¹ Byin rí rə̀myɛ́ cìcì mú wẽ́, Zhidə pyɔ̌ Sədəcaasɛ pyɛ̀lɛ̀ rɛ́ kùr-jirə́ y yi ní, è byinə nə̀na nyǎn rɛ́ cànsɛ sə̀nu nyǎ y wẽ́, nyì-zwennə, Gabaɔ̃ lyì bal Ananya, Azuuri byǐ mú, zɔ̀m ǹdə́ nɛ vwĩ̀-zwə́lnə bé ǹdə́ dwí rí púlə́púlə́ yé né Yi jì y w n wɔ̀ : ² Nyi nyí rí tɛ̀bɛ́ Bə-zhɔ-zhe, jàn cìnə́ bé gakó cǐnnə mó byili mú, ń wòwə̀ : À m’a swàr Bəbyəlɔnɛ pyɔ̌ mɔ́ zhĩĩ rí á pyə́pyəla w mɔ́ a cĩ́ tɛ̃́. ³ Nyɔ̀nɔ̀ ǹdə́ byinə nə̀lyè, byinə né nə̀lyè y zhɔ̌ mɔ́ dɛ̃ rɛ́ yù w cìcì à m’a ce bə k’a zə Bə-zhɔ-zhe jì y Nə̀zhĩ̌sí gakó shɛ̀bɛ́ Bəbyəlɔnɛ pyɔ̌ Nabəkɔdɔnɔzɔɔrɛ yà ń pwà jàà y kɛ̀bɛ́ wẽ́ n mə n vò Bəbyəlɔnɛ y mɔ́ ; ⁴ à m’a ce bə k’a zə nə̀zhĩ̌sí ǹdə́ Zhowəcimi byǐ Zhəkɔnənya Zhidə pyɔ̌ mɔ́ ǹdə́ Zhidə lyì bí byɛ̀bɛ́ gakó bə̀ y’à zɔ bə m’e vò Bəbyəlɔnɛ y mɔ́, bə k’a m’e bə̀ jàà y kɛ̀bɛ́ cìcì mú wẽ́ ; bə̀ à m’a swàr zhĩĩ rí tɛ̀bɛ́ Bəbyəlɔnɛ pyɔ̌ mɔ́ zhĩ bi mú a cĩ́ tɛ̃́. ⁵ Rə̀myɛ́ yó né nyì-zwennə Zheremyi zɛ̃̀ n lyár nyì-zwennə Ananya zɔ̀mà nɛ́, vwĩ̀-zwə́lnə bé ǹdə́ dwí rí gakó yé né Yi jì y wẽ́ ; ⁶ Zheremyi wɔ̀ : Amɛn ! Bə̀ Bə-zhɔ-zhe ce kɔn yə̀ èta ! Bə̀ Bə-zhɔ-zhe pyǐrh nyì-zwennə zɔ̀mà nɛ́ ǹ zɔ̀m mɔ́, sə n ce Yi jì y nə̀zhĩ̌sí ǹdə́ lyì bí byɛ̀bɛ́ bə̀ y’à zɔ bə m’e vò Babyəlɔnɛ y mɔ́ gakó k’a bə̀ jàà y kɛ̀bɛ́ wẽ́. ⁷ Sə kɔn rɛ́ tɛ̀bɛ́ rə̀ ŋwɛ́nɛ́ mɔ́, cili zɔ̀mɛ̀ rɛ́ tɛ̀bɛ́ èta à la zɔ̌m mɔ́, ǹmyɛ́ ǹdə́ dwí rí gakó ce-na rə zù á zhɛ̃̌ wa, nyǐ zɔ̀mɛ̀ rɛ́ : ⁸ Lwar bə̀ nyì-zwennə bé byɛ̀bɛ́ bə̀ jɛ̀rɛ̀ àmyɛ́ ǹdə́ ǹmyɛ́ ga bə bə̀ shãã ga bə zɔ̀m nyì-zwennə zɔ̀mà bə m’e bú ǹdə́ tənèrh nánzhəzhɔ̌, bə bú ǹdə́ pyǎ byɛ̀bɛ́ bə̀ y’à zhe jàn dɛ̃́dɛ̃́ mɔ́, nyǐ bə̀ dámǎ bə zɔ̀m búlə́ nyɛ̀bɛ́ nə̀ bànà, ǹdə́ lwɛlɛ rɛ́ tɛ̀bɛ́ rə̀ bànà, ǹdə́ cím-bəlwɛ̀lɛ́ y kɛ̀bɛ́ è bàn