¹ Bə-zhɔ-zhe zɔ̀m ǹdə́ nɛ n wɔ̀ : ² Zɛ̃̀ ń vò, ń bwə̀l ń búbwéé Zhərəzalɛm lyì bí zhã̌ nyɛ̀ɛ̀ : Nyǐ Bə-zhɔ-zhe nə́ ń zɔ̀m ń zhe : À n’â lyǐrh ǹ sónó w kɔ̀bɔ́ ǹ yà ǹ zhe ǹdə́ nɛ ǹdə́ ǹ gwẽ̌ wɔ́ kɛ̃-byì-bṍ mó yò, bə̀ gə́ y’à gwẽ̌ n’ê pyà mɔ́ mɔ́ yi ní sónó wə́, ǹ gə́ yà ǹ nə́ ǹ tó à kùr gɔ-elũ èpòlò w yi ní mú, cɛ kɛ̀bɛ́ lòlò yà ń tá ń vwàl è wẽ́ mó w mó. ³ Rə̀myɛ́ yi ní, Esərayɛl y’à wɔ́ Bə-zhɔ-zhe dúdú cəl kɔna, è y’à wɔ́ ń cəl wẽ̀ byǎ nã́yə́ə́ bé ; lyì byɛ̀bɛ́ gakó bə̀ y’à n’ê jí bi mú cìnə́ nábá y’à n’ê pɛ yò bə̀ cìn ni, zwini y’à n’ê pwí bi, wɔ́ Bə-zhɔ-zhe ń zɔ̀m rə̀myɛ́. ⁴ Zhakɔbɛ kɛ̀lɛ́ lyì, ǹdə́ ámyɛ̌ Esərayɛl kɛ̀lɛ́ y lyì bí gakó, cili-nə Bə-zhɔ-zhe zɔ̀mɛ̀ rɛ́ ! ⁵ Bə-zhɔ-zhe nə́ zɔ̀m ń zhe : Wɔ́ bə̀kɔ́n lwɛlɛ á dabá nɔ à wẽ́, bə m’e dùr bə vò kwã nɛ́ à nyí ni, bə vó wẽ̀ tɛ̀bɛ́ rə̀ bə kùr zhe nyí ni, bə̀ cìcì mú myɛ jǐrh kɔn nánfò mó ? ⁶ Bə yə̀ wə̀l : Wɔ́ yẽ̀ Bə-zhɔ-zhe mó ŋwɛ́nɛ́ ? Ńmyɛ̌ mɔ̀bɔ́ ń vùr nə́ba Ezhibti tənà y wa, n kál nə́ba gɔ-elũ èpòlò w wə, cə-da kɛ̀bɛ́ è sú ǹdə́ gwáárɛ, cɛ kɛ̀bɛ́ də̀-kùlù zhe, cu jàà, cɛ kɛ̀bɛ́ lòlò tá ń tó è wẽ́ ń lyɛ̃, cɛ kɛ̀bɛ́ numbyíní də́-byǐ bə è wẽ́ jě mó ? ⁷ À zɔ ába a m’a bə̀ a cĩ́ tənà kɛ̀bɛ́ è nyɛ̌ ǹdə jàà kɛ̀bɛ́ è gakó wɔ́ cèmé dúdú mú wẽ́, mùnì ga á jí cèmé né byǎ bɛ́, è wẽ̀ ré tɛ̀bɛ́ rə̀ càn dɛ̃́dɛ̃́ mɔ́ ; sə á gə́ tú á zhɛ̀, a zɛ̃̀ a ce tənà y jìmdi, á ce à cəl kɔn rɛ́ jǐrh pwarha kɔn. ⁸ Vwĩ̀-zwə́lnə bé yə̀ wə̀l : Wɔ́ yẽ̀ Bə-zhɔ-zhe ŋwɛ́nɛ́ nà ? Byɛ̀bɛ́ bə̀ n’ê cèrhè Yi nyə́ né mó yə̀ à pár lwar yé, dwí rí kálna bɛ́ yə̀ à zhə̀n cìnə́ yàl yé, nyì-zwennə bé zɔ Baalɛ yil ré bə m’ê zɔ̀m nyì-zwennə zɔ̀mà, bə lyɛ̃ bə vò lyì byɛ̀bɛ́ bə̀ bə sɛ̃ɛ̃́ də́-byǐ zhe mó sono. ⁹ Wɔ́ rə̀myɛ́ è ce, à gwẽ̌ m’a cĩ́ dóó á yó, wɔ́ Bə-zhɔ-zhe ń zɔ̀m rə̀myɛ́, à n’â yǎl a cĩ́ dóó á byǎ bɛ́ byǎ bɛ́ myɛ yó. ¹⁰ Zɛ̃̀-na a byɛrhɛ nɛ̃̌ mɔ́ á yí Citiimi cɛmɛ nɛ́ nə̀ jě nɛ̃̌ mɔ́ cəcəl mó nyí ni á nyì, s’á twĩ̀ lò Kədaarɛ nɛ́, n myə̀lɛ́ w náàcɛ̀nɛ́ á nyì, ǹdə́ kɔn dõ gə j’â wɛ̀rhɛ́ gaga rə̀ nyɛrhɛ rə̀myɛ́ ! ¹¹ Tənà ŋwɛ́nɛ́ è y’à lyə́r è yə né nà, ǹdə́ nə̀ də̀ yə yírh w ga ? Sə nyǐ à dwí rí kwè rə̀ zùwə́ y rə m’e lyə́r kɔn dɛ̀bɛ́ rə̀ bə sɛ̃ɛ̃́ də́-byǐ èdù ga zhe yé ! ¹² Dɛ̃̌ yə, yẽ̌-nə yò w òmyɛ́ mɔ́ jàr ába ; o zɛ̃̀ á wu ni, ò ywẽ zə ába ! Wɔ́ Bə-zhɔ-zhe ń zɔ̀m rə̀myɛ́. ¹³ Bə̀ nyǐ à dwí rí wɛ̀rhɛ́ yə̀-bəlɔ̀lɔ́ twər kùrə̀ nə̀lyè : Rə̀ yẽ̌ ne, àmyɛ́ mɔ̀bɔ́ à wɔ́ rə̀ nə̀-bùlì y è n’ê pɛ nyǔ mú mú, bə k’a n’ê kwì bə̀ sə̀pwà nɛ̃̌-gwáárɛ́, gwáárɛ tɛ̀bɛ́ nɛ̃̌ t’â zhì rə̀ wẽ́ mó. ¹⁴ Esərayɛl nə wɔ́ yóm-bal bə̀ yè, ráá wɔ́ kɛ̀lɛ́ w bə̀ lùl mo né ? Sə è nə wɔ́ byẽ̀ yil ń jǐrh vwàmá nyí-kùjú mú ? ¹⁵ Wɔ́ ńmyɛ̌ yil bwar-bwààlɛ n’ê swərə, rə̀ cələ n’ê dwi ; rə̀ n’ê cɔ̀ ń tənà yá ; ń cɛmɛ nɛ́ ju myǐn, lòlò kə́ ń bə nə̀ wẽ́ jě yé. ¹⁶ Lwar bə Noofu ǹdə́ Tacəpanɛsɛ myɛ cìcì lyì bí m’a zə mɔ́ bə pǎr ǹ yə́-pɛ́lɛ́ yá. ¹⁷ Nyǐ wɔ́ ǹ gə́ yẽ̌ Bə-zhɔ-zhe, ǹ Yi rí rə̀ y’à zɔ mɔ́ rə̀ m’ê zhə̀l sɔ̀má y kɛ̀bɛ́ è càn yó mó, è ce rə̀myɛ́ mɔ́ yí mú ! ¹⁸ Sə èlǎsɛ̃́ mɔ́, wɔ́ bə̀kɔ́n tum ǹ nə zhe ǹ la vò ń wɛ̀rhɛ́ Ezhibti ní, ń nyɔ̀ Niili nɛ̃̌ mɔ́ mɔ́ ? Wɔ́ bə̀kɔ́n myɛ tum ǹ nə zhe ǹ la vò ń wɛ̀rhɛ́ Ashəri ní, ń nyɔ̀ Efəraatɛ bù-fwɛ̀lɛ̀ y nɛ̃̌ mɔ́ mɔ́ ? ¹⁹ Lwar bə̀ wɔ́ ǹ wu-bárhɛ́ tumə né nə̀ la mɔ́ còrhò-tum pɔ, lwar bə̀ zhə̀n rɛ́ ǹ bə shɛ̀ rə̀ yò mó rə̀ la mɔ́ ǹ yě byulu, ń zɛ̃̀ ń tó rə̀myɛ́ dɛnnɛ ń lwar bə̀ ǹ gə yẽ̌ Bə-zhɔ-zhe, ǹ Yi rí ni, ǹ tá ǹ nyàm rɛ́ mɔ́, wɔ́ kɔn dɛ̀bɛ́ rə̀ bə càn rə̀ wɔ́ cɛ̀ɛ́, wɔ́ Cǐnnə mó, Bə-zhɔ-zhe mó ń cǐ kɔn gakó mó ń