¹ Bə-zhɔ-zhe zɔ̀m ǹdə́ Zheremyi, Zhidə lyì bí byɛ̀bɛ́ gakó bə̀ y’à jě Ezibti tənà y wa, ǹdə́ Myəgədɔl nɛ́ ǹdə́ Təpənɛɛsɛ nɛ́ ǹdə́ Məfyiisi ní ǹdə́ Patərɔɔsɛ nɛ́ mɔ́ nyí rí w mú gakó n wɔ̀ : ² Nyǐ-nə kɔn rɛ́ dɛ̀bɛ́ Bə-zhɔ-zhe, Esərayɛl Yi rí rə̀ cǐ jàn cìnə́ bé gakó mú, zɔ̀m èta n wɔ̀ : Á yírhə́ nɔ zwini rí tɛ̀bɛ́ gakó à ce rə jòm Zhərəzalɛm lyì bí ǹdə́ Zhidə cɛmɛ nɛ́ lyì bí gakó yó mɔ́ ; nyǐ kɔn gə́ wɔ́ nɛ́ zà zà, bə̀ cɛmɛ nɛ́ k’ê tɛ̀nɛ́ nɛ́ yé, nə̀ jǐrh jə̀-bwə̀r dúdú, numbyíní də́-byǐ tɛ̀nɛ́ nə̀ wẽ́ yé, ³ sə wɔ́ bə̀ wu-bárhɛ́ tumə né bə̀ twĩ̀ bə m’e zɛ̃̀ à lyim ni mú yilə ; bə̀ cɛmɛ nɛ́ lyì bí gə́ ju wẽ̀ rə̀ lwẽ́ nã́nyə̀nyɛ̀lɛ́ myǐn bə m’e cèrhé yə dwã nyɛ̀bɛ́ bə̀ yə̀l nə̀ párá, ámyɛ̌ ǹdə́ á námbala bɛ́ myɛ yə̀ nə̀ pár lwar mɔ́ yilə. ⁴ Cə-kɔ́lɔ́ gakó, à twĩ̀ à tùntùnnə bé gakó, à nyì-zwennə bé á sono, bə̀ bə̀ wál ába : Bə̀k’á wɛ̀rhɛ́ pwarha tumə né à súl mó yé. ⁵ Sə bə̀ yə̀ cili yé, bə̀ yə̀ bə̀ zhɛ̃̌ pul bə cili yé, bə̀ yə̀ bə̀ wu-bárhɛ́ tumə né ne yẽ̌ yé, bə̀ yə̀ wẽ̀ ré rə̀ lwẽ́ nã́nyə̀nyɛ̀lɛ́ y ju e m’e cèrhé yə né dwã bɛ́ nɛ mɔ́ nɛ yẽ̌ yé. ⁶ Wɔ́ rə̀myɛ́ è ce à lyim rí j’a zɛ̃̀ dɛ̃́dɛ̃́ kɔn lyɛ̃ cɛ nɛ rə kwɛ̃́ Zhidə cɛ̀mɛ nɛ́ ǹdə́ Zhərəzalɛm sɔ́msɛ́ nɛ ǹdə myǐn ta : cɛmɛ nɛ́ ǹdə́ sɔ́msɛ́ jǐrh ji-bwə̀r ǹdə́ whu-zhìlù jààsɛ ǹdə kɔn gə́ wɔ́ nɛ́ zà nɛ́ mɔ́ ! ⁷ Sə èlǎsɛ̃́, Bə-zhɔ-zhe, Esərayɛl Yi rí rə̀ cǐ jàn cìnə́ bé gakó mó, nə́ ń zɔ̀m ń zhe : È nə wɔ́ kə̀kɔ́n yil á n’á wɛ̀rhɛ́ lwɛlɛ rɛ́ nánfɔ̀lɔ̀ w kɔ̀bɔ́ gakó á cìn ni, á la ce bala ǹdə́ kana ǹdə́ bə̀sɔ́ná ǹdə́ byì-shɛ̌msɛ cì sə jé tɛ̃́ Zhidə cəcəl w numbyíní də̀-byǐ t’â la dǎl á wẽ́ mɔ́ ? ⁸ Wɔ́ bə̀kɔ́n yil á j’á n’á zə á jɛ̀rh wẽ̀ ré á n’á zwìrhì mú á m’a zɛ̃̀ à lyim ni, á n’á ji wẽ̀ rə̀ lwẽ́ nã́nyə̀nyɛ̀lɛ́ myǐn á m’a cèrhé yə dwã Ezhibti tənà y á tú á jě è wẽ́ mó w mó, èta á m’a ce á yò zhìlì, á jǐrh bwəl námməlwwɛ̀lɛ́ kɔna ǹdə́ cìzhìl kɔna, lũ w tənèsé púlə́púlə cəcəl wə. ⁹ Á nə j’á swě tũ̀-bəywààlɛ́ á dabá twĩ̀ mú, Zhidə pyǎ bɛ́ twĩ̀ mú, bə̀ kana bɛ́ twĩ̀ mú ; tũ̀-bəywààlɛ́ ámyɛ cìcì mú ǹd’á kana bɛ́ twĩ̀ Zhidə tənà y wa, ǹdə́ Zhərəzalɛm sɔ́msɛ́ yó mó yò nà ? ¹⁰ Ǹdə́ rə̀myɛ́ ga, bə̀ yə̀ bə̀ cìn tɛ̃́ lwəl kɔn m’e yí zà dɛ̃ rɛ́, bə̀ yə̀ ywẽ dùr yé, bə̀ yə̀ wɛ̀rhɛ́ ǹdə à nyə́ né ǹdə́ à sɔ́msɛ́ à byili ámyɛ̌ ǹdə́ á nàmbala bɛ́ nɛ mɔ́ gə́ n’ê byili ní yé. ¹¹ Wɔ́ rə̀myɛ́ è ce Bə-zhɔ-zhe, Esərayɛl Yi rí rə̀ cǐ jàn cìnə́ bé gakó mó, zɔ̀m èta n wɔ̀ : Nyǐwé, à m’a zhízhílí à kwã a zǎ ába, a wɛ̀rhɛ́ ába lwɛlɛ, a ce Zhidə lyì bí púlə́púlə́ jé tẽ́. ¹² À m’a zə Zhidə lyì bí kùr ré dàl mɔ́, byɛ̀bɛ́ bə̀ zɛ̃̀ bə nyɛ́ɛ́ jàn bə cẽ bə̀ la dùr bə̀ vò bə jòm Ezhibti tənà y w mɔ́ ; cìnə́ nábá lwar bə̀ bə̀ gakó m’a cì Ezhibti tə̀nà y wa ; nɔrh ǹdə́ búlə́ shù m’a gu bí gàà : nɔrh ǹdə́ búlə́ shù rə̀ m’a gu bə̀ gakó gàà mɔ́, bə̀ nə̀mwà ǹdə́ bə̀ nə̀cə̀nà ga. Bə̀ b’a jǐrh pwarha ǹdə́ wu-zhìlù nánfɔ̀lɔ̀ kɔna, bə̀ jǐrh bwəl námməlwɛ̀lɛ́ lyì ǹdə́ tùùrhì lyì. ¹³ À m’a pə còrhò-tum byɛ̀bɛ́ bə̀ la dǔr bə̀ vò bə̀ jòm Ezhibti ní mú ǹdə à gə́ zɔ búlə́ shú ǹdə́ nɔrh ǹdə́ címí námməlwɛ̀lɛ́ a m’a pə còrhò-tum rí Zhərəzalɛm lyì bí