¹ Bə-zhɔ-zhe zɔ̀m èta n wɔ̀ : Nyǐ à m’a ce zho kɔ̀bɔ́ ò n’ô zhìlì cɛ zɛ̃̀ Babyəlɔnɛ ǹdə́ Kalədɛ lyì bí yó. ² Zwini rí dɛ̃ rɛ́ yùwə̀, à m’a twĩ̀ lyì bə shí lũ cə-yala gakó w bə b’e bú ǹdə́ Babyəlɔnɛ nɛ́, bə pwà tənà y wẽ̀ ré bə yẽ̌ y e pyẽ̀ nánfò ǹdə bə̀ gə́ y’a cèlè jíjí zho zə rə̀ púúlí o lyɛ̃ mɔ́ ta. ³ Babyəlɔnɛ tənà y lò mɔ̀bɔ́ ń zhẽ̌ twã ń la tɔ gakó, sə bə tə rə̀-ná-cí ǹdə́ twã, sə bə̀ bə̀ k’a yẽ̌ è lò mɔ̀bɔ́ ń tə̀ cɔ̀bɔ́ kàmə̀zwǐ ń zù mú yil ń nə́ ń zhẽ̌ ń cìn dɛ̃̌ mó myɛ nɛ yé ! Sə bə̀ bə̀k’á yẽ̌ è tənà y ébwá-dàlá bɛ́ nɛ bə lú yé ! Gu-nə è shə̀dɛ́ɛ́sɛ́ gakó sə jé tɛ̃́ ! ⁴ È lyì bí byɛ̀bɛ́ bə̀ cɛ̀mɛ̀ mɔ́ m’a pyẽ̀ tɛ̃́ bə ləlɛ́lɛ́ Kalədɛ tənà y wa. Bə̀ cùù rí myɛ m’a pyẽ̀ tɛ̃́ Babyəlɔnɛ tənà y sɔ́msɛ́ yó sə sú ! ⁵ Bə̀ nyǐ Esərayɛl ǹdə́ Zhidə Yi rí, Bə-zhɔ-zhe mó ń cǐ jàn cìnə́ bé gakó mó, yə̀ bɛ tɛ̃́ yǎrh gaga yé, sə wɔ́ Kalədɛ lyì bí tənà y è sú ǹdə́ lwɛlɛ rɛ́ mɔ́ è bú ǹdə́ Esərayɛl Yi rí. ⁶ Zɛ̃̀-na á du Babyəlɔnɛ nɛ́ á dùr, lò gakó zwẽ á myə̌l ré, mùnì ga á bə̀k’á tó á jì bə̀ tənà y è la cɔ̌ mɔ́ wẽ́ yé ! Bə̀ nyǐ yi rí tɛ̀bɛ́ wɔ́ Bə-zhɔ-zhe jim cṹ yi ; ń mà n càrh Babyəlɔnɛ nɛ, ǹdə tumə né nyɛ̀bɛ́ ò twĩ̀ mú ta ⁷ Babyəlɔnɛ yàl sánə́má kǎzɔ̌m Bə-zhɔ-zhe jɔ̃̀ wa ! Mə̀ y’à n’ê zal lũ w púlə́púlə́, tənèsé nyɔ̀ mə̀ də̀vɛ̃́ yá : Rə̀myɛ́ ce sə zɛ̃̀ sə n’ê nyɛ̃̌. ⁸ Sə Babyəlɔnɛ j’a zhì zhì o zɛ̃̀ o tu o bɔbwɛlɛ. Zə-na w á də ò nyəla nɛ́ á cĩ́ cə́m né ; dɛ̀ga ò g’o m’a wárh ! ⁹ Nyǐ nə́ pyà Babyəlɔnɛ shulu, s’o yə̀ wárh yé. Rə̀myɛ́ ce, yẽ̌-nə nə́ yẽ̌ wə, sə lò gakó ká n kwɛ̃̀ n vò ń tənà y wa ; B’ò còrhò-tum rí yú dɛ̃̌ yi w bəban rɛ́ wa. ¹⁰ Bə-zhɔ-zhe byili ń cángá tumə né nə́myɛ̌ yilə, rə̀myɛ́ ce, bà-nà nə́ vò nə́ bwə̀l Bə-zhɔ-zhe, nə́ Yi rí tũ̀-fwààlɛ́ yò nə́ byili Shənyɔ̃ nɛ́. ¹¹ Dwèlè-nə á swə̌ né nyə́ né nə du nánsə́sɔ́msɛ ! Zwǐ-nə á cɔ̌brɛ kàmə̀zwǐsí, nyǐ Bə-zhɔ-zhe co surhə Mədi pyǎ bɛ́ wẽ́, bə̀ ń nə́ ń yǎl n tó bə̀ dɛnnɛ n cɔ̀ Babyəlɔnɛ tənà yá ; bə̀ rə̀myɛ́ wɔ́ Bə-zhɔ-zhe jim rí cṹ. ¹² Zɛ̃̀-na á zhẽ̌ ku w ò n’ô byili b’ǎ la Babyəlɔnɛ byílsí wǔr mó á ce dɛ̃̌ ! Ce-nə yùlù jààsɛ́ zhì kẽkẽ, cĩ́-nə byɛ̀bɛ́ bə̀ n’ê yìlì si mú ní bə zhì bə̀ n’ê yìlì, s’á pyà jàà á shèè á cĩ́ lyì ní bə̀ n’ê dɛ̃̀ lò gə jàr ń tu bə̀ jɔ̃̀ w sə bə za ! Bə̀ nyǐ Bə-zhɔ-zhe kwè nyí ń la kɔn rɛ́ dɛ̀bɛ́ ń bwə̀l n byili Babyəlɔnɛ tənà y lyì bí yil mó wɔ̀rhɔ́. ¹³ Babyəlɔnɛ, ǹmyɛ́ mɔ̀bɔ́ ǹ jě nàná nánzhəzhɔ̌ nyí ni mú, ǹmyɛ́ mɔ̀bɔ́ ǹ zhe nə̀cɛ̀ndɛ nánzhəzhɔ̌ mɔ́, ǹ yú ǹ yó gurə́ yə́, kɔn rɛ́ dɛ̀bɛ́ ǹ yà ǹ nə́ pyà ǹ cĩ́ ǹ tá ǹ swí rí mú yú rə̀ zhɔ̌ mɔ́ jàà wa. ¹⁴ Bə-zhɔ-zhe zə ń cìcì mú n bwəl rə̀ nyí n wɔ̀ : Zhə̀nà, à m’a ce ń nə numbyínsi nánjə̀jóló ǹdə səsɛ̀mɛ̀ ta, Sə bə̀ m’a zɛ̃̀ bə mà búlə́ búbwéé ǹ shò-kwã nɛ́. ¹⁵ Mɔ̀bɔ́ ń wɛ̀rhɛ́ cɛ y ǹdə́ ń jàn rɛ́ nánfɔ̀lɔ̀ w mɔ́, mɔ̀bɔ́ ń zə ń lárma mɔ́ n ce lũ w zhì ò jàà y w mɔ́, ń zɔ ń surhə né n lɛ̀lɛ̀ dɛ̃̌ yi rí n cĩ́ dɛ̃̌ rə̀ zhǐ mú, ¹⁶ ń zɔ̀m, nàná bɛ́ j’a mɔ dwã nɛ dɛ̃̌ yi wə, ń ce bə́ban n’ê shí lũ kùr w rə̀ dwi, ń ce dwà n’ê lyə́lyɔ̌ è nywɛ̀, ń nə́ ń ce zho w n’ô shí ò