¹ Bə-zhɔ-zhe zɔ̀m ǹdə́ Zheremyi twər rə̀lyé nyǎn rɛ́ ǹdə́ ń yà ń gwẽ̌ ŋwɛ́nɛ́ byìnə́-jì y w pyɔ̌ kɛ̀lɛ́ y w mɔ́, n wɔ̀ : ² Nyǐ Bə-zhɔ-zhe mó mɔ̀bɔ́ ń nə́ twĩ̀ ywẽ̀ nə̀myɛ́ mɔ́, ńmyɛ̌ ń nə́ ń tɛ́rɛ́ ywẽ̀ né n cĩ́, n zɛ̃̀ n twĩ̀ ni mú ; Ń yil ré wɔ́ Bə-zhɔ-zhe. N wə̀lə̀ : ³ Byẽ̌ ne, à m’a lyár mɔ́, a byili mú wẽ̀ nánfwààlɛ, wẽ̀ tɛ̀bɛ́ rə̀ shèè, ǹ yə̀l rə̀ pár mɔ́. ⁴ Nyǐ Bə-zhɔ-zhe, Esərayɛl Yi rí n’ê zɔ̀m cɔ w kɔ̀bɔ́ ǹdə́ Zhidə pyǎ bɛ́ kǎlsɛ́ bə̀ zwə̀ bé tú bə wǔr bə ló tɛ̃́ mɔ́, mùnì ga bə zɛ̃̀ búlə́ ne bə bu ǹdə́ zù-bal mɔ́ bo w púl ré ǹdə́ ń búlə́ shù w bə̀ yé né mó ; ⁵ búlə́ né bə̀ zɛ̃̀ bə bú ǹdə́ Kalədɛ lyì bí mú : wɔ́ búlə́ né yó la m’e gu mú, ǹdə́ bə̀ gu numbyínsí bə ló tɛ̃́ sə̀ cùù ri sú kǎlsɛ́ sə̀myɛ́ mɔ́, rə̀myɛ́ wɔ́ à la m’a mà bɛ a lyim rí nánfɔ̀lɔ̀ w ǹdə́ a wu zhìlù w yilə. Èta à y’à pyìrhí à kwã a m’a zǎ bɛ bə̀ wu-bárhɛ́ tumə né yilə. ⁶ Sə nyìwé, èlǎsɛ̃́ mɔ́, à m’a shílí bí bə wárh bə nə bəsàzùlí ; à m’a pul yə̀-zùlə́ né nə̀-bùlì y ǹdə́ zhə̀n tumə sɔ́má e bɔrh a pə bɛ. ⁷ À m’a k’a zə Esərayɛl lyì bí bə̀ y’à zɔ yómə́ mó bə̀ k’a bə̀ jè, a ce bə̀ k’a jòm tənà y w ǹdə shãã ga mɔ́ ta. ⁸ À m’a shàrh bɛ dwə́ə́ ré tɛ̀bɛ́ gakó bə̀ dó ne mó, à m’a pə bɛ́ bə̀ yə̀-bəlwàálɛ́ tɛ̀bɛ́ bə̀ m’e gwar nɛ mɔ́ ǹdə́ bə̀ tùntwə̃̀ə̃̀ né nyɛ̀bɛ́ bə̀ m’e cẽ à nyí ni mú gakó sǔbri. ⁹ Cɔ w kɔ̀bɔ́ m’a yə̀ wu-nyɔ̃̀ ǹdə́ zùwə́ ǹdə́ còrhó kɔn àmyɛ́ yil tənèsé shɛ̀bɛ́ gakó sə̀ la cɛ̀nɛ̀ rɛ́ tɛ̀bɛ́ gakó à la Zhidə lyì bí ǹdə́ Esərayɛl lyì bí ni wɔ̀rhɔ́ mɔ́ cəcəl wə. Cɛ̀nɛ̀ rɛ́ tɛ̀bɛ́ ǹdə́ yə̀-zùlə́ né nyɛ̀bɛ́ ǹdə́ wu-nyɔ̃̀ w à la Zhidə lyì bí ǹdə́ Esərayɛl lyì bí ni pɔ mɔ́, m’a jàr tənèsé sə̀myɛ́ sə̀ wun zɛ̃̀ sə kəkə. ¹⁰ Bə-zhɔ-zhe kə́ n zɔ̀m n wɔ̀ : Bə̀ m’a k’e zɛ̃̀ kə́dò bə̀ nyɛ̀ɛ̀ jàà y kɛ̀bɛ́ wẽ́ bə̀ n’ê zɔ̀m è shò-kwã nɛ́ b’è wɔ́ : Gɔ-elũ èpòlò, lòlò tɛ̀nɛ́ è wẽ́, vwǎm