¹ Zɛ̃̀-na á tó Zhərəzalɛm sɔ́msɛ́ yó á byɛ́lɛ́, á nyǐ, á bwə̀rh, á pyà dwã-gùúlí jààsɛ́ wẽ́ á nyǐ, ǹdə́ lò gə ŋwɛ́nɛ́, bá mə̀dù cìcì gə ŋwɛ́nɛ́ ń nə́ ń twĩ̀ cánga tum, ń nə́ wɛ̀rhɛ́ ǹdə zhə̀n rɛ́ gə́ n’ê byili ní mú, rə̀-ná-cí gə ŋwɛ́nɛ́, sə́ nyǐ à m’a pə sǔbri Zhərəzalɛm nɛ. ² Má ǹdə́ bə̀ y’a wɔ̀ : Bə-zhɔ-zhe wɔ́ nã́nyì ga yírh wə ! Wɔ́ kɔma nyí bə̀ n’ê bwələ. ³ Bə-zhɔ-zhe, ǹ yírhə́ nə bə zhə̀n rɛ́ nɛ nà ? Ǹ nə́ ǹ mà bɛ, sə mààrɛ́ t’â wɛ̀rhɛ́ bɛ kaka yé ; ǹ nə́ ǹ kwɛ̃́ bɛ myǐn, sə̀ bə̀ t’â yǎl bə zwẽ còrhò yé ; bə̀ kùl bə̀ yésé nánkùlsi kẽkẽ du nə́kulu, bə̀ bə shɛ̀ kwã̀ɔ̃̀ bə bə̀ bə̀ kwã nɛ́ yé. ⁴ À n’â wə̀l à cìn ní à zhe : Bə̀ wɔ́ bə̀sɔ́ná ; bə̀ n’ê twĩ̀ yə̀ láárɛ tũ̀-twĩ̀ĩ̀, bə̀ bə̀ yə̀l Bə-zhɔ-zhe sɔ́msɛ́ párá, bə̀ yə̀l Yi rí nyə́ né pár yé. ⁵ A m’a zɛ̃̀ a vò náncɛsɛ́ sono, a zɔ̀m ǹdə́ bɛ, dɛ̃̀ga nyǐ bə̀myɛ́, yě Bə-zhɔ-zhe sɔ́msɛ párá, bə̀ Yi rí nyə́ né párá ; Sə́ nyǐ bə̀ gakó kɔ́ zhĩĩ rí bə̀ pyə́pyəla w mɔ́, bə lwə̌r lyẽẽsé. ⁶ Wɔ́ rə̀myɛ́ è ce bɔ́rɔ́ w ò ŋwɛ́nɛ́ swɛ̀lɛ̀ rɛ́ wẽ́ mó n’ô gwi bí, gɔ-kǔlsí n’ê dɔ̀m bɛ sə̀ zhəzhɛrɛ, jə̀lə̀ shèè nə̀ zhǐ bə̀ cɛmɛ nɛ́ nyǐ nə̀ n’ê dɛ̃̀, lyì byɛ̀bɛ́ bə̀ gə du cɛmɛ nɛ́ w sə nə zə bɛ nə dɔ̃̀ nə zhəzhɛrɛ ; bə̀ nyǐ bə̀ dwə́ə́ré já, bə̀ yə̀-bəlwàálɛ́ pùlə̀. ⁷ Sə wɔ́ bə̀kɔ́n yil à nə m’a pɔ̃́ sǔbri ? Ǹ byǎ bɛ́ yẽ̌ ne, bə̀ n’ê zal yə nyɛ̀bɛ́ nə̀ də̀ yə mó bə m’e bwəl nyə́. À pɔ bɛ kɔn tɛ̀bɛ́ bə̀ lwə̀l ne mó, ǹdə́ rə̀myɛ́ ga bə̀ n’ê twĩ̀ fwə̌l tumə, bə̀ nánjə̀jóló zhə̀l bə̀ ŋwɛ́nɛ́ nə̀fòlò w sõ jù wə. ⁸ Bə̀ nyɛ̌ ǹdə gɔ eshərh sə̀ jú kùjú náàcɛ̀nɛ́ sə sú, kɛ̃ jíl shil zɛ̃̀ è zhe se, sə zɛ̃̀ sə wɔ dɛ̃̌ sə̀ n’ê dùrə̀, èdù gakó n’ê pyà è dõ kɛ̃ mɔ́ ta. ⁹ À nə t’â la còrhò-tum pɔ wẽ̀ ré rə̀myɛ́ mɔ́ yilə ! Wɔ Bə-zhɔ-zhe ń zɔ̀m rə̀myɛ́, À nə t’â la à jim cṹ tənà y èmyɛ́ mɔ́ dwí rí yó ? ¹⁰ Zɛ̃̀-na á jì è byílsí yó, wǔr-nə se, sə á bə̀k’á cɔ̀ sɛ lyɛ́lyɛ́ yé ! ¹¹ Bə̀ nyǐ Esərayɛl kɛ̀lɛ́ y ǹdə́ Zhidə kɛ̀lɛ́ y yə̀ nà èdù yó zhǐ à yé né yé, wɔ́ Bə-zhɔ-zhe ń zɔ̀m. ¹² Bə̀ zhɔ̃̀ Bə-zhɔ-zhe, Bə̀ n’ê zɔ̀m bə̀ zhe : Ń tɛ̀nɛ́ yé ! Zwini t’â la nə́ba yú yé, nə́ yírhə t’â la búlə́ shù nɔ yé, nɔrh t’â la tu nə sõ yé. ¹³ Nyi-zwennə bé jǐrh nánfò, zho dúdú, Yi t’â zɔ̀m ǹdə́ bɛ́ yé. Ywẽ̀ né bə̀ n’ê zɔ̀m bə̀ byili mú m’a jòm bə̀ cìcì mú yó ! ¹⁴ Wɔ́ rə̀myɛ́ è ce, Bə-zhɔ-zhe, Yi rí rə̀ cǐ jàn cìnə́ bé gakó mó, zɔ̀m n wɔ̀ : Á gə́ zɔ̀m èta mɔ́ yilə, nyǐ, à n’â yǎl sə à zɔ̀mɛ̀ rɛ́ ǹ nyú w mú jǐrh myǐn, Sə dwí rí tɛ̀bɛ́ jǐrh dǎr, sə myǐn mú mɔ̀bɔ́ jí ri. ¹⁵ Esərayɛl kɛ̀lɛ́ y lyì, nyǐ à la ce tənà shí pyépyé e b’e bú ǹd’ába, wɔ́ Bə-zhɔ-zhe ń zɔ̀m ; È wɔ́ tənà kɛ̀bɛ́ è zhe jàn, è wɔ́ tənà nándwã́, tənà tɛ̀bɛ́ ǹ yə̀l è zɔ̀mà yárá, ǹ bə è zɔ̀mà nɛ́ nyɛ̌ gaga yé. ¹⁶ Tənà y èmyɛ́ mɔ́ swã̀ y nyɛ̌ ǹdə lú-bɔ̀l mə̀ nyí rí pul ta ; è lyì bí gakó wɔ́ búlə́ kàndar. ¹⁷ È m’a cɔ̀ ǹ jòró w ǹdə́ ǹ kùjú wə́, È m’a gu ǹ bala-byǎ bɛ́ ǹdə́ ǹ kana-byǎ bɛ́, È m’a gu ǹ pyììsí ǹdə́ ǹ nɛ̃ nɛ́, È m’a cɔ̀ ǹ ǹ də̀vɛ̃́ cèmé né ǹdə́ ǹ épyùúlí. È m’a zə búlə́ shù e m’e wǔr ǹ cɛmɛ nɛ́ nyɛ̀bɛ́ ǹ zhe nə̀ zhə̀nə̀, nə̀ lù nə kə́kɛ́lɛ́ ǹdə́ byílsi mú e ló tɛ̃́. ¹⁸ Dwã nɛ́ nə̀myɛ́ mɔ́ wẽ́, Bə-zhɔ-zhe wə̀lə̀, à t’â la á gakó gu lyɛ́lyɛ́ yé. ¹⁹ Sə á gə́ zɛ̃̀ á zɔ̀m á wɔ̀ : Wɔ́ bə̀kɔ́n yil Bə-zhɔ-zhe, nə́ Yi rí wɛ̀rhɛ́ nə́ba èta mɔ́ ? Ǹ mà ń lyár bɛ ń wɔ̀ : Ǹdə á gə́ yẽ̌ ne, á cèrhé tənèsé dwã bɛ́ yə né né ta mɔ́, èta á m’a vò á twĩ̀ á pə tənà dõ kɛ̀bɛ́ è də̀ ámyɛ̌ nyǎ mɔ́ myɛ lyì ni ní. ²⁰ Zɛ̃̀-na á bwə̀l rə̀myɛ́ mɔ́, á byili Zhakɔbɛ kɛ̀lɛ́ y lyì bí ni, Bwə̌l-nə re á byili Zhidə cɔ wa, á wɔ̀ : ²¹ Dwí ǹ bə̀ surhə zhe, ǹ bə wu zhe gaga, Cili ! Á zhe yírhə́, á j’ǎ bə kaka nɛ yé, á zhe zhã̌, á j’ǎ bə kaka nyɛ̌ yé, ²² Á t’á la nɛ nyám, wɔ́ Bə-zhɔ-zhe ń zɔ̀m, á t’á la kəkə à yé né nà ? Nyǐ wɔ́ àmyɛ́ à zə nyɔ̀rhɔ́ w a m’a cĩ́ swɛ̃́ ǹdə́ nə̀fɔ̀lɔ̀ wá, è wɔ́ swɛ̃́ tɛ̀bɛ́ rə̀ j’â zhǐ byinə nə̀ bə zhɔ̌ zhe yilə, rə̀ t’â la fwǎr yé ; nə̀-fɔ̀lɔ̀ nɛ̃̌ mɔ́ n’ê fùù mə ce sɔ̀, sə mə̀ jàn rɛ́ yə̀ yí yé. ²³ Dwí rí tɛ̀bɛ́ bə shɛ̀ nyí zõ yé ; rə̀ wɔ́ yó-kùùli cìnə́, rə̀ cẽ à nyə́ né zõ mó yò, rə lyɛ̃ rə yẽ̌ ne rə̀ la. ²⁴ Rə̀ t’â zɔ̀m rə̀ wẽ́, sə rə wɔ̀ : Bà-nà nə́ nyɛ̀ Bə-zhɔ-zhe, nə́ Yi rí, bə̀ nyǐ wɔ́ rə̀myɛ́, dwà y nyɔ́ yi gə yú wə́, rə̀ n’ê ce dwà nã́yə́ə́ y ǹdə́ nánkwaá y nywɛ̃̀, rə ce səmyɛ́nsɛ́ ŋwɛ́nɛ́ nə́ jòró w yil mó yé. ²⁵ Sə nyǐ wɔ́ á lwɛlɛ rɛ́ yil wẽ̀ ré rə̀myɛ́ mɔ́ k’ê tɛ̀nɛ́ yé, wɔ́ á yə̀-bəlwàálɛ́ è ce á k’á t’á nɛ cɛ̀nɛ̀ rɛ́ rə̀myɛ́ mɔ́ yé. ²⁶ Bə̀ nyǐ lyì-bəlwǎlsɛ́ ŋwɛ́nɛ́ à dwí rí cəcəl wə ; sə̀ shèè tɛ̃́ sə̀ n’ê pàm pɔ̀mrɛ ǹdə lò mɔ̀bɔ́ ń nə́ ń zal kúmsi ta, sə̀ cĩ́ zaálɛ tɛ̃́ sə̀ m’e zal numbyínsi. ²⁷ Sə̀ jìsí sú ǹdə́ myùnù wẽ̀, ǹdə sə́yǎ gə́ y’a sú ǹdə́ kúmsi ta nɛ́ ; wɔ́ èta sə̀ n’ê tó né sə̀ m’ê jǐrh jàn cìnə́ ǹdə́ nə̀cɛ̀nà. ²⁸ Wɔ́ èta bə̀ n’ê tó né bə̀ nù, bə jǐrh nánfwààlɛ bə̀ n’ê jə́jɛ̀mɛ ; bə̀ lwɛlɛ rɛ́ bə̀ n’ê wɛ̀rhɛ́ mɔ́ lyɛ̃ cɛ du lwɛlɛ dwí gakó, kɔn dõ yò yə̀ sɛ zhǎ, bə̀tɛ̀lɛ́ yò yə̀ sɛ zhǎ yé, sə̀ jɛ̃̀-kɔn rɛ́ n’ê zwẽ nyí ; sə̀ t’â wɛ̀rhɛ́ kɔn tɛ̀bɛ́ rə̀ mə̌ mɔ́ nə̀mɔ̀ yil yé. ²⁹ À nə t’â la còrhò-tum pɔ wẽ̀ ré rə̀myɛ́ mɔ́ yilə ? Wɔ́ Bə-zhɔ-zhe ń zɔ̀m rə̀myɛ́, à nə t’â la à jìm cṹ tənà y èmyɛ́ mɔ́ dwí rí yó ? ³⁰ wẽ̀ tɛ̀bɛ́ rə̀ bə càn, pwarha wẽ̀ n’ê wɛ̀rhɛ́ tənà y wa. ³¹ Nyì-zwennə bé n’ê zə Yi yil ré bə̀ m’ê gòm kɔma, vwĩ̀-zwə́lnə bé n’ê zal bə̀ ŋwɔ̀nɔ́ w bə̀ twĩ̀ bə̀ cìn yilə, à dwí rɩ́ zɛ̃̀ rə̀ só rə̀myɛ́. Sə rə̀ yó gurə́ gə yú wə́, wɔ́ etər á la nɛ́ wɔ̀rhɔ́ ?