¹ Bə-zhɔ-zhe zɔ̀m ǹdə́ Zheremyi ǹdə́ pyɔ̌ mɔ́ yìlnə bé yó-cə́bal Nəbəzaradã gə́ zɔ mɔ n ká n mə n shí Araraa n kwɛ̃̀ kwã n bə̀ mɔ́ yi ní. Pyɔ̌ mɔ́ yìlnə̀ bé yó-cə́bal Nəbəzaradã gə́ yà ń ce bə̀ la Zheremyi pyǎ bə m’e bə̀ mɔ́ ǹdə́ bə̀ y’à lyẽ mó ǹdə́ nyáná ń wɔ dwí rí bə̀ zɔ yóm ré bə m’e shí Zhərəzalɛmn ǹdə́ Zhidə bə̀ m’e la Babyəlɔɔnɛ mɔ́ wẽ́. ² Pyɔ̌ mɔ́ yìlnə bé yó-cə́bal mɔ́ wɔ̀ Zheremyi ni : Wɔ́ Bə-zhɔ-zhe, ǹ Yi rí rə̀ bwə̀l zwini rí tɛ̀bɛ́ ń la jàà y kɛ̀bɛ́ nɛ pɔ. ³ Wɔ́ Bə-zhɔ-zhɔ ń wɛ̀rhɛ́ kɔn rɛ́ dɛ̀bɛ́ ǹ y’ǎ byili bə̀ ń la wɔ̀rhɔ́ mɔ́, wɔ́ á gə́ dó Bə-zhɔ-zhe ne, á yə̀ ń zɔ̀mà nɛ́ cili mú è ce ywẽ̀ né nyɛ̀bɛ́ yí ába. ⁴ Sə nyǐ zà dɛ̃ rɛ́ à m’a vwǎrh mɔ́, a lwə̌r nyáná nɛ́ ǹ jɛ̀sɛ́ nɛ a yẽ̌ mó ; sə à n’â byili mú ǹdə́ kɔn gə wɔ́ bùlə̀, ǹ nə́ ǹ yǎl ń tó né ń vò Babyəlyɔɔnɛ, sə́ bə̀ ń lyɛ̃, sə́ yẽ̌ bə̀ à m’a nyǐ ǹ yò náàcɛ̀nɛ́ ; sə kɔn gə k’ê də̀ ǹ bùlə̀, ǹ tá ǹ yǎl ń tó ne ń vò, sə́ yẽ̌. Nyǐ tənà y púlə́púlə́ è pyě tɛ̃́ ǹ yé né : Zhəl jàà y kɛ̀bɛ́ è sú ǹ yírh, è yú bùlə̀ mó wə. ⁵ Zheremyi gə́ j’á zhǐ ń nə́ ń dɛnɛ ń tá ń lyár kaka mɔ́ ce, Yìlnə bé yó-cə́bal mɔ́ wɔ̀ mɔ : È gə wɔ́ èta, ǹ tá ǹ yǎl ń tó ne, sə́ ká kwɛ̃̀ ń vò Ayəkamɛ byǐ Gədalya, Shafã nɔ̃̀ w Babyəlɔɔnɛ pyɔ̌ mɔ́ ce ń cǐ Zhidə cɛmɛ nɛ́ mɔ́ sono, ń jòm ǹdə́ mɔ́ dwí rí cəcəl wə, ráá è gə də̀ rə̀myɛ́, sə́ pyà jàà kɛ̀bɛ́ è sú ǹ yírh ń vò ń jòm. Pyɔ̌ mɔ́ yìlnə bé yó-cə́bal mɔ́ jà n zhì gàà mɔ́ n pə kùjúr Zheremyi ni, n ce ń bán n lyɛ̃. ⁶ Zheremyi myɛ já n lyɛ̃ n vò Myəsəpa Ayəkamɛ byǐ Gədalya sono, n mɛ̃ ń sõ gàà ńmyɛ̌ ǹdə́ dwí rí lyì bí byɛ̀bɛ́ bə̀ mɛ̃ tənà y w mɔ́. ⁷ Rə̀myɛ́ yó né, shə̀dɛ́ɛ́sɛ́ yó-cìnə́ bé byɛ̀bɛ́ gakó bə̀ y’à ŋwɛ́nɛ́ gɔ sõ ǹdə́ bə̀ lyì bí mú nyɛ̀ɛ̀ bə̀ Babyəlɔɔnɛ pyɔ̌ mɔ́ cír Ayəkamɛ byǐ Gədalya ń la n nyǐ tənà y yò, sə ń kwè tənà y bala bɛ́ ǹdə́ è kana bɛ́ ǹdə́ è bə̀sɔ́ná bɛ́ ǹdə́ è nə̀mwà bɛ́ byɛ̀bɛ́ bə̀ mɛ̃ tənà y w bə̀ yə̀ zə bə vò yóm ré jè y mó, n ce ń jɔ̃̀ w ń la bə̀myɛ yò nyǔ. ⁸ Lyì bí bə̀myɛ́ mɔ́ zɛ̃̀ bə b’e nə mɔ Myəsəpa nɛ́ : È y’à wɔ́ Nətanya byǐ Yəsəmayəə ǹdə́ Karəya byǎ bɛ́ ; Yɔwanã, Yɔnatã, ǹdə́ Tənəwəmɛɛrɛ byǐ Sərəya ǹdə́ Nətəfa lyì bal Efəyi byǎ bɛ́ ; e súlí Maaka lyì bal Yəzantã. ⁹ Sə Shafã nɔ̃̌ Gədalya, ń byǐ Ayəkamɛ byǐ mú bwəl nyí lyì bí ní n wɔ̀ : À lyì, á wun bə̀k’a zɛ̃̀ Kalədɛ lyì bí gə́ la ába cìnú á twĩ̀ á pə bɛ yil mó yé, Shɛ̀nɛ́-na á mɛ̃ tənà y wa, á twĩ̀ á pə Babyəlɔnɛ pyɔ̌ mɔ́ nɛ, s’á yẽ̌ b’ǎ m’ǎ nə á cìnə̀. ¹⁰ Sə nyǐ-nə àmyɛ́ ŋwɛ́nɛ́ Myəsəpa nɛ́ à la yə̀ Kalədɛ lyì bə̀ n’ê twí nə́ sono mó yé né á yilə ; sə ámyɛ̌ wírí zhəl-nə á pɔ̌r də̀vɛ̃́ cèmé né byǎ bɛ́, kwẽ-nə cèmé né nə̀ n’ê byìl cə-lumu yi ni mú byǎ bɛ́, e súlí wẽ̀ ré tɛ̀bɛ́ bə̀ m’ê wɛ̀rhɛ́ nwə̃̌ y mó ; tɛnɛ-na rɛ á cĩ́ ; s’á mɛ̃ á cɛmɛ nɛ́ wẽ́. ¹¹ Nyǐ Zhwǐbá byɛ̀bɛ́ gakó bə̀ y’à ŋwɛ́nɛ́ Mɔwaabɛ tənà y w mɔ́, ǹdə́ Amɔ̃ byǎ bɛ́ cəcəl w mó ǹdə́ Edɔmɛ nɛ́ mɔ́, e súlí tənèsé dwã bɛ́ gakó wẽ́ mó nyɛ̀ɛ̀ bə̀ Babyəlyɔnɛ pyɔ̌ mɔ́ yẽ̌ Zhidə lyì bí jàlà nɛ Zhidə né, sə wɔ́ Shafã nɔ̃̌, ń byǐ Gədalya byǐ Ayəkamɛ nɛ ń pɔ bɛ ń cǐ. ¹² Rə̀myɛ́ yó né Zhwǐfubá j’a k’a shí jààsɛ́ shɛ̀bɛ́ bə̀ y’à jì bi bə vò sə̀ wẽ́ mó w bə k’a kwɛ̃̀ bə bə̀ tənà y w Gəgalya sõ Myəsəpa nɛ́ bə zhɛ̀, bə zɛ̃̀ bə pɔ̌r dəvɛ̃́ cèmé né byǎ bɛ́ ǹdə́ wẽ̀ ré tɛ̀bɛ́ rə̀ n’ê byìl cə-lumu yi ni mú byǎ bɛ́ nánzhəzhɔ̌. ¹³ Karəya byǐ Yɔwanã ǹdə́ shə̀dɛ́ɛ́sɛ́ sə̀ y’à wɔ gɔ sõ mó yó-cìnə́ bé gakó gə́ yú Gədalya sõ Myəsəpa nɛ́ yó né, ¹⁴ bə̀ bwə̀rh mo bə wɔ̀ : Ǹ nə lwar bə̀ Amɔ̃ byǎ bɛ́ pyɔ̌ Bəəlyiisi twĩ̀ Nətanya byǐ Yəsəmayəə bə̀ ń gu mú mú ? Sə Ayəkamɛ byǐ Gədalya yə̀ nyí zwẽ yé. ¹⁵ Rə̀myɛ́ yó né, Karəya byǐ Yəwanã shèè n bə̀ Gədalya sõ Myəsəpa nɛ́ n lwə̀l mo n wɔ̀ : Pɛ̃ sɔ́má a vò a gu Nətanya byǐ Yəsəmayəə ǹdə́ lòlò yə̀ rɛ lwar yé. N wɔ̀ mɔ̀ : Wɔ́ bə̀kɔ́n yil ǹ la mɔ gu èta mɔ́ ? Wɔ́ bə̀kɔ́n yil Zhidə lyì bí byɛ̀bɛ́ èta mɔ́ gakó tú bə gùlí dwã ǹ sono, ń zɛ̃̀ ǹ la ce bə̀ k’a dùr bə làà dɛ̃̌, Zhidə lyì byɛ̀bɛ́ kùr ré rə̀ la dǎl mɔ́ zɛ̃̀ rə̀ la tɛ̃́ jó mó ? ¹⁶ Ayəkamɛ byǐ Gədalya kə́ n wɔ̀ Karəya byǐ Yɔwanã nɛ : Bə̀k’á mɛrhɛ rə̀myɛ́ mɔ́ wɔ̀rhɔ́ yé ! Nyǐ kɔn rɛ́ dɛ̀bɛ́ ǹ nə́ ǹ cĩ́ Yəsəmayəə shò kwã nɛ́ mɔ́ də̀ zhə̀n yé.