¹ Sədəcaasɛ jǐrh pyɔ̌ ǹdə́ ń zhe byinə shí-èlyè ǹdə́ rə̀dù ; N jòm Zhərəzalɛm nɛ́ n jí pyɛ̀lè rɛ́, byinə shí ǹdə́ rə̀dù. Ń ná yà ń yíl Amətal ; Lyəbəna lyì bal Yərəməya bə̀kɔ́. ² Ń wɛ̀rhɛ́ lwɛlɛ Bə-zhɔ-zhe yé né ǹdə Zɔwacim gə́ yà ń wɛ̀rhɛ́ nɛ́ ma mɔ́ gakó. ³ Wɔ́ Bə-zhɔ-zhe lyim rí gə́ y’à zɛ̃̀ Zhərəzalɛm ǹdə́ Zhidə yó wə, ń nə́ ń yǎl n yǎrh nə̀ lyì bí tɛ̃́ ń yé né mó, è ce ywẽ̀ né nə̀myɛ́ mɔ́ yí. Rə̀myɛ́ yó né, Sədəcaasɛ zɛ̃̀ n nyáásɛ Bəbyəlɔnɛ pyɔ̌ mɔ́ yó. ⁴ Sədəcaasɛ pyɛ̀lɛ̀ jú byinə nə̀bɔ́ nyǎn rɛ́ cànsɛ̀ shí nyǎ y dɛ̃ rɛ́ yùwə̀, Babyəlɔnɛ pyɔ̌ Nabəkɔdɔnɔzɔɔrɛ zɔ ń shə̀dɛ́ɛ́sɛ́ gakó n bə̀ n jòm Zhərəzalɛm yé y wə, bə zɛ̃̀ bə pwà bo bə ló tɛ̃́ púl bə m’e kə́kɛ́lɛ́ jàà y gakó, bə̀ la m’e shèè gàà mɔ́. ⁵ Bə zwẽ cɔ w bə jòm kɔn m’e yí Sədəcaasɛ pyɛ̀lɛ̀ rɛ́ jú byinə shí ǹdə́ rə̀dù byin rí. ⁶ Byin rí rə̀myɛ́ cànsɛ sə̀na nyǎ y dwã nə̀bɔ́ y dɛ̃ rɛ́ ǹdə́ nɔrh nánfɔ̀lɔ̀ tu cɔ w wa, kùjú k’ê tɛ̀nɛ́ tənà lyì bí n’ê jí yé. ⁷ Rə̀myɛ́ yó né bə zɛ̃̀ wǔr cɔ w byílí y jàà èdù bə pyà bɔ̀l bə pə cɔ w shə̀dɛ́ɛ́sɛ́ nɛ sə tó jàà mɔ́ ǹdə́ cəcɛ̃ sə dùr sə vò sə tó sɔ́má kɛ̀bɛ́ è n’ê tó pyɔ̌ mɔ́ bɔ́ɔ́ w byílsí sə̀lyè bwə̌l mó w sə du. Rə̀myɛ́ yi ní, ǹdə́ Kalədɛ lyì bí kə́kɛ́lɛ́ cɔ wa. Lyì bí byɛ̀bɛ́ bə̀ dùr mó j’a kwè vɔlɔ w sɔ́má yá. ⁸ Kalədɛ lyì bí shə̀dɛ́ɛ́sɛ́ zɛ̃̀ sə jì Sədəcaasɛ sə zə Zhərəko vɔlɔ w wa ; ń shə̀dɛ́ɛ́sɛ́ gakó j’a dùr sə làà tɛ̃́ sə vò yé né gaga sə yẽ̌ mo. ⁹ Kalədɛ lyì bí shə̀dɛ́ɛ́sɛ́ zə Sədəcaasɛ, sə m’e vò Erəbəla, Amaarɛ tənà y w bə pə Babyəlɔnɛ pyɔ̌ mɔ́ nɛ ; wɔ́ gàà mɔ́ pyɔ̌ mɔ́ kɔ́ Sədəcaasɛ búrsí ní. ¹⁰ Babyəlɔnɛ pyɔ̌ mɔ́ zɛ̃̀ n ce bə zə Sədəcaasɛ byǎ bə zwə́l bə̀ da Sədəcaasɛ cìcì yé né ; n ce bə zə Zhidə yó-cìnə́ bé myɛ gakó bə súlí bə zwə́l Erəbəla nɛ́. ¹¹ Rə̀myɛ́ kwã nɛ́, n ce bə zə Sədəcaasɛ bə lə́ ń yírhə́ né, bə lyẽ mo ǹdə́ kàmmɔ nyáná ; Babyəlɔnɛ pyɔ̌ zɛ̃̀ n zə mɔ n mə n vò Babyəlɔnɛ, n ce mo byə̀nə́-jù w n mɛ̃ gàà mɔ́ n cì. ¹² Babyəlɔnɛ pyɔ̌ Nabəkɔdɔnɔzɔɔrɛ pyɛ̀lɛ̀ rɛ́ jú byinə shí ǹdə́ nə̀bɔ́ byin rí cànsɛ sə̀nu nyǎ y dwã shí dɛ̃ rɛ́ ; pyɔ̌ kɛ̀lɛ́ y yìlnə bé yó-cə́bal Nəbərarada tú Zhərəzalɛm. ¹³ N ji Yi jì y myǐn, n ji pyɔ̌ kɛ̀lɛ́ y myǐn, n ji Zhərəzalɛm lyì bí kǎlsɛ́ myǐn, n ji lyì-fwààlɛ́ jìsí myɛ myǐn n súlí. ¹⁴ Babyəlɔnɛ pyɔ̌ kɛ̀lɛ́ y yìlnə bé yó-cə́bal mɔ́ j’a pə nyí Kalədɛ lyì bí shə̀dɛ́ɛ́sɛ́ gakó ne sə wǔr byílsí bə̀ lù bə m’e kə́kɛ́lɛ́ Zhərəzalɛm mɔ́ gakó bə ló tɛ̃́. ¹⁵ Pyɔ̌ kɛ̀lɛ́ y yìlnə bé yó-cə́bal Nəbəzaradã mɔ́ já n zɛ̃̀ pwà ń dwí rí nə̀mwà bɛ́ jàlà ǹdə́ dwí rí lyì-fwààlɛ́ ǹdə́ dwí rí lyì bí byɛ̀bɛ́ bə̀ y’à dàl bə̀ ŋwɛ́nɛ́ cɔ w mɔ́, ǹdə́ dwí rí lyì bí byɛ̀bɛ́ bə̀ y’à dùr búlə́ né yé né bə zù Babyəlɔnɛ pyɔ̌ mɔ́ mɔ́, ǹdə́ lyì nánjə̀jóló. Nəbəzaradã jà n pwà lyì bí bə̀myɛ́ nyí rí n mə n vò yómre jè. ¹⁶ Wɔ́ tənà y nə̀mwà bɛ́ jàlà nɛ Nəbəzaradã yẽ̌ bə̀ la yə̀ tənà y də̀vɛ̃́ cèmé né cɛsɛ́ ǹdə́ ǹdə́ tə̀nà kálsɛ́ vwàlna. ¹⁷ Kalədɛ lyì bí j’a zɛ̃̀ bə mà Yi jì y kàmmɔ w yə né ǹdə́ vwə̃tur rí, zwěsé y’à zhǐ rə̀ yó mó, ǹdə́ Bə-zhɔ-zhe jì y kàmmɔ zhǎ y nánfwɛ̀lɛ̀ y bə bɔbwɛlɛ, bə pwà kàmmɔ w bə zhĩ bə m’e lyɛ̃ bə vò Babyəlɔnɛ. ¹⁸ Bə pwà tɔ̀mɔ̀ nə̀zhẽ̌ né ǹdə́ pyə́lə́ né ǹdə́ shǐsí ǹdə́ kǎ-zɔ̀má bɛ́ ǹdə́ kàmmɔ nə̀zhẽ̌ né bə̀ m’ê twĩ̀ Yi jì y tumə né mó myɛ bə m’e súlí bə lyɛ̃. ¹⁹ Pyɔ̌ mɔ́ kɛ̀lɛ́ yìlnə bé yó-cə́bal mɔ́ já n súlí n pwà nə̀zhẽ̌ né ǹdə́ nə̀zhĩ̌sí shɛ̀bɛ́ bə̀ n’ê ji wẽ̀ ré rə̀ lwẽ́ nányə̀nyɛ̀lɛ́ y myǐn sə̀ wẽ́ mó ǹdə́ jal-zɔ́rhɔ́ kǎzɔ̀má bɛ́ ǹdə́ tɔ̀mɔ̀ nə̀zhẽ̌ né ǹdə́ wẽ̀ ré bə̀ n’ê cĩ́ pàntámsɛ́ rə̀ yó mó ǹdə́ kǎzɔ̀má bɛ́ námpɔ́lsɛ́ ǹdə́ nə̀zhĩ̀-bwǎlsɛ́ bə̀ y’a zə sánə́má ráá sə̀bì-kùlì bə m’ê zùrhì mú gakó n mə n súlí n lyɛ̃. ²⁰ Pyɔ̌ Salɔmɔ yà ń ce bə zùrhì yə nə̀lyè ǹdə wɔ́ də̀-yə ta, ǹdə́ zhǎ nánfwɛ̀lɛ̀ èdù sásá, n ce bə zə kàmmɔ bə zùrhì nɛ̃ shí ǹdə́ nə̀lyé bə cĩ̀ tɛ̃́, wɔ́ wẽ̀ ré rə̀myɛ́ yó vwɛ̃tur rí y’à zhǐ ní. Nə̀zhẽ̌ né nyɛ̀bɛ́ bə̀ y’à zə kàmmɔ w bə zùrhì mú y’à nyɛ̌ vwə̀lé dɛ̃́dɛ̃́ kɔn lyɛ̃ cɛ nɛ, lòlò yə̀l dùmì rí rə̀myɛ́ mɔ́ gə́ mə̌ nɛ́ ń la byilu yé. ²¹ Yə né rə̀dù gakó yó dɛ̃̌ zhìyə́ y wɔ́ jə̀-tórhó yírhə́ shí ǹdə́ lyɛlɛ, rə̀ cã̌ mɔrhɔ e kə́kɛ́lɛ́ mɔ́, wɔ́ jə̀-tórhó yírhə́ shí ǹdə́ nə̀lyè ; yə né wun ní nyɛ̌ foo, nə̀ kwere ré wɔ́ ǹdə jə̀fɔ́lá nə̀na gə tɛ́rɛ́ dwã nɛ́ wàn nɛ́ ta. ²² Bə̀ y’à zɔ kàmmɔ bə wɛ̀rhɛ́ ku òdù ò zhǐ yə né yə́-pɛ̀lɛ́ wa, ò dɛ̃̌-zhìyə́ y wɔ́ jə̀-tórhó yírhə́ nə̀nu, bə zə wẽ̀ bə zɔ kàmmɔ ǹdə́ gərənajése bə m’ê kwɛrhɛ ku w bə kə́kɛ́lɛ́ ò gakó náàcɛ̀nɛ́. Wɔ́ èta bə̀ wɛ̀rhɛ́ yə né nə̀lyè y ga nɛ́. ²³ Gərənajé shí nə̀bɔ́ ǹdə́ shə̀ldù y’à ŋwɛ́nɛ́ ku w sarha nɛ́ rədù gakó nyí ni, gərənajésé shɛ̀bɛ́ bə̀ y’a m’ê kwɛrhɛ ku w náàcɛ̀nɛ́ y mɔ́ gakó y’à wɔ́ zɔ̌m. ²⁴ Babyəlɔnɛ pɔ̌ mɔ́ kɛ̀lɛ́ y yìlnə bé yó-cə́bal mɔ́ zɛ̃̀ n zə vwĩ̀-zwə́lnə náncɛ Səraya ǹdə́ Səfanya mɔ̀bɔ́ ń pú Səraya nɛ mɔ́, n súlí n zə Yi jì y étwí-ènyírí yìlnə bé bə̀tɔ̀. ²⁵ N zù cɔ w n zə ò lyì-fɔ̀lɔ̀ òdù ò wɔ́ shə̀dɛ́ɛ́sɛ yó-cə́bal, ń zə nunə bwàlpyɛ̀ bə̀ y’à ŋwɛ́nɛ́ pyɔ̌ mɔ́ cícírnə bé gùlú w wẽ́ ǹdə́ bə̀ y’à ŋwɛ́nɛ́ cɔ w wa ; ǹdə́ shə̀dɛ́ɛ́sɛ́ yó-cə́bal mɔ́ sá-kanna mɔ́ ń nə́ ń kɛ̃ tənà y lyì bí ń ce shə̀dáárɛ́ wẽ́ mó, n zə tənà y núnə shə́-shə̀dù