¹ N zɛ̃̀ n wɔ̀ : Bal gə zhɔ̃̀ ń kɛ̃, kɛ̃ mɔ́ shə́r n vò n jí byal dõ, bal mɔ́ mɔ̀bɔ́ ń zhɔ̃̀ ń kɛ̃ mɔ́ mɔ́ nə mà n zɛ̃̀ n ká n vò kɛ̃ mɔ́ ń zhɔ̃̀ mɔ́ sono kə́dò ? Rə̀myɛ́ mɔ́ t’â la Tənà y cìcì mú jìmdi co nà ? Sə nyǐ ǹmyɛ́, ǹ fwə̌l ǹdə́ ébwǎ nánzhəzhɔ̌, ń zɛ̃̀ ń ká ǹ bàn à sono ! Wɔ́ Bə-zhɔ-zhe ń zɔ̀m rə̀myɛ́. ² Kwẽ̌ ǹ yé dɛ̃̌ ń nyǐ sɔ́msɛ́ yó ń nyì ! ń nyǐ wɔ́ jàà kɛ̌ wẽ́ ǹ yə̀ nɛ́ fwə̌l ! Ǹ yà ǹ nə́ ǹ zhì sɔ́msɛ́ yó gɔ-elũ èpòlò w wə, ǹdə Araabɛ ta, ǹ ce tənà y jìmdi ǹdə́ ǹ fwə̌l tumə né ǹdə́ ǹ lwɛlɛ ǹ nə́ ǹ wɛ̀rhɛ́ mɔ́. ³ Wɔ́ rə̀myɛ́ mɔ́ myɛ, è ce dwà y zhì, fɔ̀ dwà y myɛ nánkwaá y myɛ yə̀ nywɛ̃̀ yé ; sə ǹdə́ rə̀myɛ́ ga, ǹ wɛ̀rhɛ́ yó-kùlù ǹdə kə-nə̀fòló ta, ǹ yə̀ yẽ̌ cìzhìl zə mɔ́ yé. ⁴ Sə èlǎsɛ̃́ mɔ́, wɔ́ etər kɔn nə tó né ? Ń zɛ̃̀ ń búbwéé ń byẽ̀ ne ń wɔ̀ : À da ! ⁵ Ǹ yàl à dɔwa, à bə̀sɔ́nɛ́ yi ní ga ! Ǹ mà ń yẽ̌ ǹ lyim rí ni rə̀ j’â n’ê yì ni twéé twéé gaga ? Ǹ mà ń cə̀r re ń cĩ́ ǹ wẽ́ rə̀ j’â n’ê yì twéé twéé ? Nyǐ ǹ zɔ̀m, ǹ wɛ̀rhɛ́ wẽ̀ rə̀ n’ê gwi, sə ǹ ce rə pyìrh. ⁶ Bə-zhɔ-zhe zɔ̀m ǹdə́ nɛ pyɔ̌ Ozhaasɛ pyɛ̀lɛ́ yi ní n wɔ̀ : Ǹ nɔ Esərayɛl mɔ́ ń tá ń zhì nà èdù yó mó mó gə́ wɛ̀rhɛ́ nɛ́ mɔ́ ? Nyǐ ń zhə̀l pyàr rɛ́ dɛ̃̌dɛ̃̌ mɔ́ ò òdù gakó yó, ǹdə́ cèmé né nyɛ̀bɛ́ nə̀ pú ǹdə́ ǹdə́ vɔr mɔ́ òdù gakó kùr w n fwə̌l gàà mɔ́. ⁷ À y’à n’â bùl à wẽ́ à zhe : Ywẽ̀ né nyɛ̀bɛ́ à wɛ̀rhɛ́ mɔ́ gakó gə rə̀ y’à m’a ce ǹ ká n kwɛ̃̀ n b’à sono. Sə ń yə̀ ká n kwɛ̃̀ n bə̀ yé. Nyǐ ń nəkɔ́ Zhidə myìnù cə́-kɛ̃ mɔ́ cìcì mú yàl rə̀ zhə̀n cínnə. ⁸ Má ǹdə́ à y’à kɛ̃-zhɔ̃́ sɛ́bɛ́ a pə Esərayɛl nɛ ń fwə̌l tumə né gakó mó yil a m’a zhɛ̃̀ mɔ́ yírh w ga, à púrí ń nəkɔ́ Zhidə myìnù cə́-kɛ̃ mɔ́ yə̀ tə̀ rə̀myɛ́ yil à ywẽ zə mɔ yé, ńmyɛ zhə̀l n fwə̌l, fwə̌l mó mə̀myɛ́ mɔ́ dwí rí cìcì. ⁹ Esərayɛl fwə̌l tumə né nə̀ zɔ̀mà nɛ́ sú tɛ̃́ mɔ́ co tənà y jìmdi, Esərayɛl fwə̌l ǹdə́ nə́kulu w ǹdə́ dɔ̌ wá. ¹⁰ È jà ǹdə́ rə̀myɛ́ ga, Esərayɛl nəkɔ́ Zhidə, myìnnə mó, yə̀ ká n kwɛ̃̀ n bə̀ à sono ǹdə́ ń wu gakó yé ; ń dó wə́, ń gə́ wɛ̀rhɛ́ èta mɔ́ yilə, wɔ́ Bə-zhɔ-zhe ń zɔ̀m rə̀myɛ́. ¹¹ Bə-zhɔ-zhe zɔ̀m ǹdə́ nɛ n wɔ̀ : Esərayɛl mɔ́ ń bə nà èdù yó zhǐ mú, nə́ ń bùl bə̀ ń bə dóó zhe ǹdə Zhidə myìnnə mó myɛ ta. ¹² Rə̀myɛ́ yilə, zhəl lũ jə̀-gwã̀ sõ lyì bí sono, ń bwə̀l zɔ̀mà nɛ́ nyɛ̀bɛ́ ń byili, n wɔ̀ : Esərayɛl, ǹmyɛ́ mɔ̀bɔ́ ǹ bə nà èdù yó zhǐ ǹdə́ nɛ mɔ́, ká kwɛ̃̀ ń bà ! Wɔ́ Bə-zhɔ-zhe ń zɔ̀m rə̀myɛ́. Nyǐ à yírhə́ t’â la ǹ yó pyǎ ǹdə́ lyim tɛ̀bɛ́ rə̀ cɛ̀ wéé twéé yé ; Bə̀ à wɔ́ nɔ̀nɔ̀-dǔr Yi, wɔ́ Bə-zhɔ-zhe ń zɔ̀m rə̀myɛ́, à t’â cə̀r à lyim rí à cĩ́ à wẽ́ twéé twéé yé. ¹³ ǹmyɛ́ wúrí ń lwar ǹ dóó w párá, ǹmyɛ́ wúrí ń lwar bə̀ ǹ yə̀ nà èdù yó zhì Bə̀-zhɔ-zhe, ǹ Yi rí yé né yé, lwar bə̀ nyǐ ń y’a vò dwə́ nyɛ̀ yə né sono, ń ká vò nə̀ dwã nyɛ̀ yə né sono, ǹ zhə̀l cèmé nyɛ̀bɛ́ nə̀ pú ǹdə́ vɔr kùr mɔ́ wə, ǹ yə̀ à zɔ̀mà nɛ́ cili yé, wɔ́ Bə-zhɔ-zhe ń zɔ̀m rə̀myɛ́. ¹⁴ Bə̀sɔ́ná, yó-kùùli cìnə́, ká-na á kwɛ̃̀ á bà, wɔ́ Bə-zhɔ-zhe ń zɔ̀m ; Bə̀ nyǐ à wɔ́ á yó-cə́bal. À m’a vùr á lò mə̀dù cɔ wẽ́, a vùr á lyì bə̀lyè dwí wẽ́, a k’a zə ába a bə Səyɔ̃. ¹⁵ À m’a pə ába à wu ènɔ̀nà, bə zə surhə ǹdə́ lárma bə m’e kál ába. ¹⁶ Á gə tú á pùl nánzhəzhɔ̌, á lù byǎ tənà y wa, dwã nɛ́ nə̀myɛ́ mɔ́ wẽ́, Bə̀-zhɔ-zhe wə̀lə̀, bə̀ k’ê t’â la Yi dɔbrɛ́ kùlkõ̌ w yò zɔ̀m yé, ò yò k’ê t’â bàn lò bùlə̀ wẽ́ yé ; bə̀ k’ê t’â la ò yò lyǐrh yé, bə̀ k’ê t’â la lwar bə̀ ò nà y tɛ̀nɛ́ myɛ yé, bə̀ k’ê t’â la ò dõ wɔ̀rhɔ́ gaga yé. ¹⁷ Rə̀myɛ́ yi ní mú, bə̀ m’a byẽ̀ Zhərəzalɛm bə̀ Bə-zhɔ-zhe pyɛ̀lɛ̀ də̀gwã́ ; lũ w tənèsé púlə́púlə́ m’a b’e gùlí dwã Zhərəzalɛm nɛ́ Bə-zhɔ-zhe yil ré yilə, sə̀ lyì bí k’ê t’â la bə̀ wun bùlə̀ námməlwɛ̌lsɛ́ kùr tó yé. ¹⁸ Dwã nɛ́ nə̀myɛ́ mɔ́ wẽ́, Zhidə kɛ̀lɛ́ y lyì bí m’a b’e mù dwã nɛ ǹdə́ Esərayɛl kɛ̀lɛ́ y lyì bí ; bə tó dwã bə shí lũ jə̀-gwã̀ sõ bə bə̀ bə̀ cəl tənà y à pɔ á dabá nɛ mɔ́ wẽ́. ¹⁹ À y’à n’â zɔ̀m à wẽ́ à zhe : Wɔ́ bə̀kɔ́n yil à m’a kwè mó a cĩ́ à byǎ bɛ́ wẽ́, a pɔ̃́ tənà kɛ̀bɛ́ è sú ǹdə́ wẽ̀ nã́nyə̀nyɔ̀ɔ̀lɛ, cəl kɔn rɛ́ tɛ̀bɛ́ rə̀ bò rə̀ càn rə̀ bə dõ zhe lũ w tənèsé gakó wẽ́ mó ? À y’à n’â zɔ̀m à wẽ́ gwẽ̌ à zhe : Ǹ m’a byẽ̀ ne bə̀ : À da ! Rə̀myɛ́ ce, ǹ tá ǹ la à kwã nɛ́ kwã̀ɔ̃̀ yé. ²⁰ Sə nyǐ, kɔn yàl ǹdə kɛ̃ mɔ̀bɔ́ ń yə̀ nà èdù yó zhì ń ébɔ́ yé né ta, Esərayɛl kɛ̀lɛ́ lyì, nyǐ wɔ́ èta á yə̀ nà èdù yó zhì ǹdə́ nɛ nɛ́ yé, wɔ́ Bə-zhɔ-zhe ń zɔ̀m rə̀myɛ́. ²¹ Nyǐ bə̀ y’à zɛ̃̀ bə̀ nyɛ̌ cələ pyàr rɛ́ yó, è y’à wɔ́ Esərayɛl lyì byǎ bɛ́ cìlə́, bə̀ n’ê kúrh bə̀ wɔ́wɔ́lɛ́, bə̀ gə́ cɔ̀ bə̀ sɔ́msɛ́, bə swě Bə-zhɔ-zhe, bə̀ Yi rí yò mó yilə. ²² Bə̀sɔ́ná, yó-kùùli cìnə́, ká-na kwẽ̀ á bà, nyǐ à m’a pə ába á dwə́ə́ ré sǔbri. Nyǐ nə́ba, nə́ bàn ǹ sono. Bə̀ ǹ wɔ́ Bə-zhɔ-zhe, nə́ Yi rí. ²³ Zhə̀nà, sɔ̀ w kɔ̀bɔ́ ò shí pyǎlsɛ́ ǹdə́ pyàr rɛ́ yó mó, wɔ́ kɔma sɔ̀ ; Zhə̀nà, wɔ́ Bə-zhɔ-zhe, nə́ Yi rí sono, Esərayɛl vwǎrh mɔ́ ŋwɛ́nɛ́. ²⁴ Nyǐ nə́ bə̀sɔ́nɛ́ yi ní ga, yə né jú kɔn tɛ̀bɛ́ nə́ dabá twĩ̀ bə nə mɔ́, nə jí bə̀ pyììsì ǹdə́ bə̀ nɛ̃ nɛ́ ǹdə́ bə̀ bala-byǎ bɛ́ ǹdə́ bə̀ kana-byǎ bɛ́. ²⁵ Wɔ́ nə́ cìzhìl ré rə́ wɔ́ nə́ kɔ̀-pyònò nə́ m’ê pyè, wɔ́ nə́ fuuli mú mə̀ wɔ́ nə́ gàmmə̀lyɔ̀nɔ̀ nə́ n’é pyìlì ; Bə̀ nə́myɛ̌ ǹdə́ nə́ dabá ga dó Bə-zhɔ-zhe, nə́ Yi rí ni, nə́ bə̀sɔ́nɛ́ yi ní ga kɔn m’e yí zà, nə́ yə̀ Bə-zhɔ-zhe, nə́ Yi rí zɔ̀mà nɛ́ cili yé.