¹ Bə-zhɔ-zhe zɔ̀m ǹdə́ Zheremyi Zhidə pyɔ̌ Sədəcaasɛ pyɛ̀lɛ̀ rɛ́ byinə shí nyǎn rɛ́ wẽ́. Rə̀myɛ́ yi ní ǹdə́ Nabəkɔdɔnɔzɔɔrɛ gə́ jǐrh pyɔ̌ mɔ́ zhe byinə shí ǹdə́ lyɛlɛ. ² Wɔ́ rə̀myɛ́ yi ní, Bəbyəlɔnɛ pyɔ̌ mɔ́ shə̀dɛ́ɛ́sɛ́ tú sə zù Zhərəzalɛm cɔ w w sə̀ n’ê bwí ǹdə́ wa ; ǹdə́ bə̀ y’à zɔ nyì-zwennə Zheremyi bə ce byə̀nə̀ jì y è y’à ŋwɛ́nɛ́ Zhidə pyɔ̌ mɔ́ kɛ̀lɛ́ y kɔ̀nɔ̀ w mɔ́ wẽ́ bə pyi ń nyí ni gàà mɔ́. ³ È y’à wɔ́ Zhidə pyɔ̌ Sədəcaasɛ ń yà ń zɔ mɔ n ce byìnə́ jì y wə ; bə̀ pyɔ̌ mɔ́ yà ń nə́ ń zɔ̀m ǹdə́ Zheremyi ń zhe : Wɔ́ byè yil ǹ nə́ ǹ zɔ̀m nyì-zwennə zɔ̀mà nɛ́ ǹ wə̀l : Bə-zhɔ-zhe zɔ̀m èta n wɔ̀ : Nyǐwé, à m’a ce cɔ w kɔ̀bɔ́ Babyəlɔnɛ pyɔ̌ mɔ́ jɔ̃̀ wa ; n zwẽ w n cìní. ⁴ Zhidə pyɔ̌ Sədəcaasɛ cìcì mú tá la lú Kalədɛ lyì bbí shə̀dɛ́ɛ́sɛ́ yé né yé, sə̀ m’a zə mɔ sə pə Babyəlɔnɛ pyɔ̌ mɔ́ nɛ ; ń cìcì mú mà n zhì Babyəlɔnɛ pyɔ̌ mɔ́ yé né n zɔ̀m n wɔ̀ mɔ̀ ; ⁵ bə̀ m’a zə Zhidə pyɔ̌ Sədəcaasɛ bə̀ m’e vò Babyəlɔnɛ ; n jòm gàà mɔ́, kɔn m’e yí a lyǐrh yò. Wɔ́ Bə-zhɔ-zhe ń zɔ̀m rə̀myɛ́. Sə á gə zɛ̃̀ á la bú ǹdə́ Kalədɛ lyì bí, nyǐ á t’â la bɛlɛ jú gaga yé. ⁶ Zheremyi zɛ̃̀ n wɔ̀ : Bə-zhɔ-zhe zɔ̀m ǹdə́ nɛ n wɔ̀ : ⁷ Nyǐ ǹ da-byǐ Shəlumyi byǐ Anaməyəə mà n bə̀ n zɔ̀m ǹdə́ mɔ́ n wɔ̀ : Yě à cɛ y kɛ̀bɛ́ è wɔ Anatɔɔtɛ nɛ́ mɔ́ nɛ, bə̀ wɔ́ ǹmyɛ́ ǹ zhe sɔ́má ǹ mə̌ sə́ yè y ǹ gə́ ŋwɛ̃̀ ǹdə́ nɛ mɔ́ yilə. ⁸ Nyǐ à da-byǐ Anaməyəə tú n bə̀ nə nɛ pyɔ̌ mɔ́ kɛ̀lɛ́ y w ǹdə Bə-zhɔ-zhe gə́ yà ń dámǎ n byili ní, ń yà ń wə̀lə̀ : Yẽ̌ à cɛ y è wɔ Anatɔɔtɛ nɛ́, Bɛ̃zhamɛ tənà y w mɔ́, bə̀ wɔ́ ǹmyɛ́ ǹ zhe sɔ́má ǹ mə̌ dwã sə́ ciní yə, wɔ́ ǹmyɛ́ myɛ ǹ zhe sɔ́má ǹ mə̌ dwã sə́ ká ń zwẽ ń yè, bə̀ wɔ́ ǹmyɛ́ cəl kɔna, ǹ gə́ ŋwɛ̃̀ ǹdə́ nɛ mɔ́ yilə. Rə̀myɛ́ yó