¹ Bə-zhɔ-zhe zɔ̀m ǹdə́ Zheremyi n wɔ̀ : ² Nyǐ kɔn rɛ́ dɛ̀bɛ́ Bə-zhɔ-zhe, Esərayɛl Yi rí zɔ̀m mɔ́, rə̀ wòwə̀ : ³ Nyǐ dɛ̃ ŋwɛ́nɛ́ rə̀ bànà, à m’a k’a zwẽ à dwí Esərayɛl lyì bí ǹdə́ Zhidə lyì bí bə̀ ŋwɛ́nɛ́ yóm re jè né mó a m’a bà, wɔ́ Bə-zhɔ-zhe ń zɔ̀m rə̀myɛ́, à m’a k’a zə bɛ a bə̀ tənà y à pɔ bə̀ dabá nɛ mɔ́ wẽ́, e yə̀ bə̀myɛ́ nyǎ. ⁴ Wɔ́ zɔ̀mà nɛ́ nə̀myɛ́ Bə-zhɔ-zhe zɔ̀m Esərayɛl ǹdə́ Zhidə yil mó èta. ⁵ Nyǐ kɔn rɛ́ dɛ̀bɛ́ Bə-zhɔ-zhe zɔ̀m n wɔ̀ mɔ́ : Nə́ nyɛ̌ whu-zɛ̃̀ɛ̃́ búbwéése, sə̀ n’ê zɛ̃̀ wu ni, sə̀ də̀ yə̀-zùlə́ kɔn yé. ⁶ Wál-na dwã nɛ, á nyǐ bal wɔ̌ ń lùl byǐ ǹdə kɛ̃ ta ! Sə wɔ́ bə̀kɔ́n yil à nə nə bala bɛ́ gakó bə̀ shàr bə̀ cə̀rh ne ǹdə wɔ́ kɛ̃ ń pwǐ n’ê yì ta mɔ́ ? Wɔ́ bə̀kɔ́n yil bə̀ yésé gakó pɔn èta mɔ́ ? ⁷ Nyǐ wɔ́ zwini tã̀ ! Bə̀ dɛ̃ rɛ́ rə̀myɛ́ mɔ́ wɔ́ dɛ̃ nánfɔ̀lɔ̀ ; rə̀ dwí rí gwẽ̌ yə̀ nɛ́ yàl gaga yé. È wɔ́ yi tɛ̀bɛ́ rə̀ m’a yə̀ wu-zhìlù yi Zhakɔbɛ yilə ; sə ǹdə́ rə̀myɛ́ ga ń mà n nə vwǎrh. ⁸ Bə-zhɔ-zhe mó ń cǐ jàn cìnə́ bé gakó mó, wə̀lə̀ : dɛ̃ rɛ́ rə̀myɛ́ yù wə̀, à m’a swàr zhĩĩ rí ǹ pyə́pyəla w mɔ́ a kə́ rɛ a yəywɛlɛ, a sə́ rə̀ nyáná nɛ́, ǹ kə́ ǹ tá ǹ la zhələ yómə́ yál yé. ⁹ Eta, dwí rí m’a yə̀ Bə-zhɔ-zhe rə̀ Yi rí tùntùnnə, ǹdə́ Dəvyidi bə pyɔ̌ mɔ́ à la rɛ pɔ mɔ́. ¹⁰ Sə ǹmyɛ́ à tùntùnnə Zhakɔbɛ, ǹ bə̀k’á dùr ywẽ yé, sə ǹmyɛ́ Esərayɛl, ǹ wu bə̀k’a zɛ̃̀ yé ! Bə̀ nyǐ à m’a vwǎrh mɔ́ jàà kɛ̀bɛ́ è nyɛ mɔ́ wẽ́, à m’a vwǎrh ǹ nɛ̀mɛ́ nɛ́ tə̀nà y kɛ̀bɛ́ nə̀ yàl yómə́ è wẽ́ mó wə ; Zhakɔbɛ mà n ká n bà, n jòm shɛ́ɛ́ n shǐrh, lòlò tá ń bàn mɔ zwini pɔ yé. ¹¹ B’à ŋwɛ́nɛ́ ǹdə́ mɔ́, à la mɔ́ vwǎrh, wɔ́ Bə-zhɔ-zhe ń wɔ̀m rə̀myɛ́ ; à m’a ce tə̀nèsé shɛ̀bɛ́ gakó à jì mú ń vò sə̀ wẽ́ mó jé tɛ̃́, sə è gə wɔ́ ǹmyɛ́ yilə, à t’â la ce ń jé tɛ̃́ yé ; sə à m’a pɔ̃́ còrhò-tum ǹ dóó w yilə, à t’â la mɔ́ yõ̌ nánfò yé. ¹² Bə-zhɔ-zhe wə̀lə̀ : Ǹ cɔ̀mɔ̀ mɔ́ já dɛ̃́dɛ̃́, ǹ nyəlɛ rɛ́ yin rí já. ¹³ Ǹ bə lò zhe ń nə́ ń zwẽ ǹ nyí ní ń la ǹ nyəlɛ rɛ́ dɔ n bə rɛ́ yé ; ǹ bə cə́m zhe, ǹ bə jɛ̃̀-kɔn myɛ zhe ǹ la mə́ shili ǹ cìn ń wárh yé. ¹⁴ Lyì bí byɛ̀bɛ́ bə̀ y’à só mó mó gakó swě ǹ yò, mə̀dù ga kə́ ń tá ń nyǐ ǹ sono yé ; bə̀ à mà mɔ́ ǹdə lò gə́ y’ǎ mà ǹ zù-bal nɛ́, à pɔ mɔ́ còrhò-tum ǹdə́ jàn, ǹ lwɛlɛ rɛ́ nánjə̀jóló w ǹdə́ ǹ yə̀-bəlwàálɛ́ nánzhəzhɔ w ǹ wɛ̀rhɛ́ mɔ́ yilə. ¹⁵ Wɔ́ bə̀kɔ́n yil ǹ nə́ ǹ bwí ǹ cɔ̀mɔ̀ mɔ́ yil mó, yin rí tɛ̀bɛ́ ǹ lwɛlɛ rɛ́ ce rə̀ n’ê yì mú mú yil mó ? Bə̀ wɔ́ ǹ lwɛlɛ rɛ nánjəióló w ǹdə́ ǹ yə̀-bəlwàálɛ́ nánzhəzhɔ̌ yil à ce ywẽ̀ né nyɛ̀bɛ́ zə mɔ́ ń nwɛ̀nɛ̀. ¹⁶ Sə ǹdə́ rə̀myɛ́ ga, lwar bə̀ lyì bí byɛ̀bɛ́ bə̀ nwɛ̀nɛ̀ mɔ́ mɔ́ gakó myɛ b’a nə nɔ̀nɔ̀, sə è gə wɔ́ ǹ zwə̀ bé yilə, nyǐ bə̀ m’a zə bə̀ gakó bə vò yóm re jè ; byɛ̀bɛ́ bə bubu ǹ wẽ̀ ré mó, bə̀ m’a zə bə̀myɛ bə bubu bə̀ nyǎn rɛ́, à m’a yẽ̌ byɛ̀bɛ́ bə̀ n’ê bubu ǹ wẽ̀ ré mó ne a ce lyì byɛ̀bɛ́ bə̀ n’ê bubu wẽ̀ mó jɔ̃̀ w bə bubu bə̀ wẽ̀ ré. ¹⁷ Sə à m’a wárh mɔ́, a də ǹ nyəla nɛ́ a bə nɛ, wɔ́ Bə-zhɔ-zhe ń zɔ̀m rə̀myɛ́. Bə̀ bə̀ n’ê byẽ̀ mó, bə̀ bə̀ jì mú bə ce kwã nɛ́, Sənyɔ̃ pyɔ̀ w lòlò kə́ ń tá ń nyǐ o sõ mó. ¹⁸ Nyǐ kɔn rɛ́ dɛ̀bɛ́ Bə-zhɔ-zhe zɔ̀m mɔ́, ń wə̀lə̀ : Nyìwé, à m’a k’a zə Zhakɔbɛ lyì bí bə̀ y’à zɔ yómə́ mó a k’a m’a bə̀ bə̀ kwə̀ə́rhé wə, bə̀ bə̀ jòmə́ jààsɛ́ nɔ̀nɔ̀ zhe ne ; nyǐ cɔ w m’a k’a lù ò jì-bwə̀r ré nə̀-kùr jààsɛ́ wa, pyɔ̌ mɔ́ kɛ̀lɛ́ y m’a k’a lù e zhì è jàà y w ǹdə è gə́ y’à zhǐ ní shãã ga nɛ́ ta. ¹⁹ Rə̀myɛ́ yó né, nə̀bán-co ǹdə́ wu-nyɔ̃̀ búbwéése m’a zɛ̃̀ bə̀ cəcəl wə ; à m’a ce ń byǎ bɛ́ pù nánzhəzhɔ̌ bə̀ t’â la bɔ̌ yé ; à m’a ce bə nə còrhó, bə̀ t’â la bɛ súl yé. ²⁰ Ń byǎ bɛ́ m’a yə̀ ǹdə bə̀ gə́ y’à wɔ́ nɛ́ shãã ga nɛ́ mɔ́ ta nɛ́, ń dwã-gùlú m’a zhì à yé né, sə à m’a pə còrhò-tum lyì bí bə̀ n’ê nwɛ̀nɛ̀ mɔ mɔ́ nɛ. ²¹ Bə̀ yó-cə́bal mɔ́ mà n shí bə̀ cəcəl wə, bə̀ m’a lù mɔ̀bɔ́ ń la bɛ cìnú mú bə̀ wẽ́ ; À m’a ce n bà, n bwəlse à nyí ni. Wɔ́ mɔ̌ lò ń mà n kwɛ̀nɛ́ n bwəlse à nyí ni mú ? Wɔ́ Bə-zhɔ-zhe ń zɔ̀m rə̀myɛ́. ²² Èta, á m’ǎ yə̀ à dwí, sə àmyɛ m’a yə̀ á Yi. ²³ Nyǐ Bə-zhɔ-zhe lyim rí nánfɔ̀lɔ̀ w zɛ̃̀ zho ò bànà, kùlmə nánfɔ̀lɔ̀ dɛ̃́dɛ̃́ du tɛ̃́ mə̀ bànà, mə̀ n’ê yə́yɛ́lɛ́ dɛ̃̌ dwə́ə́ré cìnə́ bé yə́-pɛ̀lɛ́ wa, ²⁴ Bə-zhɔ-zhe lyim rí nánfɔ̀lɔ̀ t’â la pyǐrh ǹdə́ rə̀ yə̀ kɔn rɛ́ dɛ̀bɛ́ rə̀ tɛnɛ rə gu rə̀ wẽ́ rə̀ la wɔ̀rhɔ́ mɔ́ pyìrh yé. Sə kɔn m’a dɛnɛ, rə̀myɛ́ kwã á zɛ̃̀ á sú kɔn rɛ́ rə̀myɛ́ mɔ́ kùrə̀.