jàà w ò dwí. ¹⁷ Ń lwar mɔ́ mə̀myɛ́ mɔ́ ce, numbyíní gakó jǐrh námməyuru. Cìzhìl zɛ̃̀ rə̀ zhe lò mɔ̀bɔ́ ń zùrhì yi mú myɛ gakó : Bə̀ yə né nə̀myɛ́ mɔ́ gakó wɔ́ kɔma wẽ̀, rə̀ t’â shǐrh yé. ¹⁸ Rə̀ wɔ́ wẽ̀ nánfwə̀r, cìn-jə́jɔ̀rɔ́ tum ; rə̀ còrhò-tum rí dɛ̃ rɛ́ gə yúwə́, rə̀ m’a jé tɛ̃́. ¹⁹ Mɔ̀bɔ́ ń wɔ́ Zhakobɛ cəl ré mó, də̀ ǹdə rə̀ ta yé ; bə̀ wɔ́ ńmyɛ̌ ń wɛ̀rhɛ́ kɔn gakó, bə̀ wɔ́ Esərayɛl kwálá y è wɔ́ ń cəl kɔna. Ń yil ré wɔ́ Bə-zhɔ-zhe, Cǐnnə mó mɔ̀bɔ́ ń cǐ jàn cìnə́ bé gakó mó. ²⁰ Bə-zhɔ-zhe wò Babyəlɔnɛ nɛ : À zɔ mɔ́ a m’a yə̀ mə̀rtó, búlə́ ku à jɔ̃̀ wa. À zɔ mɔ́ a m’a mà tənèrh a bɔbwɛlɛ. À zɔ mɔ́ m’a mà pyǎ tənèrh a cɔ̀. ²¹ À zɔ mɔ́ a m’a mà shəshərh ǹdə́ sə̀ jòmnə a ji tɛ̃́ sə bɔbwɛlɛ ; À zɔ mɔ́ a m’a mà eshə-vwɛ̃́tur ǹdə́ ò jòmnə a ji tɛ̃́ a bɔbwɛlɛ. ²² À zɔ mɔ́ a mà bal ǹdə́ kɛ̃ a jí tɛ̃́ a bɔbwɛlɛ ; À zɔ mɔ́ a m’a mà náncə-ezhɛ̀nɛ́ ǹdə́ bə̀sɔ́bwɛ̀lɛ́ a ji tɛ̃́ a bɔbwɛlɛ ; À wɔ mɔ́ a m’a mà bal-byǐ ǹdə́ kɛ̃-byǐ a ji tɛ̃́ a bɔbwɛlɛ. ²³ À zɔ mɔ́ a m’a mà vwã̌-ènɔ̀n ǹdə́ ń vwàmá a ló tɛ̃́ a bɔbwɛlɛ ; À zɔ mɔ́ a m’a mà vwə̀lna ǹdə́ ń nə̀-vwààlɛ a ló tɛ̃́ a bɔbwɛlɛ ; À zɔ mɔ́ a m’a mà yó-cìnə́ ǹdə́ lyì-fwààlɛ a ló tɛ̃́ a bɔbwɛlɛ. ²⁴ À m’a càrh lwɛlɛ rɛ́ tɛ̀bɛ́ Babyəlɔnɛ ǹdə́ Kalədɛ lyì bí wɛ̀rhɛ́ Shənyɔ̃ nɛ á yírh w mó gakó yilə. Wɔ́ Bə-zhɔ-zhe ń zɔ̀m rə̀myɛ́. ²⁵ Babyəlɔnɛ, pyɔ̀ ò n’ô mà ò cɔ̀ mɔ́, nyǐ èlǎsɛ̃́ wɔ́ ǹmyɛ́ nɛ à pyìrhí à yé a zǎ, ǹmyɛ́ mɔ̀bɔ́ ǹ nə́ ń cɔ̀ lũ w púlə́púlə́ mó ! À m’a cèlè à jɛ̃̀ ǹ yó, a zə mɔ́ ń shí pyàr rɛ́ yə́-pyɛ̀lɛ́ w ń bə̀ tɛ̃́, a ce ń jǐrh pyɔ̀ ò jú myǐn o jǐrh myìn-cala. ²⁶ Bə̀k’ê t’â la jì jàn nə́kulu kú bə vùr ò wẽ́ ráá bə̀ kù jì kùr ju nə́kulə bə vùr ò wẽ́ yé. Ǹ jàà y m’a jǐrh wu-zhùlù jàà. Wɔ́ Bə-zhɔ-zhe ń zɔ̀m rə̀myɛ́. ²⁷ Zẽ̌-nə ku w ò n’ô byili bə̀ búlə́ zɛ̃̀ nə̀ la bú mú a ce dɛ̃̌ tənà y wa ! Wúl-nə pɔ́lá tənèsé wə ! Tɛnɛ-na tənèsé lyì bí bə zɛ̃̀ bə bú ǹdə́ Babyəlɔnɛ, Byẽ̌-nə Araraatɛ ǹdə́ Myinni ǹdə́ Ashəkənaazɛ tənèsé pyǎ bɛ́ lyì bí dwã yó, á ce bə zɛ̃̀ búlə ne ǹdə́ cɔ wa ! Cír-nə shə̀dɛ́ɛ́sɛ yó-cìnə́ á ce bə zhì bə̀ bú ǹdə́ cɔ wá ! Ce-nə shəshesé pú pú dwã nɛ sə̀ n’ê zhə̀l sə̀ la ǹdə səsɛ̀mɛ̀ nə̀ cìnì ǹdə dwà nɛ ta mɔ́, á la búlə́ né bú ! ²⁸ Tɛnɛ-na Mədi tənà y pyǎ bɛ́ ǹdə́ bə̀ yó-cìnə́ bé ǹdə́ bù-kárna bɛ́ ǹdə́ jààsɛ́ shɛ̀bɛ́ bə̀ cǐ mú nyí rí gakó lyì bí bə du búlə́ né yilə ! ²⁹ Cɛ y zɛ̃̀ è n’ê domə, è n’ê zhízhǐ ; bə̀ còrhò-tum rí Bə-zhɔ-zhe byili bə̀ ń la Babyəlɔnɛ nɛ wɔ̀rhɔ́ mɔ́ n’ê pyìrhə̀ ; ń mà n ce Babyəlɔnɛ tənà y jǐrh gɔ-elũ èpòlò lòlò tá ń la ò wẽ́ jǒm yé. ³⁰ Babyəlɔnɛ búlə́ kàndar rɛ́ gɔ rə yẽ̌ búlə́ né bú mú ni, rə vò rə shèè jààsɛ́ sə̀ lù sə kə́kɛ́lɛ́ mɔ́ wẽ́, rə̀ jàn rɛ́ zhɛ̀ rə̀ jǐrh ǹdə kana ta. Bə kə́ bə̀ jìsí bwə̀ə̀lé sàfɔ̌r rɛ́, bə ji bə̀ kǎlsɛ́ myǐn. ³¹ Lyì n’ê dùr bə̀ lyɛ̃ dwã, byɛ̀bɛ́ bə̀ zə nyí rí bə̀ la vò bə cĩ́ mú myɛ n’ê dùr bə̀ jəl dwã, mùnì ga bə yí bə cĩ́ Babyəlɔnɛ pyɔ̌ nɛ, bə̀ nyǐ lyì tó ń cɔ w jààsɛ́ gakó bə zwẽ wə. ³² Bə cə̀r bwǐsí byɛɛ́sɛ́ lò tá ń lyɛ̃ yé, Bə ji vwal-gɔ w myǐn, ywẽ nánfɔ̀lɔ̀ zhe Shə̀dɛ́ɛ́sɛ́. ³³ Wɔ́ Bə-zhɔ-zhe, Esərayɛl Yi rí rə̀ cǐ jàn cìnə́ bé gakó mó ń zɔ̀m rə̀myɛ́. Ǹ wòwə̀ : Babyəlɔnɛ bə̀kɔ́ mɔ́ nyɛ̌ ǹdə tuwə bə̀ kwɛrhɛ è zhǐ è n’ê dɛ̃̀ jòró w la o yí ; sə kɔn m’a yə̀ námpɔ́lɛ́ y ǹdə́ jòró w yi yúwə́ ń yilə. ³⁴ Nyǐ Babyəlɔnɛ pyɔ̌ Nabəkɔdɔnɔzɔɔrɛ zɔ nɛ n dɔ̃̀, n cɔ̀ nɛ ; n ce à zhǐ nánfò ǹdə nə̀zhĩ̌ nánkòló ta ; n lyìl ne n ce ń wẽ́ ǹdə wɔ́ bǔ-ku ò lyìl kɔn ta. N dɔ̃̀ à nàmá bɛ́ byɛ̀bɛ́ bə̀ càn dɛ̃́dɛ̃́ du mú n ce ń wẽ́ ń sùlú sú pyáám. N zɛ̃̀ n jì ni. ³⁵ Bə̀ jàn tumə né bə̀ wɛ̀rhɛ́ nɛ mɔ́ ǹdə́ à yala nɛ́ bə̀ zɔ nɛ bə gõ̀ gõ̀ mó, yò w jǒm Babyəlɔnɛ yó wə, Wɔ́ lò mó mɔ̀bɔ́ ń ŋwɛ́nɛ́ Shənyɔ̃ nɛ mɔ́, ń zɔ̀m rə̀myɛ́. Bə̀ à jal mɔ́ yò w jǒm kalədɛ lyì bí yó. Wɔ́ Zhərəzalɛm ń zɔ̀m rə̀myɛ́. ³⁶ Wɔ́ rə̀myɛ́ yilə, à m’a bú ǹ yilə, a cĩ́ ǹ jim ! À m’a ce Babyəlɔnɛ nə̀-fɔ̀lɔ̀ w wĩ nánkùlù, a ce ò nə̀-bùlsí myɛ shĩ. ³⁷ Babyəlɔnɛ m’a jǐrh jì-bwə̀r, nə́kulə nə̀ pyě dwã yó púl ; gɔ-kǔlsi n’ê twí sə̀ cĩ́ sə̀ pwə́lə́ gàà mɔ́, o jǐrh wu-zhùlù jàà lyì n’ê mɔ̀nà ; lòlò tá ń la ò wẽ́ jǒm kə́kò yé. ³⁸ Babyəlɔnɛ lyì bí m’a zɛ̃̀ bə tó dwã bə̀ n’ê swər ǹdə bwaarɛ ta, bə̀ n’ê ce sɔ̀ ǹdə bwar-byǎ ta. ³⁹ Bə̀ gə tú bə̀ dom dom bə lyɛ̀ɛ̀, kùjú jú shil zɛ̃̀ è zhe be, rə̀myɛ́ yi ní, à m’a zɛ̃̀ a pə bɛ sɛ̃́ bə nyɔ̀ mə zə bɛ, bə dɛ̀ɛ̀ jan rə zù bi, bə̀ pyẽ̀ tɛ̃́ ǹdə wɔ́ cú bə̀ cù ta, e yə̀ jan tɛ̀bɛ́ bə̀ dɛ̌ bə̀ k’ê t’â la bùrhù gaga yé. Wɔ́ Bə-zhɔ-zhe ń zɔ̀m rə̀myɛ́. ⁴⁰ A zə bɛ a vò bə̀ gu jàà wa, ǹdə́ bə̀ gə́ y’a zə pyì-bwǎlsɛ ráá pyììsi ráá bə̀-cǐlsi bə m’e vò sə̀ gu jàà w mɔ́ ta. ⁴¹ Wɔ́ bə̀kɔ́n dwí ndə́ tɛ̀bɛ́ èta mɔ́ ! Nyǐ bə̀ zwẽ Shəshaabɛ cɔ wá, cɔ w kɔ̀bɔ́ ò yil ré y’à du lũ w púlə́púlə́ wẽ́ mó, bə̀ zwẽ wə. Wɔ́ bə̀kɔ́n dwí ǹdə́ tɛ̀bɛ́ èta mɔ́ ! Bə̀ cɔ̀ Babyəlɔnɛ tənèsé gakó cəcəl wə ! ⁴² Nə̀-fɔ̀lɔ̀ w nɛ̃̌ mɔ́ zɛ̃̀ mə du tɛ̃́ Babyəlɔnɛ nɛ́ : Mə̀ fùù fùù mə mɔ́lɛ́ Babyəlɔnɛ. ⁴³ Ò cɛmɛ nɛ́ cɔ̀, o jǐrh jə́, èpòlò dúdú. O jǐrh tənà kɛ̀bɛ́ lòlò kə́ ń tɛ̀nɛ́ è wẽ́ yé, lòlò myɛ tá ń tó è wẽ́ ń lyɛ̃ yé. ⁴⁴ À m’a pə còrhò-tum Bɛɛlɛ nɛ, Babyəlɔnɛ nɛ́ mɔ́, à m’a vùr kɔn rɛ́ tɛ̀bɛ́ ń yà ń lyìl mó ń nyú wə, tənèsé lyì bí bə̀ y’à n’ê twí ń sõ mó k’ê t’â bàn yé. Nyǐ Babyəlɔnɛ byílí y cìcì mú ló tɛ̃́ ! ⁴⁵ À dwí rí lyì, du-nə è wẽ́, lò gakó sə́ dùr ń zwẽ ǹ cìnə̀, mùnì ń lú Bə-zhɔ-zhe lyim rí yé né ! ⁴⁶ Á wun bə̀k’a zɛ̃̀ yé, á bə̀k’á kəkə sɔ̀ w kɔ̀bɔ́ ò zɛ̃̀ sú tənà w mɔ́ yil yé ; bə̀ nyǐ sɔ̀ la co byin rí tɛ̀bɛ́ wẽ́, byin rí tɛ̀bɛ́ rə̀ bàn mɔ́ myɛ wẽ́ sɔ̀ dõ la co, jàn tumə la tũ̌ tənà y wa, pyɔ̌ mà n zɛ̃̀ n bú ǹdə́ ń dõ pyɔ̌. ⁴⁷ Rə̀myɛ́ ce, nyǐ dɛ̃ ŋwɛ́nɛ́ rə̀ bànà, à m’a pə còrhò-tum Babyəlɔnɛ yə né ne, sə cìzhìl m’a zɛ̃̀ rə pú tənà y gakó ne ; è lyì bí m’a cì bə ləlɛlɛ tɛ̃́ tənà y cəcəl wə. ⁴⁸ Lyì bí byɛ̀bɛ́ bə̀ n’ê cɔ̀ mɔ́, m’a shí lũ jə̀-gwã̀ sõ bə b’e bú ǹdə́ Babyəlɔnɛ. Rə̀myɛ́ yí ní, bə̀ b’a nyɛ̀ɛ̀ bɛlɛ jú wu-nyɔ̃̀ nwíísi Babyəlɔnɛ cɔ̌ mɔ́ yilə. Wɔ́ Bə-zhɔ-zhe ń zɔ̀m rə̀myɛ́. ⁴⁹ Esərayɛl cùùri, nyǐ-nə Babyəlɔnɛ myɛ la tu ǹdə́ è gə́ ce Esərayɛl myɛ tənà y gakó lyì bí cùùrí ló tɛ̃́ nɛ́ ta. ⁵⁰ Sə ámyɛ̌ byɛ̀bɛ́ á dùr