¹ Byin rí rə̀myɛ́ mɔ́ cànsɛ shàlpyɛ̀ nyǎ y wẽ́, Eləshama nɔ̃̌, ń byǐ Nətanya byǐ Yəsəmayəə mó yà ń wɔ́ pyə̀-dwí rí byǐ. Wɔ́ ńmyɛ̌ ń zɛ̃̀ n zə nunə shíyə́ n ce ń kwã nɛ́, n mə n bə̀ Ayəkamə byǐ Gədalya sõ Myəsəpa nɛ́, bə tó dwã bə̀ jě tɛ̃́ bə̀ n’ê jí kùjú. ² Rə̀myɛ́ yó né, Nətanya byǐ Yəsəmayəə ǹdə́ bala bɛ́ shí y byɛ̀bɛ́ bə̀ tó mo mó j’a shí tɛ̃́ bə zɛ̃̀ bə gu Ayəkamɛ byǐ Gədalya ǹdə́ búlə́ shù. Wɔ́ èta kɔn j’a tó né bə m’e gu lò mó mɔ̀bɔ́ Babyəlɔnɛ pyɔ̌ mɔ́ yà ń cír n ce ń cǐ Zhidə tənà y mɔ́. ³ Yəsəmayəə súlí n gu Zhwǐfubá byɛ̀bɛ́ gakó bə̀ y’à ŋwɛ́nɛ́ Gədalya sono Myisəpa nɛ́ mɔ́, ǹdə́ Kalɛdɛ lyì bí byɛ̀bɛ́ bə̀ y’à yě búlə́ bú mú, bə̀ y’à ŋwɛ́nɛ́ gàà mɔ́ myɛ n súlí. ⁴ Bə̀ gə́ gu Gədalya e zhɛ̀, e wɛ̀rhɛ́ dwã nə̀lyè ǹdə́ lòlò yà ń gwẽ̌ yə̀l yé. ⁵ Rə̀myɛ́ yó né, bə pwírí bala shə́-lyɛlɛ bə̀ shí Shəshɛm ǹdə́ Shilo ǹdə́ Samarɛ, bə̀ tama nɛ́ fɔ̀nà, bə̀ gàndɛ́ kǎr kǎr, bə̀ yala nɛ́ myɛ kǎr kǎr, bə̀ zhe pansɛ ǹdə́ asã bə̀ jɔ̃̀ w bə̀ m’e bàn pɔ Bə-zhɔ-zhe jì y wə. ⁶ Rə̀myɛ́ yó né, Nətanya byǐ Yəsəmayəə já n du Myəsəpa nɛ́ ń nə́ ń zhə̀l ń la bɛ jəl ǹdə́ ń kúrhə́. Ń gə́ tú n jəl be n zhɛ̀, n wɔ̀ bɛ : Bà-na á lyɛ̃ á vò á yə̀ Ayəkamɛ byǐ Gədalya sono. ⁷ Bə vò vò bə bə̀ bə̀ n’ê yí cɔ w cəcəl w bə zhɛ̀ ; rə̀myɛ́ yó né Nətanya byǐ Yəsəmayəə ǹdə́ lyì bí byɛ̀bɛ́ bə̀ y’à wɔ ń kwã nɛ́ mɔ́ j’a zɛ̃̀ bə tu bala bɛ́ bə̀myɛ́ mɔ́ yó bə gu bi lyə́m lyə́m bə cĩ́ tɛ̃́, bə zɛ̃̀ bə pwà bɛ bə vò bə ló nɛ̃̌-gɔ́rɔ́ wẽ́. ⁸ Sə́ nyǐ bala bɛ́ byɛ̀bɛ́ bə̀ gu mú, nunə shíyə́ y’à ŋwɛ́nɛ́, lyì bí bə̀myɛ́ mɔ́ zɛ̃̀ bə̀ n’ê lwə̀l Yəsəmayəə ne, bə zhe : Ǹ bə̀ká ń gu nə́ba yé, nyǐ nə́ shèè nə́ kùjú gɔ sõ, è wɔ́ : bə̀lɛ́ ǹdə́ Orəzhe ǹdə́ nwə̃̌ e súlí ǹdə́ tùr. Yəsəmayəə já n yẽ̌ bə̀myɛ́ ǹdə́ bə̀ da-byǎ bɛ́ nɛ, ń yə̀ bɛ gwi yé. ⁹ Nɛ̃̌-gɔ́rɔ́ w kɔ̀bɔ́ Yəsəmayəə ló lyì bí ń gu mú ò wẽ́ mó y’à wɔ́ nɛ̃̌-gɔ́rɔ́ nánfɔ̀lɔ̀ w kɔ̀bɔ́ Zhidə pyɔ̌ Aza yà ń ce bə kù ǹdə́ ń zɛ̃̀ ń nə́ ń bwí ǹdə́ Esərayɛl