ni ní ta. ¹⁴ lò lò tá ń la lú yé, lòlò tá ń la dǎl ǹdə́ ń yírhə́ Zhidə lyì bí kùr ré rə̀ dùr rə bə̀ rə̀ jě Ezhibti ní mú wẽ́ yé ; bə̀ lòlò tá ń la kwã̀ɔ̃̀ n bə̀ Zhidə tənà y wa, ǹdə́ è gə də̀ lyì màngɛlɛ́ byɛ̀bɛ́ bə̀ la dǔr bə lú mú dúdú sásá. ¹⁵ Rə̀myɛ́ yó né, bala bɛ́ byɛ̀bɛ́ bə̀ yě bə̀ bə̀ kana bɛ́ n’ê ji wẽ̀ ré rə̀ lwẽ́ nã́nyə̀nyɛ̀lɛ́ y bə̀ m’e cèrhé yə́ né dwã bɛ́ mɔ́, ǹdə́ kana bɛ́ nánzhəzhɔ̌ w byɛ̀bɛ́ gakó bə̀ y’à ŋwɛ́nɛ́ gàà mɔ́ mɔ́, ǹdə́ dwí rí púlə́púlə́ tɛ̀bɛ́ rə̀ y’à ŋwɛ́nɛ́ Ezhibti tənà y w Patərɔɔsɛ nɛ́ mɔ́, zɛ̃̀ bə lyár Zheremyi bə wɔ̀ : ¹⁶ Nyǐ nə́ t’á la zɔ̀mà nɛ́ nyɛ̀bɛ́ ǹ byili nə́ba Bə-zhɔ-zhe yil ré yil mó rə̀dù ga zõ yé. ¹⁷ Sə nə́myɛ̌ wɔ́ kɔn rɛ́ dɛ̀bɛ́ nə́ zɔ̀m ǹdə́ nə́ cìcì nyí rí mú nə́ n’é yǎl nə́ wɛ̀rhɛ́ ; wɔ́ e ji wẽ̀ ré rə̀ lwẽ́ nã́nyə̀nyɛ̀lɛ́ y myǐn nə́ m’é cèrhé kɛ̃ mɔ́ ń wɔ́ pyɔ̌ dɛ̃̌ yi w mú, nə́ ló də̀vɛ̃́ tɛ̃́ kɛ̃ mɔ́ ń wɔ́ pyɔ̌ dɛ̃̌ yi w mù yilə ; ǹdə nə́ dabá ǹdə nə́ pyǎ bɛ́ ǹdə nə́ yé né cìnə́ bé gə́ wɛ̀rhɛ́ nɛ́ Zhidə cɛmɛ nɛ́ wẽ́ ǹdə́ Zhərəzalɛm sɔ́msɛ́ yó, kɔn m’e yí zà mɔ́ nɛ́ ; rə̀myɛ́ mɔ́ ce, nə́ y’ǎ n’é nɛ kùjú nə́ jí nə́ swí, nə́ y’ǎ zhe wu-nyɔ̃̀, nə̀ y’ǎ yə̀ nwɛ̀nɛ̀ gaga yé. ¹⁸ Sə nyǐ nə́ gə́ tú nə́ yẽ̌ wẽ̀ ré rə̀ lwẽ́ nã́nyə̀nyɛ̀lɛ́ y zə nə́ m’é cèrhé kɛ̃ mɔ́ ń wɔ́ pyɔ̌ dɛ̃̌ yi ri w mú ni mú, ǹdə́ də̀vɛ̃́ tɛ̃́ ló ń yil yil mó gakó ne mó kwã nɛ́, kɔn gakó j’a mùrì nə́ba, búlə́ shù ǹdə́ nɔrh zɛ̃̀ rə̀ gu nə́ba. ¹⁹ Kana zɛ̃̀ bə wɔ̀ : Nə́myɛ̌ nə gə́ y’ǎ n’é ji wẽ̀ ré rə̀ lwẽ́ nã́nyə̀nyɛ̀lɛ́ y myǐn nə́ súlí nə́ n’é lwé də̀vɛ̃́ y tɛ̃́ nə́ m’é cèrhé kɛ̃ mɔ́ ń wɔ́ pyɔ̌ dɛ̃̌ yi w mú, Kɔn nə y’à də̀ nə́ byə́nə́ bé pùbùlə̀ nə́ m’é tɛnɛ búúrí rə̀ wɔ́ kɛ̃ mɔ́ ń wɔ́ pyɔ̌ mɔ́ nyɔrhɔ w mɔ́ ; ǹdə́ də̀vɛ̃́ y nə́ y’ǎ n’é lwẽ́ tɛ̃́ mɔ́ nà ? ²⁰ Rə̀myɛ̀ yó né, Zheremyi zɛ̃̀ n wɔ̀ dwí rí gakó ne ; bala bɛ́ ǹdə́ kana bɛ́ ǹdə́ lyì bí byɛ̀bɛ́ gakó bə̀ lyár mɔ, lyə́lyɛ́rɛ́ y èmyɛ́ mɔ́ nɛ n wɔ̀ : ²¹ Bə-zhɔ-zhe nə yə̀ lyǐrh, ń yə̀ tɛ́rɛ́ wẽ̀ ré rə̀ lwẽ́ nã́nyə̀nyɛ̀lɛ́ y á y’ǎ ju myǐn Zhidə cɛmɛ nɛ́ ǹdə́ Zhərəzalɛm sɔ́msɛ́ yó ámyɛ̌ ǹdə́ á dabá ǹdə́ á pyǎ bɛ́ ǹdə́ á yé né cìnə́ bé ǹdə́ tənà y kɛ̀bɛ́ dwí rí yò lyǐrh nà ? ²² Á wu-bárhɛ́ tumə né ǹdə́ á pwarha tumə né ce Bə-zhɔ-zhe yə̀ pyɛ́nɛ́ n zwẽ re yé ; wɔ́ rə̀myɛ́ è ce, á tənà y jǐrh jì-bwə̀r, gɔ-elũ èpòlò, bwəl námməlwɛ̀lé kɔn, ǹdə lyì bí gə́ nə w nɛ́ zà zà nɛ́ mɔ́ ta. ²³ Bə̀ á ju wẽ̀ rə̀ lwẽ́ nã́nyə̀nyɛ̀ɛ́ myǐn a m’á gwar Bə-zhɔ-zhe, bə̀ á yə̀ ń zɔ̀mà nɛ́ cili yé, à yə̀ ń nyə́ né zwẽ yé, à yə̀ ń sɔ́msɛ́ tó yé, wɔ́ rə̀myɛ́ è ce, zwini rí tɛ̀bɛ́ yí ába ǹdə lyì bí gə́ nə nɛ́ zà zà nɛ́ mɔ́ ta. ²⁴ Zheremyi kə́ n wɔ̀ dwí rí ǹdə́ kana bɛ́ gako ne : Ámyɛ̌ Zhidə lyì bí byɛ̀bɛ́ á ŋwɛ́nɛ́ Ezhibti tənà y w mɔ́, cili-nə Bə-zhɔ-zhe zɔ̀mɛ̀ rɛ́ ń la ába byilu mú ! ²⁵ Nyǐ-nə Bə-zhɔ-zhe, Esərayɛl Yi rí rə̀ cǐ jàn cìnə́ bé gakó mó wòwə̀ : Nyǐ ámyɛ̌ ǹdə́ á kana bɛ́ byili bə̀ á m’ǎ zə á jɛ̀rh á wɛ̀rhɛ́ kɔn rɛ́ dɛ̀bɛ́ á cìcì mú púr á nyú w á n’á zɔ̀m mɔ́ á zhe : Nə́ n’é yǎl nə́ pyìrh kɔn rɛ́ dɛ̀bɛ́ nə́ bwəl nyí bə̀ nə́ la pɔ mɔ́, kɔn rɛ́ rə̀myɛ́ mɔ́ wɔ́ ; e ji wẽ̀ rə̀ lwẽ́ nã́nyə̀nyɛ̀lɛ́ myǐn e pə kɛ̃ mɔ́ ń pyɔ̌ dɛ̃̌ yi w mú ni mú, e ló də̀vẽ́ tɛ̃́ ń yil yil mó. Èlǎsɛ̃́, á gə́ pyìrh kɔn rɛ́ dɛ̀bɛ́ á bwəl nyí bə̀ á la pɔ mɔ́ á zhɛ̀ mɔ́, j’á pyìrh á nyí rí á bwəl mó. ²⁶ Ámyɛ̌ Zhidə lyì bí byɛ̀bɛ́ gakó á ŋwɛ́nɛ́ Ezhibti tənà y w mɔ́, cili-nə, Bə-zhɔ-zhe zɔ̀mà nɛ́ ń la zɔ̌m mɔ́ : Nyǐ à n’â zə à yil ré nánfɔ̀lɔ̀ w à bwəl nyí, wɔ́ Bə-zhɔ-zhe ń zɔ̀m rə̀myɛ́, nyǐ Zhidə lò mə̀dù ga kə́ ń tá ń la à yil ré byõ̌ ń nyú w yé ; sə bə̀myɛ́ mə̀dù ga tá ń la zhì Ezhibti tənà y nyí rí púlə́púlə́ wẽ́, n wɔ́ : «Cǐnə, Bə-zhɔ-zhe mó wɔ́ nã́nyì» yé ! ²⁷ Nyǐ à yírhə́ m’a j’â pyǎ bə̀ yó, s’e də̀ bə cɛ̀nɛ̀ wɔ̀rhɔ́ yil yé, wɔ́ bə̀ lwɛlɛ wɔ̀rhɛ́ yilə ; sə bala bɛ́ byɛ̀bɛ́ gakó bə̀ ŋwɛ́nɛ́ Ezhibti tənà y w mɔ́, wɔ́ búlə́ shù ǹdə́ nɔrh rə̀ m’à n’ê gwi bi, kɔn vò e yí bə̀ gakó jé tɛ̃́. ²⁸ Sə lyì bí màngɛlɛ́ y byɛ̀bɛ́ bə̀ la ŋwɔ̀nɔ́ bə dùr bə lú búlə́ sú w yé né Ezhibti tənà y w bə k’a kwɛ̃̀ bə bə̀ Zhidə tənà y w mɔ́, bə̀myɛ́ byɛ̀bɛ́ bə̀ tú bə̀ jòm Ezhibti tanà y w mɔ́, b’a lwar ǹdə́ è gə wɔ́ àmyɛ́ zɔ̀mɛ̀ rɛ́ rə̀ pyìh ráá bə̀myɛ́ zɔ̀mɛ̀ rɛ́ rə̀ pyìrh. ²⁹ Nyǐ nyɔrhɔ òdù Bə-zhɔ-zhe byili bə̀ á m’a tó ò dɛnnɛ á lwar b’à la ába còrhò-tùm pɔ jàà y kɛ̀bɛ́ wẽ́ mó, mùnì ga á lwar bə̀ à zɔ̀mà nɛ́ à zɔ̀m a byili zwini rí rə̀ la á yó jǒm mó la pyǐrh mó. ³⁰ Nyǐ Bə-zhɔ-zhe nə́ ń wə̀lə̀ : Nyǐ-nə, à la Ezhibti pyɔ̌ Faraɔ̃ Ofəra zal a ce à zwə̀ bé jɔ̃̀ wa, à zwə̀ bé byɛ̀bɛ́ bə̀ n’ê pyà ń gu mú jɔ̃̀ wa, ǹdə à gə zɔ Zhidə pyɔ̌ Sədəcaasɛ a ce Babyəlɔnɛ pyɔ̌ Nabəkadɔnɔzɔɔrɛ mɔ́ mɔ̀bɔ́ ń yà ń nə́ ń pyǎ ń gu mú jɔ̃̀ w nɛ́ ta.