¹ Nyǐ Zheremyi zɔ̀mà nɛ́ ń zɔ̀m mɔ́. Zheremyi da yà ń yíl Yələca. Yələca yà ń wɔ́ vwĩ̀-zwə́lnə, vwĩ̀-zwə́lnə bé byɛ̀bɛ́ bə̀ y’à jě Anatɔtɛ nɛ́ mɔ́ mə̀dù. Anatɔtɛ y’à wɔ́ Bɛ̃zhamɛ tənà y cɔ òdù. ² Wɔ́ Amɔ̃ byǐ Zhɔzhaasɛ ń yàl Zhidə pyɔ̌, ń pyɛ̀lɛ̀ rɛ́ jú byinə shí ǹdə́ nə̀tɔ̀ byin rí, Bə-zhɔ-zhe zɔ̀m ǹdə́ Zheremyi, ³ Bə-zhɔ-zhe gwẽ̌ cə̀ə̀le n zɔ̀m zɔ̀m ǹdə́ mɔ, Zhɔzhaasɛ byǐ Zhowəcim ń yàl Zhidə pyɔ̌ mɔ́ myɛ pyɛ̀lɛ̀ rɛ́ jú yi ní kɔn m’e yí Sədəcaasɛ, ńmyɛ yà ń wɔ́ Zhɔzhaasɛ byǐ. Bə-zhɔ-zhe já n zɔ̀m zɔ̀m ǹdə́ Zheremyi kɔn m’e yí Sədəcaasɛ pyɛ̀lɛ̀ rɛ́ yó-gurə́ yə́, rə̀ byinə shí ǹdə́ rə̀dù byin rí cànsɛ sə̀nu nyǎ y wẽ́. Wɔ́ rə̀myɛ́ yi ní bə̀ pwà Zhərəzalɛm lyì bí bə m’e vò yómré jè y mó. ⁴ Zheremyi wə̀lə̀ : Bə-zhɔ-zhe zɔ̀m ǹdə́ nɛ n wɔ̀ : ⁵ y’à dámǎ à yě ǹ pár ǹdə́ à y’à gwẽ̌ yə̀ mɔ́ mwɛ ǹ ná pwǐ w yé, ǹ la ń mə́ du ǹ ná wẽ́ mó, à y’à cír mó a cĩ́ ǹ la yə̀ Yi nyì-zwennə tənèsé gakó yilə. ⁶ A lyár a wɔ̀ : Ǎ ! Cǐnnə, Bə-zhɔ-zhe ! à wɔ́ Bə̀sɔ́bwɛ̀lɛ́, nyǐ à nyí yə̀l zɔ̀mà gaga yé. ⁷ Bə-zhɔ-zhe zɛ̃̀ n wɔ̀ nɛ : Ǹ bə̀ká wɔ̀ : à wɔ́ bə̀sɔ́bwɛ̀lɛ́ yé. Nyǐ ǹ m’a pɔ̃́ nyí, ń mə́ vò lyì bí byɛ̀bɛ́ à la mɔ́ bə̀ sõ tũ̌ mú sono, ń byili nyí rí tɛ̀bɛ́ à pɔ mɔ́ rə̀ nyí bə̀ ǹ byili bi mú gakó. ⁸ Ǹ bə̀ká dùr lyì bí bə̀myɛ́ mɔ́ ywẽ gaga yé, bə̀ nyǐ à ŋwɛ́nɛ́ ǹdə́ mɔ́, à la mɔ́ vwǎrh, wɔ́ Bə-zhɔ-zhe ń zɔ̀m rə̀myɛ́. ⁹ Rə̀myɛ́ kwã nɛ́, Bə-zhɔ-zhe zɛ̃̀ n zə ń jɛ̃̀ n dwə̀rh à nyí rí ni ; n wɔ̀ nɛ : Nyǐ nyɔ̀nɔ̀, à co à zɔ̀mà nɛ́ ǹ nyú wə. ¹⁰ Nyǐwé, zà à cír mó a pɔ̃́ ŋwɔ̀nɔ́ ǹ la ń cìní tənèsé ǹdə́ pyə̀-tənèsé gakó, ń mə́ ǹ mùrə́, ǹ mə́ ǹ pyirh ǹ lwé tɛ̃́, ǹ mə́ ǹ cɔ̀, ǹ mə́ ǹ mà ǹ lwe, ǹ mə́ ǹ zhele. ¹¹ Bə-zhɔ-zhe kə́ n zɔ̀m ǹdə́ nɛ, n byẽ̀ ne n bwə̀rh n wɔ̀ : Zheremyi, wɔ́ bə̀ kɔn ǹ nə mɔ́ ? A lyár a wɔ̀ : À nə aməjé jɛ̃̀. ¹² Bə-zhɔ-zhe wɔ̀ nɛ : Ǹ nyǐ cɛ̀nɛ̀, èta, à m’a cili à zɔ̀mɛ̀ rɛ́ sono, a ce rə pyìrh. ¹³ Bə-zhɔ-zhe kə́ n zɔ̀m ǹdə́ nɛ e twər rə̀lyè nyǎn rɛ́ n wɔ̀ : Wɔ́ bə̀kɔn ǹ nə mɔ́ ? A lyár a wɔ́ : À nə nə́kwɛ́nɛ́ è yélé kúl wə, bə̀ tó jə́-gwã̀ sõ bə ce myǐn è kùr w è n’ê shɛ̃̀. ¹⁴ Bə-zhɔ-zhe kə́ n wɔ̀ nɛ : Lwar bə̀ wɔ́ lũ jə̀-gwã̀ sõ cɛ y cɔ̀ mɔ́ la nɛ́ shú mə b’e jòm tənà y lyì bí gakó yó. ¹⁵ Nyìwé, à m’a byẽ̀ lũ jə̀-gwã̀ sõ pyə̀-tənèsé dwə́ né, nə bà, dwí rə̀dù gakó cĩ́ rə̀ pyɛ̀lɛ̀ də̀-gwã̌ y Zhərəzalɛm bwə̀rsé nyí ni, nə jòm nə kə́kɛ́lɛ́ ò byílsí ǹdə́ Zhidə cɛmɛ nɛ́ gakó nə ce dwã wa. ¹⁶ À m’a zɛ̃̀ a pə bɛ còrhò-tum, bə̀ gə́ yẽ̌ ne bə twĩ̀ lwɛlɛ, bə̀ gə́ ju wẽ̀ rə̀ lwẽ́ nã́nyə̀nyɛ̀lɛ́ bə pə yə dwã nɛ, bə̀ gə́ wùlì tɛ̃́ bə̀ cèrhé wẽ̀ tɛ̀bɛ́ bə̀ zɔ bə̀ cìcì jɛ̀rh bə mɔ mɔ́ gakó mó yilə. ¹⁷ Sə è gə wɔ́ ǹmyɛ́ yilə, lyẽ ǹ cã̌-tɔ̀nɔ̀, ń zɛ̃̀ tɛ̃́, ń byili bi kɔn rɛ́ tɛ̀bɛ́ à pɔ rə̀ nyí bə̀ ǹ byili bi mú. Ǹ bə̀ká kəkə bə̀ yé né yé, mùnì ga à bə̀k’a ce ń kəkə bə̀ yé né yé. ¹⁸ Sə nyǐ kɔn zhì zà dɛ̃ rɛ́, à n’â pɛ mɔ́ ŋwɔ̀nɔ́ tənà y yó, ń yə̀ ǹdə cɔ ò lù byíl-fwɛ̀lɛ̀ dɛ̃̌dɛ̃̌ bə m’e kə́lɛ́lɛ́ w ta, ǹ yə̀ ǹdə cɔ̀bɔ́ yi rə̀ cìì tɛ̃́ ta, ń yə̀ ǹdə kàmɔ byíl-fwɛ̀lɛ̀ ta, ń bú ǹdə́ Zhidə pyǎ bɛ́, ǹdə́ ò yó-cìnə́ bé ǹdə́ ò vwĩ̀-zwə́lnə bé, ǹdə́ tənà y dwí rí. ¹⁹ Bə̀ m’a zɛ̃̀ búlə́ ne ǹdə́ mɔ́, sə bə̀ t’â la mɔ́ ŋwɔ̀nɔ́ yé ; bə̀ à ŋwɛ́nɛ́ ǹdə́ mɔ́ à la mɔ́ vwǎrh, wɔ́ Bə-zhɔ-zhe ń zɔ̀m rə̀myɛ́.