¹ Zhɔzhaasɛ byǐ Zhowəciim, Zhidə pyɔ̌ mɔ́ pyɛ̀lɛ̀ rɛ́ kùr-jírə́ y yi ní, Bə-zhɔ-zhe zɔ̀m zɔ̀mɛ̀ rɛ́ tɛ̀bɛ́ n pə nyí Zheremyi ni, n wɔ̀ : ² Zheremyi, zɛ̃̀ n wɔ̀ : nyǐ Bə-zhɔ-zhe zɔ̀m ǹdə́ nɛ n wɔ̀ nɛ : Zheremyi, zɛ̃̀ ń nyɔ̃̀ nyínsi sə́ pyà də̀-byǎ ń lyẽ dwã nɛ ń pyɛ̀lɛ́ ǹ pə́pyəla yó, ³ ń pə lyì bí byɛ̀bɛ́ bə̀ tú Zhərəzalɛm Zhɔzhaasɛ byǐ Zhowəciim, Zhidə pyɔ́ mɔ́ sõ mɔ́ ne, bə̀ m’e vò bə pə Edɔm, ǹdə́ Mɔwabɛ, ǹdə́ pyɔ̌ Amɔ̃ byǎ bɛ́, ǹdə́ Tiiri, ǹdə́ Shədɔ̃ pyǎ bɛ́ nɛ, ⁴ sə́ súlí ń pɛ nyí rí lyì bí byɛ̀bɛ́ gakó ǹ la bɛ à nyí pɔ mɔ́ yó-cìnə́ bé myɛ nɛ ń wɔ̀ : Wɔ́ Bə-zhɔ-zhe, jàn cìnə́ bé yó-cə́bal mɔ́, Esərayɛl Yi rí rə̀ zɔ̀m rə̀myɛ́ rə wɔ̀ : Nyǐ-nə kɔn rɛ́ dɛ̀bɛ́ á la vò á byili á yó-cìnə́ bé ne mó : ⁵ Nyǐ wɔ́ àmyɛ́ à wɛ̀rhɛ́ cɛ yá, ǹdə́ numbyínsí ǹdə́ vwàmá nɛ́ cɛ yó mó, à wɛ̀rhɛ́ rɛ ǹdə́ à jàn rɛ́, ǹd’â jɛ̃̀ y ŋwɔ̀nɔ́ wá, sə à n’â pɛ y lò mɔ̀bɔ́ à só à n’â yǎl a pə mɔ́ nɛ. ⁶ Sə nyǐ èlǎsɛ̃́, à n’â ce tənèsé sə̀myɛ́ mɔ́ gakó à tùntùnnə Bəbyəlɔnɛ pyɔ̌ Nabəkɔdɔnɔzɔɔrɛ jɔ̃̀ wa ; À n’â pɛ mɔ vwàmá nɛ́ myɛ bə̀ ń cìní. ⁷ Tənèsé gakó m’a shɛ̀nɛ́ ń nyí ni, sə shɛ̀nɛ́ ń byǎ nyí ni, sə shɛ̀nɛ́ ń byǎ bɛ́ byǎ bɛ́ myɛ nyí ni, kɔn m’e yí ǹ tənà y dɛ̃ rɛ́ m’e yí, sə tənèrh shɛ̀bɛ́ sə̀ zhe ŋwɔ̀nɔ́ nánfɔ̀lɔ̀, ǹdə́ pyǎ nánfwààlɛ mɔ́ m’a bə̀ bə zwẽ y bə cìní. ⁸ Sə tənà kɛ̀bɛ́ ǹdə́ pyɔ̌ tənà kɛ̀bɛ́ è gə yə̀ shɛ̀nɛ́ e zhĩ Nabəkɔdɔnɔzɔɔrɛ zhĩĩ rí, à m’a zə búlə́ shù ǹdə́ nɔrh ǹdə́ cím-bəlwɛ̀lɛ́ a m’a pɛ y còrhò-tum ; kɔn m’e yí e jé tɛ̃́ ǹdə́ à jɛ̃̀ jàn rɛ́. Wɔ́ Bə-zhɔ-zhe ń zɔ̀m rə̀myɛ́. ⁹ Sə è gə wɔ́ ámyɛ̌ yilə ; á bə̀k’á cili á nyì-zwennə bé, ǹdə́ á jə̀-pársɛ́ cìnə́ bé ǹdə́ á dàrhà kùrə̀ byil-nə bé ǹdə́ á jì-jǐrh ywẽ̀ tumə né cìnə́ bé zòmà nɛ́ yé ; bə̀myɛ́ byɛ̀bɛ́ bə̀ n’ê zɔ̀m ǹd’ába bə zhe : Á t’á la Bəbyəlɔnɛ pyɔ̌ mɔ́ yómə́ yál gaga mɔ́. ¹⁰ Lwar-na bə̀ wɔ́ kɔma bɛ́ bə̀ n’ê gòm bə̀ pɛ ába mɔ́, è ce à la ába jǔ á tənà y w á du á yẽ̌ y vò kwã nɛ́ gaga ; mùnì a ce a jé tɛ̃́. ¹¹ Sə tənà kɛ̀bɛ́ è shɛ̀nɛ́ e zwẽ Bəbyəlɔnɛ pyɔ̌ mɔ́ zhĩĩ rí e zhĩ mú, à m’a yẽ̌ y è sə̀pwà tənà y wa, mùnì ga e vɔ̀ è kálsɛ́, e jòm è bɔnɔ w wẽ́. Wɔ́ Bə-zhɔ-zhe ń zɔ̀m rə̀myɛ́. ¹² Wɔ́ zɔ̀mà nɛ́ nə̀myɛ́ mɔ́ cìcì mú gakó à zɔ̀m a byili Zhidə pyɔ̌ Sədəcaasɛ myɛ nɛ a wɔ̀ mɔ : Ǹmyɛ́ ǹdə́ ǹ dwí rí shɛ̀nɛ́-na á lwəl á cìn tɛ̃́, á zwẽ Bəbyəlɔnɛ pyɔ̌ mɔ́ ǹdə́ ń dwí rí zhĩĩ rí á zhĩ, mùnì ga á zhə myə̌l. ¹³ Wɔ́ bə̀kɔ́n yil ǹmyɛ́ ǹdə́ ǹ dwí rí nə m’ǎ yẽ̌ á cìn tɛ̃́ lwəl Bəbyəlɔnɛ pyɔ̌ mɔ́ ǹdə́ dwí rí yé né ne, á zhĩ bə̀ zhĩĩ rí ǹdə Bə-zhɔ-zhe gə́ byili ní ní ta, á zɛ̃̀ á la yõ̌ búlə́ shù ǹdə́ nɔrh ǹdə́ címí námməlwɛ̀lɛ́ gu ába mɔ́ ? ¹⁴ Bə̀k’á cili nyi-zwennə bé byɛ̀bɛ́ bə̀ n’ê zɔ̀m ǹd’ába bə̀ zhe bə̀ : Á t’á la Bəbyəlɔnɛ pyɔ̌ mɔ́ yómə́ yál gaga mɔ́ zɔ̀mà nɛ́ yé ! Bə̀ nyǐ bə̀ wɔ́ nyì-zwennə nánkɔ̀mrɛ. ¹⁵ À yə̀ bɛ twĩ̀ gaga yé, wɔ́ Bə-zhɔ-zhe ń zɔ̀m rə̀myɛ́. wɔ́ à yil ré bə̀ zɔ bə̀ m’ê gòm kɔma. Rə̀myɛ́ ce à m’a jì ámyɛ̌ ǹdə́ nyì-zwennə bé bə̀ n’ê zɔ̀m nyì-zwennə zɔ̀mà né mɔ́ á jé tɛ̃́. ¹⁶ À zɔ̀m ǹdə́ vwĩ̀-zwə́lnə bé ǹdə́ dwí rí