr zhe wẽ́ bə̀ zə ába bə̀ la nɛ́ ; wẽ̀ ré tɛ̀bɛ́ bə̀ byili bə̀ bə̀ nɔ bə̀ dàrhà wẽ́ mó, wɔ́ bə̀myɛ́ cìcì mú wun zɔ̀mà, s’e də̀ Bə-zhɔ-zhe nyú w nə̀ shí ní yé. ¹⁷ Bə̀ n’ê wə̀l lyì bí byɛ̀bɛ́ bə̀ n’ê fulsi Bə-zhɔ-zhe mú ni ; Bə̀ Bə-zhɔ-zhe wòwə̀ : Á m’ǎ nə yə̀-zùlə́ ; bə wɔ̀ lyì bí byɛ̀bɛ́ gakó bə̀ só bə̀ zɔ̀mà mɔ́ nɛ́ nɛ : Lwɛlɛ dwí byǐ t’â la ába yú yé. ¹⁸ Cili-nə, Wɔ́ mɔ̌ lò ń tó n jòm Bə-zhɔ-zhe zɔ̀mà nɛ́ cír gùlú w wẽ́, ń yírh nə wa, sə n mə n cili ń zɔ̀mɛ̀ rɛ́ mɔ́ ? Wɔ́ mɔ̌ lò ń pyèrhè ń zhɛ̃̌ n cili ń zɔ̀mɛ̀ rɛ́ cɛ̀nɛ̀, sə n mə n sú nə̀ kùrə̀ né mó ? ¹⁹ Nyǐ zho nánfɔ̀lɔ̀ bànà : Bə-zhɔ-zhe lyim nánfɔ̀lɔ̀ w m’a zɛ̃̀ ǹdə zho nánfɔ̀lɔ̀ ta, ǹdə kùlma mə̀ zɛ̃̀ mə̀ n’ê yə́yɛ́lɛ́ dɛ̃̌ ta : Mə só lyì-lwǎlsɛ́ yə́-pɛ̀lɛ́ wa. ²⁰ Bə-zhɔ-zhe lyim rí t’â la tu ǹdə́ kɔn rɛ́ dɛ̀bɛ́ ń tɛnɛ ń wẽ́ ń la wɔ̀rhɔ́ mɔ́ yə̀ pyìrh yé. Sə kɔn m’a dɛnɛ, é fòró á zɛ̃̀ á nyɛ̀ɛ̀ ń zɔ̀mɛ̀ rɛ́ kùr ré, dwã nɛ́ nyɛ̀bɛ́ nə̀ bàn wɔ́ wẽ́. ²¹ Lwar-na b’à yə̀ nyì-zwennə né bə̀myɛ́ mɔ́ twĩ̀ gaga yé, e jà bə̀ n’ê dùr ywə́l ; à yə̀ zɔ̀m ǹdə́ bɛ myɛ gaga yé ; e jà bə̀ n’ê zal à yil ré bə̀ m’ê zɔ̀mà. ²² Bə̀ gə y’à tó bə̀ jòm à zɔ̀mà nɛ́ gùlú w wə, bə̀ y’à m’a ce à dwí rí nyɛ̀ɛ̀ à zɔ̀mà nɛ́ kùrə̀, bə yẽ̌ bə̀ tũ̀-twə̃̀ə̃̀ né námməlwàálɛ́ ǹdə́ bə̀ wu-bárhɛ́ tumə né ne. ²³ À də̀ Yi tɛ̀bɛ́ rə̀ bwə́l nà, a j’a k’â də̀ Yi tɛ̀bɛ́ rə̀ nyɛ myɛ nà ? ²⁴ Lò mà n shèè jàà kɛ̀bɛ́ è shèè wẽ́ à yé né, a cẽ mo nɔ nà ? Wɔ́ Bə-zhɔ-zhe ń zɔ̀m rə̀myɛ́. È də̀ àmyɛ́ à sú dɛ̃̌ yə né pyáám ǹdə́ cɛ y tɛ̃́ mɔ́ pyáám mɔ́ nà ? Wɔ́ Bə-zhɔ-zhe ń zɔ̀m rə̀myɛ́. ²⁵ À nyɛ̀ɛ̀ kɔn rɛ́ dɛ̀bɛ́ nyì-zwennə