bə̀myɛ y’à tú bə̀ ŋwɛ́nɛ́ cɔ w wa. ²⁶ Nəbəzaradã zə bɛ n mə n vò Erəbəla, n pə Bəbyəlɔnɛ pyɔ̌ mɔ́. ²⁷ Babyəlɔnɛ pyɔ̌ mɔ́ já n ce bə mà bɛ bə gu bi Erəbəla nɛ́, Amaasɛ tənà y wa. Wɔ́ èta kɔn tó né bə m’e pwà Zhidə lyì bí bə m’e vò yómə́ jè y mó. ²⁸ Nyǐ dwí rí lyì bí byɛ̀bɛ́ Nabəkɔdɔnɔzɔɔrɛ pwà n mə n vò Yómdé jè y mó. Rə̀myɛ́ yàl ń pyɛ̀lɛ̀ jú byinə nyàlpyɛ̀ byin rí nyǎn rɛ́ yi ní. Lyì bí y’à wɔ́ nunə mɔ̀ɔ̀rhɛ rə̀tɔ̀ ǹdə́ shí-èlyè ǹdə́ bə̀tɔ̀. ²⁹ Nabəkɔdɔnɔzɔɔrɛ pyɛ̀lɛ̀ rɛ́ jú byinə shí ǹdə́ lyɛlɛ byin rí, byin rí rə̀myɛ́ wẽ́ è yàl nunə zɔ̃̌-lyɛlɛ ǹdə́ shə́-ètɔ̀ ǹdə́ bə̀lyè ń pwà Zhərəzalɛm nɛ́. ³⁰ Nabəkɔdɔnɔzɔɔrɛ byɛ̀lɛ̀ rɛ́ jú byinə shí-elyè ǹdə́ nə̀tɔ̀ byin rí, pyɔ̌ mɔ́ yìlnə bé yó-cə́bal Nəbəzaradã mɔ́, zɛ̃̀ n tà-kwã n bə̀ n pwà Zhwǐfubá zɔ̃̌-nyàlpyɛ̀ ǹdə́ shə́-èna n mə n vò. Lyì byɛ̀bɛ́ gakó bə̀ y’à zɔ bə m’ê vò mó mù dwã nɛ wɔ́ nunə mɔ̀ɔ̀rhɛ rə̀na ǹdə́ zɔ̃̌-nyə̀ldù. ³¹ Bə̀ gə́ zɔ pyɔ̌ Zhɔwacim bə m’e vò yómə́ jè yə ; è byinə shə́-ètɔ̀ ǹdə́ nyàlpyɛ̀ byin rí gə́ tú e yí ; byin rí rə̀myɛ́ wẽ́ Evyil-Mərədaakɛ jǐrh babyəlɔnɛ pyɔ̌. Byin rí rə̀myɛ́ mɔ́ cànsɛ shí ǹdə́ sə̀lyè nyǎ y dwã shí-èlyè ǹdə́ nyàlpyɛ̀ dɛ̃ rɛ́, ń dùr Zhidə pyɔ̌ Zhɔwakɛ̃ nɔ̀nɔ̀, n zhẽ̌ ń yó dɛ̃̌ ; n ce bə vùr mo byə̀nə́-jì y wə ; ń wɛ̀rhɛ́ rə̀myɛ, ń pyɛ̀lɛ̀ rɛ́ jú byin nã́yéé ré wẽ́. ³² N zə mɔ ǹdə́ wu-bɔ̀nɔ̀, n zhẽ̌ ń pyɛ̀lɛ̀ rɛ́ yó dẽ̌ rə dwene pyǎ bɛ́ dwã bɛ bə̀myɛ́ ǹdə́ ńmyɛ́ y’à tó dwã bə̀ ŋwɛ́nɛ́ Babyəlɔnɛ nɛ́ mɔ́. ³³ N ce bə lyə́r ń byə̀nə́ jì kàmə̀zwǐsi. Zhɔwacim jà n zɛ̃̀ ń nə́ ń tó Babyəlɔnɛ pyɔ̌ nɛ ń nə́ ń jí twéé gakó kɔn m’e yí ń cu. ³⁴ Babyəlɔnɛ pyɔ̌ mɔ́ já ń nə́ ń nyǐ kɔn dɛ̀bɛ́ ń zhe rə̀ tum dɛ̃ gakó mó yò, twéé twéé gakó, kɔn j’a m’ê yí ń cu dɛ̃.