¹ Rə̀myɛ́ yi rí wə, Bə-zhɔ-zhe wə̀lə̀ : À m’a yə̀ Esərayɛl dwə́ né gakó Yi, sə nə̀myɛ gakó m’a yə̀ à dwí. ² Bə-zhɔ-zhe zɛ̃̀ n zɔ̀m èta n wɔ̀ : Dwí rí tɛ̀bɛ́ rə̀ lú búlə́ shù w yé né gɔ-elũ èpòlò w mó, à sónó w m’a yə̀ nɛ́ ǹdə́ rɛ ; Esərayɛl dwí rí n’ê zhə̀l rə̀ la rə̀ shìrhə́ jàà y wa. ³ Bə-zhɔ-zhe byili ni ń cìn shãã ga, n wɔ̀ : À só mó ǹdə́ sónó kɔ̀bɔ́ ò bə zhɔ̌ zhe mó ; wɔ́ rə̀myɛ́ è ce à yẽ̌ à wu-bɔ̀nɔ̀ w nɛ ò zhǐ ǹ yilə. ⁴ Esərayɛl tənà, ǹmyɛ́ mɔ̀bɔ́ ń wɔ́ kɛ̃-byì-bóm mó, à m’a k’a cĩ́ mú ǹ jàà y w kə́dò ; ǹ m’ǎ kwè ǹ gǔlsí ń jele ǹ nə́ ǹ dwí címsi wẽ́ lyì m’ê sɛ ǹdə́ wu-nyɔ̃̀. ⁵ Ǹ m’ǎ kə́ zhele də̀vɛ̃́ cèmé Samarɛ pyàr rɛ́ yó ; lyì bí byɛ̀bɛ́ bə̀ n’ê zhele cèmé né mó, m’a zhele ne, nə byì nə ce byǎ bə kwẽ. ⁶ Nyǐ dɛ̃ ŋwɛ́nɛ́ rə̀ bànà, lyì bí byɛ̀bɛ́ bə̀ cĩ́ Efərəyim pyàr rɛ́ yó bə̀ n’ê yìlì jàà nɛ́ mɔ́, m’a zɛ̃̀ bə̀ n’ê búbwéé bə̀ zhe : zɛ̃̀-na tɛ̃́ nə́ vò Sənyɔ̃, Bə-zhɔ-zhe nə́ Yi rí sono. ⁷ Bə̀ Bə-zhɔ-zhe pɔ nyǐ èta n wɔ̀ : Búbwéé-nə ǹdə́ wu-nyɔ̃̀ Zhakɔbɛ yilə, Zhẽ̌-nə á cələ dɛ̃̌ á fùù tənà y kɛ̀bɛ́ è cǐ tənèsé gakó mó yilə, nún-nə zùwə́ nwíísi á ce dɛ̃̌dɛ̃̌ á zhe : Bə-zhɔ-zhe, vwǎrh Esərayɛl dwí rí kùr rí nə̀ dàl mɔ́ ! ⁸ Nyǐ à m’a zə bɛ a shí lũ jə̀-gwã̀ sõ tənà y wa, ǹdə́ lũ kùr sõ a k’a m’a bà ; a cĩ́ bi dwã yó. Lyì-lyə̌r ǹdə́ gwǎnsɛ, ǹdə́ epùrh ǹdə́ esɔ̀nà gakó ŋwɛ́nɛ́ bə̀ wẽ́, bə̀ wɔ́ nunə nánjə̀jóló bə̀ kwɛ̃̀ bə̀ bàn nyɔ̀nɔ̀. ⁹ Bə̀ bàn ǹdə́ cìlə́, a zə bɛ à m’a bàn ǹdə́ bə̀ n’ê lwə̀l sǔbri. À m’a zə bɛ a kwè sɔ́má kɛ̀bɛ́ è càn bə̀ t’â la bə̀ nà mǎ yé, a vò vwaalɛ́ tɛ̀bɛ́ rə̀ zhe twɛ́nɛ́ dɛ̃́dɛ̃́ mɔ́ wẽ́. Àmyɛ́ à wɔ́ Esərayɛl da, Efərəyim zɛ̃̀ ń wɔ́ à byì-cɛ yá. ¹⁰ Tənèrh lyì, cili-nə Bə-zhɔ-zhe zɔ̀mɛ̀ rɛ́, s’a bwə̀l re á byili rə yí cɛmɛ nɛ́ nyɛ̀bɛ́ gakó nə́ ŋwɛ́nɛ́ pyépyé nàná bɛ́ cəcəl w mó w á wɔ̀ : Nyǐ-nə mɔ̀bɔ́ ń yà ń ce Esərayɛl lyì bí làà dẽ̌ mó, mà n ká n tal bɛ n cĩ́ dwã yó, ń mà n cili bə̀ sõ ǹdə vwã̌-ènɔ̀n gə́ n cili ń vwàmá sõ né ta. ¹¹ Bə-zhɔ-zhe ce Zhakɔbɛ lú, ń zwẽ Zhakɔbɛ lò mó mɔ̀bɔ́ ń jàn rɛ́ du mu mú jɔ̃̀ wa. ¹² Esərayɛl lyì bí m’a zə wu-nyɔ̃̀ búbwéése bə m’e bə̀ Sənyɔ̃ pyɛ̀lɛ́ y yó, bə̀ m’a dùr ǹdə́ mɔ̀n bə̀ yérh w bə bə̀ Bə-zhɔ-zhe jɛ̃̀-kɔn rɛ́ wẽ̀ ré yilə ; wẽ̀ ré rə̀myɛ́ wɔ́ : Bə̀lɛ́ y ǹdə́ də̀vɛ̃́ nándwə̃̀ y ǹdə́ nwə̃̌ nándwə̃̀ y ǹdə́ vɔ̌-ywààlɛ́ ǹdə́ vwàmá nánfwààlɛ́. Èta, bə̀ m’a nə bə̀ cin tɔ́nɔ́nɔ́nɔ́ ǹdə vɔlɔ twɛ́nɛ́ ta, wu-zhìlù k’ê t’â bɛ zal yé. ¹³ Rə̀myɛ́ yi ní, kana-byǎ bɛ́ m’a zɛ̃̀ bə zə wu-nyɔ̃̀ ǹdə́ sɔ, kɔn m’a yə̀ èta ǹdə́ bala-byǎ bɛ́ ǹdə́ náncɛsɛ́ myɛ ; à m’a ce bə̀ wun k’ê t’â la zhìlù cu yil yé ; à m’a lyə́r wu-zhìlù w òmyɛ́ o k’a jǐrh wu-nyɔ̃̀ bə̀ yilə, à m’a zə bə̀ wun ní ; a pə bɛ́ wu-nyɔ̃̀ bə̀ wu zhìlù w yilə. ¹⁴ À m’a ce à vwĩ̀-zwə́lnə bé dɔ̃̀ nàmá ǹdə́ bə̀ nwə̃̌rh bə sú, à dwí rí m’a jí à wẽ̀ ré rə sú. Wɔ́ Bə-zhɔ-zhe ń zɔ̀m rə̀myɛ́. ¹⁵ Bə-zhɔ-zhe zɔ̀m èta, n wɔ̀ : Bə̀ m’a nyɛ̀ɛ̀ búbwéése Arama nɛ́, wu-zhìlù búbwéése, sə̀ n’ê kúrh sə̀ lwé yə́-nàná cɛ̀ɛ́ tɛ̃́ ; wɔ́ Arəshəə ń nə́ ń kúrh ń byǎ bɛ́ nɛ ; ń bə shɛ̀ sə bə zə ń wu ni yé, bə̀ ń byǎ bɛ́ k’ê tɛ̀nɛ́ nɛ́ yé : ¹⁶ Bə-zhɔ-zhe zɔ̀m èta n wɔ̀ : Shĩ̌ ǹ cǐl ré, pɔ́pɔ̌ ǹ yə-nàná nɛ́ ; bə̀ ǹ tumə né m’a nə kwǎndɛ, wɔ́ Bə-zhɔ-zhe ń zɔ̀m