bé bə̀myɛ́ mɔ́ zɔ̀m ǹdə nyì-zwennə ta, bə byili mú, bə̀ zɔ à yil ré bə m’e gõ̀ kɔma bə̀ wɔ́ nyì-zwennə zɔ̀mà bə̀ n’ê zɔ̀m bə̀ zhe : À dàrh dàrhà ! À dàrh dàrhà ! ²⁶ Nyì-zwennə bé bə̀myɛ́ n’ê yǎl bə j’â n’ê gòm kɔma bɛ́ bə̀ wɔ́ Yi rə̀ zɔ̀m kɔn la m’e yí dǒ, bə̀ la n’ê zɔ̀m yǔyǔ zɔ̀mà nɛ́ bə̀ wun ní wẽ́, bə̀ wɔ́ Yi rə̀ zɔ̀m mɔ́ kɔn la m’e yí dǒ ? ²⁷ Bə̀ n’ê yǎl bə tó dàrhà nɛ́ bə̀ n’ê cĩ́ dwã nɛ́ mɔ́ dɛnnɛ bə ce à dwí rí swě à yil ré yò, ǹdə bə dabá gə́ tə̀ Baalɛ yil bə swě à yil ré yò né ta. ²⁸ Bə̀ lò mɔ̀bɔ́ ǹ dàrh dàrhà, sə̀ cĩ́ kɔn rɛ́ dɛ̀bɛ́ ǹ dàrh mɔ́, sə lò mɔ̀bɔ́ ǹ nyɛ̀ɛ̀ à zɔ̀mɛ̀ rɛ́ sə́ byili ri pamparɛ̃ɛ̃ ǹdə ǹ gə́ nyɛ̀ɛ̀ rɛ nɛ́. Bə̀kɔ́n yil á n’á zə gɔ ǹdə́ bə̀lé rə̀ yàl kɔn rə̀dù ? Wɔ́ Bə-zhɔ-zhe ń zɔ̀m rə̀myɛ́. ²⁹ À zɔ̀mɛ̀ rɛ́ də̀ ǹdə myǐn ta nà, wɔ́ Bə-zhɔ-zhe ń zɔ̀m rə̀myɛ́. Rə̀ də̀ ǹdə màrətó ò n’ô mà pàtá nə́kulu o lwe ta nà ? ³⁰ Wɔ́ rə̀myɛ́ è ce, Bə-zhɔ-zhe wòwə̀ : À n’â ji nyi-zwennə bé bə̀myɛ́ mɔ́ búlə́ ; bə̀ gə́ n’ê ŋwɔ̀l à zɔ̀mà nɛ́ dwã sono mó yilə. ³¹ Nyǐ Bə-zhɔ-zhe wòwə̀ : À n’â bwí nyì-zwennə bé bə̀myɛ́ mɔ́ ; bə̀ gə́ n’ê kwè bə̀ sə̀pwà zɔ̀mà nɛ́ bə̀ byili bə̀ wɔ́ àmyɛ́ nyú w nə̀ shí ní mú yilə. ³² Nyǐ Bə-zhɔ-zhe wòwə̀, à n’â ji byɛ̀bɛ́ bə̀ n’ê byili dàrhà nɛ́ nánkɔ̀mrɛ́ bə̀ wɔ́ Yi rə̀ zɔ̀m mɔ́ búlə́, bə̀myɛ́ byɛ̀bɛ́ bə̀ n’ê cĩ́ dàrhà nɛ́ nə̀myɛ́ dwí rí ni, bə̀ m’e dwĩ̀ dwí rí ǹdə́ bə̀ kɔma bɛ́ ǹdə́ bə̀ cìn-dɛ̃̌-zõ̌ mó mó. À yə̀ bɛ twĩ̀ gaga yé, à yə̀ bɛ nyí myɛ pɛ gaga yé, è j’à də̀ nyɔ̀ɔ̀rhɛ́ kɔn dwí rí yil yé. Wɔ́ Bə-zhɔ-zhe ń zɔ̀m rə̀myɛ́. ³³ Sə dwí rí tɛ̀bɛ́, ráá nyì-zwennə mɔ̀bɔ́ ráá vwĩ̀-zwə́lnə