¹ Esərayɛl, ǹ gə ká ǹ kwɛ̃̀, ǹ gə ká ǹ kwɛ̃̀ ǹ tú à sono, wɔ́ Bə-zhɔ-zhe ń zɔ̀m rə̀myɛ́, ǹ gə vùr ǹ pwarha tumə né à yé né, ǹ kə́ ǹ tá ǹ la dɛ̃̌ tó ń yiyiri yé. ² Ǹ gə bwəl nyí ń wɔ̀ : Bə-zhɔ-zhe wɔ́ nã́nyì ! ǹ gə zɔ̀m rə̀myɛ́ ǹdə́ zhə̀nà, ǹdə́ kɔn gə́ mə̌ nɛ́, ǹdə́ wu-cángá, sə́ lwar bə̀ tənèsé lyì bí yó m’a cĩ́ bwəl ǹmyɛ́ yil yilə, sə̀ yó myɛ zhẽ̌ dɛ̃̌ ǹmyɛ́ yil yilə. ³ Nyǐ kɔn tɛ̀bɛ́ Bə̀-zhɔ-zhe zɔ̀m Zhidə lyì bí ǹdə́ Zhərəzalɛm lyì bí yil mó, ń wòwò : lyéé-nə cɛ nándwə̃̀, s’á bə̀k’á dù sɔr rɛ́ wẽ́ yé. ⁴ Zhidə ǹdə́ Zhərəzalɛm lyì, Góm-nə á cìn Bə-zhɔ-zhe yilə, góm-nə á wun ní, mùnì ga à lyim bə̀k’a zɛ̃̀ ǹdə myǐn ta á yó, rə̀ bə̀k’a kwɛ̃́ myǐn, lò wàr mɔ ń la cú, á wu-bárhɛ́ tumə né yil yé. ⁵ Bwə̌l-nə Zhidə né, byili-nə Zhərəzalɛm nɛ́, á wɔ̀ : Wúl-nə pɔ́lá Tənà y wa ! Búbwéé-nə á ce dẽ̌dẽ̌ á wɔ̀ : Bə̀-na dwã yó, nə́ vò cɛmɛ nɛ́ nə̀ lù nə kə́kɛ́lɛ́ mɔ́ wa ! ⁶ Zhẽ̌-nə ku a ce dẽ̌ o zǎ Səyɔ̃, s’á dùr, á bə̀k’á zhì yé ! Nyǐ à la ce zwini shí lũ jə-gwã̌ sõ ǹdə́ kɔn tɛ̀bɛ́ rə̀ n’ê cɔ̀ cɛ dɛ̃́dɛ̃́ mɔ́ bà. ⁷ Nyǐ bɔrɔ w shí ò pwə́l mó w ò n’ô zɛ̃̀, nyǐ cə-cɔ̀rna mɔ́ ń nə́ ń cɔ̀ tənèsé mó zhǐr ń jàà y wa, ń nə́ ń zhə̀l ń bànà, ń la tənà y cɔ̌ ; Ǹ cɛmɛ nɛ́ m’a jǐrh jì-bə̀r, lòlò kə́ ń tá ń la tənà y w jòm yé. ⁸ Wɔ́ rə̀myɛ́ è ce, zú-nə ywə́ə́le gàndɛ, kúrh-nə, wɔ́wɛ́lɛ́-na ; nyǐ Bə-zhɔ-zhe tá ń la ń lyim rí rə̀ cɛ̀ dɛ̃́dɛ̃́ mɔ́ nɛ yõ̌ rə tu nə́ yil yé. ⁹ Dɛ̃ rɛ́ rə̀myɛ́ yù wə̀, Bə-zhɔ-zhe wòwə̀, pyɔ̌ mɔ́ ǹdə́ yó-cìnə́ bé wun m’a ga, kɔn m’a jàr vwĩ̀-zwə́lnə bé, sə nyì-zwennə bé wun m’a zɛ̃̀. ¹⁰ A wɔ̀ : Ǎàà ! Cinnə, Bə-zhɔ-zhe ! Nyǐ wɔ́ dwí rí ǹdə́ Zhərəzalɛm nyí ǹ jə́jɛ̀rɛ́, ǹ gə́ y’à nə́ ǹ zɔ̀m ǹ zhe : Á m’a nə yə̀-zùlə́ mó ! Sə nyǐ búlə́ shù ò n’ô pyà bə̀ myə̌l