¹ Nyǐ kɔn rɛ́ dɛ̀bɛ́ rə̀ kɛ̃ sɛ́bɛ́ rɛ́ nyì-zwennə Zheremyi zhì Zhərəzalɛm nɛ́ n pə rə vò Babyəlɔnɛ n pə náncɛsɛ́ ǹdə́ vwĩ̀-zwə́lnə bé ǹdə́ dwí rí lyì bí byɛ̀bɛ́ gakó bə̀ dàl Bəbyəlɔnɛ nɛ́ mɔ́, byɛ̀bɛ́ Babyəlɔnɛ pyɔ̌ Nabəkɔdɔnɔzɔɔrɛ yà ń tú n zə Zhərəzalɛm nɛ́ n mə n vò Bəbyəlɔnɛ mɔ́. ² Rə̀myɛ́ yó né ǹdə́ bə̀ zɔ pyɔ̌ Zəconəya, ǹdə́ pyɔ̌ mɔ́ ná mɔ́ kɛ̀lɛ́ y tùntùnnə bé, ǹdə́ Zhidə cɔ w yé né cìnə́ bé, ǹdə́ Zhərəzalɛm cɔ w yé né cìnə́ bé ǹdə́ bwə̀ə̀lé sàfɔ̌r rɛ́ wǎrhna bɛ́ bə m’e du Zhərəzalɛm nɛ́ mɔ́. ³ N kwè sɛ́bɛ́ rɛ́ n pə Shafã byǐ Elasa ǹdə́ Yələca byǐ Gəmarəya nɛ́, wɔ́ bə̀myɛ́ Zhidə pyɔ̌ mɔ́ yà ń twĩ̀ bə̀ zə sɛ́bɛ́ bə̀ m’e la Babyəlɔnɛ pyɔ̌ Nabəkɔdɔnɔzɔɔrɛ nɛ pɔ Babyəlɔnɛ nɛ́. Bə̀ y’à kɛ̃ sɛ́bɛ́ rɛ́ wẽ́ bə wɔ̀ : ⁴ Pyɔ̌, nyǐ wɔ́ àmyɛ́ Bə-zhɔ-zhe mó à cǐ jàn cìnə́ bé gakó mó, Esərayɛl Yi rí, à n’â zɔ̀m yómə́ bé byɛ̀bɛ́ gakó à zɔ Zhərəzalɛm nɛ́ a m’a bə̀ Babyəlɔnɛ mɔ́ n’â wə̀l ába : ⁵ Lú-na jìrh á zù, zhele-nə wẽ̀ báárɛ wẽ́ á ji rə ce byǎ á jí, ⁶ lúl-nə bala-byǎ ǹdə́ kana-byǎ ; pyǎ-na kana á pə á byǎ bɛ́ nɛ bə jí, s’á pə á bə̀-kwá bɛ́ byə́nə́ ne, mùnì ga bə̀myɛ lù bala ǹdə́ kana : mùnì á pù nánzhəzhɔ̌ jàà y kɛ̀bɛ́ á jě è wẽ́ mó wə, á lyì bí bə̀k’a bɔ̀ yé. ⁷ Pyǎ-na cɛ̀nɛ̀ á pə cɔ w bə̀ zɔ ába bə bə̀ yómre jè ò wẽ́ mó ne, lwə̌l-nə Bə-zhɔ-zhe ò yilə, bə̀ cɔ w gə só ò cìnə̀, ámyɛ m’ǎ tó w á swéné á cìnə̀. ⁸ Bə̀ nyǐ Bə-zhɔ-zhe mó ń cǐ jàn cìnə́ bé gakó mó wə̀lə̀ : Bə̀k’á yẽ̌ á nyì-zwennə bé ǹdə́ á jə̀-pársɛ́ cìnə́ byɛ̀bɛ́ bə̀ ŋwɛ́nɛ́ á cəcəl w mó ne bə jə́jɛ̀rɛ́ ába