¹ Bə-zhɔ-zhe zɛ̃̀ zɔ̀m ǹdə́ Zheremyi ǹdə́ Babyəlɔnɛ pyɔ̌ Nabəkɔnɔzɔɔrɛ ǹdə́ ń shə̀dɛ́ɛ́sɛ gakó ǹdə́ tənèsé shɛ̀bɛ́ gakó ń yà ń cǐ mú gakó ǹdə́ dwə́ né gakó gə́ y’à tú bə kə́kɛ́lɛ́ Zhərəzalɛm bə̀ n’ê bwí ǹdə́ Zhərazalɛm ǹdə́ cɛmɛ nɛ́ Zhərəzalɛm y’à cǐ mú yi ní ; ² Bə̀-zhɔ-zhe, Esərayɛl Yi rí zɛ̃̀ rə wɔ̀ Zheremyi ni : Zɛ̃̀ ń vò ń wɔ̀ Zhidə pyɔ̌ Sədəcaasɛ nɛ : Bə-zhɔ-zhe pɔ nyí n wɔ̀ : Nyǐ à m’a ce cɔ w kɔ̀bɔ́ Babyəlɔnɛ pyɔ̌ mɔ́ jɔ̃̀ w n ji w myǐn. ³ Zhidə pyɔ̌ Sədəcaasɛ cìcì mú tá la lú ń jɔ̃̀ w yé, bə̀ m’a zə mɔ́ bə pə pyɔ̌ mɔ́ nɛ ; ǹ mà n zhì Babyəlɔnɛ pyɔ̌ mɔ́ yé né ; ǹmyɛ́ ǹdə́ Babyəlɔnɛ pyɔ̌ mɔ́ ga zhì dwã yírhə́, n zɔ̀m ǹdə́ mɔ́, bə zɛ̃̀ bə zə mɔ bə vò Bəbyəlɔnɛ. ⁴ Sə kɔn rɛ́ tɛ̀bɛ́ rə̀ ŋwɛ́nɛ́ mɔ́, Zhidə pyɔ̌ Sədəcaasɛ, cili kɔn kɔn rɛ́ dɛ̀bɛ́ Bə-zhɔ-zhe la zɔ̌m ǹ yil mó : Nyǐ ǹ tá ǹ la búlə́ shù cu cú yé. ⁵ Ǹ mà ń cì ǹdə́ yə̀-zùlə́ ; bə̀ m’a ji wẽ̀ rə̀ lwẽ́ nã́nyə̀nyɛ̀lɛ́ ǹ yó ǹdə́ bə̀ gə́ ju rí ǹ dabá bɛ́ byɛ̀bɛ́ bə̀ jɛ̀rɛ̀ bə yə̀ pyǎ, bə tó yé bə cì shãã mɔ́ yó mó ta, bə̀ m’a kúrh mó, bə̀ m’e zhe : Yó-cə́bal, wɔ́ bə̀kɔ́n dwí yò èta ! Bə̀ nyǐ à bwə̀l zɔ̀mɛ̀ rɛ́ a byili zhə̀nà. Wɔ Bə-zhɔ-zhe ń pɔ nyí rí rə̀myɛ́. ⁶ Wɔ́ nyì-zennə Zheremyi ń byili zɔ̀mà nɛ́ nə̀myɛ́ mɔ́ gakó Zhidə pyɔ̌ Sədəcaasɛ nɛ Zhərəzalɛm nɛ́. ⁷ Rə̀myɛ́ yi ní ǹdə́ Babyəlɔnɛ pyɔ̌ mɔ́ shə̀dɛ́ɛ́sɛ zhe búlə́ né ne sə̀ n’ê bwí ǹdə́ Zhərəzalɛm cɔ wá ǹdə́ Zhidə cɛmɛ nɛ́ dwã bɛ́ gakó ǹdə́ Ləciisi ǹdə́ Azəka ; wɔ́ cɛmɛ nɛ́ nə̀myɛ́ nə̀lyè y nə̀ y’à dàl Zhidə cɛmɛ nɛ́ wẽ́ nə́ gwẽ̌ lù nə kə́kɛ́lɛ́ nə̀ zhe jàn rɛ́ mɔ́. ⁸ Bə-zhɔ-zhe kə́ n zɔ̀m ǹdə́ Zheremyi, ǹdə́ pyɔ̌ Sədəcaasɛ gə́ tú n bə̀ n ce dwã yó ǹdə́ lyì bí bí byɛ̀bɛ́ bə̀ y’à wɔ Zhərəzalɛm nɛ́ mɔ́, bə̀ y’à mù dwã nɛ bə kwè nyí rə̀myɛ́ yi ní, bə̀ la bwə̀l bə byili bə̀ yómə́ bé cìn nɛrɛ́ y yil mó, ⁹ bə̀ lò gakó mə̌ sə n yẽ̌ ń da-byǐ Ebərə ráá ń da-bə̀kɔ́ Ebərə mó ń wɔ́ ǹ yóm mó mó ne n cìní ń cìnə̀. ¹⁰ Rə̀myɛ́ yó né, yó-cìnə́ gakó ǹdə́ dwí rí gakó byɛ̀bɛ́ bə̀ kwè nyí rí mú, mə̀dù gakó já n shɛ̀nɛ́ n yẽ̌ ń yóm-bal mɔ́ ráá ń yóm-kɛ̃ mɔ́ nɛ, ń kə́ ń yə̀ mɔ́ cə̀r n cĩ́ ń sono ń la tũ̌ n pɔ̃ ǹdə yóm ta yé ; ¹¹ bə̀ gakó j’a shɛ̀nɛ́ bə̀ wɛ̀rhɛ́ ǹdə nyí rí bə̀ kwè mó ta, bə yẽ̌ bə̀ yómə́ bé ne bə nə bə̀ cǐ bə̀ cìnə̀. ¹² Rə̀myɛ́ yó né, Bə-zhɔ-zhe kə́ n zɔ̀m ǹdə́ Zheremyi n wɔ̀ : ¹³ Bə-zhɔ-zhe, Esərayɛl Yi rí wə̀lə̀ : À zɔ dɔbrɛ ǹdə́ á dabá, dɛ̃ rɛ́ tɛ̀bɛ́ à ce bə du Ezhipti ní bə̀ yóm ré jè y w mó ; a wò be : ¹⁴ lò ǹ gə yè ǹ da-byǐ Ebərə, ń gə wɛ̀rhɛ́ byinə nyàlpyɛ̀ ǹ sono ń zhɛ̀ sə́ yẽ̌ mo, n cìní ń cìnə̀. Sə nyǐ á dabá yə̀ cili yé, bə̀ yə̀ bə̀ zhã̌ nɛ́ púr bə zhìlì bə̀ yala nɛ bə cili gaga yé. ¹⁵ Sə zà, á cìcì mú k’á zù á cìcì mú wẽ́, á wɛ̀rhɛ́ kɔn dɛ̀bɛ́ rə̀ wɔ́ cángá à yírh wə, lò gakó gə́ bwə̀l n byili bə̀ ń da-byǐ nɔ ń cìn-cìnú mú yilə, á kwè nyí à yé né, jì y à yil ré n’ê byẽ̀ è wẽ́ mó wə. ¹⁶ Sə nyìwé, á k’á kwè sɔ́má dõ, á fulsi à yil ré ; á mə̀dù mə̀dù gakó ká n zwẽ yóm-bala bɛ́ ǹdə́ yóm-kana bɛ́ byɛ̀bɛ́ á y’ǎ yẽ̌ bə nə bə̀ cìn-cìnú mú mú ni, wɔ́ bə̀myɛ́ á k’á nyɛ́ɛ́ á ce bə jǐrh á yóm-bala ǹdə́ á yóm-kana. ¹⁷ Wɔ́ rə̀myɛ́ è ce Bə-zhɔ-zhe wə̀lə̀ : Á yə̀ à nyə́ né zwẽ yé, á gə́ kwè nyí bə̀ á la á da-byǐ mú ń wɔ́ yóm mó ǹdə́ á da-bə̀kɔ́ yóm-mó ne yõ̌ n nə ń cìn-cìnú mú, e jà á yə̀ rɛ wɛ̀rhɛ́ mɔ́ yilə. Nyǐ-nə, wɔ́ rə̀myɛ́ è ce, àmyɛ la nyí kǒ a byili b’a nɔ á cìn-cìnú ; wɔ́ Bə-zhɔ-zhe ń zɔ̀m rə̀myɛ́. Sə wɔ́ búlə́ shù ǹdə́ cím-bəlwɛ̀lɛ́ ǹdə́ nɔrh rə la á cìn-cìnú mú yál, à m’a ce á yə̀ kɔn dɛ̀bɛ́ lũ w tənèsé púlə́púlə́ lyì bí gə nɔ ába bə̀ wun n’ê zɛ̃̀. ¹⁸ À m’a ce lyì bí byɛ̀bɛ́ bə̀ ywarh nə̀-byə-tóló w dwã w kùrə̀ nə̀lyé bə cĩ́ tɛ̃́, bə zɛ̃̀ bə tó nə̀ bwə̌l w bə lyɛ̃ bə̀ m’e bwəl nyí à yé né mú, m’a yə̀ ǹdə nə̀-byə-tóló w ò ywarh twər rə̀lyé y mó ta. ¹⁹ À m’a ce Zhidə tənà y yó-cìnə́ bé ǹdə́ Zhərəzalɛm nyə̀ná bɛ́ ǹdə́ pyɔ̌ mɔ́ kɛ̀lɛ́ y tùntùnnə bé ǹdə́ vwĩ̀-zwə̃́lnə bé ǹdə́ tənà y lyì bí gakó, lyì bí byɛ̀bɛ́ gakó bə̀ tó nə̀-byə-tóló w ò ywarh twər kùrə̀ nə̀lyé y bwə̌l mó w bə lyɛ̃ bə̀ m’e bwəl nyí mú, ²⁰ à m’a ce bə̀ zwə̀ bé bə̀ n’ê pyà bə̀ gu mú jɔ̃̀ wa : bə̀ yala m’a jǐrh vwàmá ǹdə́ dɛ̃̌ yi w kúmsi nyí-kùjú. ²¹ S’e gə wɔ́ Zhidə pyɔ̌ Sədəcaasɛ ǹdə́ ń lyì-fwààlɛ yilə, à m’a ce be bə̀ zwə̀ bé jɔ̃̀ wa, Bəbyəlɔnɛ pyɔ̌ mɔ́ shə̀dɛ́ɛ́sɛ́ sə̀ k’ê tə̀ bwéé ne á nyí mú jɔ̃̀ wa. ²² Nyǐ à m’a pə à nyə́ né ; wɔ́ Bə-zhɔ-zhe ń zɔ̀m rə̀myɛ́, à m’a zə shə̀dɛ́ɛ́sɛ́ sə k’a kwɛ̃̀ sə bə̀ cɔ w kɔ̀bɔ́ wẽ́, sə bú ǹdə́ w sə wzẽ w sə ji w myǐn ; a ce Zhidə cɛmɛ nɛ́ jǐrh wu-zhìlù dúdú jààsɛ, nə̀ numbyíní èdù ga myɛ k’ê t’â la nə̀ wẽ́ dǎl yé.