¹ Rəmyɛ́ yó né, shə̀dɛ́ɛ́sɛ́ kùkùlə̀ né gakó yó-cìnə́ bé, Karəya byǐ Yɔwanã ǹdə́ Oshaya byǐ Azarəya, ǹdə́ dwí rí gakó, rə̀ bə̀sɔ́ná ǹdə́ rə̀ náncɛrh ga, zɛ̃̀ bə yí ² nyì-zwennə Zheremyi nyí ni, bə wɔ̀ mɔ : Nyǐ wɔ́ tú nə́ tú nə́ la mɔ́ lwə̌l, sə́ shɛ̀nɛ́ ń wɛ̀rhɛ́ kɔn rɛ́ tɛ̀bɛ́ nə́ la mɔ́ lwə̌l mó ! Zə Bə-zho-zhe ǹ Yi rí cã̌ nɛ nə́myɛ́ màngɛlɛ́ y nə̀ dàl mɔ́ yilə ; nə́ y’ǎ wɔ́ lyì nánjə̀jóló, sə nyǐ nə́ dàl nunə màngɛlɛ́ nə́ ŋwɛ́nɛ́ ǹdə ǹ gə́ nə nə́ba nɛ́. ³ Lwə̌l Bə-zhɔ-zhe ǹ Yi rí ni, bə̀ rə̀ byili nə́ba sɔ́má kɛ̀bɛ́ nə́ b’ǎ tó, ǹdə́ kɔn rɛ́ dɛ̀bɛ́ nə́ mə̌ sə nə́ wɛ̀rhɛ́ mɔ́. ⁴ Nyì-zwennə Zheremyi lyár bɛ n wɔ̀ : À nyɛ̌ ! Nyǐ-nə à m’a zə Bə-zhɔ-zhe nə́ Yi rí cã̌ nɛ kɔn rɛ́ dɛ̀bɛ́ á byili b’a lwə̌l mo mó yilə, à gə lwə̀l mo à zhɛ̀, à m’a zɛ̃̀ a byili ába kɔn rɛ́ dɛ̀bɛ́ Bə-zhɔ-zhe la ába lyár mɔ́, à t’â la ába kaka shòò yé. ⁵ Bə̀myɛ wɔ̀ Zheremyi ni : Nə́ gə yə̀ kɔn rɛ́ dɛ̀bɛ́ Bə-zhɔ-zhe ǹ Yi rí la mɔ́ byilu bə̀ ǹ byili nə́ba nə́ wɛ̀rhɛ́ mɔ́ wɛ̀rhɛ́ ; sə Bə-zhɔ-zhe yə̀ kɔn rɛ́ dɛ̀bɛ́ nə́ zɔ̀m mɔ́ zhə̀n-cínnə páá n pə nə́ba dóó ! ⁶ È gə wɔ́ cɛ̀nɛ̀ ráá lwɛlɛ myɛ, nə́ b’ǎ wɛ̀rhɛ́ kɔn rɛ́ dɛ̀bɛ́ Bə-zhɔ-zhe nə́ Yi rí nə́ twĩ̀ mú rə̀ sõ mó mó gə́ byili ní mú, mùnì ga nə́ yə̀ wu-nyɔ̃̀ cìnə́ ǹdə́ nə́ wɛ̀rhɛ́ ǹdə Bə-zhɔ-zhe nə́ Yi rí gə́ byili mí. ⁷ È dwã shí rə̀myɛ́ kwã nɛ́, Bə-zhɔ-zhe zɔ̀m ǹdə́ Zheremyi. ⁸ Zheremyi zɛ̃̀ n byẽ̀ Karəya byǐ Yɔwamã ǹdə́ shə̀dɛ́ɛ́sɛ́ yó-cìnə́ bé byɛ̀bɛ́ gakó bə̀ y’à ŋwɛ́nɛ́ ǹdə́ mɔ mɔ́ e súlí dwí rí lyí bí gakó, rə̀ bə̀sɔ́ná ǹdə́ rə̀ náncɛrh ga, ⁹ n wɔ̀ bɛ : Èlǎsɛ̃́, nyǐ-nə, Bə-zhɔ-zhe, Esərayɛl Yi, á twĩ́ ni rə̀ sõ mó nyí rí rə̀ pɔ á lwə̌l mó á byili ni b’a lwə̀l ré mó yil mó ; Rə̀ wòwə̀ : ¹⁰ Á gə mɛ̃ tənà y kɛ̀bɛ́ wẽ́, s’á yẽ̌ bə̀ à m’a k’a ce á jòm è wẽ́, à t’â la ába zhìlù yé, à m’a zhele ába ǹdə cǒ ta, à t’â la ába mǔr yé ; bə̀ à wu zhìlì lwɛlɛ rɛ́ tɛ̀bɛ́ à wɛ̀rhɛ́ ába mɔ́ yilə. ¹¹ Á bə̀k’á dùr Babyəlɔnɛ pyɔ̌ mɔ́ ń ywẽ ré zhe ába mɔ́ ywẽ kə́dò yé. Á bə̀k’á dùr ń ywẽ yé, nyǐ-na à ŋwɛ́nɛ́ ǹd’ába à la ába vwǎrh ; wɔ́ Bə-zhɔ-zhe ń zɔ̀m rə̀myɛ́. ¹² À m’a ce n wɛ̀rhɛ́ wu-bɔ̀nɔ̀ ǹd’ába, n dùr á nɔ̀nɔ̀, n yẽ̌ ába á jòm á tənà