¹ Zhozhaasɛ byǐ Zhowəcim Zhidə pyɔ̌ mɔ́ pyɛ̀lɛ̀ rɛ́ nyinə nə̀na nyǎn rɛ́ yi ní, Bə-zhɔ-zhe zɔ̀m ǹdə́ Zheremyi n wɔ̀ : ² Kwě sɛ́bɛ́ ń kɛ̃ zɔ̀mà nɛ́ nyɛ̀bɛ́ gakó à ju kùr à n’â zɔ̀m ǹdə́ mɔ́ Zhozhaasɛ pyɛ̀lɛ́ rɛ́ yi ní, Esərayɛl lyì bí ǹdə́ Zhidə lyì bí ǹdə́ tənèsé lyì bí gakó yil kɔn m’e zà dɛ̃ rɛ́ mɔ́, kɛ̃ zɔ̀mà nɛ́ nə̀myɛ́ mɔ́ sɛ́bɛ́ rɛ́ wẽ́. ³ Èta, Zhidə lyì bí gə nyɛ̀ɛ̀ lwɛlɛ rɛ́ tɛ̀bɛ́ à gu à wẽ́ à la bɛ wɔ̀rhɔ́ mɔ́, dɛ̀ga nyǐ bə̀myɛ́ mə̀dù mə̀dù gakó m’a n yẽ̌ ń sɔ́msɛ́ námməlwǎlsɛ́ nɛ ; èta, à m’a pə bɛ bə̀ lwɛlɛ rɛ́ ǹdə́ bə̀ yə̀-bəlwàálɛ́ sǔbri. ⁴ Rə̀myɛ́ yó né Zheremyi zɛ̃̀ n byẽ̀ Nərəya byǐ Bəruuci n byili mu zɔ̀mà nɛ́ nyɛ̀bɛ́ Bə-zhɔ-zhe zɔ̀m mɔ́ gakó n kɛ̃ sɛ́bɛ́ rɛ́ wẽ́. ⁵ Rə̀myɛ́ kwã nɛ́, Zheremyi wɔ̀ Bəruuci ni : nyǐ bɔ̀l tɛ̀nɛ́ àmyɛ́ m’a ŋwɛ̀nɛ́ a vò Bə-zhɔ-zhe jì y w yé. ⁶ Sə à m’a yẽ̌ ǹmyɛ́ cìcì zə sɛ́bɛ́ rɛ́ ń mə́ vò, ǹ gə yú wə́, ǹ m’a kàrmɔ́ Bə-zhɔ-zhe zɔ̀mà nɛ́ ń zɔ̀m ǹdə́ nɛ, a byili mú ń kɛ̃ mɔ́. Nyì-lyõṍ dɛ̃ sə́ kàrmɔ́ zɔ̀mà nɛ́ dwí rí ǹdə́ Zhidə lyì bí byɛ̀bɛ́ bə̀ shí bə̀ cɛmɛ nɛ w bə bə̀ Bə-zhɔ-zhe jì w mú ni bə cili. ⁷ Dɛ̀ga, nyǐ Bə-zhɔ-zhe mà n zwẽ bə̀ lwə̌l mó ; sə bə̀ mə̀dù mə̀dù gakó yẽ̌ ń tùntwə̃̀ə̃̀ né námməywààlɛ́ nɛ ; bə̀ nyǐ Bə-zhɔ-zhe lyim rí nánfɔ̀lɔ̀ w zɛ̃̀ ń nə́ ń pupuri tɛ̃́ dwí rí tɛ̀bɛ́ tùntwĩ̀ĩ̀ rí yilə. ⁸ Nərəya byǐ Bəruuci vò n wɛ̀rhɛ́ ǹdə nyì-zwennə Zheremyi gə́ byili ní, n kàrmɔ́ Bə-zhɔ-zhe zɔ̀mà nɛ́ sɛ́bɛ́ rɛ́ w mɔ́, Bə-zhɔ-zhe jì y wə. ⁹ Zhozhaasɛ byǐ zhowəcim Zhidə pyɔ̌ mɔ́ pyɛ̀lɛ̀ rɛ́ byinə nə̀nù nyǎn rɛ́ cànsɛ nə̀bɔ́ nyǎ y wẽ́, bə̀ bwə̀l nyì-lyõṍ dɛ̃ dwí rí Zhərəzalɛm nɛ́ mɔ́ gakó yilə, ǹdə́ Zhidə dwí rí lyì bí byɛ̀bɛ́ bə̀ shí bə̀ cɛmɛ nɛ́ w bə bə Zhərəzalɛm gakó yilə, Bə-zhɔ-zhe yé né. ¹⁰ Bəruuci kàrmɔ Zheremyi zɔ̀mà nɛ́ sɛ́bɛ́ rɛ́ Bə-zhɔ-zhe jì y wẽ́ n ce dɛ̃̌dɛ̃̌ dwí rí gakó cili ; wɔ́ Shafã byǐ Gəmərəya sá-kanna mɔ́ jì y è y’à wɔ Bə-zhɔ-zhe jì y kɔ̀nɔ̀ w kɔn zǎ dɛ̃̌ sõ mó wẽ́, Bə-zhɔ-zhe jì y bòlò w nándũ̀ w étwí-ènyí rí ni ; ń kàrmɔ̀ zɔ̀mà nɛ́ n byili lyì bí gakó ne né. ¹¹ Sə́ nyǐ, Gəmarəya byǐ Myəka Shafã nɔ̃̌ wá, nyɛ̀ɛ̀ Bə-zhɔ-zhe zɔ̀mà nɛ́ nyɛ̀bɛ́ nə̀ kɛ̃ sɛ́bɛ́ rɛ́ wẽ́ mó gakó. ¹² N já n zɛ̃̀ n só tɛ̃́ n vò sá-kanna mɔ́ jì y wə ; yé né cìnə́ bé gakó y’à jě dwã yó gàà mɔ́ : Rə̀myɛ́ yó né, sa-kanna Eləshama ǹdə́ Shəmaya byǐ Dəlaya, ǹdə́ Akəbɔɔrɛ byǐ Elənatã ǹdə́ Shafã byǐ Gəmarəya ǹdə́ Ananya byǐ Sədəcaasɛ e súlí lyì-fwààlɛ dwã. ¹³ Myəka cĩ́ bi zɔ̀mà nɛ́ nyɛ̀bɛ́ gakó ń nyɛ̀ɛ̀ Nərəya byǐ Bəruuci kàrmɔ̀ sɛ́bɛ́ rɛ́ wẽ́ n byili lyì-zhǎ nɛ mɔ́. ¹⁴ Yé né cìnə́ bé gùlú w lyì bí zɛ̃̀ bə twĩ̀ Nəyanya byǐ Yəwuudi, Shələmya nɔ̃̌ w ǹdə́ Kushi nə̃̀-jòlò w bə̀ bə̀ zhəl Bəruuci sono bə wɔ̀ : Kwě sɛ́bɛ́ rɛ́ ǹ kàrmɔ ń byili lyì bí ni mú ń mə́ bə̀ ń pə nə́ba. Rə̀myɛ́ yó né, Nərəya byǐ Bəruuci zɛ̃̀ n kwè sɛ́bɛ́ rɛ́ n mə n bə̀ bə̀ sono. ¹⁵ Bə zɛ̃̀ bə wɔ̀ mɔ : Jǒm tɛ̃́ nyɔ̀nɔ̀, sə́ kármɔ sɛ́bɛ́ rɛ́ ń pə nə́ba. Bəruuci já n kàrmɔ sɛ́bɛ́ rɛ́ n pə bɛ. ¹⁶ Bə̀ gə́ cili sɛ́bɛ́ rɛ́ zɔ̀mà nɛ́ gakó bə zhɛ̀, ywẽ zɛ̃̀ rə̀ zhe be, bə̀ k’â pyìrhí bə̀ n’ê nyǐ dwã yó wə. Bə zɛ̃̀ bə