myɛ tɛ̀nɛ́ è wẽ́ kə́dò mó ; bə̀ m’a zɛ̃̀ bə̀ k’ê nyɛ̀ɛ̀ Zhidə cɛmɛ nɛ́ ǹdə́ Zhərəzalɛm sɔ́msɛ́ yó bə̀ n’ê wə̀l bə̀ rə̀ wǔr, lòlò kə́ ń tɛ̀nɛ́, vwàmá myɛ k’ê tɛ̀nɛ́ mɔ́ wẽ́ ¹¹ wu-nyɔ̃̀ ǹdə́ fùwə́ búbwéése, bal ǹdə́ ń kɛ̃ dwã jú címsi nwíísi sə̀ n’ê núnə́ ; bə̀ m’a nyɛ̀ɛ̀ lyì cəl bə̀ n’ê wə̀lə̀ : cèrhé-nə Bə-zhɔ-zhe mó ń cǐ jàn cìnə́ bé Gakó mó, bə̀ nyǐ ń wɔ́ wu-bɔ̀nɔ̀ cí, bə̀ nyǐ ń nɔ̀nɔ̀-dǔr mó ŋwɛ́nɛ́ twéé gakó ! Bə̀ m’a yɛ̀ɛ̀ lyì bí byɛ̀bɛ́ bə̀ n’ê zwə́l Yi nə̀bán co vwə̃̀ né cəl Bə-zhɔ-zhe jì y wə. Bə̀ àmyɛ́ Bə-zhɔ-zhe m’a k’a zə tənà y lyì bí bə̀ y’à zɔ yómə́ mó bə k’a bə̀ jè, a ce bə jòm tənà y w ǹdə́ shãã ga mɔ́ ta. Wɔ́ Bə-zhɔ-zhe ń zɔ̀m rə̀myɛ́. ¹² Bə-zhɔ-zhe mó ń cǐ jàn cìnə́ bé gakó mó kə́ n wɔ̀ : Nyǐ-nə, jàà y kɛ̀bɛ́ è wɔ́ gɔ-elũ èpòlò w mó, lòlò tɛ̀nɛ́ è wẽ́ mó, vwàmá myɛ tɛ̀nɛ́ è wẽ́ mó ; lwar-na bə jààsɛ b’a nə jàà y èmyɛ́ ǹdə́ è cɛmɛ nɛ gakó wẽ́ vwã̌-ènɔ̀nɔ̀ bɛ́ cə̀r bə̀ vwàmá nɛ́, nə nə jàà nə shǐrh ; ¹³ vwàmá m’a yə̀ cɛmɛ nɛ́ nə̀ ŋwɛ́nɛ́ pyàr rɛ́ səta mɔ́ wẽ́ ǹdə́ cɛmɛ nɛ́ nyɛ̀bɛ́ nə̀ ŋwɛ́nɛ́ pyǎlsɛ́ kùr w mó wẽ́ ǹdə́ Nəgɛvɛ nyí rí cɛmɛ nɛ́ wẽ́ ǹdə́ Bɛ̃zhamɛ tənà y wẽ́ ǹdə́ cɛmɛ nɛ́ nə̀ kə́kɛ́lɛ́ Zhərəzalɛm mɔ́ wẽ́ ǹdə́ Zhidə cɛmɛ nɛ́ wẽ́ ; pyììsí m’a k’a yə̀ nɛ́ nánzhəzhɔ̌ sə twìrhì dwã nɛ sə wɔ lò mó mɔ́bɔ́ ń nə́ ń gàlsɛ mɔ́ kwã nɛ́. Wɔ́ Bə-zhɔzhe ń zɔ̀m rə̀myɛ́. ¹⁴ Nyǐ dwã ŋwɛ́nɛ́ nə̀ bànà, wɔ́ Bə-zhɔ-zhe ń wə̀lə̀ ; à m’a pyìrh à zɔ̀mɛ̀ rɛ́ náàcɛ̀nɛ́ y à zɔ̀m a byili Esərayɛl lyì bí ǹdə́ Zhidə lyì bí shò-kwã nɛ́ mɔ́. ¹⁵ Dwã nɛ́ nə̀myɛ́ wẽ́, à m’a ce bə lù byǐ Dəvyidi cìcì shĩ rí wẽ́ ǹdə wɔ́ cǒ jɛ̃̀ è púrh ta, byǐ mú ńmyɛ̌ mɔ́ mà n twĩ̀ cángá tumə ǹdə́ tumə nyɛ̀bɛ́ nə̀ mə̌ mɔ́ tənà y wa. ¹⁶ Dwã nɛ́ nə̀myɛ́ wẽ́ Zhidə lyì bí m’a nə vwǎr, sə Zhərəzalɛm lyì bí m’a jòm bə̀ sono shɛ́ɛ́ ǹdə́ yə̀-zùlə́ ; bə̀ m’a zɛ̃̀ bə ce Zhərəzalɛm yil