mɔ́ gakó yò bə byili ; ⁹ sə lwar, bə̀ nyǐ wɔ́ nyì-zwennə gə bwə̀l n byili bə̀ yə̀-zùlə́ bàn jǒm, ń zɔ̀mɛ̀ rɛ́ gə pyìrh, wɔ́ rə̀myɛ́ yi ní bə̀ n’ê lwar zhə̀n zhə̀n ga, bə̀ wɔ́ Bə-zhɔ-zhe ń twĩ̀ mu. ¹⁰ Rə̀myɛ́ yó né, nyì-zwennə Ananya zɛ̃̀ n swàr zwĩĩ rí nyì-zwennə Zheremyi pyə́pyəla w n kə́ rɛ n yəywɛlɛ. ¹¹ Nyì-zwennə Ananya zɛ̃̀ n zhì dwí púlə́púlə́ yé né n wɔ̀ : Nyǐ Bə-zhɔ-zhe nə́ ń zɔ̀m èta : Nyǐ byinə né nə̀lyé y nə̀ bàn mɔ́ wẽ́ wɔ́ èta kɔn la nɛ́ yál, à m’a swàr zhĩĩ rí tɛ̀bɛ́ Babyəlɔnɛ pyɔ̌ Nabəkɔdɔnɔzɔɔrɛ cĩ́ tənèsé gakó pə́pyəla w mɔ́ a kə́ rɛ a yəywɛlɛ. Rə̀myɛ́ kwã nɛ́, nyì-zwennə, Zheremyi já n zhǐr. ¹² Nyì-zwennə Ananya gə́ swàr zhĩĩ rí nyì-zwennə Zheremyi pyə́pyəla w n kə́ rɛ n yəywɛlɛ mɔ́ kwã nɛ́, Bə-zhɔ-zhe zɔ̀m ǹdə́ nyì-zwennə Zheremyi n wɔ̀ : ¹³ Zhəl n wɔ̀ Ananya nɛ : Nyǐ Bə-zhɔ-zhe pɔ nyí n wɔ̀ : Nyǐ zhĩĩ rí ǹ kɔ́ ń yəywɛlɛ mɔ́ dɔ̌, sə dɔ̌ w òmyɛ́ kɔ́ o yəywɛlɛ mɔ́ kwã nɛ́, wɔ́ cɔ̀bɔ́ ò la yə̀ zhĩĩ ǹ la nɔ ń kə́ ń yəywɛlɛ ń cĩ́ dɔ̌ nyɔ̃̌ w jàà wa. ¹⁴ Nyǐ Bə-zhɔ-zhe, Esərayɛl Yi rí rə̀ cǐ jàn cìnə́ bé gakó mó, pɔ nyí n wɔ̀ : À la cɔ̀bɔ́ zhĩĩ zhũ tənèsé gakó yó, mùnì ga sə shɛ̀nɛ́ sə lwəl sə̀ cìn tɛ̃́ sə twĩ̀ sə pə Bəbyəlɔnɛ pyɔ̌ Nabəkɔdɔnɔzɔɔrɛ nɛ ; à n’â ce gɔ nàmá bɛ́ myɛ ń jɔ̃̀ w ń la cìnú. ¹⁵ Rə̀myɛ́ yó né, nyì-zwennə Zheremyi zɛ̃̀ n wɔ̀ nyì-zwennə Ananya nɛ : Ananya, cili ! Nyǐ Bə-zhɔ-zhe yə̀ mɔ́ twĩ̀ yé ; wɔ́ ce ǹ ce dwí rí zɛ̃̀ rə̀ zhe kɔn dɛ̀bɛ́ rə̀ də̀ zhə̀n mɔ́ zhə̀nà. ¹⁶ Wɔ́ rə̀myɛ́ yil Bə-zhɔ-zhe wə̀lə̀ : Nyǐ nyɔ̀nɔ̀, a m’a jì mú cɛ y kɛ̀bɛ́ yó, ǹ mà ń cì byin rí tɛ̀bɛ́ cìcì mú wẽ́ ; bə̀ ǹ zɔ̀mà nɛ́ wɔ́ ǹ twə́r tɛ̀nɛ́ ǹdə́ Bə-zhɔ-zhe nyɔ̀mɔ̀ zɔ̀mà. ¹⁷ Èta nyì-zwennə Ananya já n cì byin rí rə̀myɛ́ cànsɛ shàlpyɛ̀ nyǎ y wẽ́.