¹ Nyǐ zɔ̀mɛ̀ rɛ́ Bə-zhɔ-zhe zɔ̀m n byili Zheremyi ni mú ; ń wò mo : ² Zɛ̃̀ ń vò ń zhì Bə-zhɔ-zhe jì y étwí-ènyí rí ni, ń zhì gàà mɔ́ ń bwə̀l zɔ̀mɛ̀ rɛ́ tɛ̀bɛ́ n wɔ̀ : Ámyɛ̌ gakó, Zhidə lyì, ámyɛ̌ byɛ̀bɛ́ á n’á tó bwə̀rsé shɛ̀bɛ́ á m’á zwì, á wùlì tɛ̃́ Bə-zhɔ-zhe yé né mó, cili-nə Bə-zhɔ-zhe zɔ̀mɛ̀ rɛ́ ! ³ Nyǐ Bə-zhɔ-zhe, mɔ̀bɔ́ ń cǐ kɔn gakó mó, Esərayɛl Yi rí, zɔ̀m n wɔ̀ : Kwɛrhɛ-na á sɔ́msɛ́ ǹdə́ tũ̀twə̃̀ə̃̀ né á zhì cɛ̀nɛ̀, s’á yẽ̌ bə̀ à b’a yẽ̌ ába á jòm jàà y kɛ̀bɛ́ wẽ́. ⁴ Á bə̀k’á zɛ̃̀ á n’á dɛ̃̀ kɔn kɔma zɔ̀mà nɛ́ bə̀ m’ê jə́jɛ̀rɛ́ ába mɔ́ wẽ́, á m’á zɔ̀m á zhe : Wɔ́ nyɔ̀nɔ̀ èta è wɔ́ Bə-zhɔ-zhe jì yə́, è wɔ́ Bə-zhɔ-zhe jì yə́, è wɔ́ Bə-zhɔ-zhe jì yə́ ! ⁵ Á gə kwɛrhɛ á sɔ́msɛ́ ǹdə́ á tũ̀twə̃̀ə̃̀ né á zhì cɛ̀nɛ̀, á gə twĩ̀ cángá tumə á pə dwã nɛ, á gə yẽ̌ jàn tumə wɔ̀rhɔ́ zhə-bal ǹdə́ bə̀tɛ̀lɛ́ ǹdə́ ejə̃̀-kɛ̃ nɛ, ⁶ á gə yẽ̌ bə dóó zhe cə́bal jal tɛ̃́ ló jàà y kɛ̀bɛ́ wẽ́ mó ne, á yẽ̌ yə né dwã bɛ́ nə̀ n’ê pɛ̃ ába zwini mú kwã nɛ́ dǔr ne, ⁷ rə̀myɛ́ yi ní, à m’a yẽ̌ ába á jòm jàà y kɛ̀bɛ́ wẽ́, tənà y kɛ̀bɛ́ à pɔ á dabá nɛ mɔ́ wẽ́, byinə nə̀ bə zhɔ̌ yil mó. ⁸ Sə nyǐ-nə á nyì wé, á kwè á cìn á ce wẽ̀ tɛ̀bɛ́ rə̀ bə kùr zhe mó jɔ̃̀ wa, á n’á dɛ̃̀ kɔn kɔma zɔ̀mà nɛ́ bə̀ m’ê jə́jɛ̀rɛ́ ába wẽ́. ⁹ Wɔ́ bə̀kɔ́na, á nə m’a zɛ̃̀ á n’á ŋwɔ̀là, á n’á gwi lyì, á n’á fwə̀lə́, á n’á dwĩ̀ kɔma nyə́, á n’á pɛ ãsã Baalɛ nɛ, á n’á dùr yə nyɛ̀bɛ́ á yə̀l nə̀ pár kwã nɛ́… ! ¹⁰ rə̀myɛ́ kwã nɛ́, á zɛ̃̀ á b’ǎ zhǐ à yé né, jì y kɛ̀bɛ́ à yil ré n’ê byẽ̀ è wẽ́ mó wẽ́, á zhe : Nə́ nɔ vwǎrh !... Ǹd’á twĩ̀ pwarha tumə né nə̀myɛ́ mɔ́ gakó kwã nɛ́ mɔ́ ! ¹¹ Á nə n’á bùl bə̀ jì y kɛ̀bɛ́ wɔ́ ŋwɔ̀là myèlé jàà nà, jì y kɛ̀bɛ́ à yil ré n’ê byẽ̀ è wẽ́ mó ? Nyǐ à cìcì mú nə rɛ, wɔ́ Bə-zhɔ-zhe ń zɔ̀m. ¹² Zhəl-nə jàà y kɛ̀bɛ́ bə̀ y’à pɔ nɛ Silo né mó wẽ́, à gə́ y’à ce à yil ré ŋwɛ́nɛ́ mə̀gã̌ shãã ga mɔ́. Nyǐ-nə à gə́ wɛ̀rhɛ́ y nɛ́, á dwí Esərayɛl byǎ bɛ́ wu-bárhɛ́ tumə né yil mó. ¹³ Sə nyǐ-nə, èlǎsɛ̃́, á