¹ Bɛ̃zhamɛ byǎ, du-nə Zhərəzalɛm nɛ́, wúl-nə pɔ́lá Təkwa nɛ́ ; zhẽ̌-nə myɔrhɔ ku á ce dɛ̃̌ Bɛtɛ-Kɛrɛm nɛ́ ! Bə̀ nyǐ bə̀ nɔ zwini rə̀ shí lũ jə̀-jĩ́ sõ rə̀ bànà, ǹdə́ cə-cɔ̀rna nánfɔ̀lɔ̀. ² Səyɔ̃ bə̀kɔ́ ! ń wɔ́ bóm náàcɛ̀nɛ́ y ń bò ń cìn mú, à cɔ̀ ń yò. ³ Wɔ́ èmyɛ́ səta vwã̌-ènɔ̀nà n’ê twí ní ǹdə́ bə̀ vwàmá nɛ́, bə pú bə̀ kwə̀ə́rhe bə jòm bə kə́kɛ́lɛ́ Səyɔ̃, lò gakó zə ń vwàmá nɛ́ nə̀ m’ê dɔ̀m gɔ ńmyɛ cəl nyí rí jàà y wa. ⁴ zɛ̃̀-na, tɛnɛ-na shə̀dɛ́ɛ́sɛ́ á bú ǹdə́ Zhərəzalɛm ! Zhəl-nə nə́ vò ! Nə́ m’a zɛ̃̀ cəcɛ̃ swélé ! Sə nyǐ kɔn m’a yə̀ zwini ǹdə́ nə́ba, nyǐ cɛ y è n’ê yìì è la, kɔn m’a yə̀ námpɔ́lɛ́ y ǹdə́ yírhə́ k’ê bə nɛ́ nɛ yé. ⁵ Bà-nà nə́ vò ǹdə́ cəcɛ̃ yá ! Wǔr-nə nə́ wǔr Zhərəzalɛm pyɔ̌ kǎlsɛ́ ! ⁶ Wɔ́ èta, Bə-zhɔ-zhe, mɔ̀bɔ́ ń cǐ jàn cìnə́ bé mó zɔ̀m ǹ wɔ̀ nɛ́, ń wòwə̀ : Kǎ-na cèmé né á ló tɛ̃́, pwǎ-na shó á ló dwã yó púl, á m’á bú ǹdə́ Zhərəzalɛm ! Nyǐ wɔ́ cɔ w òmyɛ́ ò mə̌ ǹdə́ còrhò-tum pɔ mɔ́ ; bə̀ nyǐ wɔ́ jàn tũ̀twə̃̀ə̃̀ dúdú nə̀ n’ê twĩ̀ ò wẽ́. ⁷ Cɔ w òmyɛ́ mɔ́ jàn tumə né j’â n’ê wɛ̀rhɛ́ twéé twéé ǹdə zhìlí nə̀bùlì gə́ y’a n’ê bùl nɛ̃̌ è wẽ́ twéé twéé né ta, ò bə sɔ̀ dõ zhe ò n’ô ce ò wẽ́ ǹdə́ è də̀ jàn tumə né ǹdə́ cɛ cɔ̌ dweme dúdú yé ; Twéé twéé gakó j’â wɔ́ dwã nɔ̀nɔ̀ ǹdə́ dwã cɔ̀mɔ̀ ò lyì bí n’ê wɛ̀rhɛ́ à yé né. ⁸ Zhərəzalɛm, shɛ̀nɛ́ ń zwẽ còrhò, mùnì ga à bə̀k’a vò kwã nɛ́ a yẽ̌ mó yé, À bə̀k’a ce ń jǐrh gɔ-elũ èpòlò yé, tənà kɛ̀bɛ́ numbyíní də́-byǐ bə é wẽ́ jě mó yé. ⁹ Nyǐ kɔn tɛ̀bɛ́ Bə-zhɔ-zhe mó ń cǐ jàn cìnə́ bé zɔ̀m mɔ́ : Bə̀ tó né bə pwà Esərayɛl lyì byǎ bɛ́ kùr rí rə̀ dàl mɔ́ ǹdə bə̀ gə́ y’a tó də̀vɛ̃́ cèmé cɛrh w bə gǔn ní mú ta. Ce ǹ jɛ̃̀ vò dɛ̃̌ də̀vɛ̃́ cèmé né jɛ̃̀sɛ́ yó kə́dò, ǹdə lò mɔ̀bɔ́ ń nə́ ń pɔ̌r də̀vɛ̃́ cèmé byǎ mɔ́ ta. ¹⁰ Wɔ́ mɔ̌ lò ne à m’a zɔ̀m a ce, mɔ̌ ń mà n yə̀ à zɔ̀mɛ̀ rɛ́ zhə̀n cínnə, n zɔ̀m ǹdə́ bɛ́, mùnì ga bə cili mú ? Nyìwé, bə̀ zhã̌ nɛ́ jɛ̀ nə̀ yə̀ gòm yé, bə̀ wàr bə̀ yala nɛ́ bə̀ n’ê zhìlì bə̀ cili yé ; Nyǐ Bə-zhɔ-zhe zɔ̀mɛ̀ rɛ́ jǐrh cìzhìl kɔn bə̀ yilə, rə̀ yò də́-byǐ èdù ga k’ê yə̀ bɛ́ zwì yé. ¹¹ Nyǐ Bə-zhɔ-zhe lyim rí rə̀ cɛ̀ dɛ̃́dɛ̃́ mɔ́ sú à wu wə́, à wàr rɛ à m’a cə̀r yé. Ló ré bə̀sɔ́bwɛ̀lɛ́ kɛ̀bɛ́ è ŋwɛ́nɛ́ cɔ w sɔ́má y yó mó yó, ló re ébwá-dàlá bɛ́ dwã-gùúlí lyì bí yó, bə̀ m’a pwà bal ǹdə́ kɛ̃, bə pwà ezhə̀nà bɛ́ ǹdə́ byɛ̀bɛ́ bə̀ cɛ bə lyɛ̃ cɛ nɛ mɔ́. ¹² Bə̀ kǎlsɛ́ m’a jǐrh lyì dwã nyɛ̌rh, bə̀ cɛsɛ́ ǹdə́ bə̀ kana bɛ́ myɛ m’a jǐrh lyì dwã bə̀ cǐ, ǹdə́ à gə tú à zhẽ̌ à jɛ̃̀ tənà y lyì bí yó, wɔ́ Bə-zhɔ-zhe ń zɔ̀m. ¹³ Bə̀ nyǐ e j’a zhì bə̀sɔ́bwɛ̀lɛ́ e m’e yí náncɛ, lũ w nə̀cɛ̀ndɛ́ pyǎ mɔ́ yò zù bə̀ gakó dɛ̃́dɛ̃́, kɔn k’ê zhì nyì-zwennə bé e m’e yí vwĩ̀-zwə́lnə bé, bə̀ gakó wɔ́ yǔyǔ tumə bə̀ n’ê twĩ̀. ¹⁴ Bə̀ n’ê shili à dwí rí bə̀kɔ́ mɔ́ ǹdə́ dədalá : Bə̀ y’a zɛ̃̀ bə̀ zhe : yə̀-zùlə́ ŋwɛ́nɛ́ ! yə̀-zùlə́ ŋwɛ́nɛ́ ! e jà yə̀-zùlə́ tɛ̀nɛ́ nɛ́ gaga yé. ¹⁵ Cìzhìl m’a zə bɛ, bə̀ bə̀ n’ê twĩ̀ pwarha tumə ; bə̀ bə yə́-byĩ́ zhe yé, bə̀ yə̀l cìzhìl pár yé ; wɔ́ rə̀myɛ́ è ce bə̀ m’a tó lyì bí bə̀ n’ê twi mú ni bə̀myɛ tu, à gə tu à pɔ bɛ còrhò-tum yi ní, bə̀ m’a tu bə lə́ nàntùlú, wɔ́ Bə-zhɔ-zhe ń zɔ̀m. ¹⁶ Bə-zhɔ-zhe zɔ̀m n wɔ̀ : Zɛ̃̀-na á zhì sɔ́msɛ́ yó, á nyǐ, s’á bwə̀rh shãã ga tumə né gə́ yàl nɛ́, á nyǐ wɔ́ sɔ́má kɛ̌ è càn, s’á kwè èmyɛ́, s’á yẽ̌ bə̀ á m’a nə shìrhə́ à wun ní wẽ́ ! Bə lyár bə wɔ̀ : Nə́ t’á la nɛ́ zhəl yé. ¹⁷ Nyǐ à cír lyì a cĩ́ jààsɛ́ wẽ́ bə̀ zhǐ ǹdə́ pɔ́lsɛ bə̀ m’ê yìlì ába : Zhìlì-nə á yala nɛ́ á n’á cili pɔ́lá cəl ré ! Bə lyár bə wɔ̀ : Nə́ t’á la nə́ yala nɛ zhùlù nə́ cili yé. ¹⁸ Wɔ́ rə̀myɛ́ yilə, tənèrh lyì, dwə́ né dwã bɛ́ dwã-gùúlí lyì ! cili-nə ! S’á lwar kɔn rɛ́ tɛ̀bɛ́ rə̀ la bɛ yú mú ! ¹⁹ Cɛ, cili ! Nyǐ à la ce zwini bə̀ dwí rí tɛ̀bɛ́ yó, wɔ́ kɔn rɛ́ tɛ̀bɛ́ rə̀ bùlə̀ né pyà mɔ́ ; bə̀ rə̀ yə̀ rə̀ yala nɛ́ zhìlì rə̀ cili à zɔ̀mà nɛ́ gaga yé, rə̀ cẽ à nyə́ né zõ yò. ²⁰ À nə zhe ãsã y è n’ê shí Səba mɔ́ tum nà, à nə zhe vwal-gɔ w ò lwẽ́ nã́nyə̀nyɛ̀lɛ́ y ò n’ô shí tənà kɛ̀bɛ́ è nyɛ wẽ́ mó tum nà ? Á vwə̃̀ né námpúmə́ né t’â yí à pùbùlə̀ gaga yé, à t’â zwẽ á vwə̃̀ né myɛ gaga yé. ²¹ Wɔ́ rə̀myɛ́ è ce, Bə-zhɔ-zhe wowə̀ : Nyì wé, à m’a cĩ́ nèrh mǎ nə́kulu tɛ̃́ dwí rí tɛ̀bɛ́ yé né, dabá ǹdə́ byǎ ǹdə́ jə̀-dwã bɛ́ ǹdə́ dɔwabá gakó m’a mà bə̀ nèrh ò nɛ bə̀ cì. ²² Bə-zhɔ-zhe nə́ ń zɔ̀m ń zhe : Nyǐ dwí rə̀dù shí lũ jə̀-gwã̀ sõ tənà y w rə bànà, tənà nánfɔ̀lɔ̀ lyì bə̀ zɛ̃̀ lũ cə-yala gakó bə tɛnɛ. ²³ Bə̀ kwè twərh ǹdə́ swə́, wu-kùùli cìnə́, bə̀ t’â dùr lò nɔ̀nɔ̀ yé, bə̀ cələ n’ê dom ǹdə nə̀-fɔ̀lɔ̀ nɛ̃̌ ta ; bə̀ jě eshərh, bə̀ tɛnɛ bə ce nyí dwã w ǹdə lò mə̀dù ta, bə̀ la bú ǹdə́ ǹmyɛ́, Səyɔ̃ bə̀kɔ́ mɔ́ ! ²⁴ Bə̀ dweme ré gə́ j’a bwəlse yó né, nə́ jɛ̀sɛ́ kúr j’â cì, wu-zhùlù zɛ̃̀ o zhe nə́ba, kɔn zɛ̃̀ rə̀ n’ê yì nə́ba ǹdə wɔ́ kɛ̃ ń nə́ ń lùl ta. ²⁵ Nə̀ nyɛ̌ ; bə̀ zhe : Bə̀k’á du á vò gɔ sõ yé, bə̀k’á du sɔ́msɛ́ yó yé, bə̀ zù-bal mɔ́ zə ń búlə́ shù w ŋwɛ́nɛ́ gàà mɔ́, ce ywẽ nánfɔ̀lɔ̀ ŋwɛ́nɛ́ jààsɛ́ gakó wẽ́ ! ²⁶ À dwí rí bə̀kɔ́, kwě yóló ń zù ǹ cìnə̀, pyẽ̌ tɔ̀mɔ̀ w ń byíbyílí, wɛ̀rhɛ́ wu-zhùlù ǹdə́ wɔ́ byì-dùwə̀ è cù ta, kúrh yə́-nàná ń ló tɛ̃́, yə́-nàná cɛ̀ɛ́ ! Bə̀ nyǐ cɛ-cɔ̀rna mɔ́ la jàr jàr n bà. ²⁷ À y’à cír mó a cĩ́ à dwí rí wẽ́, ǹ la mə́ ǹ nyǐ rə̀ zhə̀zhèèlé, ǹ mə́ ǹ zhẽ̀ re, sə́ lwar rə̀ sɔ́msɛ́ yé-shò. ²⁸ Nyǐ rə̀ lyì bí gakó wɔ́ yó-kùùli cìnə́, gàrmə́-nyə̌lsɛ, bə̀ wun nánkùùli ǹdə kàmɔ ráá ǹdə cɔ̀bɔ́ ta, bə̀ gakó púlə́ púlə́ j’a cɔ̀. ²⁹ Zho fùrh shɔ̃́ w wẽ́, myìn-cala nɛ́ shɛ̀l, myǐn yə̌l kàmɔ̃ wá ; sə wɔ́ tum bə̀ n’ê lyɛ̀ɛ̀ bə̀ cìn bə̀ twĩ̀ nánfò, wẽ̀ ré jìmdí t’â shə́r yé. ³⁰ Bə̀ n’ê byẽ̀ wẽ̀ rə̀myɛ́ mɔ́ bə̀ : sə̀byì kùlì kɛ̀bɛ́ bə̀ n’ê kwè bə̀ dul kwã nɛ́. Wɔ́ Bə-zhɔ-zhe ń zɔ̀m rə̀myɛ́.