¹ Zhɔzhacim byǐ Zhowəcim, Zhidə pyɔ̌ mɔ́ pyɛ̀lɛ̀ rɛ́ jú byinə nə̀na nyǎn rɛ́ yó né, ǹd’ê y’à wɔ́ Bəbyəlɔnɛ pyɔ̌ Nabəkɔdɔnɔzɔɔrɛ myɛ pyɛ̀lɛ̀ rɛ́ jú byin nã́yéé ré. Rə̀myɛ́ yó né Bə-zhɔ-zhe zɔ̀m zɔ̀mɛ́ ǹdə́ Zheremyi bə̀ ń byili Zhidə lyì bí púlə́púlə́ ne : ² Nyǐ zɔ̀mɛ̀ rɛ́ tɛ̀bɛ́ Zheremyi zɔ̀m ǹdə́ Zhidə lyì bí ǹdə́ lyì bí byɛ̀bɛ́ gakó bə̀ jě Zhərəzalɛm nɛ́ mɔ́ yé né mó, ń yà ń nə́ ń zɔ̀m ń zhe : ³ Nyǐ-na Amɔ̃ byǐ Zhɔzhaasɛ, Zhidə pyɔ̌ mɔ́ pyɛ̀lɛ̀ rɛ́ jú byinə shí ǹdə́ nə̀tɔ̀ nyǎn rɛ́, kɔn m’e yí zà mɔ́, è zhe byinə shí-èlyé ǹdə́ nə̀tɔ̀ ; Bə-zhɔ-zhe zɔ̀m ǹdə́ nɛ, à y’a zɛ̃̀ nəkɔkɔ́lɛ́ gakó, a zɔ̀m ǹdə́ ába, a zɔ̀m ǹdə́ ába, sə á yə́ à zɔ̀mà nɛ́ cili yé. ⁴ Bə-zhɔ-zhe twĩ̀ ń tùntùnnə bé, ǹdə́ ń nyì-zwennə bé, ń yà n dùlí nəkɔkɔ́lɛ́ n twĩ̀ bi á sono, sə á yə̀ bə̀ zɔ̀mà nɛ́ cili yé. ⁵ Bə̀ y’à n’ê wə̀lə̀ : Á mə̀dù mə̀dù gakó yẽ̌ ń sɔ́má y námməlwɛ̀lɛ́ y ǹdə́ ń tumə né náməywààlɛ́ nɛ́ ; mùnì ga á mɛ̃ tənà y kɛ̀bɛ́ à pɔ á daba ǹdə́ ámyɛ̌ nɛ byinə nə̀ bə zhɔ̌ zhe yil mó wẽ́. ⁶ Bə̀k’á shɛ̀nɛ́ a vò a zù yə dwã, á tó ne, á wùlì tɛ̃́ nə̀ yé né á cèrhé ne yé, bə̀k’á tə̀ wẽ̀ ré tɛ̀bɛ́ á wɛ̀rhɛ́ ǹd’á jɛ̀rh mɔ́ yil á zɛ̃̀ à lyim ni yé. Zhə̀nà, á gə yə̀ rə̀myɛ́ mɔ́ wɛ̀rhɛ́, s’á lwar bə̀ à t’â la ába lwɛlɛ dwí-byǐ wɔ̀rhɔ́ yé. ⁷ Sə Bə-zhɔ-zhe wə̀l bə̀ á yə̀ ń zɔ̀mà nɛ́ cili yé, mùnì ga á bə̀ tə̀ wẽ̀ ré tɛ̀bɛ́ á wɛ̀rhɛ́ ǹd’á jɛ̀rh mó yil á zɛ̃̀ ń lyim ni, á pyà zwini á pə á cin ni yé. ⁸ Wɔ́ rə̀myɛ́ è ce, Bə-zhɔ-zhe, jàn cìnə́ bé gakó yó-cə́bal mɔ́ wə̀lə̀ : Á gə́ yə̀ à zɔ̀mà nɛ́ cili mú ce, ⁹ à m’a ce bə byẽ̀ lũ-jə̀gwã̀ sõ cìnə́ dwə́ né gakó, a ce bə byẽ̀ à tùntùnnə, Bəbyəlɔnɛ pyɔ̌ Nabəkɔdɔnɔzɔrɛ bə súlí ; a ce bə bú ǹdə́ tənà y kɛ̀bɛ́ lyì bí, bə