¹ Rə̀myɛ́ yi rí gə yú wə́, bə̀ m’a vùr Zhidə pyǎ bɛ́ kúr rí, bə vùr yó-cìnə́ bé búr rí, bə̀ vùr vwĩ̀-zwə́lnə bé kúr rí, bə vùr nyì-zwennə bé kúr rí ǹdə́ Zhərəzalɛm cɔ w lyì bí kúr rí lù-bɔ̀là bɛ́ wẽ́. ² Bə̀ kwè re bə ləlɛɛ tɛ̃́ nə̀nyɛ́nɛ́ kwã, cã̀-pwã̀ kwã, ǹdə́ càmə́sɔ̌sɛ́ shɛ̀bɛ́ gakó bə̀ swéné mó, bə twĩ̀ sə̀ yil mó, bə tó sə̀ gə́ n’ê yǎl nɛ́ mɔ́, bə dùr sə̀ kwã nɛ́ mɔ́, rə̀myɛ́ tɛ̀bɛ́ bə̀ wùlì tɛ̃́ rə̀ yé né bə cèrhé re mó ; bə̀ m’a ləlɛɛ bə̀ kúr rí tɛ̃́ rə̀myɛ́ mɔ́ gakó yé né ; bə̀ k’ê t’â la rɛ pwǎ bə ce lú-bɔ̀là w yé, bə̀ m’a yẽ̌ re tɛ̃́ cɛ y yó, rə̀ jǐrh ǹdə pùlú ta. ³ Dwí rí tɛ̀bɛ́ èta mɔ́, rə̀ n’ê twĩ̀ lwɛlɛ rɛ́ mɔ́, rə̀ lyì bí kùr rí rə̀ la dǎl mɔ́ ; cɛmɛ nɛ́ nyɛ̀bɛ́ à la bɛ jǔ a ce bə vò nə̀ wẽ́ mó w mó, rə̀ m’a zhì gàà mɔ́ rə pyà cu cɔ̃̀ è yə̀ nɛ́ cɛ yó, wɔ́ Bə-zhɔ-zhe ń zɔ̀m. ⁴ Zɔ̌m ǹdə́ bɛ n wɔ̀ : Nyǐ Bə-zhɔ-zhe nə́ ń zɔ̀m ń zhe : Lò nə y’ǎ tu tɛ̃́, ǹ kə́ ǹ tá ǹ zɛ̃̀ nà ? Lò nə y’ǎ dó ǹ sɔ́má shò, ǹ kə́ ǹ tá ǹ kwɛ̃̀ ǹ twí ǹ kwã nɛ́ nà ? ⁵ Sə è nə wɔ́ bə̀kɔ́n yil Zhərəzalɛm dwí rí tɛ̀bɛ́ j’a yẽ̌ rə̀ cìn ni rə̀ ŋwɛ́nɛ́ rə̀ jó sɔ́má y yó twéé twéé mó ? Bə̀ j’â wɔ bə̀ cìn jə́jɔ̀rɔ́ sɔ́má yó, bə̀ bə shɛ̀ bə̀ wun ní lyə́r mó. ⁶ Nyǐ à zhìlì à yala nɛ́ à n’â cili : Bə̀ t’â zɔ̀m ǹdə bə̀ gə́ y’à mə̌ dwã sə bə zɔ̀m nɛ́ yé ; lò mə̀dù ga wu t’a zhìlì ń lwɛlɛ rɛ́ yil yé, ń tá ń wə̀lə̀ : Wɔ́ bə̀kɔ́n à wɛ̀rhɛ́ myɛ yé ? Bə̀ gakó j’â wɔ́ ywə́l yó bə̀ ŋwɛ́nɛ́ bə̀ n’ê dùrə̀, ǹdə wɔ́ shəshã è n’ê dùr búlə́ bú ywə́l ta. ⁷ Nyǐ nə̀cə̃̌cóló yě yi rí tɛ̀bɛ́ ò mə̌ s’o lyɛ̃ o vò ò jààsɛ́ dwã bɛ́ wẽ́ mó párá ; épwèné ǹdə́ jíjílí ǹdə́ sə̀sɔ̀nɔ́ myɛ ga yě yi rí tɛ̀bɛ́ rə̀ mə̌ sə rə kwɛ̃̀ mɔ́ párá. Sə nyǐ à dwí rí yə̀l Bə-zhɔ-zhe nyə́ né pár yé. ⁸ Sə wɔ́ etər á nə́ m’a zɛ̃̀ á tó né á zhe : Nə́ zhe surhə, Bə-zhɔ-zhe nyə́ né ŋwɛ́nɛ́ ǹdə́ nə́ba mɔ́ ? Nyǐ wɔ́ nánfò yilə, sá-kanna mɔ́ nə́ ń lyɛ̀ɛ̀ ń cìn cɛ̀nɛ̀ ń zal kãɔ̃ dɛ̀bɛ́ ń mə́ ń kɛ̃. ⁹ Cìzhìl pú surhə cìnə́ bé, bə̀ wun gɔwa, bə̀ zɔ bɛ. Bə zhɔ̃̀ Bə-zhɔ-zhe zɔ̀mɛ̀ rɛ́, sə wɔ́ surhə dwí tɛ̌ bə̀ nə zhe ? ¹⁰ Wɔ́ rə̀myɛ́ yilə, à m’a pə bə̀ kana bɛ́ lyì dwã nɛ, a pə bə̀ cɛsɛ́ lyì dwã bə zwẽ se bə cìní. Bə̀ nyǐ kɔn j’a zhì bə̀ náncɛrh e m’e vò bə̀ bə̀sɔ́ná bɛ́, lũ w nə̀cɛ̀ndɛ́ pyǎ yò zù bi ; kɔn zhì nyì-zwennə bé e m’e yí vwĩ̀-zwə́lnə bé, bə̀ gakó wɔ́ yǔyǔ tumə bə̀ n’ê twĩ̀. ¹¹ Bə̀ t’â zal yə́-byĩ́ bə̀ m’ê dɛ à dwí rí bə̀kɔ́ mɔ́ nyəlɛ rɛ́ yé : bə̀ n’ê wə̀lə̀ : Yə̀-zùlə́ nwɛ́nɛ́ ! Yə̀-zùlə́ ŋwɛ́nɛ́ ! E jà yə̀-zùlə́ tɛ̀nɛ́ nɛ́ gaga yé. ¹² Nyǐ cìzhìl m’a pú bi, bə̀ bə̀ n’ê twĩ̀ pwarha tumə ; bə̀ yə̀l cìzhìl pár yé, cìzhìl t’â wɛ̀rhɛ́ bɛ kaka yé ; wɔ́ rə̀myɛ́ è ce, bə̀myɛ m’a tu tɛ̃́ ǹdə lyì bí dwã bɛ́ ta, à gə tú à pɔ bɛ còrhò-tum yí ní, bə̀ m’a tu tɛ̃́ bə byíbyílí, wɔ́ Bə-zhɔ-zhe ń zɔ̀m. ¹³ À n’â yǎl a cɔ̀ bə̀ yò w gakó, wɔ́ Bə-zhɔ-zhe ń zɔ̀m ; bə̀ k’ê t’â la də̀vɛ̃́ cèmé byǎ nɔ də́vɛ̃́ cǒ yó yé, èpyìlə́ k’ê t’â la nɔ épyìlú yó yé, rə̀ vɔr rɛ́ gakó m’a kù ; kɔn rɛ́ tɛ̀bɛ́ à y’à pɔ bɛ mɔ́ m’a jé tɛ̃́ bə̀ yé né. ¹⁴ Wɔ́ bə̀kɔ́n yil nə́ nə m’ǎ zɛ̃̀ nə́ jě tɛ̃́ ? Bà-nà dwã yó, nə́ lyɛ̃ nə́ vò cɛmɛ nɛ́ nə́ lù nə kə́kɛ́lɛ́ mɔ́ wa, nə́ vò nə́ cì gàà mɔ́ ! Bə̀ Bə-zhɔ-zhe, nə́ Yi rí gu rə̀ wẽ́ rə̀ la nə́ba gu, rə̀ ce nə́ n’é nywɛ̀ nɛ̃̌ mɔ̀bɔ́ bə̀ co cə́m mɔ̀bɔ́ mə̀ n’ê gwi lò mó, bə̀ nə́ dó Bə-zhɔ-zhe ne. ¹⁵ Nə́ y’ǎ n’é dɛ̃̀ yə̀-zùlə́, sə wu-nyɔ̃̀ də́byǐ t’â twí yé ; nə́ y’ǎ n’é dɛ̃̀ nə́ wárh dɛ̃, k’â wɔ́ wu-zɛ̃̀ɛ̃́ è ŋwɛ́nɛ́ ! ¹⁶ Zù-bal mɔ́ zə ń shəhesé n yí Dan səta, lyì bí j’â nyɛ̌ sə̀ myə̀lə́ né pǔr mɔ́ dweme ré, sə̀ myə̀lə́ né pǔr mɔ́ dweme ré j’a ce cɛ y gakó zhízhǐ ; sə̀ bàn tənà y ǹdə́ wẽ̀ ré, ǹdə́ cɔ wa, ǹdə́ ò lyì bí cɔ̌. ¹⁷ Nyǐ à ce dɔma, ǹdə́ kùrh bànà, sə̀ bə lò nɔ̀nɔ̀ dǔr zhe gaga yé ; mə̀ m’a dɔ̃̀ ába, wɔ́ Bə-zhɔ-zhe ń zɔ̀m. ¹⁸ À n’â yǎl a yẽ̌ à wu-zhùlù ni ; lyààrɛ zhe ne à wẽ́. ¹⁹ Nyǐ à dwí bə̀kɔ́ mɔ́ búbwéé ń zhǐ cɛ kɛ̀bɛ́ è nyɛ dɛ̃́dɛ̃́ wẽ́ ń nə́ ń búbwéé ń zhe : Bə-zhɔ-zhe nə́ kə́ ń tɛ́nɛ́ Səyɔ̃ nɛ́ nà ? Səyɔ̃ pyɔ̌ mɔ́ kə́ ń tɛ̀nɛ́ ò cəcəl w nà ? Wɔ́ bə̀kɔ́n yil bə̀ tó bə̀ yə né bə̀ sə̀lə̀, ǹdə́ dwə́ né dwã bɛ́ yə né dɛnnɛ, bə zɛ̃̀ à lyim ni mú ? ²⁰ Nyǐ jòró w lyɛ̃, cə-bɔ́rhɔ́ w zhɛ̀, e jà nə́ yə̀ nə́ cìn nɛ yé ! ²¹ À wu w cɔ̀, à dwí rí bə̀kɔ́ mɔ́ lyààrɛ́ yilə, à wu zhìlì, wu-zhùlù nánfɔ̀lɔ̀ zhe ne. ²² Cə́m nə tɛ̀nɛ́ Galaadɛ nɛ́ nà ? lyì-twə́r myɛ nə tɛ̀nɛ́ nɛ́ nà ? Sə è nə wɔ́ byè yil à dwí rí bə̀kɔ́ mɔ́ nə mə́ ń tá ń wárh mɔ́ ?