¹ Zhidə pyɔ̌ Sədəcaasɛ pyɛ̀lɛ́ rɛ́ byinə nə̀bɔ̀ nyǎn rɛ́ yó né, byin rí cànsɛ shí nyǎ y wẽ́, Babyəlɔɔnɛ pyɔ̌ Nabəkɔdɔnɔzɔɔrɛ zə ń shə̀dɛ́ɛ́sɛ́ gakó n bə̀ Zhərəzalɛm n jòm cɔ w yé y wə, n zɛ̃̀ búlə́ ne ń nə́ ń bwí ǹdə́ cɔ w lyì bí. ² E k’e yí Sədəcaasɛ pyɛ̀lɛ̀ rɛ́ byinə shí ǹdə́ rə̀dù nyǎn rɛ́ yó né, è cànsɛ sə̀na nyǎ y dwã nə̀bɔ́ yù wə̀, cɔ w byílí y kə̀kàlà èdù kǎr, ³ rə̀myɛ́ yó né, Babyəlɔɔnɛ pyɔ̌ mɔ́ shə̀dɛ́ɛ́sɛ́ gakó j’a zhǐr sə bə̀ sə jòm cɔ w bwə̀rə̀ y è ò wɔ cəcəl w mó nyí ní, shə̀dɛ́ɛ́sɛ́ sə̀ jòm gàà mɔ́ y’à wɔ́ : Babyəlɔɔnɛ pyɔ̌ mɔ́ shə̀dɛ́ɛ́sɛ́ yó-cìnə́ bé ǹdə́ Nərəgal-Sarəsɛɛrɛ ǹdə́ Shaməgar-Nəbo ǹdə́ Sar-Səcim ǹdə́ pyɔ̌ kɛ̀lɛ́ y yó-cə́bal mɔ́ ǹdə́ Nərəgal-Sarɛsɛɛrɛ cícírnə bé yó-cə́bal mɔ́ e súlí pyɔ̌ kɛ̀lɛ́ lyì bí yó-cìnə́ bé ǹdə́ Babyəlɔɔnɛ shə̀dɛ́ɛ́sɛ́ yó-cìnə́ bé dwã bɛ́. ⁴ Zhidə pyɔ̌ mɔ́ shə̀dɛ́ɛ́sɛ́ gə́ nɔ sɛ yó né, Zhidə shə̀dɛ́ɛ́sɛ́ j’a zɛ̃̀ sə tó cəcɛ̃ nɛ sə dùr sə vò sə tó pyɔ̌ mɔ́ bɔ́ɔ́ səta, byílí y è kǎr mɔ́ cəcəl w sə kwè sɔ́má y è zǎ Araba səta mɔ́. ⁵ Rə̀myɛ́ yó né, Kalədɛ lyì bí shə̀dɛ́ɛ́sɛ́ j’a pú bə̀ kùr sə jì jì si sə zə Sədəcaasɛ Zhəriko jə́ y wə. Sə zə mɔ sə m’e vò Erəbəla, Amaatɛ tənà y wa, sə pə ⁶ Babyəlɔɔnɛ pyɔ̌ Nabəkɔdɔnɔzɔɔrɛ nɛ ; Nabəkɔdɔnɔzɔɔrɛ zhì gàà mɔ́ n byili còrhò-tum rí dɛ̀bɛ́ ń kɔ́ ń la Sədəcaasɛ nɛ wɔ̀rhɔ́ mɔ́. Babyəlɔɔnɛ pyɔ̌ já n ce bə zə Sədəcaasɛ byǎ bɛ́ bə zwə́l Erəbəla nɛ́, Sədəcaasɛ cìcì mú yirh wə, n ce bə zə Sədəcaasɛ lyì-fwààlɛ́ gakó bə zwə́l. ⁷ Rə̀myɛ́ kwã nɛ́, n ce bə zə Sədəcaasɛ cìcì mú bə lə́ ń yírhə́ né, n ce bə zə kàmɔ nyáná kùrə̀ nə̀lyé bə m’e lyẽ mo, bə zə mɔ bə m’e vò Babyəlɔɔnɛ. ⁸ Kalədɛ lyì bí shə̀dɛ́ɛ́sɛ́ zɛ̃̀ sə ji pyɔ̌ mɔ́ kɛ̀lɛ́ y ǹdə́ dwí rí lyì bí jìsí myǐn, sə wǔr Zhərəzalɛm cɔ w byílsí sə ló tɛ̃́. ⁹ Pyɔ̌ mɔ́ yìlnə bé yó-cə́bal