rə̀myɛ́ ; bə̀ ǹ byǎ bɛ́ m’a k’a shí bə̀ zwə̀ bé tənà y w bə bà. ¹⁷ Bə̀ nyǐ kɔn ŋwɛ́nɛ́ ǹ nə́ ǹ dɛ̃̀ rə̀ bànà, wɔ́ Bə-zhɔ-zhe ń zɔ̀m rə̀myɛ́ ; Ǹ byǎ bɛ́ m’a k’a bə̀ bə̀ sə̀pwà taŋà y wa. ¹⁸ À nyɛ̌ Efərəyim wu-zhìlù w ò zhe mo ń nə́ ń kúrh ń zhe : Ǹ pɔ nɛ còrhò-tum ǹdə bə̀ y’a pə còrhò-tum nə̀-byɛ́lɛ́ námmənyɛnɛ nɛ mɔ́ nɛ́ ta ; ce a k’a pyìrhí a bə̀ à kwã nɛ́, nyǐ à ḿa kwɛ̃̀ a bà, bə̀ ǹ wɔ́ Bə-zhɔ-zhe, à Yi rí. ¹⁹ À gə́ y’à yẽ̌ mó a vò kwã nɛ́ mɔ́ yi ní, à wu w y’à zhìlì, sə à gə́ tú a lwar b’à wɛ̀rhɛ́ dwə́ə́ ré mó kwã nɛ́, à lwə̀l sǔbri : Cìzhìl zhe ne, à n’â yiyiri tɛ̃́ ! Sə wɔ́ à bə̀sɔ́nɛ́ rɛ́ tùntwə̃̀ə̃̀ né nə̀ ce cìzhìl ré pú ni èta mɔ́. ²⁰ Efərəyim nə də̀ à byǐ mɔ̀bɔ́ à só dɛ̃́dɛ̃́ nà, byǐ mɔ̀bɔ́ ń nə́ ń pɛ nɛ wu-nyɔ̃̀ dɛ̃́dɛ̃́ mɔ́ nà ? À gə tú à la ń yò zɔ̌m, à la ń yò zɔ̌m gakó mó, ǹ yò t’â shə́r à wẽ́ yé : À m’a dùr ń nɔ̀nɔ̀, wɔ́ Bə-zhɔ-zhe ń zɔ̀m rə̀myɛ́. ²¹ Esərayɛl, Kɛ̃-byì-bóm, Wɛ̀rhɛ́ nyɔrhɔ wẽ̀ tɛ̀bɛ́ rə̀ n’ê byili ǹ sɔ́má y shó mó, ń kù dǎr ń pəpa rɛ nɛ́, dɛ̃̌ sɔ́má yá, sɔ́má y kɛ̀bɛ́ ǹ tó mó ; ká kwɛ̃̀ ń bə̀ cɛmɛ nyɛ̀bɛ́ nə́ wɔ́ ǹmyɛ́ nyə̀ná nɛ́ mɔ́ wẽ́ ! ²² Bə̀kɔ́ ǹ jé, ǹ mà ń já ǹ nə́ ǹ yiyiri tɛ̃́ kɔn la m’e yí dǒ ? Nyǐ Bə-zhɔ-zhe wɛ̀rhɛ́ kɔn rə̀dù nándùl cɛ yó : Kɛ̃ mɔ́ ń nə́ ń pyà bal mɔ́. ²³ Bə-zhɔ-zhe mó, ń cǐ jàn cìnə́ bé gakó mó, Esərayɛl Yi rí nə́ ń zɔ̀m èta, ń zhe : Nyìwé, bə̀ m’a k’e zɔ̀m Zhidə tənà y ǹdə́ è cɛmɛ nɛ wa, ǹdə́ à gə tú a k’a zə è lyì bí yómə́ jè né bə kwɛ̃̀ bə bə̀ mó yó né, bə̀ m’a wɔ̀ : Bə̀ Bə-zhɔ-zhe cĩ́ bwəl cángá jàà y yó, Yi pyɔ̀ wá ! ²⁴ Wɔ́ gàà mɔ́ Zhidə lyì bí ǹdə́ bə̀ cɛmɛ nɛ́ gakó ǹdə́ bə̀ vwàlna bɛ́ ǹdə́ byɛ̀bɛ́ bə̀ n’ê kál vwàmá nɛ́ mɔ́ gakó m’a jòm né. ²⁵ A zɛ̃̀ n pə nɛ̃̌ lò mɔ̀bɔ́ nə̀nyɛ̀lɛ̀ zhe mó ne n nyɔ̃̀, a pə kùjú lò mɔ̀bɔ́ gakó ń jàn rɛ́ n’ê zhɛ̀ nɛ n jí n sú. ²⁶ Rə̀myɛ́ yi ní a j’a bùrhì a zɛ̃̀ jan rɛ́ wa, sə à púrí à jan rɛ́ wɛ̀rhɛ́ nɛ cɛ̀nɛ̀. ²⁷ Bə-zhɔ-zhe wə̀l bə̀ dɛ̃ ŋwɛ́nɛ́ rə̀ bànà ; à m’a dù numbyínsi dwí ǹdə jíjí dwí ta, a dù vwàmá myɛ dwí ǹdə jíjí dwí ta, Esərayɛl kɛ̀lɛ́ y ǹdə́ Zhidə kɛ̀lɛ́ y wẽ́. ²⁸ Ǹdə à gə́ twĩ̀ bi tum ní ; a mǔr, a kà, a cɔ̀, a wǔr a ló tɛ̃́, a wɛ̀rhɛ́ lwɛlɛ rɛ́ mɔ́ ta, wɔ́ èta myɛ à m’a k’a cili bə̀ sõ ; a lù, a zhele, wɔ́ Bə-zhɔ-zhe ń zɔ̀m rə̀myɛ́. ²⁹ Dwã nɛ́ nə̀myɛ́ mɔ́ wẽ́, bə̀ k’ê t’â la wál : Bə̀ dabá dɔ̀m sɛ̃́-cǒ byǎ nángwə́r, bə̀ byǎ yə́lə́ zɛ̃̀ nə nyɛ̀nɛ̀ yé. ³⁰ Bə̀ lò gakó wɔ́ ǹ sə̀pwà lwɛlɛ rɛ́ cu ǹ la cú ; wɔ́ lò mɔ̀bɔ́ gakó ń la sɛ̃́-cǒ byǎ nángwə́r ré dɔ́m mɔ́, cìcì mú yə́lə́ né nə̀ la nyɔ̀nɔ̀. ³¹ Nyǐ dwã ŋwɛ́nɛ́ nə̀ bànà, à m’a zə dɔbrɛ nándùl ǹdə́ Esərayɛl kɛ̀lɛ́ y ǹdə́ Zhakɔbɛ kɛ̀lɛ́ yá, ³² sə dɔbrɛ́ rə̀myɛ́ mɔ́ t’â la yál ǹdə tɛ̀bɛ́ à zɔ ǹdə́ bə̀ dabá ta mɔ́ yé, dɛ̃ rɛ́ tɛ̀bɛ́ à zɔ bɛ bə du Ezhipti tənà y w yi ní mú, bə̀ cɔ̀ dɔbrɛ́ rə̀myɛ́ mɔ́, e jà wɔ́ àmyɛ́ à yàl bə̀ yó-cə́bal mɔ́. Wɔ́ Bə-zhɔ-zhe ń zɔ̀m rə̀myɛ́. ³³ Nyǐ dɔbrɛ́ à la zal ǹdə́ Esərayɛl kɛ̀lɛ́ y dwã nɛ́ nə̀myɛ́ kwã nɛ́ mɔ́, wɔ́ Bə-zhɔ-zhe ń zɔ̀m rə̀myɛ́, ń wə̀lə̀ : À m’a ce à nyí rí yə̀ bə̀ wun ní wẽ́, à m’a kɛ̃ rɛ bə̀ wun ní wẽ́, à m’a yə̀ bə̀ Yi, sə bə̀ m’a yə̀ à dwí. ³⁴ Lò kə́ ń tá ń la zɛ̃̀ ń nə́ ń cèrhè ń dõ ráá ń da-byǐ ń zhe : Á yě Bə-zhɔ-zhe párá ! Bə̀ lyì bí