bə̀ n’ê byẽ̀ bə̀ : «Bə-zhɔ-zhe wɔ́ nə́ cángá yá». ¹⁷ Bə-zhɔ-zɛ kə́ n zɔ̀m èta n wɔ̀ : Nyǐ Dəvyidi tá ń la lò lyã̀ɔ̃̀ n zhì ń jàà w gaga n jòm Esərayɛl lyì bí pyɛ̀lɛ́ də̀gwã́ y yó gaga yé ; ¹⁸ vwĩ̀-zwə́lnə ǹdə́ Levyibá t’â la lyì lyã̀ɔ̃̀ gaga bə zhì à yé né bə zwə́l vwə̃̀ námpúmə́, bə ji wẽ̀ rə̀ lwẽ̀ nã́nyə̀nyɛ̀lɛ́ ǹdə́ pansɛ ; bə̀ n’ê zwə́l vwə̃̀ twéé twéé à yé né yé. 18 Bə-zhɔ-zhe zɔ̀m ǹdə́ Zheremyi n wɔ̀ : ¹⁹ Nyǐ Bə-zhɔ-zhe nə́ ń zɔ̀m èta ń zhe : ²⁰ Bə-zhɔ-zhe wə̀lə̀ : Á gə m’a ŋwɛ̀nɛ́ á cə̀r cɛ y yé né è bə̀ lɛ́, à dɔbrɛ́ yilə, á cə̀r cɛ y yé né è bə̀ yìì, à dɔbrɛ yilə, á gə ŋwɛ̀nɛ́ rə̀myɛ́ yé né á cə̀r, rə̀ yi gə yú rə̀ k’e t’â wɛ̀rhɛ́, ²¹ sə́ nyǐ á dɔbrɛ́ à zɔ ǹdə́ tùntùnnə Dəvyidi mú myɛ m’a cɔ̀, èta ń kə́ ń tá ń la byǐ nɔ gaga n jòm ń jàà w n jí pyɛ̀lɛ̀ rɛ́ yé ; èta myɛ à dɔbrɛ́ ǹdə́ Levyibá ǹdə́ vwĩ̀-zwə́lnə bé bə̀ wɔ́ à tùntùnnə mó myɛ m’a cɔ̀. ²² Ǹdə lòlò gə́ wàr càmmə́sɔ̌sɛ́ sə̀ ŋwɛ́nɛ́ dɛ̃̌ yi w ń la gál nɛ́, ǹdə́ lòlò gə́ wàrh nə̀-fɔ̀lɔ̀ w nyɔ̀rhɔ́ w ń la gál nɛ́ ; wɔ́ èta cìcì à m’a ce à tùntùnnə Dəvyidi nɛ̀mɛ́ nɛ́ pù ní, e súlí Levyibə́ bə̀ n’ê twĩ̀ à tùm rí mú. ²³ Bə-zhɔ-zhe kə́ n zɔ̀m ǹdə́ Zheremyi n wɔ̀ : ²⁴ Ǹ yə̀ lyì bí gə́ n’ê zɔ̀m nɛ́ cili nà : Bə̀ n’ê wə̀l bə̀ Bə-zhɔ-zhe yə̀ dwə́ né kùrə̀ né nə̀lyé y ń y’ǎ cír mó zhɛ̃̀ nà ? Lyì bí gə́ n’ê zɔ̀m èta mɔ́ də̀ à dwí rí bə̀ n’ê fulsi nà, bə̀ zɛ̃̀ bə̀ tə̀ rə̀myɛ́ yil bə̀ k’ê t’â nyí rí ǹdə tənà ta yé. ²⁵ Bə-zhɔ-zhe zɔ̀m n wɔ̀ : À gə y’à yə̀ dɔbrɛ zal ǹdə́ nə̀nyɛ́nɛ́ y ǹdə́ cəcɛ̃ yá, à gə y’à yə́ nyə́ dɛ̃̌ yi rí ǹdə́ cɛ y nɛ pɛ, ²⁶ à y’à wɔ̌ à m’a zhɛ̃̀ Zhakɔbɛ ǹdə́ Dəvyidi à tùntùnnə mó dwí rí, à y’à m’a cẽ à k’â t’â la lò vǔr ń dwí rí wẽ́ n cìní Abəraham ǹdə́ Yəzakɛ ǹdə́ Zhakɔbɛ nɛ̀mɛ́ nɛ́ yé. Sə à m’a k’a zə bə̀ lyì bí bə̀ zɔ bə vò yómré jè y mó bə k’a bə̀ jé, bə̀ à dùr bə̀ nɔ̀nɔ̀.