á lú búlə́ shù w yé né mó, zhəl-nə, á bə̀k’á jíjírhí yé ! Dǔr-nə á vò á jòm jàà kɛ̀bɛ́ è nyɛ mɔ́ wa, s’á bù Bə-zhɔ-zhe yò, sə Zhərəzalɛm yò bə̀k’a shə́r á wẽ́ yé ! ⁵¹ Nə́ gə y’ǎ j’â nyɛ̀ɛ̀ tùùrhí bə̀ y’à n’ê tùrh nə́ba mɔ́ gakó mɔ́ ce, nə́ y’ǎ k’é yə̀l nə́ gə́ n’é wɛ̀rhɛ́ nɛ́ yé, cìzhìl y’a zhe nə́ba, ǹdə́ nə́ gə nɔ zhələ bé bə̀ tú bə zù Bə-zhɔ-zhe jì y jàà y náàcɛ̀nɛ́ y wẽ́ mó yi ní. ⁵² Rə̀myɛ́ yilə, nyǐ Bə-zhɔ-zhe wə̀lə̀ : dwã ŋwɛ́nɛ́ nə̀ bànà, sə rə̀myɛ́ yi ní, à m’a pə còrhò-tum Babyəlɔnɛ yə né ne ; sə tənà y lyì bí byɛ̀bɛ́ bə̀ cɛ̀mɛ́ mɔ́ m’à n’ê kúrh bə̀ m’ê wɔ́wɔ́lɛ́ tənà y gakó wẽ́. ⁵³ Bá Babyəlɔnɛ zɛ̃̀ o vò dɛ̃̌ yi wə, bá ò gə lù kɔ̀nɔ́ dɛ̃̌dɛ̃̌ o m’o kə́kɛ́lɛ́ cɔ w lò wàr ń zwì ò wẽ́ myɛ, à m’a twĩ̀ lyì byɛ̀bɛ́ bə̀ n’ê cɔ̀ ò wẽ́ bə bú ǹdə́ wa, Wɔ́ Bə-zhɔ-zhe ń zɔ̀m rə̀myɛ́… ⁵⁴ Wìísi zɛ̃̀ Babyəlɔnɛ nɛ nɛ́ sə̀ n’ê wùrhə́, sə̀ zhe ; Kalədɛ tənà y cɔ̀ dɛ̃́dɛ̃́ kɔn lyɛ̃ cɛ nɛ. ⁵⁵ Bə̀ Bə-zhɔ-zhe cɔ̀ Babyəlɔnɛ, n ce wìísí sə̀ y’à n’ê wǔrh mó gu ; wìísí shɛ̀bɛ́ lyì bí byɛ̀bɛ́ bə̀ n’ê cɔ̀ mɔ́ y’à tú ǹdə wɔ́ nə-fɔ̀lò nɛ̃̌ mə̀ zɛ̃̀ mə̀ n’ê fùù ǹdə sɔ̀ ta mɔ́, y’à ce wìísí y’à zɛ̃̀ sə̀ n’ê wǔrh lòlò kə́ ń bə ń dõ zɔ̀mɛ̀ kùr nyɛ̌ mɔ́. ⁵⁶ Zhə̀n zhə̀nà, lò mó mɔ̀bɔ́ ń nə́ ń cɔ̀ mɔ́ tú n bú ǹdə́ Babyəlɔnɛ ; n zə Babyəlɔnɛ shə̀dɛ́ɛ́sɛ́ kàndar rɛ́, n zwẽ bə̀ twesé n ká. Bə̀ wɔ́ Bə-zhɔ-zhe ń nə́ ń càrh lò gakó ne ǹdə tum rí tɛ̀bɛ́ ǹ twĩ̀ mú ta, ń nə́ ń kwɛ̃̌ lò gakó ǹ kwǎndɛ́. ⁵⁷ À m’a ce Babyəlɔnɛ lyì-fwààlɛ́ ǹdə́ ò larma cìnə́ bé ǹdə́ yó-cìnə́ bé ǹdə́ ò