ré vǔr. ¹¹ Rə̀myɛ́ yi ní mú, bə̀ m’a zɔ̀m ǹdə́ dwí rí ǹdə́ Zhərəzalɛm bə̀ wɔ̀ : Nyǐ zho bárhɛ́ zɛ̃̀ o shí gɔ -elũ-èpòlò w pyǎlsɛ́ yó, o bə̀ ò n’ô ce à dwí rí bə̀kɔ́ mɔ́ sɔ́má y yó, s’e də̀ bə̀lé y còlò mó yil ráá è púúlí vǔr e yẽ̌ è byǎ bɛ́ nɛ wárgáá yil yé. ¹² Sə wɔ́ zho nánfɔ̀lɔ̀ à ce o shí gàà mɔ́ o bə̀ à sono. Èlǎsɛ̃́, à m’a zɛ̃̀ a bwə̀l bə̀ bùrsí kɔ́ mɔ́ zɔ̀mà nɛ́ a byili. ¹³ Nyǐ, cə-cɔ̀rna mɔ́ ń nə́ ń zhə̀l ǹdə bə́ban ta ǹ bànà ; ń búlə́ eshə-vwɛ̃tur rí nyɛ̌ ǹdə kɔ̀lma ta, ń shəshesé n’ê dùr fúlə́ə́ du ényə̀lá ta. Nyǐ zwini zhe nə́ba, nə́ yò zhìlì ! ¹⁴ Zhərəzalɛm, vǔr ǹ wu w lwɛlɛ rɛ jìmdí, mùnì ga ń nə́ vwǎrh ! Ǹ mà ń jà ń yẽ̌ bùlə̀ né námməlwǎlsɛ́ nɛ ǹ wẽ́ kɔn m’e yí dǒ ? ¹⁵ Nyǐ cəl rə̀dù zhì Dan nɛ́ rə̀ n’ê bwə̀l cɛ cɔ̌ yò rə̀ byili, wɔ́ Efərəyim pyɔ̀ w yó yi ní ga rə̀ ju kùr rə̀ n’ê bwə̀l né. ¹⁶ Bwə̌l-nə nyí rí á byili tənèsé ne, ce-nə Zhərəzalɛm myɛ lwar rɛ : Nyǐ lyì la shí zwə̀ tənà kɛ̀bɛ́ è nyɛ ; bə̀ n’ê bya bə̀ m’ê bwí ǹdə́ Zhidə cɛmɛ nɛ́. ¹⁷ Bə̀ kə́kɛ́lɛ́ Zhərəzalɛm bə ce cəcəl wə, ǹdə bə̀ gə́ y’a cĩ́ lyì cɛ nyí ni bə̀ n’ê yìlì ta, bə̀ Zhərəzalɛm cẽ à nyə̀ná yò, wɔ́ Bə-zhɔ-zhe ń zɔ̀m rə̀myɛ́. ¹⁸ Wɔ́ rə̀myɛ́ è wɔ́ ǹ sɔ́msɛ́ ǹdə́ tùntwə̃̀ə̃̀ né ǹ twĩ̀ mú byǎ bɛ́ ; wɔ́ rə̀myɛ́ è wɔ́ ǹ wu-bárhɛ́ tumə né byǎ bɛ́ ; zhə̀nà, rə̀myɛ́ mɔ́ wɔ́ nyɛ̌ cɛ̀ɛ́, rə zù ǹ wẽ́. ¹⁹ À wu ! à wu : À n’â nwɛ̀nɛ̀ à wu wẽ́, à shíshúrhú w n’ô mà, ce à wàr à n’â gwi à nyí à yé ; À wu, ǹ nyɛ̌ pɔ́lá y cəl ré, ǹ nyɛ̌ búlə́ né dweme ré. ²⁰ Bə̀ n’ê bwə̀l bə̀ zhe : Bə̀ wɔ́ e cɔ̀ e jǐrh ji-bwə̀r, e cɔ̀ e jǐrh jì-bwə̀r dúdú zɔ̀mà. Tənà y gakó cɔ̀, bə cɔ̀ à kwə̀ə́rhé gakó rə j’a tó dwã kùr yó rə wǔr, bə cɔ̀ à kwə̀ə́rhé kàmə̀jɛ̀sɛ́ kùr yó. ²¹ À nə m’a j’â n’â nyǐ ku w ò zhẽ̌ dɛ̃̌ búlə́ né bú yil mó kɔn m’e yí dǒ, à nə m’a j’â n’â cili pɔ́lá y wúl mó kɔn m’e yí dǒ ? ²² Zhə̀n zhə̀nà, à dwí rí wɔ́ nyə̀nyà, rə̀ yə̀l à pár yé ; rə̀ wɔ́ bə̀sɔ́ná námməyirsi, bə̀ bə surhə zhe yé ; bə̀ yě lwɛlɛ wɔ̀rhɔ́, sə bə̀ yə̀l cɛ̀nɛ̀ wɔ̀rhɔ́ yé. ²³ À zɛ̃̀ à n’â nyǐ cɛ yá, a púrí è wɔ́ nã́wǒ ò zhǐ nánfò ; a púrí dɛ̃̌ yi rí ǹdə́ rə̀ pwẽ̀ ré jé. ²⁴ A nyǐ pyàr rɛ́, a púrí rə̀ zhízhǐ rə ló tɛ̃́ ; pyǎlsɛ́ gakó ló tɛ̃́. ²⁵ À la nyǔ, a púrí numbyíní tɛ̀nɛ́ nɛ́ gaga yé ; a púrí kúmsí dɛ̃̌ yi y w mú gakó dùr. ²⁶ À la nyǔ a púrí, Karəmɛlɛ y jǐrh gɔ-elũ èpòlò ; è cɛmɛ nɛ́ gakó wǔr nə cɔ̀, Bə-zhɔ-zhe yé né, ń lyim rí yé né. ²⁷ Bə̀ wɔ́ èta Bə-zhɔ-zhe zɔ̀m nɛ́, ń zɔ̀m n wɔ̀ : Tənà y gakó m’a cɔ̀ ; sə à t’â la è gakó púlə́pulə́ cɔ̌ yé. ²⁸ Wɔ́ rə̀myɛ́ è ce tənà y ŋwɛ́nɛ́ cu wu-zhùlù wẽ́, dɛ̃̌ yə né jǐrh cə-byṹ ; bə̀ à zɔ̀m rɛ, à gu rí à wẽ́, à k’â t’â bàn à kwã nɛ́ yé, à t’â la rɛ kwǎrh yé. ²⁹ Cɛmɛ nɛ́ lyì bí gə́ nyɛ̀ɛ̀ eshə-jǒmnə bé ǹdə́ twesé tarna bɛ́ dweme ré yi ní, cɛmɛ lyì bí gakó j’a zɛ̃̀ bə̀ n’ê dùrə̀ ; jàlà n’ê dùr bə zwì swə̀ə̀lɛ wẽ́, bə̀ byɛ̀ n’ê dùr bə̀ jìl nə́kuuli yó ; bə yẽ̌ cɛmɛ nɛ́ gakó ne, lò lò kə́ ń tɛ̀nɛ́ nə́ wẽ́ yé. ³⁰ Sə ǹmyɛ́ mɔ̀bɔ́ bə̀ cɔ̀ ǹ cɛmɛ nɛ́ ga kókó mó, wɔ́ etər ǹ zɛ̃̀ ǹ la nɛ́ wɔ̀rhɔ́ ? Ǹ nə m’ǎ zɛ̃̀ ń zù gã̀-shɛ̀n, ń bò ǹ cìnə̀, ń ce sánə́má cìbyǔr, ń tútǔ nwə̃̌ nã́byĩ́ ǹ yírhə́ ne ; e jà wɔ́ nánfò ǹ bò ǹ cìnə̀ ; bə̀ ǹ bɔ́bwá bɛ́ fulsi mú, bə̀ n’ê pyǎ ǹ myə̌l vǔr. ³¹ Nyǐ à zhã̌ nyɛ̌ wɔ́wɔ́lɔ́ mə̀ m’ê wɔ́wɔ́lɛ́ ǹdə wɔ́ kɛ̃ ń pwǐ zɛ̃̀ è n’ê yì ta, wɔ́wɔ́lɔ́ mə̀ nyɛ̌ ǹdə wɔ́ kɛ̃ ń bwál-pwǐ zɛ̃̀ è n’ê yì ta. Sə nyǐ cəl ré wɔ́ Səyɔ̃ bə̀kɔ́ mɔ́ cəl ; ń cèlè ń jɛ̀rh n ce : Sə à gə́ wɔ́ zúzúnú cí mú yilə ! À tu lyì-gurnə jɔ̃̀ wa !