¹ Zheremyi gə́ tú n byili dwí rí gakó ni zɔ̀mà nɛ́ nyɛ̀bɛ́ gakó Bə-zhɔ-zhe bə̀ Yi rí yà ń byili mu bə̀ ń byili mú n zhɛ̀, ² rə̀myɛ́ yó né, Oshaya byǐ Azarəya byǐ Yɔwanã ǹdə́ cìn-byilu cìnə́ bé gakó j’a lyár Zheremyi bə wɔ̀ : Nyǐ wɔ́ kɔma ǹ nə́ ǹ gòmə̀. Bə-zhɔ-zhe nə́ Yi rí yə̀ mɔ́ twĩ̀ bə̀ ǹ zhəl ń wɔ̀ nə́ba : Á bə̀k’á vò Ezhibti yé. ³ Nyǐ wɔ́ Nərəya byǐ Bəruuci ń nə́ ń cìrh mó ń ce né, mùnì ga n zə nə́ba n pə Kalədɛ lyì bí ni bə gu ráá bə zə nə́ba bə vò yóm re Babyəlɔnɛ nɛ nɛ́. ⁴ Sə Karəya byǐ Yɔwanã, ǹdə́ shə̀dɛ́ɛ́sɛ́ yó-cìnə́ bé, ǹdə́ lyì bí byɛ̀bɛ́ bə̀ y’à ŋwɛ́nɛ́ bɛ mɔ́, mə̀dù ga yə̀ Bə-zhɔ-zhe mó ń byili bi bə̀ bə̀ mɛ̃ Zhidə tənà y w mɔ́ zɔ̀mà nɛ́ cili yé. ⁵ Karəya byǐ Yɔwanã, ǹdə́ shə̀dɛ́ɛ́sɛ́ yó-cìnə́ bé gakó zə Zhidə lyì bí byɛ̀bɛ́ bə̀ y’à jì bə làà tənèsé wẽ́ mó, bə zɛ̃̀ bə k’a kwɛ̃̀ bə bə̀ b’e jě Zhidə né mó kùr ré bə m’e lyɛ̃ : ⁶ È y’à wɔ́ bala ǹdə́ kana ǹdə́ bə̀sɔ́ná ǹdə́ pyɔ̌ bə̀kwá e súlí lyì byɛ̀bɛ́ gakó pyɔ̌ mɔ́ yìlnə bé yó-cə́bal Nəbəzaradã yà ń pɔ Ayəkamɛ byǐ Gədalya, Shafa nɔ̃̌ w nɛ mɔ́ ; bə súlí bə zə nyì-zwennə Zheremyi ǹdə́ Nərəya byǐ Bəruuci bə m’e lyɛ̃ ; ⁷ bə j’a cẽ bə̀ yə̀ Bə-zhɔ-zhe zɔ̀mɛ̀ rɛ́ cili yé, bə du bə̀ la Ezhibti tənà y wa, bə zə zə bə yí Təpənɛɛsɛ. ⁸ Bə-zhɔ-zhe zɛ̃̀ n zɔ̀m ǹdə́ Zheremyi Təpənɛɛsɛ nɛ́ n wɔ̀ : ⁹ Pwà nə́kulə nánfwààlɛ màngɛlɛ́ ń vò ń shèè ń gwàr gɔ́rɔ́ bo-kwá bɛ́ bə̀ shɛ̃ bə̀ pyě dwã yó pyɔ̌ Faraɔ̃ jì y è ŋwɛ́nɛ́ Təpənɛɛsɛ nɛ́ mɔ́ étwí-ènyí rí ni mú wẽ́ ń ce tɛ̃́, Zhwifu lyì bí yírh wə. ¹⁰ Sə́ zɛ̃̀ ń wɔ̀ Zhwifu lyì bí ni : Bə̀ nyǐ Bə-zhɔ-zhe, Esərayɛl Yi rí zɔ̀m èta rə wɔ̀ : Nyǐ-nə, à m’a twĩ̀ bə vò zə à tùntùnnə Babyəlɔnɛ pyɔ̌ Nabəkɔdɔnɔzɔɔrɛ n bà, a cĩ́ ń pyɛ̀lɛ̀ də̀gwã́ y nə́kulə né nyɛ̀bɛ́ à shèè tɛ̃́ nyɔ̀nɔ̀ mɔ́ yó, n pú ń pyɛ̀lɛ̀ kòrhó w n mə n kə́kɛ́lɛ́ nɛ. ¹¹ Ń mà n bə̀ n bú ǹdə́ Ezhibti tənà y lyì bí ; n gu byɛ̀bɛ́ bə̀ mə̌ ǹdə́ cu mú, n zə byɛ̀bɛ́ bə̀ mə̌ ǹdə́ yómə́ mó, bə vò yóm re jè, n gu byɛ̀bɛ́ bə̀ mə̌ ǹdə́ búlə́ shù gu mú, n gu ǹdə́ búlə́ shù ! ¹² À m’a ji Ezhibti tənà y jìsí myǐn ; Nabəkɔdɔnɔzɔɔrɛ m’a n ji si myǐn, n pwà bə̀ yə né n mə n lyɛ̃, n zù Ezhibti tənà y w n kɔkɔlɛ è wẽ̀ ré kókó ǹdə vwã̌-ènɔ̀n gə́ y’a jɛ́rhɛ́ sherh shɛ̀bɛ́ sə̀ wɔ ń kàmə̀zwǐ w sə̀ n’ê lyɛ̀ɛ̀ mɔ gakó n dwĩ̀ ta nɛ́, fòró n zɛ̃̀ n du tənà y w gàà mɔ́ ǹdə́ yə̀-zùlə́. ¹³ Ń mà n mà nə́kulə né bə̀ shə̀l ǹdə yə ta Yələyopoliisi cɔ w Ezhibti tənà y mɔ́ n yəwɛlɛ, n súlí n ji Ehzibti tənà y yə né jìsí myǐn.