¹ Zhɔzhaasɛ byǐ Zhowəcim Zhidə pyɔ̌ mɔ́ pyɛ̀lɛ̀ rɛ́ jú yi ní, Bə-zhɔ-zhe zɔ̀m ǹdə́ Zheremyi n wɔ̀ : ² Zɛ̃̀ ń vò ń nə Erəkaabɛ dwí rí lyì bí, ń zɔ̀m ǹdə́ bɛ ; sə́ zə bɛ ń mə́ vò Bə-zhɔ-zhe jì y jìsí èdù wẽ́ ń pə bɛ də̀vɛ̃́ bə nyɔ̀. ³ Rə̀myɛ́ yó né, a zɛ̃̀ a vò a zə Yərəməya byǐ Yazanya nɔ̃̌ wá, ǹdə́ ń da-byǎ bɛ́ gakó, e súlí ń byǎ bɛ́ gakó, ǹdə́ Erərəkaabɛ dwí rí gakó, ⁴ a j’a zə bɛ a m’a vò Bə-zhɔ-zhe jì y wə, bə zù Yəgədəlya byǐ Anã, Yi lò mó byǎ bɛ́ jì y èmyɛ́ ǹdə́ lyì-fwààlɛ́ jì y wɔ dwã nyí ni mú, Shəlum byǐ Maasəya mɔ́ ń wɔ́ Yi jì y étwí-ènyí rí yìlnə mó jì y yə́-pɛ̀lɛ́ wa. ⁵ A zɛ̃̀ kwè kǎzɔ̀má bə̀ sú pyáám ǹdə́ də̀vɛ̃́, ǹdə́ wẽ̀ dwã, a cĩ́ Erəkaabɛ dwí rí yé né a wɔ̀ bɛ : Nyǐ-nə də̀vɛ̃́ y a kwè á nyɔ̀. ⁶ Bə zɛ̃̀ bə lyár nɛ bə wɔ̀ : Nə́myɛ̌ t’á nywɛ̀ də̀vɛ̃́ yé ; nyǐ nə́ nàmbal Yɔnadaabɛ byǐ Erəkaabɛ mú pɔ nə́ba nyí n wɔ̀ : Ámyɛ̌ ǹdə́ á byǎ bɛ́ bə̀k’á nyɔ̀ də̀vɛ̃́ gaga yé ; ⁷ á bə̀k’á lù jìrh yé, á bək’á dù twã́ yé, á bə̀k’á zhele də̀vɛ̃́ cèmé yé, á bə̀k’á pyà á sə̀pwà də̀vɛ̃́ cèmé cɛrh myɛ yé, pú-nə kwə̀ə́rhe rə yə̀ á jìrh á n’á zwì kɔn m’e yí á cu. Á gə wɛ̀rhɛ́ èta, á myə̌l m’a zə dwɛ̀lɛ̀ tənà y á wɔ́ zhələ è wẽ́ mó wə. ⁸ Nyǐ wɔ́ èta, nə́ j’á n’é tó nyə́ nyɛ̀bɛ́ gakó nə́ nàmbal Yɔnadaabɛ, Erəkaabɛ byǐ mú kɛ̃ n pə nə́ba mɔ́ nɛ : Nə́myɛ̌ ǹdə́ nə́ kana bɛ́ ǹdə́ nə́ byǎ bɛ́ ǹdə́ nə́ bə̀kwá bɛ́ t’á nywɛ̀ də̀vɛ̃́ gaga nə́ lul yi ní kɔn m’e yí zà ; ⁹ nə́ t’á lwì jìrh nə́ zwí gaga, nə́ bə də̀vɛ̃́ cɛrh zhe yé, nə́ bə nə́ sə̀pwà cɛrh zhe yé, nə́ bə cɛrh myɛ zhe nə́ n’é dwì kaka sə̀ wẽ́ yé ; ¹⁰ Wɔ́ kwə̀ə́rhe wẽ́ nə́ ŋwɛ́nɛ́, nə́ n’é tó ǹdə nyə́ né nyɛ̀bɛ́ nə́ da Yɔnadaabɛ kɛ̃ n pə nə́ba mɔ́ gə́ n’ê byili ní. ¹¹ Wɔ́ Babyəlɔnɛ pyɔ̌ Nabəkɔdɔnɔzɔɔrɛ gə́ tú n zɛ̃̀ n bə̀ ń zù tənà y kɛ̀bɛ̀ wẽ́ ń nə́ ń bwí ǹdə́ è lyì bí mú yi ní, nə́myɛ̌ zɛ̃̀ nə́ zɔ̀m ǹdə́ dwã nə́ wɔ̀ : Bànà nə́ dùr Kalədɛ shə̀dɛ́ɛ́sɛ́ ǹdə́ Səri shə̀dɛ́ɛ́sɛ́ yé né nə́ vò yé né gaga. Wɔ́ rə̀myɛ́ è ce nə́ tú nə́ jě Zhərəzalɛm nɛ́ èta mɔ́. ¹² Rə̀myɛ́ yó né Bə-zhɔzhe kə́ n zɔ̀m ǹdə́ Zheremyi n wɔ̀ : ¹³ Nyǐ kɔn rɛ́ dɛ̀bɛ́ Bə-zhɔ-zhe mó ń cǐ jàn cìnə́ bé gakó mó, Esərayɛl Yi rí zɔ̀m mɔ́ : Zhəl ń nə Zhidə lyì bí ǹdə́ Zhərəzalɛm lyì bí ń zɔ̀m ǹdə́ ń wɔ̀ : Á t’á la à cícú mú à n’â byili ába shɔ̀nɔ́, á wɛ̀rhɛ́ ǹdə à zɔ̀mà nɛ́ gə́ n’ê byili ní ǹ ? Wɔ́ Bə-zhɔ-zhe ń zɔ̀m rə̀myɛ́. ¹⁴ Nyǐ Erəkaabɛ byǐ Yɔnadaabɛ gə́ pɔ nyí ń byǎ bɛ́ bə̀ bə̀ k’á nyɔ̀ də̀vɛ̃́ mɔ́, bə̀ shɛ̀nɛ́ bə zwẽ bə̀ nàmbal mɔ́ nyí rí : kɔn j’a zhɩ́ ǹdə́ zà bə̀ gwẽ̌ yə̀ də̀vɛ̃́ nywɛ̀ gaga yé. ¹⁵ À twĩ̀ à tùntùnnə bé bə̀ wɔ́ à nyì-zwennə bé gakó á sono, à twĩ̀ bí a k’a bwérhé a bwérhé ; à zhe bə̀ bə̀ wál àba : Bə̀ á mə̀dù mə̀dù gakó yẽ̌ ń sɔ́má y námməlwɛ̀lɛ́ y nɛ, n ká n bə̀ ń kwã, á twĩ̀ kɔn rɛ́ dɛ̀bɛ́ rə̀ mə̌ mɔ́, á bə̀k’á tó yə dwã kùr á cèrhé ne yé ; mùnì ga á mɛ̃ tənà y kɛ̀bɛ́ à pɔ ámyɛ̌ ǹdə́ á dabá nɛ mɔ́ wẽ́. À zɔ̀m rə̀myɛ́ ǹd’ába, sə á yə̀ á zhã̌ púr á cili à zɔ̀mà nɛ́ yé. ¹⁶ Nyǐ Erəkaabɛ byǐ Yɔnadaabɛ byǎ bɛ́ wɛ̀rhɛ́ ǹdə nyə́ né bə̀ nàmbal mɔ́ pɔ bɛ mɔ́ ta. Sə dwí rí tɛ̀bɛ́ èta mɔ́ yə̀ àmyɛ́ zɔ̀mà nɛ́ cili yé. ¹⁷ Wɔ́ rə̀myɛ́ è ce Bə-zhɔ-zhe, Esərayɛl Yi rí rə̀ cǐ jàn cìnə́ bé gakó mó wə̀lə̀ : Nyìwé, à m’a ce zwini rí tɛ̀bɛ́ gakó à zɔ̀m rə̀ yò mó gakó jòm Zhidə lyì bí ǹdə́ Zhərəzalɛm lyì bí yò, bə̀ gə́ zɔ̀m ǹdə́ bɛ́ bə zɛ̃̀ bə̀ yə̀ à zɔ̀mà nɛ́ cili, bə̀ yə̀ nɛ lyár myɛ mɔ́ yilə. ¹⁸ Rə̀myɛ́ yó né, Zheremyi zɛ̃̀ n wɔ̀ Erəkaabɛ lyì bí ni : Nyǐ-nə Bə-zhɔ-zhe mɔ́ mɔ̀bɔ́ ń cǐ jàn cìnə́ bé gakó mó zɔ̀m n wɔ̀ : Á gə́ zwẽ á nàmbal Yɔnadaabɛ nyí rí, á tó ń nyə́ gakó ne, á wɛ̀rhɛ́ ǹdə ń nyə́ né gə́ n’ê byili ní gakó mó ce, ¹⁹ Nyǐ-nə Bə-zhɔ-zhe mó ń cǐ jàn cìnə́ bé gakó mó wòwə̀ : Erəkaabɛ byǐ Yɔnadaabɛ tá ń la nɛ̀mɛ́ lyɔ̃̀ gaga nə́ zhì à yé né yé.