wɔ̀ Bəruuci ni : Nə́ wàr nə́ m’a cẽ ywẽ̀ né nyɛ̀bɛ́ èta mɔ́ cṹ pyɔ̌ mɔ́ nɛ yé. ¹⁷ Bə k’e bwə̀rh Bəruuci bə wɔ̀ : Nə́ n’é lwə̀l mó sə́ byili nə́ba ǹ gə́ tó né ń mə́ kɛ̃ zɔ̀mà nɛ́ nyɛ̀bɛ́ gakó ǹ byili nə́ba mɔ́ mɔ́ nɛ́. ¹⁸ Bəruuci lyár bə n wɔ̀ : Nyǐ wɔ́ Zheremyi cìcì ń byili ni zɔ̀mà nyɛ̀bɛ́ ǹdə́ à kɛ̃ sɛ́bɛ́ rɛ́ wẽ́. ¹⁹ Yé né cìnə́ bé zɛ̃̀ bə wɔ̀ Bəruuci ni : Cili, ǹmyɛ́ ǹdə́ Zheremyi ga, dǔr-na á vò á pyà jàà á shèè ; lòlò bə̀ká n lwar á jàà shò yé. ²⁰ Bə kwè sɛ́bɛ́ rɛ́ bə cĩ́ sá-kanna Elyəsham tum rí jì y wə, bə zɛ̃̀ bə lyɛ̃ bə zù pyɔ̌ kɛ̀lɛ́ y kɔ̀nɔ̀ w wẽ́ bə yí bə cĩ́ mu zɔ̀mà nɛ́ nyɛ̀bɛ́ gakó bə̀ nyɛ̀ɛ̀ mɔ́. ²¹ Rə̀myɛ́ yó né, pyɔ̌ mɔ́ já n zɛ̃̀ n twĩ̀ Yəwuudi sɛ́bɛ́ rɛ́ kwã nɛ́, Yəwuudi n zhǐr n vò sákanna Elyəshama sono n zwẽ sɛ́bɛ́ rɛ́ n ká n mə n bə̀ n kàrmə rɛ n byili pyɔ̌ mɔ́ ǹdə́ cɔ w yé né cìnə́ bé byɛ̀bɛ́ bə̀ y’à zhǐ pyɔ̌ yé né mó gakó yé né bə cili. ²² Rə̀myɛ́ yó né ǹdə́ pyɔ̌ mɔ́ y’ǎ jě ǹ jì y ń nə́ ń jòm è wẽ́ wàr yi ní mú wẽ́, bə̀ y’à ju myǐn mə̀ zhe ku òdù ò zhǐ ń yé né wẽ́, ǹdə́ è y’à wɔ́ cànsɛ nə̀bɔ́ nyǎ yi ní. ²³ Yəwuudi gə́ kàmɔ̀ kàrmɔ̀ sɛ́bɛ́ rɛ́ sá-yérh sə̀tɔ̀ y n mə n yí sá-yérh sə̀na yá, ǹdə́ pyɔ̌ mɔ́ já n zə sá-kanna mɔ́ shì-bwɛ̀lɛ́ y ń mə́ ń gõ̀ sɛ́bɛ́ ń lwé ku w ò zhǐ ń yé né ǹdə́ myǐn mú mú wẽ́, rə̀ gakó j’a də́dɔ́ myǐn. ²⁴ Pyɔ̌ mɔ́ ǹdə́ ń tùntùnnə bé byɛ̀bɛ́ bə̀ nyɛ̀ɛ̀ zɔ̀mà nɛ́ nə́myɛ́ gakó mó ywẽ yə̀ bɛ zal yé, bə̀ yə̀ bə̀ gàndɛ́ kǎr bə̀ ló tɛ̃́ yé. ²⁵ E jà Elənatã ǹdə́ Dələya y’à lwə̀l pyɔ̌ nɛ bə̀ ń bə̀ká n ji sɛ́bɛ́ rɛ́ myǐn