yé, s’á bə̀k’á pyà dàrhà nɛ́ á n’á dàrh mɔ́ kǒ ǹdə kɔ̀-twə̌ ta yé ! ⁹ Bə̀ nyǐ nyì-zwennə bé wɔ́ à yil ré bə̀ n’ê zal bə̀ m’ê gòm kɔma bə̀ pɛ ába. S’e də̀ àmyɛ́ à twĩ̀ bí gaga yé. Wɔ́ Bə-zhɔ-zhe ń zɔ̀m rə̀myɛ́. ¹⁰ Nyǐ kɔn rɛ́ dɛ̀bɛ́ Bə-zhɔ-zhe zɔ̀m n byili mú, ń wòwə̀ : Nyɔ̀nɔ̀ ǹdə́ byinə né shə́-shàlpyɛ̀ y gə tú nə̀ zhɛ̀ Babyəlɔnɛ yil mó kwã nɛ́, à m’a zɛ̃̀ a lyǐrh á yò, a pyìrh à zɔ̀mɛ̀ rɛ́ náàcɛ̀nɛ́ y á yilə, a k’a zə ába a bə̀ jàà y kɛ̀bɛ́ wa. ¹¹ B’à yě kɔn rɛ́ dɛ̀bɛ́ à tɛnɛ á yil mó párá, kɔn rɛ́ rə̀myɛ́ mɔ́ wɔ́ yə̀-zùlə́ kɔna, rə̀ də̀ zúzúnú kɔn yé, mùnì ga á ce á n’á dɛ̃̀ cɛ̀nɛ̀ rɛ́ tɛ̀bɛ́ à la ába wɔ̀rhɔ́ mɔ́. ¹² Eta, á m’ǎ n’á twí yi-co jààsɛ́ wẽ́, á m’á byẽ̀ ne ; sə à m’a zwẽ á lwə̌l mó. ¹³ Á m’ǎ pyà nɛ, sə á m’ǎ nə nɛ, ǹd’á gə n’á pyà nɛ ǹd’á wu gakó. ¹⁴ À m’a yẽ̌ à cìn ni a byili ába, wɔ́ Bə-zhɔ-zhe ń zɔ̀m rə̀myɛ́, à m’a k’a zə á lyì bí bə̀ zɔ bə vò yóm ré mó, a k’a m’a bà ; à m’a zə ába á k’á shí tənèsé, ǹdə́ jààsɛ́ shɛ̀bɛ́ gakó à y’à jì ába a ce sə̀ wẽ́ mó w a cĩ́ dwã yó, à m’a k’a zə ába á shí jàà y kɛ̀bɛ́ à y’a ce á vò yóm ré è wẽ́ mó w á k’á bə̀ jàà y kɛ̀bɛ́ wẽ́. ¹⁵ Ǹdə́ rə̀myɛ́ ga, á n’á wə̀lə̀ : Bə-zhɔ-zhe vùr nyì-zwennə n pə nə́ba Bəbyəlɔnɛ nɛ́ ! ¹⁶ Nyǐ kɔn rɛ́ dɛ̀bɛ́ Bə-zhɔ-zhe mó ń cǐ jàn cìnə́ bé gakó mó, zɔ̀m pyɔ̌ mɔ́ mɔ̀bɔ́ ń jě Dəvyidi pyɛ̀lɛ̀ rɛ́ də̀gwã́ y yó mó, ń cǐ dwí rí lyì bí byɛ̀bɛ́ gakó bə̀ jě cɔ w kɔ̀bɔ́ wẽ́ mó, ǹdə́ da-byǎ bɛ́ byɛ̀bɛ́ bə̀ yə̀ zal bə m’e vò yóm ré jè y mó yil mó ; ¹⁷ Bə-zhɔ-zhe zɔ̀m èta n wɔ̀ : Nyǐ à m’a ce búlə́ shù ǹdə́ nɔrh ǹdə́ címí námməlwɛ̀lɛ́ bə rə zə bɛ, a ce bə jǐrh ǹdə épyìlə́ nyɛ̀bɛ́ nə̀ bə càn numbyíní wàr è m’a jí ta. ¹⁸ À m’a zə búlə́ shú ǹdə́ nɔrh ǹdə́ címí námməlwɛ̀lɛ́ a pú bə̀ kùr a jì, a ce bə jǐrh ywẽ kɔn lũ w tənèsé lyì bí gakó yé né, bwəl námməlwɛ̀lɛ́ lyì, wu-zhìlù lyì, mɔ̀n kɔna, ǹdə́ cìzhìl nánfɔ̀lɔ̀ kɔna, tənèsé shɛ̀bɛ́ à la bɛ jǔ a ce sə̀ wẽ́ mó wẽ́. ¹⁹ Bə̀ gə́ yə̀ à zɔ̀mɛ̀ rɛ́ cili mú yilə ; wɔ́ Bə-zhɔ-zhe ń zɔ̀m rə̀myɛ́, bə̀myɛ́ byɛ̀bɛ́ à twĩ̀ à tùntùnnə, à nyì-zwennə bé bə̀ sono nəkɔkɔ́lɛ́ gakó, bə zɛ̃̀ yə̀ cili mú, wɔ́ Bə-zhɔ-zhe ń zɔ̀m rə̀myɛ́. ²⁰ Sə ámyɛ̌, byɛ̀bɛ́ à zɔ Zhərəzalɛm nɛ́ a m’a vò yóm ré Babyəlɔnɛ mɔ́, cili –nə ! ²¹ nyǐ wɔ́ Bə-zhɔ-zhe mó ń cǐ jàn cìnə́ bé gakó mó, Esərayɛl Yi rí rə̀ n’ê zɔ̀mà ; rə̀ n’ê zɔ̀m Kɔlɔja byǐ Ashabɛ ǹdə́ Maasəja byǐ Sədəcasɛ bɛ́ bə̀ n’ê zə à yil ré bə̀ gòm kɔma bə̀ pɛ ába mɔ́ ; nyǐ-nə à la bɛ Babyəlɔnɛ pyɔ̌ Nabəkɔdɔnɔzɔɔrɛ jɔ̃̀ w co n gu bi á yé né. ²² Bə̀ m’a zə bɛ bə yə̀ bwəl námməlwɛ̀lɛ́ kɔn, byɛ̀bɛ́ gakó bə̀ zɔ yóm ré mó gakó yilə ; bə̀ m’a n’ê zɔ̀m bə̀ yò bə̀ zhe : Bə̀ Bə-zhɔ-zhe wɛ̀rhɛ́ mɔ́ ǹdə ń gə́ wɛ̀rhɛ́ Sədəcasɛ ǹdə́ Ashabɛ nɛ́, n ce Babyəlɔnɛ pyɔ̌ mɔ́ zə bɛ n wò myǐn w ní mú ta ! ²³ Wɔ́ bə̀ gə́ wɛ̀rhɛ́ pwàrhà tumə né, bə̀ zù bə̀ da-byǎ bɛ́ kana bɛ́ wẽ́ bə̀ n’ê zal bə̀ zwì, ǹdə́ kɔma bɛ́ bə̀ n’ê zal à yil ré bə̀ gòm mó yilə, e j’à yə̀ bɛ nyí pɛ bə̀ bə̀ zɔ̌m yé, À yě re, à wɔ́ rə̀myɛ́ mɔ́ zhə̀n cínnə. Wɔ́ Bə-zhɔ-zhe ń zɔ̀m rə̀myɛ́. ²⁴ Zheremyi, wál Nəshəla lyì bal Səshəməyəja nɛ : ²⁵ bə̀ ń nyǐ wɔ́ Bə-zhɔ-zhe mó mɔ́bɔ́ ń cǐ jàn cìnə́ bé gakó mó, Esərayɛl Yi rí rə̀ wə̀lə̀ : Ǹmyɛ́ ǹ cìcì ǹ kɛ̃ ǹ sə̀pwà yil sɛ́bɛ́ ń pə bə vò bə pə dwí rí púlə́púlə́ né, ǹdə́ Maasəja byǐ, vwĩ̀-zwə́lnə Sofoni ni, ǹdə́ vwĩ̀-zwə́lnə gakó ne Zhərəzalɛm nɛ́; Ǹ kɛ̃ sɛ́bɛ́ rɛ́ wẽ́ ń wɔ̀ : ²⁶ Bə̀ wɔ́ Bə-zhɔ-zhe ń cír mó n cĩ́ ǹ wɔ́ vwĩ̀-zwə́lnə, ǹ zhǐ vwĩ̀-zwə́lnə Jəwəjada jàà wa, mùnì ga lyì yə̀ Bə-zhɔ-zhe jì y w bə̀ nyǐ è yò ; lò gə zɛ̃̀ ń nə́ ń zɔ̀m nyə̀nyààrɛ zɔ̀mà bə̀ ń wɔ́ nyì-zwennə, sə́ zə mɔ ń ce byə̀nə́-jù wə ráá ń lyẽ mo ǹdə́ cɔ̀bɔ́. ²⁷ Sə èlǎsɛ̃́, è nə wɔ́ byè yil ǹ nə tá ǹ ji Anatɔtɛ lyì bal Zheremyi mú ń nə́ zɔ̀m nyì-zwennə zɔ̀mà nɛ́ nə́ cəcəl w mó búlə́ mó, ²⁸ ń gaga mɔ́ twĩ̀ bə bə̀ Babyəlɔnɛ bə wɔ̀ : Bə̀ nyǐ yóm ré m’a dɛnɛ ; rə̀myɛ́ ce, lú-nə jìrh a zù, zhele-nə cèmé nə ce byǎ á jí ! ²⁹ Nyǐ vwĩ̀-zwə́lnə Sofoni kàrmɔ sɛ́bɛ́ rɛ́ nyì-zwənnə Zheremyi yé né. ³⁰ Sə Bə-zhɔ-zhe zɔ̀mɛ̀ rɛ́ wə̀l Zheremyi ni èta : ³¹ Zɛ̃̀ ń zɔ̀m ǹdə́ byɛ̀bɛ́ gakó bə̀ ŋwɛ́nɛ́ yóm ré jè y né mó ń wɔ̀ : Nyǐ-nə kɔn rɛ́ dɛ̀bɛ́ Bə-zhɔ-zhe zɔ̀m Nəshəlam lyì bal Səshəmaja yil mó : Səshəmaja gə́ zɔ̀m nyì-zwennə zɔ̀mà n byili ába, e j’à də̀ àmyɛ́ à twĩ̀ mu mú, n ce á zə ń kɔma bɛ́ zhə̀n mɔ́ ce, ³² Nyǐ-nə kɔn rɛ́ dɛ̀bɛ́ Bə-zh-ɔ-zhe zɔ̀m mɔ́ : À m’a pə còrhò-tum Nəshəlam lyì bal Səsəmaja ǹdə́ ń nɛ̀mɛ́ nɛ́ nɛ, ń nɔ̃ òdù ga t’â la dwí rí tɛ̀bɛ́ cəcəl w jǒm yé, ń yírh t’â la cɛ̀nɛ̀ rɛ́ tɛ̀bɛ́ à la à dwí rí ni wɔ̀rhɔ́ mɔ́ yó jǒm yé, wɔ́ Bə-zhɔ-zhe ń zɔ̀m rə̀myɛ́ ; Bə̀ ń zɔ̀mà nɛ́ wɔ́ Bə-zhɔ-zhe nyí ni cõ zɔ̀mà.