súlí bə ce tənèsé shɛ̀bɛ́ sə̀ bwə́l gàà mɔ́ nɛ́, bə̀ bú ǹdə́ sə̀myɛ ; mùnì a ce sə jé tɛ̃́ lyɛ́lyɛ́, sə jǐrh wu-zhìlù dúdú jàà, sə jǐrh wu-zɛ̃̀ɛ̃́ kɔn, lyì bí n’ê wǔrh bə̀ búbwéé sə̀ kùr wə, sə jǐrh jì-bwə̀r twéé twéé gaga. ¹⁰ À m’a ce wu-nyɔ̃̀ búbwéése ǹdə́ fùwə́ búbwéése jé, a ce kɛ̃-jú ǹdə́ byal jú swíísi, ǹdə́ nə̀mṹ nɔ́m dweme, ǹdə́ pàntɛ́mɛ́ myǐn pwẽ̀ jé. ¹¹ Tənà y èmyɛ́ mɔ́ gakó m’a jǐrh jì-bwə̀r, gɔ-elũ èpòlò. Tənèsé sə̀myɛ́ mɔ́ lyì bí m’a jǐrh Babyəlɔnɛ pyɔ̌ mɔ́ yómə́ byinə shí-shàlpyɛ̀. ¹² Sə byinə né shə́-shàpyɛ̀ y gə tú nə̀ pyìrh, à m’a pə còrhò-tum Babyəlɔnɛ pyɔ̌ mɔ́ ǹdə́ tənà y èmyɛ́ mɔ́ còrhò-tum ; wɔ́ Bə-zhɔ-zhe ń zɔ̀m rə̀myɛ́, bə̀ lwɛlɛ rɛ́ yilə, à m’a pə còrhò-tum Kalədɛ tənà y lyì bí ni, a ce tənà y jǐrh jì-bwə̀r byinə nə̀ bə zhɔ̌ zhe yilə. ¹³ À m’a ce zɔ̀mà nɛ́ nyɛ̀bɛ́ à zɔ̀m tənà y èmyɛ́ shò-kwã nɛ́ mɔ́ pyìrh, kɔn rɛ́ dɛ̀bɛ́ gakó rə̀ kɛ̃, Zheremyi zɔ̀m rə̀ yò tənèsé gakó yil mó. ¹⁴ À m’a ce bə̀ k’a cèrhè lwɛlɛ rɛ́ tɛ̀bɛ́ bə̀ wɛ̀rhɛ́ mɔ́ gakó jim. ¹⁵ Nyǐ Bə-zhɔ-zhɔ, Esərayɛl Yi rí zɔ̀m ǹdə́ nɛ n wɔ̀ : Zwẽ də̀vɛ̃́ kǎzɔ̌m mɔ́ mɔ̀bɔ́ èta mɔ́, mə̀ sú ǹdə́ à lyim rí mú à jɔ̃̀ w ń vò ń pə tənèsé shɛ̀bɛ́ à la mɔ́ sə̀ wẽ́ tũ̌ mú lyì bí gakó ni bə nyɔ̃̀. ¹⁶ Bə̀ m’a nyɔ̃̀ mɔ bə tutwi tɛ̃́ ǹdə nyə̀nyə̀rh ta, ǹdə́ bə̀ gə tú bə̀ nɔ búlə́ shù w à la ce o bə̀ bə̀ cəcəl w mó yi ní. ¹⁷ A zɛ̃̀ a zwẽ də̀vɛ̃́ kǎzɔ̌m mɔ́ Bə-zhɔ-zhe jɔ̃̀ w a vò a pə tənèsé shɛ̀bɛ́ ń twĩ̀ ni sə̀ wẽ́ mó lyì bí gakó ne bə nyɔ̃̀ ; lyì bí b,ə̀myɛ́ wɔ́ : ¹⁸ Zhərəzalɛm, ǹdə́ Zhidə cɛmɛ nɛ́ lyì bí, ǹdə́ bə̀ pyǎ bɛ́, ǹdə́ bə̀ yó-cìnə́ bé ; bə̀ nyɔ̀ mɔ, mùnì ga n ce bə̀ cɛmɛ nɛ́ jǐrh jì-bwə̀r, wu-zhìlù jàà, lyì n’ê mɔ̀n bɛ, bwəl námməlwɛ̀lɛ́ zhǐ bə̀ yó, ǹdə