né, à zɛ̃̀ a lwar bə̀ wɔ́ Bə-zhɔ-zhe ń yà ń zɔ̀m ǹdə́ nɛ. ⁹ À zɛ̃̀ a mɛrhɛ wársɛ́ mɔrhɔ ku yó, wár-kùlsi shí ǹdə́ shàlpyɛ̀, a m’a yè cɛ y è wɔ Anatɔɔtɛ nɛ́ mɔ́ à da-byǐ Anməyəə sono. ¹⁰ A zɛ̃̀ a kɛ̃ cɛ y yǒ mó sábá nə̀lyè, a pú rə̀dù y a cĩ́ à jɛ̃̀ rə̀ yó a pyi, a zə zhə̀n cìnə́ bə zhì, a mɛrhɛ sə̀byǐ mú mɔrhɔ ku yó. ¹¹ À zɛ̃̀ a kwè cɛ y yǒ sɛ́bɛ́ rɛ́ tɛ̀bɛ́ rə̀ nyí rí pyi mú ǹdə́ rə̀ dõ mó rə̀ nyí rí yə̀ pyi mú, kɔn tó ǹdə nyə́ né gə́ n’ê byili ní, kɔn tó ǹdə kɔn gə́ mə̌ s’e tó né mó sɔ́msɛ́, a m’a cĩ́ à jɛ̃̀ y rə́ yó mó, ¹² a ce sábá nɛ́ nə̀lyé y ga Maasəya nɔ̃̌ Nəyəya byǐ Bəruuci jɔ̃̀ wa, Anaməyəə ǹdə́ zhə̀n-cìnə́ bé byɛ̀bɛ́ bə̀ y’à cĩ́ bə̀ jɛ̀rh cɛ y yǒ sɛ́bɛ́ rɛ́ yó yírh wə, e súlí Zhidə lyì bí bə̀ y’à ŋwɛ́nɛ́ pyɔ̌ mɔ́ kɛ̀lɛ́ y byə̀nə́-jì y kɔ̀nɔ̀ w mɔ́ yírh wə. ¹³ A zɛ̃̀ a zhì bə̀ yé né a pə nyí Bəruuci ni a wɔ̀ : ¹⁴ Nyǐ nyí rí tɛ̀bɛ́ Bə-zhɔ-zhe mó ń cǐ jàn cìnə́ bé gakó mó, Esərayɛl Yi rí pɔ nɛ, b’à byili mú : Kwě cɛ y yǒ sábá nɛ́ nyɛ̀bɛ́ à zhə̀n-pɔ ku w nyɔrhɔ w cĩ́ rə̀ yó mó ǹdə́ rə̀ dõ mó rə̀ yə̀ pyi mú ń vò ń cĩ́ dɔ nə́kwɛ́nɛ́ y wẽ́, mùnì ga rə zhì gàà mɔ́ rə dɛnɛ. ¹⁵ Nyǐ Bə-zhɔ-zhe mó ń cǐ jàn cìnə́ bé gakó mó, Esərayɛl Yi rí wə̀lə̀ : Bə̀ b’a k’a yè kǎlsɛ ǹdə́ cɛrh ǹdə́ cèmé tənà y kɛ̀bɛ́ wẽ́. ¹⁶ À gə́ pɔ cɛ y yǒ sɛ́bɛ́ rɛ́ Nərəya byǐ Bəruuci ni kwã nɛ́, à zɛ̃̀ a lwə̀l Yi a wɔ̀ : ¹⁷ Bə-zhɔ-zhe à Yi, wɔ́ ǹmyɛ́ ǹ wɛ̀rhɛ́ dɛ̃̌ ǹdə́ cɛ y ǹdə́ ǹ ŋwɔ̀nɔ́ w nánfɔ̀lɔ̀ w ǹdə́ ǹ jɛ̃̀ y jàn rɛ́ rə̀ bə̀ swɛ̃́ zhe mó : Kɔn rə̀dù ga tɛ̀nɛ́ rə̀ cə̀l ǹmyɛ́ yé. ¹⁸ Ǹmyɛ́ mɔ̀bɔ́ ǹ nə́ ǹ zal nɔ̀nɔ̀-dǔr ǹdə́ dabá kùrə̀ kùrə̀ kɔn m’e yí kùrə̀ mɔ̀rhɔ̀ ; ǹ nə́ ǹ pɛ còrhò-tum dabá nɛ̀mɛ́ nɛ́ nɛ bə̀ dabá dwə́ə́ ré yilə, ǹ wɔ́ Yi nánfɔ̀lɔ̀, ǹ wɔ́ kã̀dɔ ; ǹ yil ré yíl : Bə-zhɔ-zhe ń cǐ jàn cìnə́ bé gakó. ¹⁹ Ǹ wɔ́ cícírnə nánfɔ̀lɔ̀, ǹ nə́ ǹ twĩ̀ tũ̀-fwààlɛ ; ǹ yírhə́ pyǎ numbyínsí byǎ bɛ́ sɔ́msɛ́ gakó yó, mùnì ń pə còrhò-tum lò gakó ne kɔn tó ǹdə ń tumə né ta. ²⁰ Ǹ wɛ̀rhɛ́ màmyaarhɛ ǹdə́ wò-jààrɛ Ezhipti ni kɔn m’e zà, ǹ nə́ ǹ wɛ̀rhɛ́ rɛ Esərayɛl nɛ́, ǹ nə́ ǹ wɛ̀rhɛ́ rɛ numbyínə́ bé cəcəl wə, ń pə yil ǹ cìcì ni ǹdə́ rə̀ gə́ wɔ́ nɛ́ zà zà. ²¹ Ǹ wɛ̀rhɛ́ màmyaarhɛ ǹdə́ wò-jààrhɛ tɛ̀bɛ́ rə̀ n’ê zɛ̃̀ wu ni ǹdə́ ǹ ŋwɔ̀nɔ́ w nánfɔ̀lɔ̀ w Ezhipti tənà y wa ; wɔ́ rə̀myɛ́ dɛnnɛ ǹ tó né ń ce ǹ dwí Esərayɛl du Ezhipti tə̀nà y wa. ²² Ń zɛ̃̀ ń pɛ tənà y kɛ̀bɛ́ ǹ dwí rí ni, wɔ́ tənà y èmyɛ́ nyí ǹ yà ǹ bwəl ǹ la bə̀ dabá nɛ pɔ mɔ́, Tənà kɛ̀bɛ́ yil ǹdə́ tùr n’ê dùr tɛ̃́ è wẽ́ mó. ²³ Bə̀ tú è wẽ́, bə zwẽ y bə̀ cìní. Sə bə̀ yə̀ shɛ̀nɛ́ bə tó ǹ sɔ́má y ǹ byili bí mú yé ; bə̀ yə̀ shɛ̀nɛ́ bə wɛ̀rhɛ́ ǹdə ǹ nyə́ né gə́ byili ní yé, bə̀ yə̀ kɔn rɛ́ tɛ̀bɛ́ ǹ y’à pɔ bɛ nyí bə̀ bə̀ wɛ̀rhɛ́ mɔ́ rə̀dù ga wɛ̀rhɛ́ yé ; wɔ́ rə̀myɛ́ yil ǹ ce zwini rí tɛ̀bɛ́ gakó jòm bə̀ yó ! ²⁴ Nyǐ-nə wé ! Zwə̀ bé shə̀dɛ́ɛ́sɛ́ tó shó w sə̀ pwà sə cĩ́ dwã yó cɔ w nyí ni sə̀ la m’e bú búlə́ né mó ; sə̀ la cɔ w zõ sə pə Kalədɛ̃ lyì bi ni, bə̀ bú ǹdə́ cɔ wá ; wɔ́ búlə́ shú ǹdə́ nɔrh ǹdə́ cím-bəlwɛ̀lɛ́ bə̀ m’e jí bɛlɛ bə̀ yó. Lwar bə̀ wɔ́ kɔn rɛ́ ǹ zɔ̀m mɔ́ rə̀ yú wə́ ; wɔ́ rə̀myɛ́ ǹ yírhə́ nɔ èlǎsɛ̃́ èta mɔ́. ²⁵ Èta, Zhərəzalɛm cɔ w j’a tu Kalədɛ̃ lyì bí jɔ̃̀ wa. Ǹdə́ rə̀myɛ́ ga, ǹmyɛ́ Bə-zhɔ-zhe jà ń wɔ̀ nɛ : Ǹmyɛ́ cìcì zə sə̀byì-kùlì ń yè cɛ zhə̀n-cìnə́ yé né ǹ cìn yilə ! ²⁶ Rə̀myɛ́ yó né, Bə-zhɔ-zhe zɛ̃̀ n zɔ̀m ǹdə́ Zhərəmyi n wɔ̀ : ²⁷ Nyìwé, àmyɛ́ wɔ́ Bə-zhɔ-zhe, kɔn dɛ̀bɛ́ gakó rə̀ ŋwɛ́nɛ́ rə̀ n’ê shǐrh mó Yi rí. Kɔn nə ŋwɛ́nɛ́ rə̀ m’a cə̀l ne ? ²⁸ Rə̀myɛ́ ce, Bə-zhɔ-zhe zɔ̀m n wɔ̀ : À m’a ce cɔ w kɔ̀bɔ́ Kalədɛ̃ lyì bí ǹdə́ Babyəlɔnɛ pyɔ̌ Nabəkɔdɔnɔzɔɔrɛ jɔ̃̀ wa. Sə Nabəkɔdɔnɔzɔɔrɛ mà n zwẽ wə ; ²⁹ Kalədɛ̃ lyì bí m’a bú bə zwẽ cɔ w bə zù ò wẽ́, bə ji w myǐn, bə ji cɔ w jìsí shɛ̀bɛ́ ò lyì bí n’ê jòm sə̀ lyarha nɛ́ yó bə̀ ji wẽ̀ ré rə̀ lwẽ́ nã́nyə̀nyɛ̀lɛ́ y myǐn bə̀ pɛ Baalɛ nɛ mɔ́, kɔn súlí ǹdə́ də̀vɛ̃́ y bə̀ n’ê lwé tɛ̃́ bə̀ pɛ yə dwã nɛ bə̀ m’ê yì à lyim ni mú. ³⁰ Zhə̀nà, Esərayɛl lyì bí ǹdə́ Zhidə lyì bí yə̀ kɔn dõ wɛ̀rhɛ́ ǹd’ê də̀ lwɛlɛ dúdú à yé né, bə̀ bə̀sɔ́nɛ́ yi ní ga mɔ́ yé ; Esərayɛl lyì bí j’â n’ê yì à lyim ni ǹdə́ bə̀ tumə né bə̀ n’ê wɛ̀rhɛ́ ǹdə́ bə̀ jɛ̀sɛ́ mɔ́. ³¹ Cɔ w kɔ̀bɔ́ n’ô yì à lyim ni ò gə́ ju kùr ò lù w yi ní ga kɔn ḿe yí zà mɔ́ ; rə̀myɛ́ ce à n’â yǎl a vùr w a ce kwã nɛ́ à yé né, ³² lwɛlɛ rɛ́ tɛ̀bɛ́ gakó Esərayɛl lyì bí ǹdə́ Zhidə lyì bí ǹdə́ bə̀ pyǎ bɛ́, ǹdə́ bə̀ yé né cìnə́ bé ǹdə́ bə̀ vwĩ̀-zwə̀lnə bé ǹdə́ bə̀ nyì-zwennə bé ǹdə́ Zhidə bala bɛ́ ǹdə́ byɛ̀bɛ́ bə̀ jě Zhərəzalɛm nɛ́ mɔ́ wɛ̀rhɛ́ nɛ mɔ́. ³³ Bə̀ pyìrhí bə̀ kwã bə zǎ nɛ, bə̀ yə̀ à sõ nyǐ yé ; nəkɔkɔ́lɛ́ nəkɔkɔ́lɛ́ gakó bə̀ cèrhè be à nyə́ né ; sə bə̀ yə̀ à còrhò mó zwẽ yé. ³⁴ Bə̀ kwè bə̀ pwarha tumə wẽ̀ ré bə cĩ́ jì y kɛ̀bɛ́ bə̀ n’ê byẽ̀ à yil ré è yó mó wẽ́, bə m’e ce y jìmdi. ³⁵ Bə̀ lù vwĩ̀-jùúlí bə pə Baalɛ nɛ Bɛn-Yinɔmɛ vɔlɔ w wa, bə zə bə̀ bala-byǎ ǹdə́ kana-byǎ bə zwə́l rə̀ yó : e j’à yə̀ bɛ rə̀myɛ́ mɔ́ nyí pɛ gaga yé ; à yə̀ rə̀myɛ́ mɔ́ yò bùl à wẽ́ gaga yé. Bə̀ twĩ̀ lwɛlɛ tumə né nə̀myɛ́ bə m’e ce dóó jòm Zhidə yó. ³⁶ Sə èlǎsɛ̃́, Bə-zhɔ-zhe, Esərayɛl Yi rí n’ê zɔ̀m cɔ w kɔ̀bɔ́ á n’á zɔ̀m ò yil á zhe : Bə̀ m’a zə w bə pə Babyəlɔnɛ pyɔ̌ mɔ́ nɛ, búlə́ shú ǹdə́ nɔrh ǹdə́ cím-bəlwɛ̀lɛ́ jàn yil mó : ³⁷ Nyǐ à m’a k’a zə bɛ bə shí tənèsé shɛ̀bɛ́ à y’à ji bi bə làà sə̀ wẽ́, à lyim rí nánfɔ̀lɔ̀ w gə́ y’à zɛ̃̀ mɔ́ yil mó ; à m’a ce bə bə̀ dwã yó jàà y kɛ̀bɛ́ wẽ́, bə̀ jòm è wẽ́ ǹdə́ yə̀-zùlə́. ³⁸ Bə̀ m’a yə̀ à dwí, s’amyɛ m’a yə̀ bə̀ Yi. ³⁹ À m’a pə bɛ wu òdù ǹdə́ sɔ́má èdù, mùnì ga bə dùr ne twéé gakó, èta bə̀ b’a yə̀ wu-nyɔ̃̀ cìnə́, bə̀myɛ́ ǹdə́ bə̀ byǎ bə̀ bàn bə̀myɛ́ kwã nɛ́ mɔ́ yilə. ⁴⁰ À m’a zə dɔbrɛ́ rə̀ t’â la zhɔ̌ ǹdə́ bɛ, à k’â t’â la yõ̌ yé, à m’a wɛ̀rhɛ́ bɛ cɛ̀nɛ̀, à m’a ce à nyɔ̀mɔ̀ bə̀ wun ní wẽ́, mùnì ga bə̀ bə̀k’a vò kwã nɛ́ à nyí ni gaga yé. ⁴¹ À m’a swéné be, a wɛ̀rhɛ́ bɛ cɛ̀nɛ̀, a ce bə̀ jòm tənà y w bə cĩ́ kùr è wẽ́ zhə̀n zhə̀nà, à m’a wɛ̀rhɛ́ bɛ rə̀myɛ́ ǹdə́ à wu gakó, ǹdə́ à bùlə̀ né gakó. Bə-zhɔ-zhe zɔ̀m n súlí n wɔ̀ : ⁴² Ǹdə à gə́ ce zwini rí tɛ̀bɛ́ nánfɔ̀lɔ̀ w gakó jòm dwí rí tɛ̀bɛ́ yó w né ta, èta myɛ, à m’a ce cɛ̀nɛ̀ rɛ́ tɛ̀bɛ́ gakó à bwəl be rə̀ nyí rí myɛ bə̀ rə̀ jòm bə̀ yó. ⁴³ Lwar-na bə̀ tənà y kɛ̀bɛ́ á n’á wə̀l bə̀ bə̀ co y Kalədɛ̃ lyì bí jɔ̃̀ wa ; e jǐrh wu-zhìlù jàà, gɔ-elũ èpòlò, lòlò tɛ̀nɛ́ è wẽ́, vwàmá myɛ tɛ̀nɛ́ è wẽ́ mó, ⁴⁴ Lwar-na bə̀ nyǐ bə̀ m’a kɛ̃ cɛrh yǒ sábá bə cĩ́ jɛ̀rh nə̀ yó, zhə̀n-cìnə́ yé né, bə̀ k’a m’e yè cɛrh ǹdə́ sə̀byì kùlsi Bɛ̃zhamɛ tənà y wẽ́ ǹdə́ cɛmɛ nɛ́ nyɛ̀bɛ́ nə̀ kə́kɛ́lɛ́ Zhərəzalɛm mɔ́ wẽ́ ǹdə́ Zhidə cɛmɛ nɛ́ wẽ́ ǹdə́ cɛmɛ nɛ́ nə̀ ŋwɛ́nɛ́ pyàr rɛ́ nyí mú wẽ́ ǹdə́ nyɛ̀nɛ́ nə̀ ŋwɛ́nɛ́ pyàr rɛ́ kùr w mó wẽ́ ǹdə́ nyɛ̀bɛ́ nə̀ ŋwɛ́nɛ́ kɔn zǎ Nəgɛɛrɛ sõ mó wẽ́. Bə̀ nyǐ à m’a k’a zə cɛmɛ nɛ́ nə̀myɛ́ yómə́ bé bə̀ k’a bə̀ bə jòm nə̀ wẽ́. Wɔ́ Bə-zhɔ-zhe ń zɔ̀m rə̀myɛ́.