mú ku w yé, sə pyɔ̌ mɔ́ yə̀ cili yé. ²⁶ Pyɔ̌ zɛ̃̀ n pə nyí Yəraməyəə ǹdə́ Arəyəə byǐ Səraya ǹdə́ Abədəyəə byǐ Shələnya nɛ bə̀ bə̀ zə sá-kanna Bəruuci ǹdə́ nyì-zwennə Zheremyi bə bà : Sə Bə-zhɔ-zhe ce bə shèè. ²⁷ Bə-zhɔ-zhe zɔ̀m ǹdə́ Zheremyi ǹdə́ pyɔ̌ mɔ́ ju sɛ́bɛ́ rɛ́ myǐn mú kwã nɛ́ ; zɔ̀mà nɛ́ nyɛ̀bɛ́ Zheremyi byili Bəruuci ni n kɛ̃ mɔ́ sɛ́bɛ́ rɛ́, Bə-zhɔ-zhe kə́ n wɔ̀ Zheremyi ni : ²⁸ Zɛ̃̀ ń kə́ ń kwè sɛ́bɛ́ dõ ń kɛ̃ zɔ̀mà nɛ́ nyɛ̀bɛ́ gakó nə̀ y’à ŋwɛ́nɛ́ sɛ́bɛ́ rɛ́ nã́yéé ré Zhidə pyɔ̌ Zhiwəəcim ju mú wẽ́ mó. ²⁹ Ǹ m’a zɔ̀m Zhidə pyɔ̌ Zhiwəəcim shò kwã nɛ́ ń wɔ̀ mɔ̀ : Zhiwəəcim, ǹ ju sɛ́bɛ́ rɛ́ myǐn ń wɔ̀ : Wɔ́ bə̀kɔ́n yil ǹ kɛ̃ zɔ̀mà nɛ́ sɛ́bɛ́ wẽ́ n wɔ̀ : Bə̀ nyǐ Bəbyəlɔɔnɛ pyɔ̌ mà n bə̀ n cɔ̀ tənà y kɛ̀bɛ́, n ce è lyì bí ǹdə́ è vwàmá nɛ́ làà dẽ̌ mó ? ³⁰ Wɔ́ rə̀myɛ́ yil Bə-zhɔ-zhe nə́ ń zɔ̀m Zhidə pyɔ̌ Zhowəəcim shò kwã ń zhe : Rə̀myɛ́ ce, ǹmyɛ́ sə̀pwà byǐ tá ń la nɔ n jòm ǹ jàà w Dəvyidi pyɛ̀lɛ́ də̀gwã́ y yó yé, bə̀ m’a kwè ǹ cùù bə dwĩ̀ pwẽ̀ ne nə̀nyɔ́nɔ́ shɛ̃̀ wa, è gə wɔ́ cəcɛ̃ nɛ, bə̀ dwĩ̀ w pwẽ̀ ne wàr rɛ́ wẽ́. ³¹ À m’a pə còrhò-tum ńmyɛ́ ǹdə́ ń nɛ̀mɛ́ nɛ́ ǹdə́ ń tùntùnnə bé ne, bə̀ lwɛlɛ rɛ́ yilə, à m’a ce zwini dwí tɛ̀bɛ́ gakó à zɔ̀m rə̀ yò Zhərəzalɛm lyì ǹdə́ Zhidə lyì bí shò kwã nɛ́, zə bɛ bə̀ gə́ yə̀ à zɔ̀mà nɛ́ cili mú yilə. ³² Zheremyi kə́ n kwè sɛ́bɛ́ dõ, n pə Nərəya byǐ, sá-kanna Bəruuci ni, Zheremyi kə́ n byili sɛ́bɛ́ rɛ́ tɛ̀bɛ́ Zhidə pyɔ̌ Zhowəcim ju myǐn mú zɔ̀mà gakó Bəruuci ni n kɛ̃, n súlí n byili mu zɔ̀mà dwã myɛ n kɛ̃ rə̀ wẽ́.