lyì bí yírhə́ gə́ nə nɛ́ zà zà nɛ́ ma. ¹⁹ Bə̀myɛ́ kwã nɛ́, à lyim rí kǎzɔ̌m mɔ́ m’a yí Ezhipti pyɔ̌ Faraɔ̃ ǹdə́ ń yé né cìnə́ bé, ǹdə́ ń lyì-fwààlɛ́, ǹdə́ ǹ dwí rí gakó ; ²⁰ ǹdə́ Arəbyi púlə́púlə́, ǹdə́ Uzhi tənà y pyǎ bɛ́ gakó, ǹdə́ Fələsətɛ̃ tənà y pyǎ bɛ́ gakó, ǹdə́ Asəkalɔ̃, ǹdə́ Gaza, ǹdə́ Ekərɔ̃, ǹdə́ kɔn tɛ̀bɛ́ rə̀ dàl Asədode né mó ; ²¹ ǹdə́ Edɔmɛ, ǹdə́ Mɔwabɛ, ǹdə́ Ammɔ byǎ bɛ́ ; ²² ǹdə́ Tiiri pyǎ bɛ́ gakó, ǹdə́ Sədɔ̃ pyǎ bɛ́ gakó, ǹdə́ cɛmɛ nɛ́ nə̀ jě nɛ̃̌ mɔ́ cəcəl w nə̀-fɔ̀lɔ̀ w èpákɛ̀ mɔ́ ; ²³ ǹdə́ Dədan, ǹdə́ Təma, ǹdə́ Buuzhi, ǹdə̀ lyì bí byɛ̀bɛ́ gakó bə̀ n’ê fɔ̀n bə̀ pə̀pésé mó ; ²⁴ ǹdə́ Arəbyi pyǎ bɛ́ gakó, ǹdə́ Arabɛ lyì bí bə̀ jě gɔ-elũ èpòlò w mó pyǎ bɛ́ gakó ; ²⁵ ǹdə́ Ziimi pyǎ bɛ́ gakó, ǹdə́ Alam pyǎ bɛ́ gakó, ǹdə́ Mədi pyǎ bɛ́ gakó ; ²⁶ ǹdə́ lũ jə̀gwã̀ sõ pyǎ bɛ́ byɛ̀bɛ́ bə̀ bwə́l ǹdə́ byɛ̀bɛ́ bə nyɛ mɔ́ gakó la nyɔ̃̀ mə̀dù mə̀dù, ǹdə́ lũ w tənèsé shɛ̀bɛ́ sə̀ ŋwɛ́nɛ́ cɛ yò mó gakó. Rə̀myɛ́ kwã nɛ́ Shəshaakɛ pyɔ̌ mɔ́ la n zɛ̃̀ n tà bə̀ gakó kwã n nyɔ̀. ²⁷ Ǹ m’a zɔ̀m ǹdə́ bɛ ń wɔ̀ : Nyi-nə kɔn rɛ́ dɛ̀bɛ́ Bə-zhɔ-zhe, Esərayɛl Yi rí zɔ̀m mɔ́, rə̀ wə̀lə̀ : zwẽ-nə á nyɔ̃̀, mə zə ába, á tɔlɛ, á tu á pyẽ̀, á bə̀k’á zɛ̃̀ tɛ̃́ yé, búlə́ shù w à la tũ̌ o bə̀ á cəcəl wə, á yírhə́ nə w mó yilə ! ²⁸ Sə bə̀ gə cẽ bə̀ yə̀ də̀vɛ̃́ kǎzɔ̌m mɔ́ zwẽ ǹ jɔ̃̀ w bə nyɔ̀, sə́ wɔ̀ bɛ : Nyǐ wɔ́ Bə-zhɔ-zhe, mɔ̀bɔ́ ń cǐ jàn cìnə́ bé mó ń wɔ̀wə̀ : Nyɔ́-na mɔ ! ²⁹ Bə̀ nyìwé, cɔ w kɔ̀bɔ́ bə̀ n’ê byẽ̀ à yil ré ò wẽ́ mó, nyǐ à ju kùr à n’â wɛ̀rhɛ́ lwɛlɛ ; sə ámyɛ̌, á n’á bùl bə̀ á m’ǎ mɛ̃ nɛ́ á t’á la còrhò-tum nɔ nà ! Lwar-na bə̀ á t’á la nɛ́ mãɔ̃ ǹdə́ á yə̀ còrhò-tum nɛ yé ; nyǐ à m’a ce búlə́ shù bə̀ o bú ǹdə́ lyì bí byɛ̀bɛ́ bə̀ ŋwɛ́nɛ́ cɛ yó mó. Wɔ́ Bə-zhɔ-zhe, mɔ̀bɔ́ ń cǐ jàn cìnə́ bé mó ń zɔ̀m rə̀myɛ́. ³⁰ Sə è gə wɔ́ ǹmyɛ́ yilə, bwə̌l ywẽ̀ né nyɛ̀bɛ́ gakó ń byili bi, ń wɔ́ bɛ : Nyǐ Bə-zhɔ-zhe lyim la zhì dɛ̃̌ ń gə́ jě mə̀gã̌, rə ce dweme ; ń lyim rí m’a zɛ̃̀ ń jì y rə̀ ŋwɛ́nɛ́ è wẽ́ mó yó ; rə búbwéé ǹdə lyì byɛ̀bɛ́ bə̀ n’ê nɔ̀m sɛ̃́ cǒ byǎ bə̀ nèrh kùr w də̀vɛ̃́ y m’e dwi mú ta, ń mə́ ń ji lũ w lyì bí búlə́. ³¹ Ń búbwéé dweme ré j’a sáaa lũ w cə-yala nɛ́ gakó wə ; Bə-zhɔ-zhe nə́ ń bwǐ ǹdə́ tənèsé, ń zɛ̃̀ bùrsi ǹdə́ numbyíní gakó ; ń co lyì-bəlwǎlsɛ́ búlə́ shù jɔ̃̀ wa, wɔ́ Bə-zhɔ-zhe ń zɔ̀m rə̀myɛ́. ³² Nyǐ Bə-zhɔ-zhe, mɔ̀bɔ́ ń cǐ jàn cìnə́ bé gakó mó wòwə̀ : Nyǐ-na màbyóó n’ô jòm tənà yó o lyɛ̃ o lyɛ́ɛ è tõ ne, zho nánfɔ̀lɔ̀ n’ô zɛ̃̀ o shí lũ kùr wə. ³³ Sə lyì bí byɛ̀bɛ́ Bə-zhɔ-zhe la gu mú, m’a cì bə ləlɛlɛ tɛ̃́, e zhì yí-púrhí sõ e m’e vò yi-zùr sõ ; lòlò tá la bɛ kurh, bə̀ wàr bɛ bə̀ la pwǎ bə ce yé, bə̀ m’a pyẽ̀ tɛ̃́ dwã yó bə̀ jǐrh pùlú cɛ y yó. ³⁴ À lyì bí kálna, wǔrh-nə á búbwéé ! Dwí rí yé né cìnə́, tu-nə tɔ̀mɔ̀ w a byíbyílí ! nyǐ dwã nɛ́ yúwə́, bə̀ la ába zwə́l. À m’a nɔ̀ ába a bɔbɔlɛ́, á ló tɛ̃́ ǹdə nə̀zhì-ècɛ̀nɛ́ kɛ̀bɛ́ è yé y cɛ̀ dɛ̃́dɛ̃́ ta. ³⁵ jàà k’ê tɛ̀nɛ́ dwí rí kálna bɛ́ la nɛ́ shòò yé ! Vwǎrh k’ê tɛ̀nɛ́ dwí rí yé né cìnə́ bé yil yé ! ³⁶ Bə̀ m’a nyɛ̀ɛ̀ dwí rí kálna bɛ́ wìísi cəl, ǹdə́ dwí rí yé né cìnə́ bé wɔ́wɔ́lɔ́ mɔ́ ; Bə̀ Bə-zhɔ-zhe cɔ̀ w jùkú w jàà yá. ³⁷ Yə̀-zùlə́ né kǎlsɛ́ wǔr, Bə-zhɔzhe lyim rí nánfɔ̀lɔ̀ rə̀ zɛ̃̀ mɔ́ yilə. ³⁸ Bə-zhɔ-zhe yẽ̌ ń jàà y nɛ ǹdə bɔrɔ gə́ y’a zɛ̃̀ o yẽ̌ ò pwə́l mó ne né ; mɔ̀bɔ́ ń nə́ ń cɔ̀ mɔ́ búlə́ né ń nə́ ń bwí ǹdə́ búlə́ shù w ǹdə́ ń lyim rí nánfɔ̀lɔ̀ w mɔ́ ce bə̀ tənà y cɔ̀ e jǐrh gɔ-elũ èpòlò.