mɔ̀bɔ́, bə̀ gə zɛ̃̀ bə̀ bwə̀rh mó : Wɔ́ kɔn tɛ̌ rə̀ wɔ́ yò w ó n’ô lyɛ̀ɛ̀ Bə-zhɔ-zhe mó ? Ǹ m’a lyár bɛ ń byili yò w òmyɛ́ mɔ́ ń wɔ̀ : Nyǐ wɔ́ ámyɛ̌ cìcì mú á wɔ́ yò wə́, à la ába tɛ̃́ dũ̀, wɔ́ Bə-zhɔ-zhe ń zɔ̀m rə̀myɛ́. ³⁴ Rə̀myɛ́ yi ní, nyi-zwennə, ráá vwĩ̀-zwə́lnə ràà dwí rí lò mó mɔ̀bɔ́ ń gə zɛ̃̀ ń wə̀lə̀ : «Yò ò n’ô lyɛ̀ɛ̀ Bə-zhɔ-zhe !» Nyǐ à m’a pə còrhò-tum ńmyɛ̌ ǹdə́ ń kɛ̀lɛ́ y lyì bí ni. ³⁵ Sə kɔn rɛ́ tɛ̀bɛ́ á la wɔ̀rhɔ́ mɔ́, wɔ́ lò mə̀dù gakó m’ǎ zɛ̃̀ ǹ nə́ ǹ zɔ̀m ǹdə́ ǹ dõ mó, ǹdə́ ǹ da-byǐ mú, á m’á bwə̀rh dwã á zhe : «Wɔ́ bə̀kɔ́n Bə-zhɔ-zhe lyár ? Wɔ́ bə̀kɔ́n Bə-zhɔ-zhe zɔ̀m ?» ³⁶ S’á bə̀k’á k’á zɔ̀m yò w ò n’ô lyɛ̀ɛ̀ Bə-zhɔ-zhe mó yò kə́dò yé ! Bə̀ zɔ̀mɛ̀ tɛ̀bɛ́ á mə̀dù gakó la zɔ̌m mɔ́ la yò kɔ̀bɔ́ ò n’ô lyɛ̀ɛ̀ Bə-zhɔ-zhe mó yál ; Bə̀ á n’á lyə́r Yi nã́nyì yə́, Bə-zhɔ-zhe nə́ Yi rí rə̀ cǐ jàn cìnə́ bé zɔ̀mà nɛ́. ³⁷ Wál nyì-zwennə bé ne : Wɔ́ bə̀kɔ́n Bə-zhɔ-zhe lyár mɔ́ ? Wɔ́ bə̀kɔ́n zɔ̀mɛ̀ Bə-zhɔ-zhe zɔ̀m ǹdə́ mɔ́ ? ³⁸ Á zɛ̃̀ á cẽ á gwẽ̌ wɔ̀ : Bə-zhɔ-zhe yò w ò n’ô lyɛ̀è mɔ mɔ́ ! Nyǐ kɔn rɛ́ dɛ̀bɛ́ Bə-zhɔ-zhe nə́ ń zɔ̀m rə̀myɛ́ yil mó : Á gə́ púr zɔ̀mɛ̀ rɛ́ rə̀myɛ́ mɔ́ á nyú w á wɔ̀ : Bə-zhɔ-zhe yò w ò n’ô lyɛ̀ɛ̀ mɔ mɔ́ ! E j’à y’à twĩ̀ à nyì-zwennə bé bə b’e zɔ̀m ǹd’ába bə wɔ̀ : Bə̀k’á shɛ̀nɛ́ á zɔ̀m zɔ̀mɛ̀ rɛ́ tɛ̀bɛ́ á wɔ̀ : Bə-zhɔ-zhe yò w ò n’ô lyɛ̀ɛ̀ mɔ mɔ́ yé ! ³⁹ Wɔ́ rə̀myɛ́ yilə, nyǐ-nə à la á yò sǒ, à la ámyɛ̌ ǹdə́ cɔ w à y’à pɔ á nàmbala bɛ́ mɔ́ tɛ̃́ dũ̀, à m’a dwĩ̀ ába tɛ̃́ á vò kwã gaga à nyí ni ; ⁴⁰ A m’a ce fuuli jòm á yó, a ce cìzhìl pú ába byinə nə̀ bə zhɔ̌ zhe yilə, bə̀ t’â la rə̀ yò sǒ gaga yé.