y wẽ́. ¹³ Sə á gə yə̀ wɛ̀rhɛ́ ǹdə Bə-zhɔ-zhe, á Yi rí gə́ n’ê byili ní, ¹⁴ á zɛ̃̀ á zhe : ɔ̃́’ɔ̃ ! Nə́ t’á la tənà y kɛ̀bɛ́ w mãɔ̃ yé, , nə́ m’a vò Ezhibti tənà wa, bə̀ nə́ t’á la búlə́ nɔ gàà mɔ́ yé, nə́ t’á la búlə́ pɔ́lá cəl myɛ nyɔ̀ɔ̀ mɔ́ yé, nə́ t’á la búrú mùrù nə́ dɔ̃̀ gàà mɔ́ yé, wɔ́ gàà mɔ́ nə́ m’ǎ vò nə́ jòm né. ¹⁵ Ámyɛ̌, Zhidə lyì bí kùr ré rə̀ dàl mɔ́, lwar-na, bə̀ kɔn gə yàl èta, cili-nə Bə-zhɔ-zhe, á Yi rí rə̀ cǐ jàn cìnə́ bé gakó gə́ zɔ̀m nɛ́, ń wòwə̀ : À gə k’a kwɛ̃̀ á vò Ezhibti, á jòm gàà mɔ́, ¹⁶ sə́ nyǐ búlə́ shù w á kwàl mɔ́, b’a kà ába Ezhibti tənà y w gàà mɔ́, nɔrh mɔ́ mə̀ ywẽ zhe ába mó, b’a zə ába Ezhibti ní gàà mɔ́, sə á m’a cì gàà mɔ́. ¹⁷ Lyì bí byɛ̀bɛ́ gakó bə̀ k’a la kwã̀ɔ̃̀ bə vò bə jòm Ezhibti ní mú, búlə́ shù b’a gu bí, nɔrh ǹdə́ címí námməlwɛ̀lɛ́ m’a gu bi, bə̀ t’â la dǔr bə lú zwini rí tɛ̀bɛ́ à la ce rə bə̀ rə jòm bə̀ yó mó yé né yé. ¹⁸ Bə̀ nyǐ wɔ́ Bə-zhɔ-zhe, Esərayɛl Yi rí rə̀ cǐ jàn cìnə́ bé gakó mó ń pɔ nyí rə̀myɛ́ mɔ́ n wɔ̀ : Á gə zhə̀l Ezhibti yə́, sə́ nyǐ à m’a ló à lyi-shùùrí á yó, ǹdə à gə́ ló re Zhərəzalɛm lyì bí yó né tá : á jǐrh pwarha kɔn lò gə nɔ ába wu-zɛ̃̀ɛ̃́ nánfɔ̀lɔ̀ zhe mo, á jǐrh kɔn dɛ̀bɛ́ bwəl námməlwɛ̀lɛ́ dɛ̃, ráá kɔn dɛ̀bɛ́ tùùrhi dɛ̃ bə̀ n’ê tùrhə̀, á yírh k’ê t’â la jàà y kɛ̀bɛ́ yó jǒm gaga yé. ¹⁹ Zheremyi kə́ n wɔ̀ : Ámyɛ̌ Zhidə lyì bí kùr ré rə̀ dàl mɔ́, nyǐ-nə Bə-zhɔ-zhe nə́ ń wə̀l ába : Á bə̀k’á vò Ezhibti y yé ! Lwar-na, bə̀ zà dɛ̃ rɛ́, à n’â cẽ, bə̀k’á vò yé. ²⁰ Nyǐ-na, ámyɛ̌ cìcì mú dó á yé, á gə́ zɛ̃̀ á twĩ̀ ni Bə-zhɔ-zhe sõ á wɔ̀ : Zhəl ń zə Bə-zhɔ-zhe cã̌ nɛ nə́ yil n wɔ̀ : sə kɔn rɛ́ dɛ̀bɛ́ Bə-zhɔ-zhe byili mú mú, sə́ k’á bə̀ ń byili nə́ba kɔn rɛ́ dɛ̀bɛ́ Bə-zhɔ-zhe nə́ Yi rí byili mú mú ; nyǐ nə́ b’a zwẽ zɔ̀mɛ̀ rɛ́ tɛ̀bɛ́ ń byili mú nyí. Wɔ́ á gə́ kwè nyí rí rə̀myɛ́ mɔ́ è ce á dwĩ̀ á cìn èta mɔ́. ²¹ À zɔ̀m ǹd’ába zà, sə á yə̀ Bə-zhɔ-zhe, nə́ Yi rí zɔ̀mɛ̀ rɛ́ cili yé, á yə̀ nyí rí tɛ̀bɛ́ ń pɔ nɛ b’à byili ába mɔ́ myɛ zwẽ yé. ²² Rə̀myɛ́ ce, èlǎsɛ̃́, lwar-na, bə̀ b’a zə búlə́ shù bə gu ába, nɔrh ráá címí námməlwɛ̀lɛ́ m’a gu ába jàà y kɛ̀bɛ́ á n’á yǎl á vò á jòm è wẽ́ mó wẽ́.