zɔ̀m. ²⁰ Sə nyǐ kɔn dɛnɛ ǹ kɔ́ ǹ zhĩĩ rí, ń sə́ ǹ nyáná nɛ́, ń zɛ̃̀ ǹ zhe : à k’â t’â yǎl a yə̀ yómde wẽ́ yé ! E jà ń zɛ̃̀ ǹ zhǐ pyɛ̀lɛ́ kɛ̀bɛ́ gakó e wɔ́ dɛ̃̌dɛ̃̌ yó, ǹ zhǐ cǒ kɔ̀bɔ́ ò púrh vɔr o pyi dwã nɛ kùr wə, ń kó tɛ̃́ ǹdə kə-nə̀fòló ta. ²¹ À y’à zhele mó ǹdə sɛ̃́-cǒ kɔ̀bɔ́ ò cɛ̀nɛ̀ rɛ́ bə dõ zhe ta, cǒ kɔ̀bɔ́ ò càn du ò dwã bɛ́ ; Sə wɔ́ bə̀kɔ́n yil ǹ zɛ̃̀ ń lyə́r sɛ̃́-cǒ dwí dõ ò n’ô ce byǎ námməywààlɛ mɔ́ ? ²² Má ǹ gə yà ǹ zɔ gɔ̀n-shɔ̀rhɔ́ ń mə́ shɛ nɛ̃̌ myɛ, má ǹ gə yà ǹ súlí tàl nánzhəzhɔ̌ nɛ́ myɛ, ǹ lwɛlɛ rɛ́ y’à m’a gwẽ̌ zhì à yé né, wɔ́ Bə-zhɔ-zhe, ń wɔ́ Cǐnnə mó, ń zɔ̀m rə̀myɛ́. ²³ Sə wɔ́ bə̀kɔ́n yil ǹ nə́ mà ń zɛ̃̀ ǹ zhe : À yə̀ à cìn jìmdi ce gaga, à yə̀ Baalɛbá kwã nɛ́ dùr gaga mɔ́ ? Sə gwɛ̃ ń nyǐ ǹ nə̀-gwárá nɛ́ rə̀ pyě vwaalɛ́ wa, Yómó nã́nyɔ̃̀, ǹ já ǹ bə tum zhe wɔ́ dɛ̃̌ dǔr yómde námbyaálɛ́ kwã nɛ́ dúdú è wɔ́ ǹ tum, shɛ̀nɛ́ ń zwẽ kɔn rɛ́ tɛ̀bɛ́ ǹ wɛ̀rhɛ́ mɔ́ nyí ! ²⁴ Ǹ wɔ́ gɔ bə̀nə-nyɛ̀, è myɛ̀rhɛ̀ gɔ-elũ èpòlò w wẽ́ zhəl, bə̀nə-byesé jíl shəl n’ê jí myǐn è wẽ́, wɔ́ mɔ̌ lò ń wɔ̌ ń mà cə̀r è yé né, è yẽ̌ è shíl ré vǔr ne ? Rə̀myɛ́ ce, è cànà y gə yú wə́, lyì bí byɛ̀bɛ́ bə̀ n’ê pyà y mɔ́ k’ê t’â lyɛ̀ɛ̀ bə̀ cìn ǹdə́ è nɔ yé. ²⁵ Zhǐ cǐm, è gə də̀ rə̀myɛ́, ǹ m’a púrí ǹ nə́ ǹ zhə̀l tɛ̃́ ǹdə́ ǹ nèrh nánfò, ǹ bə̀k’á yẽ̌ ǹ byã mə̀gɔ̀lɔ́ w nɛ o kú yé ! Ǹdə́ rə̀myɛ́ ga yírh w ǹ nə́ wə̀lə̀ : À só dwə́ né dwã bɛ́ yə né, à n’â yǎl a dùr nə̀ kwã nɛ́. ²⁶ Nyǐ cìzhìl la Esərayɛl kɛ̀lɛ́ y lyì bí, ǹdə́ bə̀ pyǎ bɛ́, ǹdə́ yó-cìnə́ bé, ǹdə́ bə̀ vwĩ̀-zwə́lnə, ǹdə́ bə̀ nyì-zwennə bé zal ǹdə cìzhìl gə́ y’a zə ŋwɔ̀l-bal mɔ̀bɔ́ bə̀ zɔ mɔ ǹdə́ ǹ nə́ ń ŋwɔ̀l mɔ́ nɛ́ ta. ²⁷ Bə̀ n’ê wə̀l dɔ̌ nɛ : Ǹ wɔ́ à da ! Bə̀ n’ê wə̀l nə́kulu myɛ nɛ : Ǹmyɛ́ ǹ pɔ nɛ myə̌l ! Bə̀ bə̀ pyìrhí bə̀ kwã bə