lyì pyɔ̌ Bashã yi ní mú. Nətanya byǐ Yəsəmayəə mó já n ce bə ló lyì bí ń gu mú nɛ̃̌-gɔ́rɔ́ w w o sú. ¹⁰ Rə̀myɛ́ kwã nɛ́, Yəsəmayəə zɛ̃̀ n ce bə pwà lyì bí kùr ré rə̀ dàl Myəsəpa nɛ́ mɔ́ n mə n lyɛ̃ : È y’à wɔ́ : pyɔ̌ mɔ́ bə̀kwá bɛ́ ǹdə́ lyì bí byɛ̀bɛ́ gakó pyɔ̌ mɔ́ yìlnə bé yó-cə́bal Nəbəzaradã yà ń pɔ Ayəkamɛ byǐ Gədalya nɛ mɔ́ kùr ré ; Nətanya byǐ Yəsəmayəə y’à ń zɔ yómə́ n mə n vò Amɔ̃ byǎ bɛ́ sõ. ¹¹ Wɔ́ rə̀myɛ́ yó né, Karəya byǐ Yɔwatã ǹdə́ shə̀dɛ́ɛ́sɛ́ yó-cìnə́ bé bə̀ y’à ŋwɛ́nɛ́ ǹdə́ mɔ mɔ́ gakó gə́ nyɛ̀ɛ̀ lwɛlɛ rɛ́ tɛ̀bɛ́ Nətanya byǐ Yəsəmayəə twĩ̀ mú, ¹² bə byẽ̀ bə̀ lyì bí bə cĩ́ dwã yó, bə zɛ̃̀ bə̀ la vò bə bú ǹdə́ Nətanya byǐ Yəsəmayəə. Bə zə zə bə yí Gabaɔ̃ póló nánfɔ̀lɔ̀ w nyí ni. ¹³ Rə̀myɛ́ yó né, dwí rí rə̀ y’à ŋwɛ́nɛ́ ǹdə́ Yəsəmayəə mó gə́ j’a nə Karəya byǐ Yɔwatã ǹdə́ shə̀dɛ́ɛ́sɛ́ yó-cìnə́ bé bə̀ wɔ ń kwã nɛ́ mɔ́, dwí rí wu j’a zə nyàn ; ¹⁴ rə̀myɛ́ ce dwí lyì bí byɛ̀bɛ́ gakó bə̀ y’à zɔ yómə́ bə m’e vò Myəsəpa nɛ́ mɔ́ j’a k’a zhǐr bə vò Karəya byǐ Yɔwatã sõ. ¹⁵ Rə̀myɛ́ yó né, Nətanya byǐ Yəsəmayəə j’a dùr Karəya byǐ Yɔwatã yé né n vò Amɔ̃ byǎ bɛ́ sono. ¹⁶ Karəya byǐ Yɔwatã ǹdə́ shə̀dɛ́ɛ́sɛ́ yó-cìnə́ bé bə̀ ŋwɛ́nɛ́ ń kwã mɔ́ j’a zə dwí rí kùr ré bə zwẽ Nətanya byǐ Yəsəmayəə ń yà yà ń zɔ yómə́ mó jɔ̃̀ wa ; ń gə́ yà ń bú ǹdə́ Ayəkamɛ byǐ Gəgalya n gu mu Myəsəpa nɛ́ yi ní mú. Dwí rí lyì bí bə̀ zwẽ Esəmayəə jɔ̃̀ w mɔ́ y’à wɔ́ : bala bɛ́ byɛ̀bɛ́ bə̀ wɔ̌ búlə́ bə̀ bwí mú, ǹdə́ kana bɛ́ ǹdə́ bə̀sɔ́ná bɛ́ ǹdə́ pyɔ̌ kɛ̀lɛ́ tùntùnnə bé bə̀ y’à zə bə shí Gabaɔ̃ bə m’e kwɛ̃̀ bə bə̀ mɔ́ ; ¹⁷ wɔ́ lyì bí bə̀myɛ́ bə du bə kwè sɔ́má, bə vò vò bə yí bə zhì Cəmamɛ zúlə́ y jàà è bwə́l Bɛtɛlɛyɛm nyí mú wə, sə bə m’e zhǐr bə vò Ezhibti ; ¹⁸ bə̀ Nətanya byǐ Yəsəmayəə gə́ gu Ayəkamɛ byǐ Gədalya mɔ́, Babyəlɔnɛ pyɔ̌ mɔ́ y’ǎ ce ń cǐ bí mú ce ywẽ zhe be, bə zɛ̃̀ bə̀ n’ê dùr Kalədɛ lyì bí yé né, lò mó mɔ̀bɔ́ Babyəlɔnɛ pyɔ̌ vùr ń cǐ tənà y mɔ́ gu mú yilə.