gə́ twĩ̀ tũ̀-twə̃̀ə̃̀ né nə̀myɛ́ mɔ́ gakó mɔ́, wɔ́ Bə-zhɔ-zhe ń zɔ̀m, à ju kùr nəkɔ́lɛ́ yi ní ga a zɔ̀m ǹd’ába, sə á yə̀ cili yé, à gə́ byẽ̀ ába, á zɛ̃̀ á yə̀ lyár mɔ́ ce, ¹⁴ À m’a wɛ̀rhɛ́ jì y à yil ré n’ê byẽ̀ è wẽ́ mó, jì y kɛ̀bɛ́ á zhe è zhə̀n ré mɔ́, jàà y kɛ̀bɛ́ à pɔ ámyɛ̌ ǹdə́ á dabá nɛ mɔ́, ǹdə à gə́ wɛ̀rhɛ́ Silo nɛ́ ta ; ¹⁵ À m’a dwĩ̀ ába kwã nɛ́ gaga à yé né, ǹdə à gə dwĩ̀ á da-byǎ, Efərayim kwálá y lyì bí gakó né mó ta. ¹⁶ Sə è gə wɔ́ ǹmyɛ́ yilə, ǹ bə̀ Yi cã̌ nɛ́ zal dwí rí tɛ̀bɛ́ yil yé, ǹ bə́ká ce Yi, ǹ bə̀ká nyɛ́ɛ́ ǹ nə́ byẽ̀ ne ǹ ká ǹ bwérhé yé ; nyǐ à t’â la ǹ zɔ̀mà nɛ́ cilu yé. ¹⁷ Ǹ yírhə́ bə kɔn rɛ́ tɛ̀bɛ́ bə̀ n’ê wɛ̀rhɛ́ Zhidə cɛmɛ nɛ́ ǹdə́ Zhərəzalɛm sɔ́msɛ́ yó mó nɛ nà ¹⁸ Nyǐ bə̀sɔ́ná bɛ́ n'ê pwà dǎr, dabá jéé myǐn mú, nábá mà búrú w mún mú, bə ji búrú bə̀ la pə dɛ̃̌ yi pə̀-kɛ̃ mɔ́ nɛ, bə̀ n’ê zwə́l vwə̃̀ bə̀ pɛ yə dwã nɛ́, bə̀ la m’e ce à lyim zɛ̃̀. ¹⁹ Sə rə̀myɛ́ mɔ́ wɔ́ àmyɛ́ lyim bə̀ la ce rə zɛ̃̀ ? wɔ́ Bə-zhɔ-zhe ń zɔ̀m ; è nə də̀ bə̀myɛ́ cìcì mú cìzhìl pɔ yil nà ? ²⁰ Wɔ́ rə̀myɛ́ yil Bə-zhɔ-zhe mó ń cǐ kɔn gakó mó, zɔ̀m n wɔ̀ : Nyǐ à lyim rí zɛ̃̀, à lyim rí rə̀ t’â zɛ̃̀ rə̀ k’ê pɛ́ mɔ́, zɛ̃̀ jàà y kɛ̀bɛ́ yó, rə̀ zɛ̃̀ numbyínsí ǹdə́ vwàmá nɛ́ yó, rə̀ zɛ̃̀ gɔ sõ cèmé né yó, rə̀ zɛ̃̀ cɛ y wẽ̀ ré byǎ bɛ́ yó ; cɛ y m’a kwɛ̃́ myǐn, sə mə̀ t’â la cú gaga yé. ²¹ Bə-zhɔ-zhe, Esərayɛl Yi rí, rə̀ cǐ kɔn gakó mó, zɔ̀m rə wɔ̀ : Kwě-na á vwə̃̀ né námpúmə́ né cɛ́ɛ́ mɔ́ á m’á súlí á vwə̃̀ né ne, á dɔ̃̀ nə̀ nàmá bɛ́ ! ²² Bə̀ nyǐ à yə̀ zɔ̀m ǹdə́ á dabá gaga yé, à yə̀ bɛ nyí rə̀dù ga pɛ gaga yé, dɛ̃ rɛ́ tɛ̀bɛ́ bə̀ du Ezhibti ní mú, à yə̀ vwə̃̀-námpúmə́ ǹdə́ vwə̃̀ zɔ̀mà zɔ̀m yé. ²³ Nyǐ nyí rí tɛ̀bɛ́ à pɔ bɛ mɔ́, à wòwə̀ : Cili-nə à zɔ̀mɛ̀ rɛ́, à m’a yə̀ á Yi, sə ámyɛ m’a yə̀ à dwí ; Zhəl-nə sɔ́msɛ́ shɛ̀bɛ́ gakó à kɛ̃ à pə ába mɔ́ yó, mùnì ga á yə̀ wu-nyɔ̃̀ cìnə́. ²⁴ Sə bə̀ yə̀ cili gaga yé, bə̀ yə̀ bə̀ zwɛ̃̌ pyèrhè bə cili gaga yé, wɔ́ bə̀ wun bùlə̀ né kùr bə̀ tó, bə̀ wun bùlə̀ né námməlwǎlsɛ́ kùr bə̀ tó, bə̀ yə̀ yé né yàl yé, wɔ́ kwã nɛ́ bə̀ yàl nɛ́. ²⁵ Bə̀ dabá gə́ du Ezhibti yi ní ga, kɔn m’e yí zà dɛ̃ rɛ́, dɛ̃ gakó à y’a dùlí nəkɔkɔlɛ́ nɛ, a twĩ̀ à tùntùnnə bé ǹdə́ à nyì-zwennə á sono. ²⁶ Sə bə̀ yə̀ cili gaga yé, bə̀ yə̀ bə̀ zhɛ̃̌ pyèrhè bə cili gaga yé ; bə̀ wɛ̀rhɛ́ yò-kùùli, bə̀ wɛ̀rhɛ́ lwɛlɛ dwene bə̀ dabá. ²⁷ Ǹ gə byili bi ywẽ̀ né nə̀myɛ́ mɔ́ gakó myɛ, bə̀ t’â la ǹ zɔ̀mà nɛ́ culu yé ; ǹ gə búbwéé ǹ co be myɛ, bə̀ t’â la mɔ́ lyár yé. ²⁸ Sə ǹdə́ rə̀myɛ́ ga, wál bɛ : Tənà y kɛ̀bɛ́ è wɔ nyɔ̀nɔ̀ èta mɔ́, è t’â cili Bə-zhɔ-zhe è Yi rí zɔ̀mà nɛ́ yé, è t’â yǎl e zwẽ còrhò yé ; zhə̀n rɛ́ jé, rə̀ k’a du è nyú wə. ²⁹ Góm ǹ ywésé ǹ yẽ̌ sə cɛ ǹ yó w sə byì nándə̀dwààlɛ èta mɔ́, ń dwĩ̀ kwã nɛ́ gaga ; zɛ̃̀ ń jì pyàr rɛ́ yó, ń zhì gàà mɔ́ ń nún wu-zhùlù nwə̃́ ! Bə̀ nyǐ Bə-zhɔ-zhe zhɔ̃̀ dwí rí tɛ̀bɛ́, ń cìrh dwí rí tɛ̀bɛ́ rə̀ tò ń lyim rí ni mú rə ce kwã nɛ́. ³⁰ Bə̀ nyǐ Zhidə byǎ bɛ́ wɛ̀rhɛ́ lwɛlɛ à yé né, wɔ́ Ba-zhɔ-zhe ń zɔ̀m ; Bə̀ kwè bə̀ pwarha wẽ̀ ré bə cĩ́ jì y kɛ̀bɛ́ bə̀ n’ê byẽ̀ à yil ré è wẽ́ mó wə, bə̀ m’e ce y jìmdi ; ³¹ Bə̀ lù vwĩ̀-jùúli Təfɛɛtɛ nɛ́, Bɛn-Yənɔm pyə̀-gwáá rɛ́ wa, bə̀ la m’e zwə́l bə̀ byǎ ǹdə́ bə̀ bə̀kwá bə̀ ji myǐn : È jà wɔ́ kɔn à yə̀ rə̀ nyí pɛ yé, è jà wɔ́ kɔn rə̀ yə̀ à bùlə̀ wẽ́ twí yé. ³² Rə̀myɛ́ yilə, nyǐ dwã ŋwɛ́nɛ́ nə̀ bànà, bə̀ k’ê t’â la wál bə̀ wɔ́ Təfɛɛtɛ ǹdə́ Bɛn-Yənɔm pyə̀-gɔ́rɔ́ kə́dò yé, dwã nɛ́ nə̀myɛ́ mɔ́ wẽ́, bə̀ m’a zɛ̃̀ bə̀ zhe bə̀ wɔ́ numbyínsi gu jàà, bə̀ jàà k’ê t’â la nɔ bə m’e ce cùùri yé, wɔ́ Təfɛɛtɛ nɛ́ bə̀ m’a n’ê ce cùùrí ní, wɔ́ Bə-zhɔ-zhe ń zɔ̀m. ³³ Dwí rí cùùrí m’a jǐrh dɛ̃̌ kúmsí ǹdə́ vwàmá nɛ́ cɛ yó mó kùjú nə̀ n’ê jí, numbyíní myɛ t’â la nɛ́ yál, s’e m’e jə́jɛ́ nə̀ yé ne yé ! ³⁴ À m’a ce nwə́ y bə̀ y’a nún bal ǹdə́ kɛ̃ dwã jú címsí yil mó wu-nyɔ̃̀ búbwéésé jé tɛ̃́ Zhidə cɛmɛ nɛ́ ǹdə́ Zhərəzalɛm sɔ́msɛ́ yó ; bə̀ tənà y m’a jǐrh jə̀-bwə̀r.