¹ Zhozhaasɛ byǐ Zhowəcim, Zhidə pyɔ̌ mɔ́ pyɛ̀lɛ̀ rɛ́ yi ní, Bə-zhɔ-zhe zɔ̀m zɔ̀mɛ̀ rɛ́ tɛ̀bɛ́ ǹdə́ Zheremyi n wɔ̀ : ² Nyǐ Bə-zhɔ-zhe zɔ̀mɛ̀ rɛ́ ń zɔ̀m mɔ́, ń wòwə̀ : Zɛ̃̀ ń zhì, Bə-zhɔ-zhe jì y kɔ̀nɔ́ w wa, ń byili lyì bí byɛ̀bɛ́ gakó bə̀ ŋwɛ́nɛ́ Zhidə cɛmɛ nɛ́ wẽ́ mó ne, bə̀ bə̀ bə̀ Bə-zhɔ-zhe jì y w bə wùlì tɛ̃́ Bə-zhɔ-zhe yé né ; byili zɔ̀mà nɛ́ nyɛ̀bɛ́ à pɔ nyí bə̀ ǹ byili bi mú gakó, ǹ bə̀ká vùr rə̀dù ga ń ce kwã nɛ́ yé. ³ Dɛ̀ga nyǐ bə̀ m’a cili, sə bə̀ mə̀dù mə̀dù gakó ká n yẽ̌ ń sɔ́má y námməlwɛ̀lɛ́ y ń y’ǎ ŋwɛ́nɛ́ è yó mó né ; èta, à wu m’a pyìrhí a yẽ̌ lwɛlɛ rɛ́ à y’à bùl à wẽ́ à la wɔ̀rhɔ́, bə̀ wu-bárhɛ́ tũ̀-twə̃̀ə̃̀ né yil mó ne. ⁴ Ǹ m’a wɔ̀ bɛ : Nyǐ Bə-zhɔ-zhe wə̀l èta : Á gə yə̀ à nyə́ né à pɔ ába b’à tó mó, à nyə́ né à cĩ́ á yé né mó cili, ⁵ 5 á gə yə̀ à tùntùnnə bé ndə́ à nyì-zwennə zɔ̀mà nɛ́cili, bə̀myɛ́ byɛ̀bɛ́ à y’a twĩ̀ nəkɔkɔlɛ́, nəkɔkɔlɛ́ gakó á sono, á yə̀ bə̀ zɔ̀mà nɛ́ cili mú ce, ⁶ lwar-na bə̀ à m’a wɛ̀rhɛ́ kɛ̀lɛ́ èmyɛ́ ǹdə à gə́ wɛ̀rhɛ́ Shəlo né ta, a ce cɔ w òmyɛ́ jǐrh bwəl námməlwɛ̀lɛ́ kɔn, lũ w tənèsé gakó yilə. ⁷ Vwĩ̀-zwə́lnə bé ǹdə́ nyì-zwennə bé ǹdə́ dwí rí púlə́púlə́ y’à tú bə̀ n’ê cili zɔ̀mà nɛ́ nə̀myɛ́ mɔ́ Bə-zhɔ-zhe jì y yé né. ⁸ Zheremyi gə́ byili zɔ̀mà nɛ́ Bə-zhɔ-zhe y’ǎ byili mú bə̀ ń byili mu, bə̀ ń byili dwí rí gakó ne mó n zhɛ̀ ; rə̀myɛ́ yó né, vwĩ̀-zwə́lnə bé gakó ǹdə́ nyì-zwennə bé gakó ǹdə́ dwí rí gakó j’a zə Zheremyi bə̀ zhe : Èlǎsɛ̃́ myɛ̌, ǹ mə̌ ǹdə́ gu ! ⁹ Bə̀ n’ê bwə̀rh mo bə̀ zhe : Wɔ́ kɔ́n yil ǹ nə́ ǹ zal Bə-zhɔ-zhe yil ré ǹ mə́ ǹ zɔ̀m nyì-zwennə zɔ̀mà, ǹ mə́ ǹ wə̀l : Bə̀ Cɔ w