¹ Zhɔzhaasɛ byǐ Sədəcaasɛ jǐrh pyɔ̌ Zhowəcim byǐ Kɔnəya jàà w Zhidə tənà y wa. Wɔ́ Bəbyəlɔɔnɛ pyɔ̌ Nəbəkɔdɔnɔzɔɔrɛ ń cĩ́ mu pyɛ̀lɛ̀ rɛ́ də̀gwã́ y yó. ² Sə Sədəcaaɛ ǹdə́ ń kwã-lyì bí mə̀dù ga y’à t’á cili Bə-zhɔ-zhe zɔ̀mà nɛ́ nyì-zwennə Zheremyi yà ń nə́ zɔ̀m mɔ́ yé. ³ Rə̀myɛ́ yó né, pyɔ̌ Sədəcaasɛ zɛ̃̀ n twĩ̀ Sələmya byǐ Yɔbalɛ ǹdə́ Maasəya byǐ Səfanya ń wɔ́ vwĩ̀-zwə́lnə mó, nyì-zwennə Zheremyi sono, bə̀ bə̀ zhəl mo bə wɔ̀ : Nyǐ nə́ n’é lwə̀l mó bə̀ : zə Bə-zhɔ-zhe nə́ Yi rí cã̌ nɛ nə́ yilə. ⁴ Rə̀myɛ́ yí ni ǹdə́ Zheremyi yà ń nə́ ń twí ń nɛ ń dwí rí ń ká ń kwɛ̃̀ ; ǹdə́ bə̀ y’à gwẽ̌ yə̀ mɔ byìnə́-jù w ce yé. ⁵ Rə̀myɛ́ yó né ǹdə́ Faraɔ̃ shə̀dɛ́ɛ́sɛ́ y’a zhǐr Ezhipti ní sə̀ k’ê tɛ̀nɛ́ nɛ́ yé, sə Kalədɛ lyì bí bə̀ y’à tú bə bú bə zwẽ Zhərəzalɛm mɔ́, gə́ nyɛ̀ɛ̀ bə̀ Faraɔ̃ shə̀dɛ́ɛ́sɛ́ du Ezhipti ní mú yí ní bə̀ k’a du Zhərəzalɛm nɛ́. ⁶ Wɔ́ rə̀myɛ́ yó né, Bə-zhɔ-zhe zɔ̀m ǹdə́ nyì-zwennə Zheremyi n wɔ̀ : ⁷ Nyǐ-na nyí rí tɛ̀bɛ́ Bə-zhɔ-zhe, Esərayɛl Yi rí pɔ mɔ́ : Wál-na Zhidə pyɔ̌ mɔ́ ń y’ǎ twĩ̀ ába à sono à cã̌ nɛ́ zal yil mó ; bə̀ nyǐ Faraɔ̃ shə̀dɛ́ɛ́sɛ́ sə̀ y’à du Ezhipti ní sə̀ bàn ába sãɔ̃ mɔ́ k’a kwɛ̃̀ sə vò Ezhipti sə̀ tənà y wa. ⁸ Sə kalədɛ lyì bí m’a bə̀ bə zɛ̃̀ búlə́ ne cɔ w cɔ̀bɔ́ yó, bə̀ zwẽ w bə ji w myǐn. ⁹ Bə-zhɔ-zhe kə́ n zɔ̀m n wɔ̀ : Á bə̀k’á zɛ̃̀ á n’á jə́jɛ̀rɛ́ á cìn á zhe : Bə̀ Kalədɛ lyì bí m’a dùr bə̀ vò yé né gaga bə yẽ̌ nə́ba yé ! Lwar-na bə̀ bə̀ t’â la yé né yé. ¹⁰ Bá á gə ŋwɛ̀nɛ́ Kalədɛ lyì bí bə̀ n’ê bwí ǹd’ába mɔ́ myɛ, lwar-na bə̀ byɛ̀bɛ́ màgɛlɛ́ y bə̀ cɛ̀mɛ́ mɔ́ m’a shí tɛ̃́ bə zɛ̃̀ bə̀ kwə̀ə́rhé wẽ́ bə ji cɔ w kɔ̀bɔ́ myǐn. ¹¹ Faraɔ̃ shə̀dɛ́ɛ́sɛ́ gə́ y’à ce Kalədɛ lyì bí shə̀dɛ́ɛ́sɛ́ du Zhərəzalɛm nɛ́ sə vò kwã nɛ́ mɔ́ yí ní, ¹² Zheremyi zɛ̃̀ ń nə́ ń yǎl n du Zhərəzalɛm nɛ́ n vò Bɛ̃zhamɛ tənà y wa, mùnì ga n shèè dwí rí cəcəl w wẽ́ n