¹ Matã byǐ Shafaca ǹdə́ Pəshuuri byǐ Gədəlya ǹdə́ Shələmya byǐ Yɔbalɛ ǹdə́ Mələce byǐ Pəsuuri nyɛ̀ɛ̀ zɔ̀mà nɛ́ nə̀myɛ́ Zheremyi yà ń nə́ ń zɔ̀m n byili dwí rí mú, ń y’ǎ nə́ zɔ̀m ń zhe : ² Nyǐ wɔ́ Bə-zhɔ-zhe ń zɔ̀m ń wɔ̀ : Bə̀ lò mɔ̀bɔ́ ń mɛ̃ cɔ w kɔ̀bɔ́ wẽ́ mó, sə rə̀-ná-cí lwar bə̀ wɔ́ búlə́ shù ǹdə́ nɔrh ǹdə́ cím-bəlwɛ̀lɛ́ cu ń la cú ; Sə lò mɔ̀bɔ́ ń zwẽ nyí n du cɔ w n vò Kalədɛ̃ lyì bí sono mó, rə̀-ná-cí mà n lú, n zwẽ ń myə̌l ré rə̀ yə̀ búlə́-kɔn ń nɔ búlə́ bú wẽ́. ³ Bə-zhɔ-zhe zɔ̀m èta n súli n wɔ̀ : Babyəlɔɔnɛ pyɔ̌ mɔ́ shə̀dɛ́ɛ́sɛ́ mà sə zwẽ cɔ w kɔ̀bɔ́ sə pwà ò lyì bí. ⁴ Rə̀myɛ́ yó né, cɔ w yé né cìnə́ bé zɛ̃̀ bə wɔ̀ pyɔ̌ mɔ́ nɛ : Bal mɔ́ mɔ̀bɔ́ mə̌ ǹdə́ gu ! Bə̀ zɔ̀mà nɛ́ nyɛ̀bɛ́ dwí rí, bal mɔ́ mɔ̀bɔ́ nə́ ń zɔ̀m mɔ́ m’a ce cɔ w lyì bí ǹdə́ cɔ w shə̀dɛ́ɛ́sɛ́ gə bə̀ wun ; bə̀ bal mɔ́ mɔ̀bɔ́ tá ń pyà dwí rí tɛ̀bɛ́ cɛ̀nɛ̀ yé, wɔ́ rə̀ zwini dúdú ń nə́ ń yàlá. ⁵ Rə̀myɛ́ yó né, pyɔ̌ mɔ́ Sədəcaasɛ lyár n wɔ̀ : Nyǐ-nə mo ń gwẽ̌ ŋwɛ́nɛ́ á jɔ̃̀ wa ; bə̀ pyɔ̌ mɔ́ wàr á nyí ni ń la cõ yé. ⁶ Bə j’a zə Zheremyi bə vò bə ji pyɔ̌ byǐ Maləca nɛ̃̌-gɔ́rɔ́ w ò y’à ŋwɛ́nɛ́ kɛ̀lɛ́ y w mɔ́ wẽ́. Nɛ̃̌ y’à tɛ̀nɛ́ gɔ́rɔ́ w wẽ́ yé, wɔ́ bɔ̀bɔ̀rɔ̀ dúdú ò y’à ŋwɛ́nɛ́, Zheremyi já n mɔ́rh ò wẽ́. ⁷ Rə̀myɛ́ yó né, Ecopyi lyì bal, Ebɛdə-Malɛɛkɛ pyɔ̌ mɔ́ kɛ̀lɛ́ y tùntùnnə, bal mɔ́ ńmyɛ́ nyɛ̀ɛ̀ bə̀ bə̀ zɔ Zheremyi bə ji nɛ̃̌ mɔ́ gɔ́rɔ́ w wẽ́, rə̀myɛ́ yi ní ǹdə́ pyɔ̌ mɔ́ yà ń jě Bɛ̃zhamɛ bwə̀rə̀ y wə. ⁸ Ebɛdə-Malɛɛkɛ já n du kɛ̀lɛ́ y wa, ⁹ n vò n nə pyɔ̌ mɔ́ n wɔ̀ mɔ̀ : À yó-cə́bal, pyɔ̌, nyǐ kɔn rɛ́ dɛ̀bɛ́ lyì bí byɛ̀bɛ́ wɛ̀rhɛ́ nyì-zwennə Zheremyi ni èta bə càn yé ; nyǐ bə̀ zɔ mɔ bə ji nɛ̃̌ gɔ́rɔ́ w wẽ́ ; e jà búrú k’ô tɛ̀nɛ́ cɔ w w yé, nɔrh m’a gu mu gàà mɔ́. ¹⁰ Rə̀myɛ́ yó né, pyɔ̌ mɔ́ zɛ̃̀ n pə nyí Ecopyi lyì bal Ebɛdə-Malɛɛkɛ nɛ n wɔ̀ : Zhəl n zə nunə bə̀tɔ̀ bə