kɔ̀bɔ́ m’a jǐrh ǹdə Shəlo ta, ò k’ô t’â la lòlò nɔ n jòm ò wẽ́ mó ? Dwí rí púlə́púlə́ j’a púpúní Zheremyi ni, Bə-zhɔ-zhe jì y wẽ́. ¹⁰ Zhidə tənà y lyì bí gə́ nyɛ̀ɛ̀ yò w òmyɛ́ mɔ́, bə j’a zhì pyɔ̌ mɔ́ kɛ̀lɛ́ y nɛ bə zhǐr bə bə̀ Bə-zhɔ-zhe jì y nyí ni, bə jòm tɛ̃́ Bə-zhɔ-zhe jì y bwə̀rə̀ y nándwə̃̀ y nyí rí ni. ¹¹ Rə̀myɛ́ yó né, vwĩ̀-zwə́lnə bé ǹdə́ nyì-zwennə bé, zɛ̃̀ bə̀ n’ê zɔ̀m ǹdə́ yé né cìnə́ bé ǹdə́ dwí rí gakó bə̀ zhe : Bal mɔ́ mɔ̀bɔ́ mə̌ ǹdə́ gu ; ń nə́ ń zɔ̀m nyì-zwennə zòmà ń mə́ ń bwəl lwɛlɛ ń pɛ cɔ w kɔ̀bɔ́ nɛ, ǹdə á cìcì mú zhã̌ gə́ nyɛ̀ɛ̀ nɛ́. ¹² Zheremyi wɔ̀ yé né cìnə́ bé gakó ǹdə́ dwí rí gakó ne : Wɔ́ Bə-zhɔ-zhe ń twĩ̀ ni b’a zɔ̌m nyì-zwennə zɔ̀mà a m’a bwəl lwɛlɛ a pə ji y kɛ̀bɛ́ ǹdə́ cɔ w kɔ̀bɔ́ nɛ, ywẽ̀ nɛ́ nyɛ̀bɛ́ gakó à zɔ̀m á nyɛ̀ɛ̀ mɔ́. ¹³ Rə̀myɛ́ mɔ́ ce, èlǎsɛ̃́, kwɛrhɛ-na á sɔ́msɛ́, ǹdə́ á tũ̀-twə̃̀ə̃̀ né, s’á cili Bə-zhɔ-zhe, á Yi rí zɔ̀mà nɛ́ rə̀ n’ê zɔ̀m mɔ́, mùnì ga Bə-zhɔ-zhe pyìrhí ń wu n yẽ̌ lwɛlɛ rɛ́ ń yà ń bwəl n pə ába mɔ́ nɛ. ¹⁴ S’e gə wɔ́ àmyɛ́ yilə, nyǐ-nə ne à ŋwɛ́nɛ́ á jɛ̀sɛ́ wẽ́ ! Wɛ̀rhɛ́-na nɛ ǹdə kɔn gə́ mə̌ nɛ́, ǹdə á pùbùlə̀ né gə́ n’ê yǎl nɛ́. ¹⁵ S’á lwar kɔn rə̀dù, bə̀ á gə gu ni, sə́ nyǐ bə dóó zhe cí jal, la ámyɛ̌ ǹdə́ cɔ w kɔ̀bɔ́ ǹdə́ lyì bí byɛ̀bɛ́ bə̀ jě ò wẽ́ mó yó w jǒm ; Bə̀ nyǐ wɔ́ zhə̀n zhə̀n ga, Bə-zhɔ-zhe twĩ̀ ni b’à zɔ̀m zɔ̀mà nɛ́ nyɛ̀bɛ́ a byili ába á zhã̌ nyɛ̀ɛ̀. ¹⁶ Rə̀myɛ́ yó né, yé né cìnə́ bé ǹdə́ dwí rí gakó wɔ̀ vwĩ̀-zwə́lnə bé ǹdə́ nyì-zwennə bé ne : Bal mɔ́ mɔ̀bɔ́ bə mə̌ ǹdə́ gu gaga yé ; bə̀ Bə-zhɔ-zhe, nə́ Yi rí yil ré yil ń zɔ̀m ǹdə́ nə́ba. ¹⁷ Rə̀myɛ́ yó