zǎ nɛ, bə̀ k’ê t’â nyǐ à yó w yé. E jà zwini gə tú rə̀ zhe be, bə̀ n’ê wə̀lə̀ : Zɛ̃̀ tɛ̃́, ń zwẽ nə́ba ! ²⁸ È nə wɔ́ yẽ̀ ǹ yə né ǹ wɛ̀rhɛ́ ǹ cìn ní mú ŋwɛ́nɛ́ rə̀myɛ́ yi ní mú ? Bə̀ yə né nə̀myɛ́ mɔ́ gə wɔ̌ sə nə zɛ̃̀ tɛ̃́ nə zwẽ mó ǹ zwini rí wẽ́ ! Ǎ Zhidə, nyǐ ǹ zhe yə nánzhəzhɔ̌ ǹdə cɛmɛ ta wɛ̀ ! ²⁹ Sə è nə wɔ́ bə̀kɔ́n yil á n’á cĩ́ yò à yó w mó ? Wɔ́ ámyɛ̌ gakó á yə̀ zhə̀n cìnə́ yàl ǹdə́ nɛ yé, wɔ́ Bə-zhɔ-zhe ń zɔ̀m rə̀myɛ́. ³⁰ Wɔ́ nánfò yil à mà á byǎ bɛ́ nà ; nyǐ bə̀ yə̀ còrhò-tum ri à pɔ bɛ mɔ́ kwè ǹdə yò ta yé ; Á búlə́ shù w gu á nyì-zwennə bé ǹdə bwar-cɔ̀lɔ̀ ta. ³¹ Ámyɛ̌ lũ w kɔ̀bɔ́ lyì, cili-nə Bə-zhɔ-zhe zɔ̀mɛ̀ rɛ́ sono ! À nə yàl gɔ-elũ èpòlò Esərayɛl yil nà, ráá à yàl tənà námbyṹ fúrí è yil nà ? Sə wɔ́ byè yil à dwí rí zɛ̃̀ rə̀ zhe : Nə́ cǐ nə́ cìnə̀, nə́ k’é t’á la kwã̀ɔ̃̀ nə́ vò ǹ sono mó ? ³² Kɛ̃-byǐ nə y’a swě è bò wẽ̀ yò nà, dɛ̃ tɛ̀bɛ́ kɛ̃-byǐ n’ê shə́r ń la ń byal jú mú, è y’a swě ń gàndɛ́ lyẽẽ́ y yò nà ? Sə nyǐ à dwí rí swě à yò dwã nánzhəzhɔ̌ nə̀ bə yó zhe yé. ³³ Ǹ gə́ j’á lá ǹ sɔ́msɛ́ ǹ mə́ ǹ pyà kɔn dɛ̀bɛ́ ǹ só mó yilə ! Bá numbyíní gu myɛ cìcì mú, ǹ nə́ pyà ǹ mə́ ǹ wɛ̀rhɛ́ rɛ. ³⁴ Nyǐ nə̀mwà bɛ́ bə̀ yə̀ zal ǹdə́ bə̀ twĩ̀ yò mó, ǹ ló bə̀ jal tɛ̃́, mə j’a lyɛ̃ mə ló ǹ gàndɛ́ nyə́ né ne. ³⁵ E jà ǹdə́ rə̀myɛ́ ga, ǹ nə́ ǹ wə̀lə̀ : Zhə̀nà, àmyɛ́ bə dóó zhe yé ! Ce Yi lyim t’â la nɛ yú yé. Sə lwar b’àmyɛ́ m’a cĩ́ yò ǹ yó wə, Ǹ gə́ wə̀l bə̀ : À yə̀ yə̀-bəlɔ̀lɔ́ wɛ̀rhɛ́ gaga mɔ́ yilə. ³⁶ Wɔ́ bə̀kɔ́n yil ǹ bə bwàl ǹ sɔ́msɛ́ lyə́r mó ? Nyǐ wɔ́ Ezhibti ní ǹ cìzhìl ré la nɛ́ shú, ǹdə rə̀ gə́ shí Ashəri ní mú ta. ³⁷ Ǹ mà ń zhì gàà mɔ́ myɛ ń zhĩ ǹ jɛ̀rh ǹ yó w ń mə́ du ; Bə̀ Bə-zhɔ-zhe zhɔ̃̀ lyì bí byɛ̀bɛ́ ǹ zhe bə̀ zhə̀n mɔ́, ce ǹ kaka t’â la nyí zõ bə̀ sono yé.