tó mó ń vò ń vùr nyì-zwennə Zheremyi nɛ̃̌-gɔ́rɔ́ w wa, ǹdə́ ń gwẽ̌ yə̀ cì yé. ¹¹ Ebɛdə-Malɛɛkɛ já n zhǐr n vò zə nunə bé bə̀tɔ̀ y n ce ń kwã nɛ́, bə vò bə zù jì y è wɔ nə̀cɛ̀ndɛ́ jì y kùr w pyɔ̀ kɛ̀lɛ́ y wẽ́ mó wə, n pwà kàmə̀jùúrhí ráá kàmə̀zù-ezhaarɛ n lyẽ nyínsi ni n ce Zheremyi kwã nɛ́ nɛ̃̌-gɔ́rɔ́ w wẽ́. ¹² Ecopyi lyì bal Ebɛdə-Malɛɛkɛ zɛ̃̀ n wɔ̀ Zheremyi ni : Ce kàməjùúrhí ǹ vɔ̃̀-kwə̀ə́le kùr w ń zə nyínsí ń lyẽ rə̀ dɛ̃̌ sõ mó. Zheremyi já n wɛ̀rhɛ́ ǹdə bə̀ gə́ byili mú ní. ¹³ Bə zɛ̃̀ bə zə nyínsí bə vwẽ Zheremyi bə cĩ́ pwẽ̀ ne. Zheremyi já n mɛ̃ pyɔ̌ mɔ́ kɛ̀lɛ́ y kɔ̀nɔ̀ wa. ¹⁴ Rə̀myɛ́ kwã nɛ́, pyɔ̌ Sədəcaasɛ zɛ̃̀ n twĩ̀ bə vò bə zə nyi-zwennə Zheremyi bə b’e pɔ̃, Bə-zhɔ-zhe jì y étwí-ènyə́ né nə̀tɔ̀ nyǎn rɛ́ nyí ni. N wɔ̀ Zheremyi ni : À la mɔ́ zɔ̀mɛ̀ rə̀dù bwə̌rh, sə ǹ bə̀ká ń shèè n kaka yé ! ¹⁵ Zheremyi lyár Sədəcaasɛ n wɔ̀ : À nə gə byili mu zɔ̀mɛ̀ rɛ́, ǹ tá ǹ la gu yé ? À gə cící mú ǹdə́ zɔ̀mɛ̀ myɛ, ǹ tá ǹ la à zɔ̀mɛ̀ cilu yé. ¹⁶ Pyɔ̌ Sədəcaasɛ zɛ̃̀ n já n shèè n zə Yi yil ré n bwəl nyí Zheremyi ni n wɔ̀ : Nyǐ Bə-zhɔ-zhe wɔ́ nã́nyì, wɔ́ ńmyɛ̌ ń pɔ nə́ba nyǔ mú ! À t’â la mɔ́ gu yé, à t’a la mɔ́ zal a ce lyì bí byɛ̀bɛ́ bə̀ n’ê pyà ǹ myə̌l ré vǔr mó jɔ̃̀ w yé. ¹⁷ Rə̀myɛ́ yó né Zhermyi zɛ̃̀ n wɔ̀ Sədəcaasɛ nɛ : Nyǐ kɔn dɛ̀bɛ́ Bə-zhɔ-zhe Esərayɛl Yi rí rə̀ cǐ jàn cìnə́ bé gakó mó wə̀lə̀ : Lwar bə ǹ gə zə ǹ cìn ń vò Babyəlɔɔlɛ pyɔ̌ mɔ́ yé né cìnə́ bé sono, ǹ mà ń lú, ǹ mà ń zə myə̌l, bə̀ t’â la cɔ w kɔ̀bɔ́ myǐn ju yé ; ǹmyɛ́ ǹdə́ ǹ kɛ̀lɛ́ y lyì bí m’ǎ lú. ¹⁸ Sə ǹ gə cẽ ǹ yə̀ shɛ̀nɛ́ ń zə ǹ cìn ń vò ń pə Babəlyɔɔnɛ pyɔ̌ mɔ́ yé né cìnə́ bé ne ; sə́ lwar bə̀ bə̀ m’a zə cɔ w kɔ̀bɔ́ lyì bí bə ce Kalədɛ lyì bí jɔ̃̀ wa, bə ji cɔ w myǐn ; sə ǹmyɛ́ cìcì mú tá ǹ la bə̀ jɔ̃̀ w lú yé. ¹⁹ Pyɔ̌ Sədəcaasɛ wɔ̀ Zheremyi ni : Nyǐ Zhwǐfu lyì bí byɛ̀bɛ́ bə̀ zhə̀l bə pə bə̀ cìn Kalədɛ lyì bí ni mú ywẽ zhe ne ; ywẽ zhe ne, à yə̀l ǹdə́ bə̀ gə m’a zə nɛ bə̀ ce bə̀ jɔ̃̀ w bə fulsi ni yé. ²⁰ Zheremyi lyár pyɔ̌ Sədəcaasɛ n wɔ̀ : Bə̀ t’â la mɔ́ zal bə ce bə̀ jɔ̃̀ w yé. Ǹmyɛ́ wírí ń cili kɔn rɛ́ dɛ̀bɛ́ Bə-zhɔ-zhe byili ni b’a byili mú mú ; ǹ mà ń yí ń nə ǹ cìn cɛ̀nɛ̀, ń lú ń zə myə̌l. ²¹ Nyǐ kɔn rɛ́ dɛ̀bɛ́ Bə-zhɔ-zhe byili ǹdə́ ǹ gə cẽ ǹ tá ǹ la cɔ w du mú : ²² Bə̀ m’a zə kana bɛ́ byɛ̀bɛ́ gakó bə̀ dàl Zhidə pyɔ̌ mɔ́ kɛ̀lɛ́ y w mɔ́, bə m’e vò Babyəlɔɔnɛ shə̀dɛ́ɛ́sɛ́ yó-cìnə́ bé sono, bə zhì bə̀ sono bə̀ n’ê zɔ̀m ǹ shò-kwã nɛ́ bə̀ zhe : Nyǐ lyì bí byɛ̀bɛ́ bə̀ y’à n’ê bwə̀l yə̀-zùlə́ né bə̀ byili mú mú, nyǐ wɔ́ jə́ bə̀ jə́jɛ̀rɛ́ mɔ́, bə̀ ŋwɛ̀nɛ́ mɔ́, ǹ nèsé gə́ tú sə mɔ́rh mɔ́rhɔ́ w wẽ́ mó, bə̀ dùr bə yẽ̌ mó. ²³ Sə bə̀ m’a zə kana bɛ́ bə̀myɛ́ mɔ́ gakó ǹdə́ bə̀ byǎ bɛ́ bə vò bə pə Kalədɛ lyì bí ni ; sə Babyəlɔɔnɛ pyɔ̌ mɔ́ mà n cĩ́ jɛ̃̀ ǹmyɛ́ cìcì mú yó, bə ji cɔ w kɔ̀bɔ́ myǐn. ²⁴ Sədəcaasɛ zɛ̃̀ wɔ̀ Zheremyi ni : Bə̀ká shɛ̀nɛ́ lòlò lwar zɔ̀mɛ̀ rə̀dù ga zhərhə́ y nə́ zhərh mó yil yé, sə́ lwar bə̀ ǹ tá ǹ la cú yé. ²⁵ Sə shə̀dɛ́ɛ́sɛ́ yó-cìnə́ bé gə lwar bə̀ à zɔ̀m ǹdə́ mɔ́, sə̀ gə zɛ̃̀ sə̀ n’ê bwə̀rh mó sə̀ zhe : Bə̀ ń byili nə́ba kɔn rɛ́ dɛ̀bɛ́ ǹmyɛ́ ǹdə́ pyɔ̌ mɔ́ zɔ̀m nə́ nyì, nyǐ ǹ gə yə̀ byili nə́ m’ǎ gu mú ! ²⁶ sə́ lyár sɛ ń wɔ̀ : Nyǐ wɔ́ lwə̌l à lwə̀l pyɔ̌ mɔ́ nɛ, bə̀ ń bə̀ká n ce a k’a kwɛ̃̀ a vò Zhɔnatã sõ kɛ̀lɛ́ y w yé, à gə k’â zhə̀l gàà mɔ́ à m’a cì. ²⁷ Rə̀myɛ́ kwã nɛ́, Shə̀dɛ́ɛ́sɛ́ yó-cìnə́ bé bə̀ bə nə Zheremyi bə̀ n’ê bwə̀rh mo : Sə Zheremyi já n lyár shə̀dɛ́ɛ́sɛ́ n byili si kɔn gakó rə tó ǹdə pyɔ̌ mɔ́ gə́ byili mú bə̀ ń byili ní cìcì ; sə̀ j’a yẽ̌ shɛ́ɛ́, sə k’a kwɛ̃̀, bə̀ yò w yə̀ dɛ̃̌ dwí yé. ²⁸ Zheremyi já n mɛ̃ pyɔ̌ mɔ́ kɛ̀lɛ́ y w kɔn m’e yí Kalədɛ lyì bí bú bə zwẽ Zhərəzalɛm cɔ wá.