lú. ¹³ N zə zə n bə̀ n yí Bɛ̃zhamɛ cɔ w bwə̀rə̀ y nyí ní ; rə̀myɛ́ yó né, ń nɔ Ananya nɔ̃̌ wá, Shələmya byǐ Yərəya mɔ́ ń wɔ́ bwə̀rə̀ y yìlnə bé yó-cə́bal mɔ́ mɔ́ ; Yərəya já n zə nyì-zwennə Zheremyi n wɔ̀ mɔ̀ : Ǹmyɛ́ wɔ́ Kalədɛ lyì bí sono ǹ nə́ ǹ yǎl ń lyɛ̃ ń vò né ! ¹⁴ Zheremyi lyár mɔ n wɔ̀ : Nyǐ è də̀ gàà mɔ́ à la nɛ́ yé ! È də̀ Kalədɛ lyì bí sono à n’â lyɛ̃ à la nɛ́ yé. Sə Yərəya yə̀ cili gaga yé ; n já n zə mɔ n mə n vò yó-cìnə́ bé yé né. ¹⁵ Yó-cìnə́ bé lyimə j’a zɛ̃̀ Zheremyi yó, bə mà mɔ, bə zə mɔ bə ce byìnə́-jù w Zhonatã sá-kánna mɔ́ jì y bə̀ y’a zɔ è wɔ́ byìnə́-jì mú wẽ́. ¹⁶ Wɔ́ èta kɔn tó né bə m’e zə Zheremyi bə ce byìnə́-jù w gɔ́rɔ́ w bə̀ y’à kù ò vò tɛ̃́ mɔ́ wẽ́, bə shèè mo n dɛnɛ gàà mɔ́. ¹⁷ Pyɔ̌ Sədəcaasɛ zɛ̃̀ n ce bə byẽ̀ mo n bà, n shèè n bwə̀rh mó ń sõ jù w n wɔ́ : Bə-zhɔ-zhe zhe zɔ̀mɛ̀ ŋwɛ́nɛ́ ń byilu nà ? Zheremyi lyár mɔ n wɔ̀ : ɔ̃̀’ɔ̃̂ ; Bə-zhɔ-zhe zɔ̀mɛ̀ ŋwɛ́nɛ́. N wɔ̀ pyɔ̌ mɔ́ nɛ : Nyǐ bə̀ la mɔ́ zal bə ce Babyəlɔɔlɛ pyɔ̌ mɔ́ jɔ̀ wà. ¹⁸ Rə̀myɛ́ kwã nɛ́, Zheremyi bwə̀rh pyɔ̌ Sədəcaasɛ n wɔ̀ : Wɔ́ bə̀kɔ́n yò à m’a dó ǹmyɛ́ ǹdə́ ǹ kwã-lyì bí ǹdə́ dwí rí tɛ̀bɛ́ nɛ, á m’a zə nɛ á ce byìnə́-jù w mú ? ¹⁹ Á nyì-zwennə bé byɛ̀bɛ́ bə̀ y’à n’ê zɔ̀m nyì-zwennə zɔ̀mà nɛ́ bə̀ byili ába bə̀ zhe bə̀ : Babyəlɔɔnɛ pyɔ̌ mɔ́ tá ń bàn bú ǹdə́ ámyɛ̌ ǹdə́ á tənà y gaga mɔ́ mɔ́ ŋwénɛ́ yẽ̀ ? ²⁰ Sə èlǎsɛ̃́, à yó-cə́bal pyɔ̌, à n’â lwə̀l mó, cili, sə́ zwẽ à lwə̌l mó à zhǐ ǹ yé né à n’â lwə̀l mó mó ! Sə ǹ bə̀ká ń kə́ yẽ̌ ne a vò sá-kanna Zhonatã sõ kɛ̀lɛ́ w byìnə́-jì y w yé, mùnì ga à bə̀k’a vò a cì gàà mɔ́ yé ! ²¹ Pyɔ̌ Sədəcaasɛ já n pə nyí bə cə̀r Zheremyi n mɛ̃ pyɔ̌ kɛ̀lɛ́ y w byìnə́-jì y wẽ́, bə̀ n’ê pɛ mɔ búrú w ó ŋwɛ́nɛ́ cɔ w sɔ́msɛ́ yó mó ń nə́ ń dɔ̀m dɛ̃ gakó, kɔn m’e yí búrú w cɔ w mɔ́ zhɛ̀. Wɔ́ èta kɔn tó né Zheremyi j’a n mə n yə̀ byìnə́-jì y wẽ́.