gakó, bə̀sɔ́ná ǹdə́ náncɛrh ga, m’a lwar à párá, wɔ́ Bə-zhɔ-zhe ń zɔ̀m rə̀myɛ́ ; À m’a pə bɛ bə̀ lwɛlɛ rɛ́ sǔbri, à k’â t’â la bə̀ yə̀-bəlwàálɛ́ yò lyǐrh yé. ³⁵ Bə-zhɔ-zhe mó mɔ̀bɔ́ cɛ y gə lɔ́wá, n ce yi rí púrh rə yə̌r dɛ̃ rɛ́ mɔ́, yi rí gə zùwə̀, n ce cànà y ǹdə́ càmə́sɔ̌sɛ́ yə̌r cəcɛ̃ y mɔ́, ń nə́ ń ce nə̀-fɔ̀lɔ̀ w shìì nɛ̃̌ mɔ́, mə zɛ̃̀ mə̀ n’ê fùù ǹdə́ sɔ̀ nánfɔ̀lɔ̀ mɔ́, ń yil Bə-zhɔ-zhe, ń cǐ jàn cìnə́ bé gakó, wɔ́ ńmyɛ̌ ń zɔ̀m rə̀myɛ́ : ³⁶ Nyə́ né nə́myɛ́ gə tú nə̀ k’ê tɛ̀nɛ́ à yé né dɛ̃, wɔ́ Bə-zhɔ-zhe ń zɔ̀m rə̀myɛ́, rə̀myɛ́ yi ní cicì, Esərayɛl dwí rí myɛ j’a zhɛ̀ rə̀ k’ê t’â la tənà yál gaga à yé né yé. ³⁷ Bə-zhɔ-zhe zɔ̀m èta n wɔ̀ : Nyǐ, ǹdə́ lò gə wɔ̌ dɛ̃̌ yi rí dɛ̃̌ zhìyə́ ń la mɔrhɔ n nə rə̀ yó gə́ zhə̀l o gu má, ǹdə́ lò gə wɔ̌ ń mà mɛrhɛ cɛ kùr rí n vò n zə è kùr re gə́ zhə̀l rə zhí má, rə̀myɛ́ gə lwar, sə́ nyǐ rə̀myɛ́ yi ní àmyɛ́ m’a dwĩ̀ Esəayɛl dwí rí ni tɛ̃́, kɔn rɛ́ dɛ̀bɛ́ gakó bə̀ wɛ̀rhɛ́ mɔ́ yilə. Wɔ́ Bə-zhɔ-zhe ń zɔ̀m rə̀myɛ́. ³⁸ Nyǐ dɛ̃ ŋwɛ́nɛ́ rə̀ bànà, wɔ́ Bə-zhɔ-zhe ń zɔ̀m rə̀myɛ́, bə̀ m’a k’a lù Zhərəzalɛm cɔ wá, kɔn zhì Ananəyɛl jì y nánjíjíní y è lù e vò dɛ̃̌dɛ̃̌ mɔ́ nɛ e m’e vò e yí Nəgúl ré bwə̀rə̀ y ne. ³⁹ Bə zhì gàà mɔ́ bə zə tə́tɔ̃̌ w bə mɛrhɛ bə j’a m’e vò Garɛɛbɛ pyɛ̀lɛ́ y yó, bə zhì gàà mɔ́ bə gwɛ̃́ bə zǎ Gɔwa səta. ⁴⁰ Bə vò cùùrí ǹdə́ tɔ̀mɔ̀ w pyə̀-gɔ́rɔ́ w gakó, bə súlí bə ce cɛ y è y’à twèlé Sədərɔ̃ nə̀-gɔ̀lɔ̀ w nyí rí gakó e m’e yí Shəshesé bwə̀rə̀ y nə̀gúl ré ne, yi-púrhí sõ mó, rə̀myɛ́ mɔ́ gakó m’a yə̀ Bə-zhɔ-zhe jàà ; bə̀ t’â la kaka mǔr è wẽ́, bə̀ t’â la kaka myɛ cɔ̌ è wẽ́ gaga yé.