¹ Bəbyəlɔnɛ pyɔ̌ Nabəkɔdɔnonɔɔrɛ gə́ tú n zə Zhidə pyɔ̌ Zhowəcim byǐ Yəkɔnya, n pwà Zhidə lyì-fwààlɛ́ ǹdə́ bə̀ də̀-sə̀lnə bé ǹdə́ bə̀ yàlá bɛ́ ǹdə́ byɛ̀bɛ́ bə̀ n’ê wɛ̀rhɛ́ sàfwǎr rɛ́ ǹdə́ bwə̀l-byǎ bɛ́ n mə n vò Bəbyəlɔnɛ y mɔ́ kwã nɛ́, Bə-zhɔ-zhe ce a nə sə́yə̌rh sə̀lyè bə̀ cĩ́ tɛ̃́ Yi jì y nyí rí ni, ǹdə́ èpyìlə́ sə̀ wẽ́. ² Sə́yǎ y èdù y épyìlə́ né y’à càn dɛ̃́dɛ̃́, nə̀ nyɛ̀ ǹdə épyǐl-yə́ə́ gə́ y’ǎ nyɛ̀ nɛ́ ta. Sə́yǎ y dõ mó nyə̀ná nɛ́ y’à bə càn námpɔ́lɛ́ dwí-byǐ kɛ̀ ga yé, ce nə̀ y’ǎ wàr nə̀ la jú yé. ³ Rə̀myɛ́ yó né Bə-zhɔ-zhe zɛ̃̀ n bwə̀rh ne n wɔ̀ : Zheremyi, wɔ́ bə̀kɔ́n ǹ na ? A lyár a wɔ̀ : Wɔ́ épyìlə́ à na. Nyɛ̀bɛ́ nə̀ càn mɔ́, j’â càn dɛ̃́dɛ̃́, sə nyɛ̀bɛ́ nə̀ bə càn mɔ́, j’â bə càn lyɛ́lyɛ́, ce nə̀ wàr nə̀ la jú yé, nə̀ gə́ bə càn lyɛ́lyɛ́ mɔ́ yilə. ⁴ Bə-zhɔ-zhe kə́ n zɔ̀m ǹdə́ ne n wɔ̀ : ⁵ Nyǐ wɔ́ Bə-zhɔ-zhe, Esərayɛl Yi rí rə̀ zɔ̀m èta, cili : Ǹdə ǹ gə́ lwar épyìlə́ nyɛ̀bɛ́ nə̀ càn mɔ́ pár mɔ́ ta, wɔ́ èta, àmyɛ́ lwar Zhidə lyì bí à ce bə vò Kalədənyɛ̃bá tənà y w yóm ré jè mó pár nɛ́. ⁶ À n’â nyǐ bi ǹdə́ sónó, sə à m’a k’a zə bɛ bə bə̀ Tənà y kɛ̀bɛ́ wẽ́ ; à m’a cĩ́ bi è wẽ́, à k’â t’â la bə̀ yò zhìlù kə́dò yé, à m’a zhele be né, à k’â t’â la bɛ mǔr kə́dò yé. ⁷ À m’a pə bɛ wu, mùnì ga bə lwar bə̀ à wɔ́ Bə-zhɔ-zhe, bə̀ m’a yə̀ à dwí, sə à m’a yə̀ bə̀ Yi, bə k’a bə̀ à sono ǹdə́ bə̀ wun gakó. ⁸ Ǹdə ǹ gə́ nɔ épyìlə́ nyɛ̀bɛ́ nə̀ bə càn lyɛ́lyɛ́ nə̀ də̀ jú kɔn mɔ́ ta, wɔ́ Bə-zhɔ-zhe ń zɔ̀m rə̀myɛ́, wɔ́ èta à m’a wɛ̀rhɛ́ Zhidə pyɔ̌ Sədəcaasɛ, ǹdə́ ń lyì-fwààlɛ́, ǹdə́ lyì bí byɛ̀bɛ́ bə̀ kùr ré dàl Zhərasalɛm nɛ mɔ́ ǹdə́ lyì bí byɛ̀bɛ́ bə̀ jě Ezhipti ni mú ; kɔn yə̀ ǹdə Épyìlə́ né nə̀ bə càn lyɛ́lyɛ́ nə̀ də̀ jú kɔn mɔ́ ta. ⁹ À m’a ce bə yə̀ wu-zɛ̃̀ɛ̃́ ǹdə́ lwɛlɛ kɔn tənèsé cɛ yó mó gakó yilə ; bə̀ m’a fulsi bi, bə̀ mɔ̀n bɛ, bə̀ yə̀ bwəl námməlwɛ̀lɛ́ lyì jààsɛ́ shɛ̀bɛ́ à la bɛ jǔ bə̀ vò sə̀ wẽ́ mó gakó wə. ¹⁰ À m’a ce búlə́ shú ǹdə́ nɔrh ǹdə́ címsi námməlwǎlsɛ zə bɛ, bə jé tɛ̃́ tənà y à y’à pɔ bə̀myɛ́ ǹdə́ bə̀ dabá nɛ mɔ́ wẽ́.