né, tənà y náncɛsɛ́ jàlà zɛ̃̀ sə zhì dwí rí dwã gùlú w púlə́púlə́ yé né sə wɔ̀ : ¹⁸ Morəsəshɛtɛ lyì bal Myəshe, zɔ̀m nyì-zwennə zɔ̀mà, Zhidə pyɔ̌ Ezəcaasɛ pyɛ̀lɛ̀ rɛ́ yi ní n byili dwí rí gakó ne n wɔ̀ : Nyǐ-nə Bə-zhɔ-zhe, mɔ̀bɔ́ ń cǐ jàn cìnə́ bé mó ń zɔ̀m rə̀myɛ́ èta, n wɔ̀ : Nyǐ bə̀ m’a vɔ̀ Sənyɔ̃ ǹdə bə̀ gə́ y’a kɛ́lɛ́ nɛ́ ta, Zhərəzalɛm m’a jǐrh nə́kulə nə̀ pwě dwã yó púl, Bə-zhɔ-zhe jì y pyɔ̀ w m’a jǐrh sɔ̀lɔ̀ ò cèmé né byìl nə zù dwã w nə vò dɛ̃̌dɛ̃̌ nə mɔ́lɛ́. ¹⁹ Zhidə pyɔ̌ Zhɔzhaasɛ ǹdə́ ń dwí rí nə m’a gu Zheremyi nà ? Zhɔzhaasɛ nə tá ń nyàm Bə-zhɔ-zhe nà ? Wɔ́ rə̀myɛ́ è ce Bə-zhɔ-zhe, pyìrhí ń wu w n yẽ̌ lwɛlɛ rɛ́ ń yà ń bwə̀l n byili bə̀ ń la bɛ wɔ̀rhɔ́ mɔ́ nɛ. Sə nə́myɛ̌ nə́ m’ǎ zɛ̃̀ nə́ shɛ̀nɛ́ nə́ zhĩ yò nánfɔ̀lɔ̀ nə́ yó ! ²⁰ Rə̀myɛ́ yi ní, Cərəyaatɛ-Yəyəciim lyì Bal mə̀dù ń yil Uri, Shəməya byǐ ; ńmyɛ yà ń zɛ̃̀ ń nə́ ń zɔ̀m nyì-zwənnə zɔ̀mà, ń byili bə̀ bwəl námməlwɛ̀lɛ́ m’a jòm cɔ w kɔ̀bɔ́ ǹdə́ tənà y kɛ̀bɛ́ yó ǹdə ywẽ̀ né nyɛ̀bɛ́ Zheremyi byili mú cìcì ta. ²¹ Rə̀myɛ́ yó né, pyɔ̌ Zhowəcim ǹdə́ ń búlə́ kã̀dar rɛ́, ǹdə́ ń yé né cìnə́ bé nyɛ̀ɛ̀ zɔ̀mà nɛ́ nə̀myɛ́, pyɔ̌ mɔ́ zɛ̃̀ ń nə ń pyà ń gu. Uri nyɛ̀ɛ̀, ywẽ zə mɔ, n zɛ̃̀ n dùr n vò Ezhipti. ²² Pyɔ̌ Zhəwəcim zɛ̃̀ n twĩ̀ lyì Ezhipti ní : è y’à wɔ́ Akəbɔrɛ byǐ Elənata ǹdə́ lyì dwã bə tó mo bə vò Ezhipti yə́. ²³ Bə yí bə zə Uri Ezhipti ní bə̀k’a bə̀ bə pə pyɔ̌ Zhozwəciim ni, 23 n ce bə gu mu ǹdə́ búlə́ shù, bə kwè ń cùù w bə vò bə ce dwí rí byǎ bɛ́ lú-bɔ̀là bɛ́ wẽ́. ²⁴ Sə Shafã byǐ Ayəkam yà ń só Zheremyi nyə̀ná nɛ́, ce bə̀ yə̀ mɔ zal bə ce dwí rí lyì bí jɔ̃̀ w bə gu yé.