búlə́ kàndar rɛ́ nyɔ̀ sɛ̃́ mə zə bɛ, bə̀ dɛ̀ɛ̀ dɛ̀ɛ̀ bə̀ t’â la bùrhù gaga yé, wɔ́ pyɔ̌ mɔ́, ń yil ré wɔ́ Bə-zhɔ-zhe ń cǐ jàn cìnə́ bé gakó mó ń zɔ̀m rə̀myɛ́. ⁵⁸ Nyǐ Bə-zhɔ-zhe mó mɔ̀bɔ́ ń cǐ jàn cìnə́ bé gakó mó wə̀lə̀ : Babyəlɔnɛ byílsí bə̀ lù nánkokwəəre sə̀ yə́-pǎlsɛ́ wà ǹdə sɔ́má ta mɔ́, b’a wǔr sə ló tɛ̃́, bə ji sə̀ bwə̀ə̀lé dẽ̌dẽ̌ mó myǐn ; Bə lwar bə̀ dwə́ né lyààrɛ́ nə̀ lyɛ̀ɛ̀ nə m’e twĩ̀ mú yàl nánfò, bə̀ tənèsé lyààrɛ́ sə lyɛ̀ɛ̀ mɔ́ wɔ́ myǐn ni sə pɔ wa. ⁵⁹ Zhidə pyɔ̌ Sədəcaasɛ pyɛ̀lɛ̀ byinə nə̀na nyǎn wẽ́, nyì-zwennə Zheremyi pɔ nyí Maasəya byǐ Nərəya byǐ Səraya nɛ, ǹdə́ Səraya yà ń tó Sədəcaasɛ nɛ ń la Babyəlɔnɛ. Rə̀myɛ́ yi ní ǹdə́ wɔ́ Səraya ń yà ń wɔ́ Sədəcaasɛ zulə́ jàà yìlnə mó. ⁶⁰ Zheremyi yà ń kɛ̃ zwini rí tɛ̀bɛ́ rə̀ la Babyəlɔnɛ zal mɔ́ gakó n ce sɛ́bɛ́ wẽ́ : È yà wɔ́ zɔ̀mà nɛ́ nyɛ̀bɛ́ nə̀ zɔ̀m nə lyɛ̃ mɔ́ gakó Babyəlɔnɛ yil mó. ⁶¹ Zheremyi zɛ̃̀ n zɔ̀m ǹdə́ Sərəya n wɔ̀ mɔ : Ǹ gə tú ǹ yú Babyəlɔnɛ ǹ zhɛ̀, sə́ ce jàn nɛ́ ń kàrmɔ zɔ̀mà nɛ́ nyɛ̀bɛ́ gakó, ⁶² ń byili ń wɔ̀ : Bə-zhɔ-zhe, wɔ́ ǹmyɛ́ cìcì ǹ zɔ̀m ń byili bə̀ jàà y kɛ̀bɛ́ m’a cɔ̀ ; numbyíní ráá vwǎm k’ê tâ la è wẽ́ yál yé, è m’a jǐrh èpòlò byinə nə̀ bə zhɔ̌ zhe yilə. ⁶³ Sə ǹ gə tú ǹ kàrmɔ sɛ́bɛ́ ǹ zhɛ̀, sə́ kwè nə́kulu ń lyẽ re ń dɛ̃ w ń vò ń ji ri Efəratɛ bù-fwɛ̀lɛ̀ y wẽ́, ⁶⁴ ń wɔ̀ : Wɔ́ èta Babyəlɔnɛ myɛ la zwini rí à la ce rə jòm ò yó w mó wẽ́ tu o mɔ́lɛ́ o mɛ̃ ò k’ô t’â la du yé, nyǐ dwə́ né wɔ́ nə́ cìn nə́ n’ê lyɛ̀ɛ̀ nánfò. Wɔ́ nyɔ̀nɔ̀ Zheremyi zɔ̀mà nɛ́ tú nə zhɛ̀ nɛ́.