Nəbəzaradã mɔ́, já n pwà lyì bí byɛ̀bɛ́ bə̀ dàl cɔ w w mɔ́, ǹdə́ byɛ̀bɛ́ bə̀ y’à dùr búlə́ né yil bə bə̀ ń sono mó ǹdə́ cɔ w lyì-fwààlɛ́ tɛ̀bɛ́ rə̀myɛ y’à gwẽ̌ dàl cɔ w w mɔ́ kùr rí gakó n mə n vò Bəbyəlɔɔnɛ. ¹⁰ Wɔ́ cɔ w lyì bí byɛ̀bɛ́ bə̀ wɔ́ nə̀mwà bə̀ bə yàlà zhe mó màngɛlɛ́ nɛ Nəbəzaradã yẽ̌ tənà y wa, n yẽ̌ də̀vɛ̃́ cèmé cɛsɛ́ ǹdə́ kálsɛ nɛ n pə bɛ. ¹¹ Babyəlɔɔnɛ pyɔ̌ Nabəkɔdɔzɔɔrɛ pə nyí ń yìlnə bé yó-cə́bal mɔ́ nɛ Zheremyi shò kwã nɛ́ n wɔ̀ : ¹² Zhəl ń zə Zheremyi, ń cili ń sõ cɛ̀nɛ̀, bə̀ mɔ lwɛlɛ wɛ̀rhɛ́ yé, kɔn dɛ̀bɛ́ gakó ń gə lwə̀l mó sə́ wɛ̀rhɛ́ rɛ ń pɔ̃. ¹³ Rə̀myɛ́ yó né, pyɔ̌ mɔ́ yìlnə bé yó-cə́bal Nəbəzaradã ǹdə́ pyɔ̌ kɛ̀lɛ́ tùntùnnə bé yo-cìnə́ bé yó-cə́bal Nəbəshazəbã ǹdə́ cícírnə bé yó-cə́bal Nərəgal-Sarɛsɛɛrɛ ǹdə́ pyɔ̌ Nabəkɔdɔnɔzɔɔrɛ shə̀dɛ́ɛ́sɛ́ yó-cìnə́ bé gakó, ¹⁴ twĩ̀ bə vò bə vùr Zheremyi pyɔ̌ kɛ̀lɛ́ y kɔ̀nɔ́ w wẽ́, bə pə Ayəkam byǐ Gədalya, Shafã nɔ̃̀ w nɛ, mùnì ga n zə mɔ n vò ń sõ kɛ̀lɛ́ wa. Wɔ́ èta kɔn tó né Zheremyi já n mə n mɛ̃ dwí rí cəcəl wə. ¹⁵ Bə-zhɔ-zhe kə́ n zɔ̀m ǹdə́ Zheremyi ǹdə́ bə̀ co mo pyɔ̌ kɛ̀lɛ́ y kɔ̀nɔ́ w byə̀nə́-jì w mú, n wɔ̀ mɔ : ¹⁶ Zɛ̃̀ ń vò ń zɔ̀m ǹdə́ Ecopyi lyì bal Ebɛd-Malɛkɛ ń wɔ̀ mɔ : Bə ń nyǐ Bə-zhɔ-zhe, Esərayɛl Yi rí rə̀ cǐ jàn cìnə́ bé gakó mó wòwə̀ : Nyǐ ywẽ̀ né nyɛ̀bɛ́ à y’à bwə̀l rə̀ yò a byili bə̀ rə̀ bàn cɔ w kɔ̀bɔ́ yó mó ; à m’a ce rə bə̀ cɔ w kɔ̀bɔ́ yó, sə rə̀ t’â la cɛ̀nɛ̀ yál yé, wɔ́ lwɛlɛ rə̀ la yál, ywẽ̀ né nə̀myɛ́ mɔ́ b’a yí dɛ̃ rɛ́ rə̀myɛ́ mɔ́ yù w ǹ yé né. ¹⁷ Dɛ̃ rɛ́ rə̀myɛ́ yù wə, à m’a vwǎrh mɔ́, wɔ́ Bə-zhɔ-zhe ń zɔ̀m rə̀myɛ́, ce bə̀ t’â la mɔ́ zal bə ce lyì bí bə̀ ywẽ zhe mó mó jɔ̃̀ w yé. ¹⁸ À m’a vwǎrh mɔ́, ǹ tá ǹ la búlə́ shù jɔ̃̀ w tú yé ; ǹ m’ǎ lú ń zə myə̌l, e yə̀ wu-nyɔ̃̀ kɔn ǹ yilə, wɔ́ Bə-zhɔ-zhe ń zɔ̀m rə̀myɛ́, bə̀ ǹ zɔ ń zhə̀nà.