gakó a wɔ̀ : Nyǐ Bə-zhɔ-zhe zɔ̀m èta n wɔ̀ : Bə̀k’á cili nyì-zwennə bé bə̀ n’ê zɔ̀m nyì-zwennə zɔ̀mà bə̀ byili ába bə̀ zhe : Nyǐ-nə kɔn k’ê la dɔnɔ yé, bə̀ m’a k’a zə Bə-zhɔ-zhe jì y nə̀zhĩ̌sí bə shí Bəbyəlɔɔnɛ bə̀ bà ! Lwar-na bə̀ nyǐ wɔ́ kɔma bə̀ n’ê gòmà ! ¹⁷ Á bə̀k’á cili bə̀ zɔ̀mà nɛ́ yé ; ámyɛ̌ wírí á shɛ̀nɛ́ á lwəl á cìn tɛ̃́ Bəbyəlɔnɛ pyɔ̌ mɔ́ yé né, nyǐ á gə wɛ̀rhɛ́ èta á m’á zhə myə̌l. Sə è nə wɔ́ byè yil cɔ w kɔ̀bɔ́ la jì-bwə̀r jǐrh mó ? ¹⁸ Bə̀ gə wɔ́ nyi-zwennə zhə̀nà, zɔ̀mà nɛ́ nyɛ̀bɛ́ bə̀ n’ê byili gə wɔ́ Bə-zhɔ-zhe sono nə̀ shí ní ; sə bə zə Bə-zhɔ-zhe mó ń cǐ jàn cìnə́ bé gakó mó cã̌ nɛ, mùnì ga bə̀ bə̀k’a pwà Bə-zhɔ-zhe jì nəzhĩ̌sí sə̀ dàl Zhərəzalɛm nɛ́ mɔ́ bə m’e vò Bəbyəlɔnɛ yé. ¹⁹ Nyǐ-nə kɔn rɛ́ dɛ̀bɛ́ Bə-zhɔ-zhe mó ń cǐ jàn cìnə́ bé gakó mó zɛ̃̀ n zɔ̀m yə né ǹdə́ zhǎ nánfwɛ̀lɛ́ y ǹdə́ vwə̃tur rí, ǹdə́ zhěsé y’à cĩ́ rə̀ yó mó, ǹdə́ wẽ̀ ré dwã bɛ́ tɛ̀bɛ́ gakó rə̀ y’à gwẽ̌ dàl cɔ w Zhərəzalɛm nɛ́ mɔ́, ²⁰ e sùlì wẽ̀ ré dɛ̀bɛ́ gakó rə̀ y’à mɛ̃ nɛ́ Bəbyəlɔnɛ pyɔ̌ Nabəkɔdɔnɔzɔɔrɛ gə́ tú n zə Zhowəcim byǐ Yəkɔnəya Zhidə pyɔ̌ mɔ́, ǹdə́ Zhidə lyì-fwààlɛ́ ǹdə́ Zhərəzalɛm lyì-fwààlɛ mɔ́ yi ní mú, ²¹ Nyǐ-nə kɔn rɛ́ dɛ̀bɛ́ Bə-zhɔ-zhe, Esərayɛl Yi rí zɛ̃̀ rə zɔ̀m wẽ̀ ré tɛ̀bɛ́ rə̀ dàl Yi jì y ǹdə́ pyɔ̌ mɔ́ kɛ̀lɛ́ y wa, ǹdə́ Zhərəzalɛm yil mó : ²² Bə̀ m’a pwà wẽ̀ ré bə m’e vò Bəbyəlɔnɛ, sə rə̀ m’a mɛ̃ gàà mɔ́, kɔn m’e yí dɛ̃ rɛ́ tɛ̀bɛ́ à la zɛ̃̀ a pyàr rɛ̀, a ce bə k’a zə rɛ bə bə̀ jàà y kɛ̀bɛ́ wa. Wɔ́ Bə-zhɔ-zhe ń zɔ̀m rə̀myɛ́ mɔ́.